Այս ամենը կարող է հնչել որպես ապրիլմեկյան կատակ, սակայն Չինաստանը պատրաստվում է արագընթաց երկաթուղի կառուցել Չինաստանից դեպի ԱՄՆ: Մի շարք ԶԼՄ-ների տվյալներով, Չինաստանը պատրաստվում է կառուցել 12870 կիլոմետր երկարությամբ արագընթաց երկաթգիծ: Սա իհարկե իրական է հնչում: Անհավանականն ու զարմանալին այն է, որ այս երկաթգիծը, իր մեջ ներառելով 200 կիլոմետր երկարությամբ ստորջրյա թունել Բերինգի նեղուցի հատվածում, պետք է իրար միացնի Չինաստանը, Ռուսաստանը, Ամերիկան և Կանադան: Ինչպես հաղորդում է չինական կառավարական Beijing Times պարբերականը, Ռուսաստանը պատրաստ է միանալ այս նախագծին: Չնայած այն բանին, որ բավականին հաճելի է հնչում այն հնարավոր տարբերակը, որ կարելի է 2 օրում Չինաստանից հասնել ԱՄՆ առանց օդանավակայաններում երկար սպասումների, ամբողջ աշխարհի ճարտարագետները թերահավատորեն են տրամադրված նախագծի իրականացմանը: Ինչպես նշում է Չինաստանի Ճարտարագիտական ակադեմիայի անդամներից մեկը, Չինաստանն ուսումնասիրում է այնպիսի երթուղի, որը կսկսվի երկրի հյուսիս-արևելյան շրջանից, կանցնի արևելյան Սիբիրով, այնուհետև Ալյասկայի հատվածում 200 կիլոմետր երկարությամբ ստորջրյա թունելով կհատի Բերինգի նեղուցը: Ամեն ինչ հավանական է հնչում մինչև համեմատությունը. վերոնշյալ թունելը քառակի անգամ երկար է «Եվրոթունելից» (The Eurotunnel), որի երկարությունը կազմում է 51 կիլոմետր, իսկ Ճապոնիայում գտնվող ներկայիս տիտղոսակիր աշխարհի ամենաերկար ստորջրյա «Սեյկան» թունելի (Seikan Tunnel) երկարությունը կազմում է 53,85 կիլոմետր, որի ստորջրյա հատվածը կազմում է 23.3 կիլոմետր: Ինչպես նշում է The Guardian պարբերականը, վերոնշյալ 2 թունելներն էլ համարվում է յուրօրինակ սխրանքներ տեխնիկայի ոլորտում, և 2 շինարարության մեջ էլ աշխարհի 4 կարևոր կառավարությունները մասնակցություն չեն ունեցել, իսկ նրանցից 2-ը, մեղմ ասած, իրար բոլորովին չեն համակրում: Նշենք նաև, որ չինական կառավարական Beijing Times պարբերականը նշում է միայն Ռուսաստանի մասնակցության պատրաստակամության մասին, այն ինչ մյուս 2 պետությունների դիրքորոշումները անհայտ են: Ինչպես նշում է մեկ այլ հեղինակավոր պարբերական The Washington Post-ը, չնայած այսօր մենք կասկածում ենք այս նախագծի իրականություն դառնալու շուրջ, այնուամենայնիվ արդարության համար պետք է նշել, որ Չինաստանը այն միակ երկիրն է, որն ի վիճակի է նմանատիպ նախագիծ իրականացնել: Նշենք, որ վերջին 5 տարիների ընթացքում Չինաստանը տասնյակ հազարավոր կիլոմետրեր արագընթաց երկաթգծեր և բազմաթիվ եզակի տրանսպորտային կառույցներ է կառուցել:

Բրիտանական Yacht Island Design ընկերության նախագծողները ներկայացրել են «Մոնակոյի փողոցներ» անվանումը ստացած նոր յուրօրինակ զբոսանավի նախագիծը: Ամբիցիոզ նախագծի ընդհանուր բյուջեն կազմում է 402 մլն ԱՄՆ դոլար: Ըստ նախնական տվյալների` նորագույն զբոսանավի տախտակամածին կվերարտադրվի իրական Մոնակոյի մի հատվածը, մասնավորապես այնտեղ կկառուցվի «Արքայազնի պալատը», «Հերկուլեսի նավահանգիստը», «Լոյուս» և «Փարիզի» հյուրանոցները, ինչպես նաև «Լա Ռասկասե խաղատունը»: Այս բոլոր կառույցներն իրար կմիանան «Ֆորմուլա 1» հիշեցնող երթուղով: Իհարկե հույս ունենալ, որ տախտակամածին կիրականացվի իրական «Ֆորմուլա 1»-ի մրցավազք, փոքր ինչ ծիծաղելի է: Բանն այն է, որ այս երթուղին լինելու է լոկ կրկնօրինակ: Սակայն ինչպես պնդում են նախագծի հեղինակները, այն միանգամայն հարմար կլինի քարթինգի մրցույթների համար: Բացի Մոնակոյի ճարտարապետությունը վերարտադրող կառույցներից, տախտակամածին կկառուցվեն ուղղաթիռային հրապարակ, ջակուզի, ինչպես նաև մի քանի լողավազաններ: «Մոնակոյի փողոցներ» զբոսանավը կունենա 155 մետր երկարություն և կկարողանա հյուրընկալել 16 հյուրերի և անձնակազմի 70 անդամների: Նախագծի մասին առաջին անգամ բարձրաձայնվել է 2011 թ-ին, սակայն բուռն ֆինանսական ճգնաժամի տարիներին նմանօրինակ զբոսանավի պոտենցիալ գնորդ գտնելը դժվարին էր: Ինչպես նշել է նախագծի համահեղինակներից Ռոբ Մաքֆերսոնը Daily Mail պարբերականին տրված հարցազրույցում, նախագծի վրա աշխատել են շատ մասնագետներ և հանրությանը ներկայացնելուց հետո բազմաթիվ մարդիկ արդեն ցանկություն են հայտնել լինել այդ զբոսանավի տախտակամածին:

2 տարի տևած նախագծման և շինարարական աշխատանքներից հետո ճարտարապետական «ՅուԷն Ստուդիո» (UNStudio) ընկերությունը վերջնականապես հանրությանն է ներկայացրել Քութայիսի նոր օդանավակայանը: Օդանավակայանը փաստացիորեն գործում է անցած տարվա սեպտեմբերից, սակայն շինարարական աշխատանքները վերջնականապես ավարտվել են այս ամիս: Նոր օդանավակայանը կառուցված է նորարական և արդիական մեթոդներով, այնտեղ տեղադրված են մի շարք «կանաչ» տեխնոլոգիաներ: Համաձայն կանխատեսումների` մոտ ապագայում Քութայիսի օդանավակայանը դառնալու է Վրաստանի հիմնական միջազգային դարպասը, որը 2014-15 թթ-ից կարողանալու է սպասարկել մինչև միլիոն ուղևորի: Ճարտարապետները նախագծել են օդանավակայանի գլխավոր տերմինալն այնպես, որ այստեղ գերիշխի բաց տարածությունը և լույսը: Նմանօրինակ տեսք տերմինալին հաղորդում է բարձր, թափանցիկ և ալիքաձև տանիքը, որը յուրօրինակ պաշտպանիչ անձրևանոց է հանդիսանում տերմինալի համար: Օդանավակայանի տերմինալում այցելուների համար կա սրճարան և պատկերասրահ: Քութայիսի միջազգային օդանավակայանը կենտրոնական տերմինալից բացի ունի նաև 55 մետր բարձրությամբ «Բաբախող աշտարակ», որն օդանավակայանի համար յուրօրինակ փարոս է հանդիսանում: Ամբողջ աշտարակը պատված է լուսադիոդային լամպերով, որոնք քամու ուժգնության փոփոխությանը զուգահեռ փոխում են իրենց գույնը ստեղծելով յուրօրինակ տեսողական պատկեր գիշերվա մթում: Ինչպես նշել ենք, օդանավակայանում օգտագործված են մի շարք «կանաչ» տեխնոլոգիաներ: Օդանավակայանի հիմքում գտնվող ջրի ամբարը օգտագործվել է «ցնցուղային լողավազաններ» ստեղծելու համար, որոնց շնորհիվ ջուրը խողովակների միջոցով հոսում է դեպի տերմինալի մի քանի հարկերը և ապահովում հարմարվետ ջերմաստիճան ջեռուցման և հովացման համար: Տերմինալի հարավային և հարավ-արևմտյան հատվածում թեք և ալիքաձև տանիքը ապահովում է ստվեր, և նվազեցնում է տերմինալի վրա ազդող ջերմությունը: Օդափոխության ցածր ճնշման հիբրիդային համակարգը ապահովում է էներգիայի խնայողությունը: Բացի վերոնշյալից, տերմիալի ստորգետնյա հատվածում տեղադրված է նաև օգտագործված ջրերի հավաքման, վերամշակման և կրկնօգտագործման համակարգ:

Սաուդյան Արաբիան ընտրել է երեք միջազգային կոնսորցիումներ, որոնք պետք է երկրի մայրաքաղաք Էր-Ռիյադում մետրո կառուցեն: Գործարքների գումարը կազմում է 22.5 մլրդ ԱՄՆ դոլար: Ըստ նախնական տվյալների՝ մետրոյի երկու գիծը կկառուցի ամերիկյան «Բեչթել» (Bechtel) ընկերությունը: Այս ընկերության կատարվելիք աշխատանքների բաժինը կկազմի 9.45 մլրդ ԱՄՆ դոլար: Իսպանական «ԷֆՍիՍի» ընկերությունը (FCC) կկառուցի 7.82 մլրդ ԱՄՆ դոլար արժողությամբ մյուս երեք գծերը, իսկ վերջին գիծը կկառուցի իտալական «Անսալդո» (Ansaldo) ընկերությունը և վերջինիս գործընկերները՝ 5.21 մլրդ ԱՄՆ դոլար արժողությամբ: Մետրոյի նախագծման աշխատանքները կսկսվեն անմիջապես, իսկ 2014 թ-ի առաջին եռամսյակում կսկսվեն և 2019 թ-ին կավարտվեն շինարարական աշխատանքները: Սաուդյան Արաբիայի մայրաքաղաք Էր-Ռիադում կառուցվելիք մետրոն, որը ստացել է «Անապատի հրաշք» (Miracle of the Desert) անվանումը, կունենա 6 գիծ, 176 կիլոմետր ընդհանուր երկարություն և 94 կայարան, որոնցից 85–ը կլինեն մետրոյի հիմնական կայարանները, 4–ը տեղափոխությունների կայարաններ, իսկ մնացած 5-ը ավտոմեքենաների կայանատեղիներով: Երկաթուղային գծերը կանցնեն քաղաքի այն շրջաններով, որտեղ տեղակայված են կառավարական շենքերը, առևտրային, բժշկական և կրթական կենտրոնները, համալսարանները: Մետրոն անմիջապես կկապվի նաև արքա Խալիդի անվան միջազգային օդանավակայանի և քաղաքի առավել խիտ բնակեցված շրջանների հետ: Էլեկտրագնացքները, որոնք կղեկավարվեն համակարգչով, այլ ոչ թե վարորդի օգնությամբ, բոլոր 6 գծերում էլ կերթևեկեն 40 կլիոմետր ժամ արագությամբ: Բոլոր կայարանները և գնացքները կապահովվեն օդորակիչներով: Նշենք, որ դեռևս այս տարվա մայիսին երկրի կառավարությունը հասարակությանն էր ներկայացրել այն ընկերություններին և ճարտարապետներին, ովքեր պիտի նախագծեին մետրոյի հիմնական կայարանները: Մասնավորապես՝ արքա Աբդուլայի անունը կրող ֆինանսական կենտրոնում աշխարհի մետրոյի ամենաթանկ կայարաններից մեկը նախագծում է բրիտանացի ճարտարապետ Զահա Հադիդը, մետրոյի «Կենտրոնական կայարանը» կնախագծի նորվեգիական «Սնոհեթթա» (Snohetta) ընկերությունը, իսկ գերմանական «Գերբեր Արքիթեքթեն» (Gerber Architekten) ընկերությունը՝ է Օլայա (Olaya) շրջանի հանգույցը:

Իրաքյան ծագումով աշխարհահռչակ բրիտանացի ճարտարապետ Զահա Հադիդը կիրականացնի աշխարհի ամենաշքեղ մետրոպոլիտենի կայարանի նախագծի իրականացումը, որը կկառուցվի Սաուդյան Արաբիայի մայրաքաղաք Էր-Ռիադում: Ըստ նախնական տվյալների՝ թագավորի անունը կրող ֆինանսական թաղամասում գտնվող համանուն (King Abdullah Financial District (KAFD) Metro Station) կայարանի ընդհանուր մակերեսը կկազմի 20,434 հազար քառակուսի մետր: Նախատեսվում է, որ նորակառույց ենթակառուցվածքը կհամապատասխանի իր թագավորական տիտղոսին և կդառնա ամենաշքեղն ու թանկն աշխարհում՝ մարմարե հատակներով և ոսկեզոծ պատերով: Նշենք նաև, որ Էր-Ռիադի 6 գծերից բաղկացած նոր մետրոպոլիտենի շինարարությունը սկսվել է նախորդ տարի և թագավորի հրամանով պետք է ավարտվի չորս տարուց: Մետրոպոլիտենի կայարանի գլխավոր ճարտարապետի խոսքերով՝ նախագծի վրա աշխատելիս նա ոգեշնչվել է Սաուդյան Արաբիայի անապատների ավազաթմբերով, որոնց սահուն եզրագծերն էլ փորձել է արտացոլել իր նախագծում: Համաձայն ներկայացված նախագծի՝ մետրոպոլիտենի մուտքը նույնպես կտարբերվի ավանդական նախասրահից. առջևում կկառուցվի յուրօրինակ մի շինություն, որտեղ կտեղակայվեն ավտոկայանատեղին և առևտրային համալիրը: Զահա Հադիդը նպատակ ունի լուծել բավականին լուրջ խնդիրներ՝ առավելագույնը օգտագործել արևի լույսը և միաժամանակ պաշտպանել տարածքը աշխարհի ամենակիզիչ արևի ճառագայթներից, իսկ ճարտարագետների օգնությամբ նախագծել ամենակատարելագործված օդափոխության և հովացման համակարգը: