Ազգային անվտանգության խորհրդի քարտուղար, Հայաստանի Ազգային սոցիալական բնակարանային ասոցիացիայի (ԱՍԲԱ) խորհրդի նախագահ Արթուր Բաղդասարյանը Նիդերլանդներ կատարած այցի շրջանակներում հանդիպել է Հոլանդիայի մի շարք սոցիալական բնակարանային հիմնադրամների և կազմակերպությունների ղեկավարների հետ, հաղորդում է Ազգային անվտանգության խորհրդի մամուլի գրասենյակը: Համաձայն գրասենյակի ներկայացրած տվյալների՝ այցի շրջանակներում պայմանագիր է ստորագրվել Հայաստանի Ազգային սոցիալական բնակարանային ասոցիացիայի խորհրդի նախագահ Արթուր Բաղդասարյանի և Հոլանդական միջազգային բնակարանային երաշխիքներ (Dutch international guarantees for housing) հիմնադրամի նախագահ Էրիկ Բերժենի միջև՝ Հայաստանում սոցիալական բնակարանային ոլորտում ներդրումային ծրագրերի պորտֆելի ձևավորման համար: Ըստ պայմանագրի՝ համագործակցության առաջին փուլում շուրջ 3 մլն եվրո կտրամադրվի Հայաստանում ցածր և միջին եկամուտներ ունեցող ընտանիքների բնակարանային խնդիրների լուծմանը: Առաջին սոցիալական բնակարանները կսկսվեն կառուցվել արդեն այս տարվա աշնանը: Ծրագրի առաջին փուլում ընդգրկված են Դիլիջան, Աշտարակ, Ապարան, Հրազդան և Վեդի քաղաքները, որտեղ նախատեսվում է առաջին երեք տարում կառուցել մինչև 1000 բնակարան ցածր եկամուտներ ունեցող անձանց համար: Այս ծրագրերի կենսագործման համատեքստում Գրին Ուեստ (Green West) սոցիալական բնակարանային կազմակերպության հետ քննարկվել և հաստատվել է ԱՍԲԱ-ի ներդրումային ծրագրերին երաշխիքներ տրամադրելու հարցը, իսկ Նորհուստ (Norhust) շինարարական կոնցեռնի հետ քննարկվել է Հայաստանում նորագույն տեխնոլոգիաներով բնակարանային շինարարության հարցը, ինչը կնպաստի սոցիալական բնակարանների մատչելիության բարձրացմանը:
Այսօր, հունիսի 28-ին Բոսնիայի Վիշեգրադ քաղաքում, կսկսվի հայտնի սերբ կինոռեժիսոր Էմիր Կուստուրիցայի Կամենգրադի (կամ Քարե Քաղաքի) շինարարությունը: Ինչպես Կուստուրիցան հաղորդել է վերջերս Բելգրադում կայացած մամուլի ասուլիսի ժամանակ, քաղաքի շինարարությունը նախատեսվում է ավարտել 4 տարվա ընթացքում: Այսպես կոչված Կամենգրադը կկառուցվի Դրին գետի վրայով անցնող 16-րդ դարում կառուցված կամուրջի հարևանությամբ: Նշված կամուրջը, որը ներառված է ՅՈՒՆԵՍԿՕ-յի Համաշխարհային ժառանգության ցանկի մեջ, այսօր համարվում է Բոսնիա և Հերցոգովինայի զբոսաշրջիկության կենտրոններից մեկը: Ենթադրվում է, որ շինարարության ավարտից հետո այս քաղաքում, նոբելյան մրցանակակիր Իվո Անդրիչի «Դրինայի կամուրջը» վեպի հիման վրա, կնկարահանվի Կուստուրիցայի հերթական ֆիլմը: Վեպն ընդգրկում է ավելի քան 4 դարի պատմություն՝ սկսած Օսմանյան կայսրության ծաղկման ժամանակաշրջանից, երբ Բոսնիայի տարածքը համարվում էր կայսրության մի մասը, մինչև 20-րդ դարի սկիզբը: Կամենգրադի ընդհանուր մակերեսը կլինի 25 հազար քառակուսի մետր, որից 14.5 հազար քառակուսի մետր տարածքում կկառուցվեն տարբեր շինություններ: Քաղաքում կկառուցվեն քարե շենքեր, եկեղեցիներ՝ կրոնական 3 ուղղություններով, քաղաքապետարան, հյուրանոց, թատրոն, Իվո Անդրիչի տուն-թանգարանը, խանութներ, շուկա, անգամ փոքրիկ նավակայան: Նախագծի ընդհանուր բյուջեն գնահատվում է 10-12 մլն եվրո: Նախագծի հիմնական ֆինանսավորողը կինոռեժիսորն է, սակայն Սերբական Հանրապետությունը ևս համակողմանի օգնություն կցուցաբերի: Բելգրադի մամուլի ասուլիսի ժամանակ ներկա Սերբական Հանրապետության նախագահ Միլորադ Դոդիկը հայտարարել է, որ Կամենգրադը նոր շունչ կհաղորդի Վիշեգրադին: Ի դեպ Կուստուրիցան նման նախագծերի իրականացման փորձ ունի: Մի քանի տարի առաջ Սերբիայի և Բոսնիայի սահմանին մոտ նա կառուցել է Դրեվնեգրադը (Древнеград)՝ Փայտե քաղաքը, որը դարձել է զբոսաշրջիկների և կինոսիրահարների հետաքրքրության կենտրոնը: Էմիր Կուստուրիցան սերբ կինոռեժիսոր և երաժիշտ է: Ծնվել է 1954 թ-ի նոյեմբերի 24-ին Սարաևոյում: Մինչ օրս արժանացել է Կաննի «Ոսկե արմավենու ճյուղ» կինոփառատոնի 2 մրցանակի՝ «Հայրիկը գործուղման մեջ» և «Անդերգրաունդ» ֆիլմերի համար: Նա նաև Նո Սմոքինգ Օրչեսթրա (No Smoking Orchestra) խմբի կիթառահարն է և Ֆրանսիական արվեստի և գրականության շքանշանի կրողը: Նշենք նաև որ նախորդ գարնանը կինոռեժիսորը իր երաժշտական խմբով այցելեց Երևան և եզակի համերգով հանդես եկավ Սպենդիարյանի անվան Օպերայի և բալետի պետական ակադեմիական թատրոնում:
Հայաստանի պետական բյուջեից Շիրակի մարզին հատկացված 1.32 մլրդ դրամի շրջանակներում շինարարական մրցույթներն իրականացվել են, և արդեն սկսվել են շինարարական աշխատանքները: Այդ գումարի շրջանակներում մարզում իրականացվում են ճանապարհաշինության, դպրոցների, մարզադահլիճների, տանիքների վերանորոգման աշխատանքներ ինչպես Գյումրիում, այնպես էլ մարզի այլ բնակավայրերում, հաղորդում է news.am կայքը: Ըստ ծրագրի՝ Գյումրիում հիմնանորոգվում են Սեվյան եւ Լիսինյան փողոցները, որոնք վերջին ժամանակներում չեն հիմնանորոգվել: Ծրագրով նախատեսվում է նաև բազմաբնակարան շենքերի հարթ տանիքների հիմնանորոգման աշխատանքներ Անի և Բուլվարային թաղամասերում: Գյումրիի գեղարվեստի երրորդ արհեստագործական ուսումնարանում նույն ծրագրի շրջանակներում կիրականացվի տանիքի ու սանհանգույցի վերանորոգման աշխատանքներ: Պետական այս ծրագրով աշխատանքներ տարվում են նաև մարզի մի շարք դպրոցներում ու կրթական հաստատություններում: Գյումրիից ընդգրկվել են երկու դպրոց: Աշխատանքներն արդեն սկսված են Գյումրիի թիվ 15 դպրոցում, որի վերանորոգման համար նախատեսված է 50 միլիոն դրամ: Աշխատանքներն ավարտելու են մինչև սեպտեմբերի 1-ը:
Վինսի (Vinci) շինարարական ընկերությունը և Ֆրանսիայի երկաթուղային ենթակառուցվածքների գլխավոր մարմինը (Reseau Ferre France) 50 տարի ժամկետով բազմամիլիարդ գումարի արտոնյալ պայմանագիր են ստորագրել: Ինչպես տեղեկացնում է constructiondigital կայքը, պայմանագիրը ներառում է վերջին տասնամյակի աշխարհի խոշորագույն երկաթուղային նախագծերից մեկի իրականացումը: Նշենք, որ այս պայմանագիրը Ֆրանսիայի երկաթգծային շինարարության պատմության մեջ ամենամեծ պետական-մասնավոր համագործակցությունն է: Նոր Հարավ-Եվրոատլանտյան գերարագ երկաթուղին (SEA HSR) կունենա մոտ 300 կիլոմետր երկարություն և իրար կմիացնի Տուր և Բորդո քաղաքները: Ներկայումս այդ ճանապարհի տևողությունը 3 ժամից քիչ ավելի է, իսկ երկաթգծի շինարարության ավարտից հետո այն կդառնա մոտ 2 ժամ: Ըստ Ֆրանսիայի երկաթուղային ենթակառուցվածքների գլխավոր մարմնի գործադիր տնօրեն Յուբեր դյու Մենիլի՝ ընդամենը 2 ժամ տևողությամբ ճանապարհը հնարավորություն կտա երկրի ավիափոխադրումների մի մասն իրականացնել տվյալ երկաթուղով, ինչպես նաև տարեկան 4 մլն ուղևոր ավել սպասարկել: Նոր Հարավ-Եվրոատլանտյան գերարագ երկաթգծի շինարարությունը նախատեսվում է սկսել հաջորդ տարվա սկզբին և ավարտել 5 տարվա ընթացքում: Շինարարության ընթացքում երկրում կբացվի 1300 շինարարական և 150 սպասարկման աշխատատեղ: Վինսի ընկերությունը 1899 թ-ին ստեղծել են ճարտարագետներ Ալեքսանդր Գիրոսը և Լուի Լուչիերին: Հետզհետե զարգանալով՝ ընկերությունն այժմ համարվում է աշխարհի շինարարական ոլորտում խոշորագույն ընկերություններից մեկը: Ընկերությունն ունի մոտ 180 հազար հոգուց բաղկացած աշխատակազմ աշխարհի ավելի քան 100 երկրներում: Մինչ օրս ընկերությունն իրականացրել է այնպիսի նախագծեր, ինչպիսիքն են՝ Գերիփի Ամբարտակը (Gariep Dam) 1971 թ-ին, Թուր Մոնպառնասը (Tour Montparnasse) 1972 թ-ին, Լուվրի նոր նախասրահը 1989 թ-ին, Չենել Թունելը (Channel Tunnel) 1994 թ-ին, Սթեյդ դե Ֆրանսը (Stade de France) 1998 թ-ին և Ռիո-Անտիրիոյի (Rio-Antirio) կամուրջը 2004 թ-ին: 2010 թվականին Վինսի ընկերությունը ըստ կատարված աշխատանքների ծավալների առաջնայնությունը զիջեց Չինական երկու շինարարական (տրանսպորտային) կազմակերպություններին:
15 տարի տևած լայնածավալ վերանորոգման աշխատանքներից հետո լոնդոնյան Սուրբ Պողոս Տաճարը (St Paul's Cathedral) վերականգնված է, հայտնում է news.yahoo.com կայքը: Երկար տարիների ընթացքում առաջին անգամ լոնդոնցիներին հնարավորություն ընձեռնվեց տեսնել տաճարն առանց շինարարական փայտամածի: Սուրբ Պողոսի Տաճարը, որը գտնվում է քաղաքի Սիթի ֆինանսական թաղամասի ամենաբարձր Լուդգեյթ Հիլլ (Ludgate Hill) հատվածում, համարվում է մայրաքաղաքի ճարտարապետական կենտրոնը: Բրիտանիայի պատմության ընթացքում իրականացված խոշորագույն վերականգնողական 58 մլն ԱՄՆ դոլար արժողությամբ ծրագիրն ավարտվել է Ճիշտ ժամանակին՝ տաճարի 300-ամյա տարեդարձին: Կիսավեր վիճակում գտնվող տաճարի վերականգնողական աշխատանքները սկսվել են մոտ 15 տարի առաջ, 1996 թ-ի ամռանը: Տաճարի միայն դիմային հատվածում սպիտակ կրաքարե 150 հազար քարե բլոկներ են մաքրվել հարյուրավոր տարիների ընթացքում կուտակված կեղտից ու փոշուց: Բացի այդ վերականգնողական ծրագրով թարմացվել է ներքին բակը, վերականգնվել է գլխավոր երգեհոնը, ինչպես նաև կառուցվել են հաշմանդամների համար նախատեսված անցուղիներ տաճարի տարբեր հատվածներում: Քրիստոֆեր Ռենի ճարտարապետական գլուխգործոցը կառուցված է Վերածննդի ոճով, պորտլանդական կրաքարից, ինչպես և մայրաքաղաքի բոլոր գլխավոր շինությունները: Տաճարը կառուցվել է 1666 թ-ին Լոնդոնյան Մեծ հրդեհից գրեթե ամբողջությամբ այրված հին Սուրբ Պողոս Տաճարի տեղում: Տաճարի կառուցումը տևել է մոտ 36 տարի և ավարտվել 1711 թ-ին: Սուրբ Պողոս Տաճարում են տեղի ունեցել երկրի հերոսներ հերցոգ Վիլլինգթոնի, Հորացիո Նելսոնի և Ուինսթոն Չերչիլի թաղման արարողությունները: Ինչպես նաև 1981 թ-ին այս տաճարում են պսակադրվել Անգլիայի արքայազն Չարլզը և արքայադուստր Դիանան:
