Ինչպես տեղեկացնում է Daily Mail պարբերականը, այն առանձնատունը, որտեղ Քեմբրիջի դուքսն ու դքսուհին անց են կացրել իրենց ամուսնական կյանքի առաջին 2 տարին, տրվում է վարձով: Առանձնատունը, որն ունի 4 ննջասենյակ՝ յուրաքանչյուրը երկտեղանի մահճակալով, սեփական լողափ և շքեղ բնապատկերներ, գտնվում է Ուելսի Անգլսի կղզում: Դուքս Ուիլյամն այն վարձակալում էր ամսեկան 1200 ԱՄՆ դոլարով, սակայն առանձնատան սեփականատերերը համոզված են, որ այժմ տան վարձակալության գինն անհամեմատ կաճի: Բանն այն է, որ Ուիլյամն ու Քեյթը խոստովանել են, որ իրենց չափազանց դուր է եկել առանձնատունը և ցանկություն են հայտնել երբեմն-երբեմն այցելել այնտեղ: Հետևաբար, նոր վարձակալները բացառիկ հնարավորություն կստանան հանդիպել նրանց հետ: Մինչ օրս տեղական ԶԼՄ-ները թագավորական ընտանիքի անվտանգությունից ելնելով ոչինչ չեն հաղորդել առանձնատան մասին, սակայն այսօր արդեն պարզ է, որ այն ունի 4 ննջասենյակ, հյուրասենյակ բուխարիով, խոհանոց, հանդերձարան և տնտեսական սենյակ: Վերջերս դուքս Ուիլյամը ափսոսանքով հայտարարել է, որ պատրաստվում է ավարտել զինվորական ծառայությունը և ընտանիքի հետ հեռանալ Ուելսից: Մոտ ապագայում թագավորական ընտանիքը նախատեսում է տեղափոխվել լոնդոնյան Քենսինգթոնյան դղյակ, որի մի թևը 1.6 մլն ԱՄՆ դոլար բյուջեյով վերակառուցվել է վերջերս: Նշենք, որ մինչը փոքրիկ արքայազնի ծնունդը ամուսնական զույգն ապրում էր այս առանձնատանը միայնակ: Փոքրիկ Ջորջի ծննդից հետո այստեղ է տեղափոխվել նաև Քեյթի մայրը՝ Քերոլ Միդլթոնը, որպեսզի օգնի խնամել փոքրիկին:
Այսօր Մոսկվայի Տրիֆոնովի անվան փողոցում տեղի ունեցավ ՀՀ տարածքից դուրս գտնվող Հայ առաքելական եկեղեցու ամենամեծ շինության՝ Հայ Առաքելական եկեղեցու Ռուսաստանի և Նոր Նախիջևանի թեմի վանական համալիրի բացման հանդիսավոր արարողությունը: Եկեղեցու բացման հանդիսավոր արարողությանը գլխավորում էր Հայ Առաքելական եկեղեցու առաջնորդ Գարեգին II-ը: Բացման հանդիսավոր արարողությանը ներկա էր երեկ Մոսկվա ժամանած ՀՀ նախագահ Սերժ Սարգսյանը, ԼՂՀ-ի նախագահ Բակո Սահակյանը, Մոսկվայի և Համայն ռուսիո պատրիարք Նորին Սրբություն Կիրիլը և այլ բարձրաստիճան հյուրեր Ռուսաստանից և Հայաստանից: Հայ Առաքելական եկեղեցու վանական համալիրի հիմնաքարի օծման արարողությունը տեղի է ունեցել 2004թ-ին Մոսկվայում: Տրիֆոնովի փողոցի վրա գտնվող վանքի հիմքում խորհրդանշական պարկուճը տեղադրել էր Մոսկվայի և Համայն ռուսիո հանգուցյալ պատրիարք Ալեքսի II-ն ու Գարեգին II-ը: Շինարարական աշխատանքները սկսվել են 2006թ-ին, իսկ Սուրբ խաչի օծման արարողությունը տեղի է ունեցել 2011թ-ին: Ինչպես նախկինում տեղեկացրել էինք, շինարարական աշխատանքերի ավարտը նախատեսված էր 2012 թ-ի վերջին: Եկեղեցու ճարտարապետն է Արտակ Ղուլյանը, իսկ համալիրը կառուցվել է բացառապես հայ և ռուս մեկենասների նվիրատվությունների շնորհիվ: Եկեղեցական համալիրի ընդհանուր մակերեսը կազմում է 13.2 հազար քառակուսի մետր: Տաճարի բարձրությունը 50 մետր է, իսկ գմբեթի տրամագիծը 21 մետր: Գլխավոր խաչի բարձրությունը կազմում է 7 մետր, իսկ մյուս 5 խաչերի բարձրությունը կազմում է 4 - ական մետր: Եկեղեցու պատերի վրա ընդհանուր առմամբ պատկերված է 72 խաչ: Եկեղեցական համալիրը ներառում է մայր տաճար, «Սուրբ Խաչ» փոքրիկ եկեղեցի, թեմի առաջնորդի նստավայր, կրթամշակութային և ադմինիստրատիվ մասնաճյուղեր, հանդիսությունների սրահ, թանգարան և 200 մեքենաների համար նախատեսված կայանատեղի: Ի դեպ, նմանատիպ Հայ Առաքելական եկեղեցու համալիր, որը ներառում է մայր տաճար և կրթական կենտրոն, բացի Մայր Աթոռ Սուրբ Էջմիածնից, աշխարհի որև է այլ վայրում չկա:
Google ընկերությունը վարձակալության երկարաժամկետ համաձայնագիր է ստորագրել: Վերջինիս համաձայն՝ ընկերությունը վարձակալում և գրասենյակի է ձևափոխում կալիֆորնիական Մաունթին Վյու քաղաքում գտնվող «Մայֆիլդ Մոլ» (Mayfield Mall) առևտրի կենտրոնը: Ինչպես տեղեկացնում է Bloomberg ընկերությունը, այս առևտրի կենտրոնն իր պատմության ընթացքում երկրորդ անգամ է գրասենյակի վերածվում: Ընթացիկ տարվա ընթացքում «Սիլիկոնային հովտում» գրանցված տարվա ռեկորդային համաձայնագիրը ստորագրվել է առևտրի կենտրոնը համատեղ տնօրինող «Ռոքվուդ Քեփիթալ» (Rockwood Capital) և «Ֆոր Քորներս Փրոփերթիս» (Four Corners properties) ընկերությունների և Google կորպորացիայի միջև: Ի դեպ, վարձակալության ժամկետների և պայմանների մասին կողմերը դեռևս լռում են: Ըստ նախնական տվյալների՝ առևտրի կենտրոնի վերանորոգման և ձևափոխման աշխատանքները կավարտվեն 2014 թ-ին, որոնց արդյունքում 11.2 հեկտար տարածքում կտեղակայվի 46.5 հազար քառակուսի մետր ընդհանուր մակերեսով նոր գրասենյակային համալիր, որը կլինի Google–ի Մաունթին Վյուի գլխավոր գրասենյակի հարևանությամբ: 1966 թ-ին բացված «Մայֆիլդ Մոլ» առևտրի կենտրոնն առաջին փակ տանիքով և օդափոխության համակարգով համալրված առևտրային համալիրն էր Կալիֆորնիայում: Այնուհետև 1983 թ-ին առևտրի կենտրոնը փակվել է, և 3 տարի անց այն ձեռք է բերել «Հյուլեթ-Փաքարդ» (Hewlett-Packard) ընկերությունը, որն էլ առաջին անգամ առևտրային համալիրը վերածել է գրասենյակի: Այնուհետև 2003 թ-ին այս ընկերությունը հեռացել է առևտրի կենտրոնից՝ այն թողնելով լքված վիճակում: «Ռոքվուդ Քեփիթալ» և «Ֆոր Քորներս Փրոփերթիս» ընկերությունները առևտրային համալիրը մոտ 90 մլն ԱՄՆ դոլարով գնել են 2012 թ-ին և այն վերանվանել «Սան Անտոնիոյի կայարան» (San Antonio Station):
Ամերիկացի միլիարդատեր Դոնալդ Թրամփը հանրությանն է ներկայացրել Վաշինգտոնի նախկին փոստի պատմական շենքի (Old Post Office Pavilion)` էլիտար հյուրանոցի ձևափոխման նախագիծը: Ինչպես տեղեկացնում է USD Today պարբերականը, նախագծի ներկայացման ժամանակ գործարարը խոստացել է կառուցել քաղաքի լավագույն հյուրանոցը: Նախագծի իրականացման համար «Թրամփ Կազմակերպությունը» (Trump Organization) մտադիր է ներդնել մոտ 200 մլն ԱՄՆ դոլար: Ընդհանուր առմամբ հյուրանոցում կլինեն 56 քառակուսի մետր մակերեսով 270 համարներ: Սակայն հյուրանոցի զարդը կհամարվեն 280 քառակուսի մետր մակերեսով 2 նախագահական սենյակներ, որոնք կունենան բուխարի, սաունա, անձնական վերելակ և զրահապատ պատուհաններ: Բացի վերոնշյալը հյուրանոցում կլինի հանդիսությունների սրահ 1200 քառակուսի մետր մակերեսով, 9 հարկանի ատրիում շատրվաններով, գրադարան, ռեստորաններ և խանութներ: Հյուրանոցի ներքին հարդարումը կլինի շքեղ, կահույքները պատրաստված թանկարժեք փայտերից: Վերաձևափոխման նախագծի սկիզբը նախատեսված է 2014 թ-ի գարնանը, իսկ ավարտը՝ 2015 թ-ի վերջին: Նախագծի իրականացմանը ակտիվ մասնակցում է Թրամփի աղջիկը՝ Իվանկան: Վաշինգտոնի փոստի պատմական շենքը կառուցվել է 1899 թ-ին և գտնվում է Սպիտակ տան և Կապիտոլիի միջնամասում: Համալիրը մի քանի անգամ փորձել են ապամոնտաժել, իսկ ներկա պահին այնտեղ գործում են միայն մի քանի խանութներ և արագ սննդի կետեր: Ընթացիկ տարվա հունիսին Թրամփը ԱՄՆ կառավարությունից 60 տարի ժամկետով վարձակալել է շենքը՝ 250 հազար ԱՄՆ դոլար ամսեկան վճարով: Համաձայնագրում հնարավորություն է տրված 2 անգամ 20 տարով երկարաձգել վարձակալությունը:
Անցած տարվա սկզբին «ՋիԴիԷս Արքիթեքթս» (GDS Architects) ճարտարապետական ընկերության պաշտոնական կայքը հայտարարել էր, որ պատրաստվում է նախագծել աշխարհի առաջին անտեսանելի աշտարակը: Ի դեպ, «ՋիԴիԷս Արքիթեքթս» ընկերության այս նախագիծը լավագույն աշտարակի մրցույթում հաղթել էր դեռևս 2008 թ-ին, և միայն 5 տարի անց ընկերությունը հնարավորություն է ստանում այն կյանքի կոչել: Այսօր արդեն նրանք ունեն շինարարությունը սկսելու Հարավային Կորեայի մայրաքաղաք Սեուլի իշխանությունների թույլատվությունը: 450 մետր բարձրությամբ «Անվերջության աշտարակը» (Infinity Tower) լինելու է անտեսանելի: Ինչպես պնդում են նախագծի հեղինակները, օպտիկական պատրանքների և լուսավորության շնորհիվ, այս աշտարակը հայտնվելու և անհայտանալու է երկնքում: Նոր յուրօրինակ աշտարակը կառուցվելու է Ինչհոն միջազգային օդանավակայանի (Incheon International Airport) հարևանությամբ Յոնսան միջազգային գործարար շրջանի (Yongsan International Business District) սրտում: Կառուցապատող ընկերության համոզմամբ՝ «Անվերջության աշտարակը» դառնալու է շրջանի խորհրդանիշը և գլխավոր տեսարժան վայրը հյուրերի ու զբոսաշրջիկների համար: Հիմնականում դիտահարթակ աշտարակն ունենալու է ժամանցային բնույթ՝ այստեղ տեղակայվելու են դիտահարթակներ, հարսանյաց սրահներ, թատրոններ, ռեստորաններ, ջրային կենտրոններ, բնապատկերներով զարդարված այգիներ և այլն:
