Բարձրահարկ շենքերի և քաղաքային միջավայրի միջազգային Խորհուրդը (The Council on Tall Buildings and Urban Habitat- CTBUH) ամեն տարի անցկացնում է աշխարհի «Լավագույն բարձրահարկ շենք» մրցույթը: Նախապես ընտրվում են 4 աշխարհագրական տարածաշրջաններից լավագույնները, իսկ հետագայում նրանցից ամենալավը արժանանում է տարվա լավագույնի տիտղոսին: Այս տարվա աշխարհի «լավագույն բարձրահարկ շինություն» անվանակարգի հաղթողի անունը կհայտարարվի հոկտեմբերի 27-ին Չիկագոյում կայանալիք հանդիսավոր արարողության ժամանակ, իսկ այժմ հայտնի են դարձել տարածաշրջանային 4 հաղթողները, որոնք էլ հավակնում են տարվա «լավագույն բարձրահարկ շենք» տիտղոսին: Այս մասին հաղորդում է խորհրդի պաշտոնական կայք ctbuh.org-ը: Ինչպես ներկայացված է խորհրդի պաշտոնական կայքում, տարվա «լավագույն բարձրահարկ շինություն» տիտղոսի հավակնորդներն են, իրենց տարածաշրջաններում արդեն լավագույնը ճանաչված Նյու Յորք բայ Գեհրի (New-York by Gehry) երկնաքերը Հյուսիսային և Հարավային Ամերիկա տարածաշրջանից, Ինդեքս (The Index) աշտարակը Մերձավոր Արևելք և Աֆրիկա տարածաշրջանից, Ասիա և Ավստրալիա տարածաշրջանից Գուանչժոուի Միջազգային ֆինանսական կենտրոնը (Guangzhou International Finance Center) և Եվրոպայից KFW Վեսթարկադե (KFW Westarkade) աշտարակը: Նյու Յորք բայ Գեհրի երկնաքերի պատվիրատուն Ֆորեսթ Սիթի Ռաթներ (Forest City Ratner) ընկերությունն է, որը կառույցի շինարարությունն ավարտել է 2011 թ-ի ապրիլին: 76 հարկանի բնակելի աշտարակի ճարտարապետն է Ֆրենկ Գեհրին Նյու Յորքյան Գեհրի Արքիթեքթս (Gehry Architects New York) ընկերությունից: 102 հազար քառակուսի մետր ընդհանուր մակերեսով աշտարակի բարձրությունը 265 մետր է, իսկ նախագիծն իրականություն դարձնելու համար պատվիրատուն ծախսել է ավելի քան 174 մլն ԱՄՆ դոլար: Գուանչժոու քաղաքում է գտնվում Ասիա և Ավստրալիա տարածաշրջանի հաղթող Գուանչժոուի Միջազգային ֆինասական կենտրոնը: 103 հարկանի, 440 մետր բարձրությամբ երկնաքերը աշխարհի ամենաբարձր աշտարակների ցուցակում զբաղեցնում է 9-րդ հորիզոնականը: Նախագծի գլխավոր պատվիրատուն Յու Քսյու Գրուփն է (Yue Xiu Group), իսկ գլխավոր ճարտարապետը Քրիս Ուիլկինսոնի Ուիլկինսոն Եյր Արքիթեքս (Wilkinson Eyre Architects) ընկերությունը: 2010 թ-ին շահագործման հանձնված՝ 250 հազար քառակուսի մետր ընդհանուր մակերեսով շինության ընդհանուր բյուջեն կազմել է 410 մլն ԱՄՆ դոլար: Շինարարության գլխավոր կապալառուի դերը ստանձնել են 2 ընկերություններ՝ Չինաստանի պետական ճարտարագիտա-շինարարական կորպորացիա ՍՊԸ (China State Construction Engineering Corporation LTD) և Գուանժուի քաղաքաշինական գրուփ ՍՊԸ (Guanzhou Municipal Construction Group CO LTD) ընկերությունները: Եվրոպական տարածաշրջանի հաղթողի տիտղոսը ստանձնել է 2010թ-ին շահագործման հանձնված KFW Վեսթարկադե աշտարակը Ֆրանֆուրտում: 14 հարկանի աշտարակի գլխավոր պատվիրատուն է KFW Բանքենգրուփփե (KFW Bankengruppe) ընկերությունը: 56 մետր բարձրությամբ աշտարակի նախագիծն իրականացրել է Զաուերբրուխ Խաթթոն (Sauerbruch Hutton) ճարտարապետական ընկերությունը: Մերձավոր Արևելք և Աֆրիկա տարածաշրջանի հաղթող, 326 մետր բարձրությամբ Ինդեքս երկնաքերը շահագործման է հանձնվել 2011 թ-ի մարտին Դուբայում: 80 հարկանի աշտարակի գլխավոր կապալառուի դերը ստանձնել է Բրուքֆիլդ Մուլթիփլեքս (Brookfield Multiplex) ընկերությունը, իսկ ճարտարապետական նախագիծն իրականացրել է Ֆոսթեր+Գործընկերներ (Foster+Partners) ընկերությունը: 170 քառակուսի մետր ընդհանուր մակերեսով շինության պատվիրատուն է Յունիոն Փրոփերթիս (Union Properties) ընկերությունը: Այս հղումով դուք կարող եք կարդալ նախորդ տարվա «Լավագույն բարձրահարկ շենք 2010» մրցույթի արդյունքների մասին:

Մերձավոր Արևելքի խոշորագույն կառուցապատողներից մեկը, Դամաք Փրոփերթիս (Damac Properties) ընկերությունը Դուբայ Մարինա (Dubai Marina) թաղամասում սկսել է իր Դամաք Հեյթս (Damac Heights) նախագծի շինարարությունը, տեղեկացնում է Tradearabia լրատվական գործակալությունը: Նախագծի գլխավոր կապալառուի դերը ստանձնել է Արաբթեք (Arabtec) ընկերությունը: 85 հարկանի և 420 մետր բարձրությամբ նախագծի իրականացման նախնական բյուջեն կազմում է 138.4 մլն ԱՄՆ դոլար: Դամաք Հեյթսը շահագործման հանձնվելուց հետո իր հավանական սեփականատերերին կառաջարկի 2, 3 և 4 սենյականոց, ինչպես նաև երկհարկանի բնակարաններ, և փենթհաուսներ: Բնակելի համալիրը կհամապատասխանի ապրելու ամենաբարձր չափանիշներին և բնակիչները կկարողանան օգտվել համալիրի 5 աստղանի ենթակառուցվածքներից: Մասնավորապես՝ նախատեսվում է աշտարակում կառուցել կարգավորվող ջերմաստիճանով լողավազան, մարզասրահ, մանկական խաղասրահ, շոգեբաղնիք, սպա-կենտրոն և այլն: Ինչպես նշված է Դամաք Փրոփերթիս ընկերության փոխնախագահ Նիալ Մակ Լուգլինի (Niall Mc Loughlin) ելույթում, Դամաք Հեյթսը կդառնա հերթական շողացող ծովափնյա մարգարիտը: Աշտարակը կառուցվում է Դուբայ Մարինա թաղամասի Ալ Սուֆու մայրուղու (Al Sufouh Road) վրա: 2 կիլոմետր երկարությամբ ծովափնյա այս ոչ լայն հատվածը դարձել է բազմաթիվ բացառիկ նախագծերի վայր, «որոնց շարքում Դամաք Հեյթսը պիտի ամենավառը փայլի», նշել է Մակ Լուգլինը: Նա նաև ավելացրել է, որ այսօր շատ դժվար է զարմացնել՝ Դուբայում նոր շենք կառուցելով: «Բավարար չէ կառուցել լավ շինություն սովորական թաղամասում: Այսօր կառուցապատողները պետք է տեղափոխվեն մեկ այլ հարթություն և ստեղծեն ֆենոմենալ նախագծեր՝ հեղինակավոր թաղամասերում և բոլոր ժամանակակից հարմարություններով: Դամաք Հեյթսը կլինի հենց այդպիսին», ավելացրել է փոխնախագահը: Դամաք Հեյթս բնակելի համալիրը կառուցապատող Դամաք Փրոփերթիս և կապալառու Արաբթեք ընկերությունների երկրորդ համատեղ նախագիծն է: Նրանք անցած տարի հաջողությամբ ավարտեցին 84 հարկանի Օուշըն Հեյթս (Ocean Heights) կառույցի շինարարությունը: Դամաք Փրոփերթիս ընկերությունը ստեղծվել է 2002 թ-ին և մինչ օրս Դուբայում կառուցել է 28 շենք ընդհանուր 986,6 հազար քառակուսի մետր տարածքով: Մինչև այս տարվա վերջ ընկերությունը նախատեսում է շահագործման հանձնել ևս 8 շենք 233,5 հազար քառակուսի մետր ընդհանուր մակերեսով: Ինչպես արդեն նշել էինք, Դուբայում վերջին 2 տարվա ընթացքում հետաձգվել կամ չեղյալ են հայտարարվել ավելի քան 217 անշարժ գույքի նախագիծ, իսկ 2010 թ-ին մոտ 22%-ով նվազել են անշարժ գույքի նկատմամբ կատարված գործարքները: Սակայն ինչպես տեսնում ենք, այս հանգամանքները և անշարժ գույքի գների շարունակական անկումը բոլորովին էլ չեն անհանգստացնում որոշ կառուցապատողների, որոնք բավականին լավատեսորեն են տրամադրված և ղեկավարվում են իրենց առաջարկի բացառիկությամբ:

Ինչպես տեղեկացնում է Reuters լրատվական գործակալությունը, Լոնդոնում ավարտվել է 12 հազար տեղանոց բասկետբոլային մարզահրապարակի շինարարությունը, որը սկսվել էր դեռևս 2009 թ-ի հոկտեմբերին: Արդյունքում բասկետբոլային մարզահրապարակը չորրորդ ավարտված կառույցն է Օլիմպիական այգում (Olympic Park): 35 մետր բարձրությամբ և 115 մետր երկարությամբ մարզադաշտն Օլիմպիական խաղերի պատմության մեջ ամենամեծ ժամանակավոր շինություններից է: Օլիմպիական խաղերից հետո վերջինս կապամոնտաժվի և կարող է օգտագործվել մեկ այլ վայրում: 69 մլն ԱՄՆ դոլար արժողությամբ բասկետբոլային մարզահրապարակում առաջին փորձնական խաղերը կկայանան այս տարվա ամռանը: Օգոստոսի 16-21-ը այս մարզադաշտում տեղի կունենան աշխարհի 6 առաջատար տղամարդկանց հավաքականների մրցումները (Մեծ Բրիտանիա, Ավստրալիա, Ֆրանսիա, Սերբիա, Խորվատիա և Չինաստան): Լոնդոնյան Օլիմպիական խաղերին մնացել է 1 տարուց մի քիչ ավել, իսկ քաղաքում արդեն պատրաստ են 4 մարզական համալիր՝ բասկետբոլային մարզահրապարակը, հիմնական օլիմպիական մարզադաշտը, հեծանվահրապարակը և ձեռքի գնդակի մարզահրապարակը:

Ինչպես տեղեկացնում է Arabian business-ը, հարուստ բրիտանացիներն ավելի հաճախ են սկսել վաճառել Լոնդոնի հեղինակավոր թաղամասերի իրենց առանձնատներն ու բնակարանները: Վաճառվող անշարժ գույքը հիմնականում գնում են օտարերկրյա գնորդները, մասնավորապես, Մերձավոր արևելքից, Չինաստանից, Հնդկաստանից, Արևելյան Եվրոպայի և նախկին Խորհրդային միության երկրներից: Այս մասին է վկայում Սավիլս (Savills) ընկերության կատարած մարքետինգային ուսումնասիրությունը: Ուսումնասիրությունը նաև փաստում է, որ օտարերկրացիները Լոնդոնում անշարժ գույք գնելու համար տարեկան ծախսում են միջինը 6 մլրդ ԱՄՆ դոլար, որից 4.4 մլրդ ԱՄՆ դոլարը Մեյֆեյրի (Mayfair), Քենսինգթոնի (Kensington) և Չելսիի (Chelsea) նման հեղինակավոր թաղամասերում: Համաձայն ուսումնասիրության՝ ամենաթանկ անշարժ գույք գնողները Արևելյան Եվրոպայից և նախկին Խորհրդային միության երկրներից են, միջինը 10.3 մլն ԱՄՆ դոլար գնված գույքի արժեքով: Շքեղ անշարժ գույքի սեփականության 13 տոկոսը բաժին է ընկնում Մերձավոր Արևելքի և Հյուսիսային Աֆրիկայի երկրներից գնորդներին՝ գույքի 6.7 մլն ԱՄՆ դոլար միջին արժեքով: Համեմատաբար համեստ են Հնդկաստանի և Չինաստանի մեծահարուստները: Հնդկաստանին բաժին է ընկնում օտարերկրացիների կողմից գնված անշարժ գույքի 9 տոկոսը՝ միջինը 5.7 մլն ԱՄՆ դոլար արժեքով, իսկ Չինացիների կողմից գնված գույքի միջին արժեքն է 3.7 մլն ԱՄՆ դոլար: Հետաքրքրական է, որ սեփական մայրաքաղաքում բրիտանացիների կողմից ձեռք բերված անշարժ գույքի միջին գինը կազմում է ընդամենը 2.5 մլն ԱՄՆ դոլար: Ինչպես տեղեկացնում է Arabian business-ը, բրիտանացիները կենտրոնական Լոնդոնում վաճառում են իրենց բնակարանները և տեղափոխվում են քաղաքի ծայրամասերը, իսկ նրանց փոխարինելու են գալիս օտարերկրյա մեծահարուստները: Արդյունքում բրիտանական մայրաքաղաքը դառնում է առավել միջազգային: Ի դեպ, Լոնդոնի ամենաթանկ նախագծերից մեկում՝ Ուան Հայդ Պարկում (One Hide Park), ընդհանուր բնակարանների քանակի մեկ քառորդը պատկանում է մեծահարուստ արաբներին: Համալիրում, որտեղ ամենաէժան բնակարանի արժեքն է 9.2 մլն ԱՄՆ դոլար, տարածքների 20-25 տոկոսը արդեն ձեռք են բերել մերձավոր Արևելքի երկրներից գնորդները: :

Ինչպես տեղեկացնում է Արաբիան Բիզնես (Arabian Business) ինտերնետային պարբերականը, Դուբայում վերջին 2 տարվա ընթացքում հետաձգվել կամ չեղյալ է հայտարարվել ավելի քան 217 անշարժ գույքի նախագիծ: Համաձայն Դուբայի իշխանությունների ներկայացրած տվյալների՝ մոտ 450 անավարտ անշարժ գույքի նախագծերից միայն 237-ն է նախատեսվում ավարտել ժամանակին: Ինչպես ներկայացված է կայքում, 2010 թ-ին Դուբայում նվազել են անշարժ գույքի նկատմամբ կատարված գործարքները՝ կազմելով 32.6 մլրդ ԱՄՆ դոլար նախորդ տարվա 41.7 մլրդ ԱՄՆ դոլարի փոխարեն: Համաձայն գերմանական Դոյչե բանկի (Deutsche Bank) տրամադրած տեղեկատվության՝ վերջին 3 տարում Մերձավոր արևելքի ամենաանկայուն անշարժ գույքի շուկայում՝ Դուբայում, անշարժ գույքի գները գնալով նվազում են, իսկ հարևան երկրներում տիրող քաղաքական դրությունը ավելի է ծանրացնում ստեղծված իրավիճակը: Այսպիսով՝ մայիսին նախորդ ամսվա համեմատ տների գները նվազել են 1.2, իսկ վարձավճարները՝ 1 տոկոսով: Բնակարանների գները նվազել են 1.3, իսկ առանձնատներինը՝ 1 տոկոսով: Ըստ ոլորտի մասնագետների՝ չնայած բազմաթիվ ջանքերին բարձրացնելու Դուբայի անշարժ գույքի նկատմամբ երբեմնի հետաքրքրությունը՝ արդյունքը գոհացուցիչ չէ: Անգամ եթե ենթադրենք, որ վատագույնն անցյալում է, միևնույն է նորաստեղծ առաջարկը, գնորդների անտարբերությունն ու իրականացվող գործարքների պակացը առաջիկայում իրավիճակի փոփոխություն դեպի լավը չեն խոստանում: