Ինչպես տեղեկացնում է Reuters լրատվական գործակալությունը, 2022 թ-ի ֆուտբոլի աշխարհի առաջնությունը հյուրընկալող Կատարն առաջիկա 3 ամիսների ընթացքում կհայտարարի մրցույթ՝ երկաթգծային ցանցերի և մետրոպոլիտենի շինարարության համար: Ինչպես տեղեկացնում է Կատարի Երկաթգծային ընկերության տնօրեն Աբդուլա ալ-Սուբայը (Abdullah al-Subaie) ծրագրի նախնական նախագիծն արդեն պատրաստ է: Ըստ Աբդուլա ալ-Սուբայի՝ 100 կայարան ունեցող նախագծի ընդհանուր բյուջեն կկազմի 35.7 մլրդ ԱՄՆ դոլար, իսկ ծրագրի իրականացման համար կպահանջվի ավելի քան 1.2 մլն տոննա երկաթ: Նրա խոսքերով, շինարարությունը կսկսվի մետրոպոլիտենից և առաջին փուլի ավարտը նախատեսված է 2021 թ-ին, իսկ ամբողջ ցանցը պատրաստ կլինի արդեն 2026 թ-ին: Հսկայական բնական գազի պաշարները Կատարին դարձրել են աշխարհի ամենահարուստ երկրներից մեկը: Կատարը մինչև 2016 թ-ը իր պետական բյուջեի 40 տոկոսը նախատեսում է տրամադրել երկրի ենթակառուցվածքների զարգացմանը: Սա ներառում է 11 մլրդ ԱՄՆ դոլար արժողությամբ միջազգային օդանավակայանը, 5.5 մլրդ ԱՄՆ դոլար արժողությամբ խորահուն նավահանգիստը և 1 մլրդ ԱՄՆ դոլար արժողությամբ տրանսպորտային միջանցիկ ճանապարհը մայրաքաղաք Դոհայում, իսկ ավտոճանապարհների վրա նախատեսվում է ծախսել մոտ 20 մլրդ ԱՄՆ դոլար: Աշխարհի խոշորագույն հեղուկ գազ արտահանող երկիրն առաջիկա 5 տարիների ընթացքում նախատեսում է մոտ 125 մլրդ ԱՄՆ դոլար ծախսել շինարարական և էներգետիկ նախագծերի իրականացման համար: Աբդուլա ալ-Սուբայը հորդորել է Կատարի կազմակերպություններին համագործակցել միջազգային ընկերությունների հետ շինարարական և էներգետիկ նախագծերն իրականացնելու նպատակով:

Ինչպես տեղեկացնում է Daily Mail-ը, Մեծ Բրիտանիայի ամենամեծ առանձնատունը, որը գտնվում է Լոնդոնի արվարձանում վաճառքի է հանվել 122 մլն ԱՄՆ դոլարով: Ափդաուն Քորթ (Updown Court) առանձնատունն ունի 103 սենյակ, 5 լողավազան, 2 փենթհաուս և ուղղաթիռային հարթակ: Բացի այդ կա 50 տեղանոց կինոդահլիճ, բոուլինգի խաղասրահ, սպորտդահլիճ, թենիսի կորտեր, «անվտանգության սենյակ» («panic room»), արհեստական լճակ և 3000 շշի համար նախատեսված գինու մառան: Առանձնատունն ունի 234 հազար քառակուսի մետր հողատարածք: 24 ննջասենյակից և 23 լոգասենյակից բաղկացած ամառանոցը կառուցված է հազվագյուտ քարերից՝ մասնավորապես իտալական մարմարից: Ափդաուն Քորթի խոհրդավոր սեփականատերն է որմնադրի զավակ՝ իսկ այժմ հաջողակ կառուցապատող Լեսլի Ալեն-Վերքոն (Leslie Alen Vercoe): Ռայմեր Ինվեսթմենթս (Rhymer Investments) ընկերության հիմնադիր Ալեն-Վերքոն տունը գնել է 2002 թ-ին 32.8 մլն ԱՄՆ դոլարով և մինչ օրս վերանորոգման աշխատանքների վրա ծախսել է 49 մլն ԱՄՆ դոլար: Ափդաուն Քորթը կառուցվել է 1924 թվականին: 1970-ականներին այն ժամանակավոր տնօրինել է եգիպտական արքայազն Սամի Գայեդը (Sami Gayed): 1987-ին կառույցը լուրջ վնասվել է հրդեհից, որից հետո այն ձեռք են բերել երկու կառուցապատողներ, որոնց սնանկացումից հետո Ափդաուն Քորթի սեփականատեր դարձավ պարոն Ալեն-Վերքոն: Ափդաուն Քորթի հարևանությամբ են ապրում այնպիսի նշանավոր դեմքեր, ինչպիսիք են սըր Էլտոն Ջոնը և Քուին (Queen) խմբի կիթառահար Բրայան Մեյը:

Ինչպես տեղեկացնում է Նայթ Ֆրենկ (Knight Frank) ռիելթորական ընկերությունը, 1 տարվա ընթացքում Փարիզում էլիտար բնակարանների գինն ավելացել է 22 տոկոսով: Արդյունքում Փարիզը գրավել է ընկերության կողմից կատարված ուսումնասիրության առաջին հորիզոնականը՝ դառնալով աշխարհի այն քաղաքը, որտեղ տարվա ընթացքում ամենաշատն է թանկացել էլիտար անշարժ գույքը: Ինչպես նշված է ուսումնասիրության մեջ, գների աճը պայմանավորված է էլիտար բնակարանների սահմանափակ առաջարկով և փարիզյան անշարժ գույքի նկատմամբ արտասահմանյան գնորդների հետաքրքրության աճով: Ընկերության կողմից կատարված ուսումնասիրության համաձայն՝ տարվա ընթացքում էլիտար անշարժ գույքը թանկացել է միջինը 6.6 տոկոսով, անցած տարվա 12,7տոկոսի փոխարեն: Անցած տարի նմանատիպ ուսումնասիրության ժամանակ մայրցամաքների մեջ բավականին տարբերություն կար: Ասիական քաղաքները գրավում էին առաջատար տեղերը, այն ինչ եվրոպական և ամերիկյան քաղաքները ցածր հորիզոնականներում էին: Այսօր, արդեն 1 տարի անց, այդ տարբերությունն ավելի քիչ նկատելի է: Համաձայն ընկերության ուսումնասիրության տվյալների՝ երկրորդ տեղը զբաղեցրել է Հոնկոնգը՝ 15 տոկոս աճով, իսկ երրորդը Հելսինիկին՝ 12.2 տոկոս աճով: Առաջատար հնգյակը եզրափակում են Շանհայն ու Պեկինը համապատասխանաբար 11 և 10 տոկոս աճով: Ավելի քիչ թանկացել է էլիտար բնակարանները Լոնդոնում և Սինգապուրում՝ ընդամենը 8.6 տոկոս: Մոսկվայում, ընդհակառակը, էլիտար բնակարանների գներն ընկել են 8 տոկոսով: Այնուամենայնիվ, ինչպես նշում են մասնագետները, գների անկումը փոքր ինչ դանդաղել է՝ նախորդ եռամսյակի համեմատ գները նվազել են ընդամենը 0.7 տոկոսով:

Այս շաբաթ Կոպենհագենի նորաստեղծ Օրեսթադ թաղամասում (Orestad) բացվել է ոչ միայն Դանիայի, այլև ամբողջ Սկանդինավիայի խոշորագույն հյուրանոցներից մեկը: Բելլա Սքայ (Bella Sky) հյուրանոցը խորհրդանշում է ոչ միայն թաղամասի արդիականությունը, այլև մայրաքաղաքի աստիճանաբար աճող միջազգային դերը: Գտնվելով Բելլա Սենթրի (Bella Center), օդանավակայանի և Կոպենհագենի պատմական կենտրոնի շրջակայքում, կառույցի տեղը բավականին բարենպաստ է միջազգային միջոցառումների անցկացման համար: Հյուրանոցի պատվիրատուն Բելլա Սենթր (Bella Center) ընկերությունն է, իսկ նախագծողը դանիական 3XH Ճարտարապետական բյուրոն: Շինարարության ինժեներական կողմն ապահովել է Ռեմբոլ (Rembol) խորհրդատվական և ինժեներական ընկերությունը: Ինչպես բացատրում է նախագծի գլխավոր պատասխանատու Կարե Դահլը (Kaare K.B. Dahl), «նախագծի հիմնական խնդիրներից էր շինության «երկրաչափությունը» հասկանալը և դրա իրականացնելը: Անխոս առանց Tekla դիզայն-ծրագրի, նախագծի իրականացումն անհնար կլիներ»: Ռեմբոլ (Rembol) ընկերության մասնագետները բոլոր հաշվարկները և գծագրերն իրականացրել հաշվարկային ROBOT և դիզայներական TEKLA ծրագրերի համատեղմամբ: Երկու ծրագրերի համատեղումը հնարավորություն տվեց պարզել նաև այնպիսի հարցեր ինչպիսիքն են՝ հիմքերի հետագա դեֆորմացումը շինության ավարտից հետո, ինչքան կարող է թեքվել շինությունը հետագայում և այլն: Մասնագետները նախագծել և կառուցել են երկու աշտարակ, որոնք մոտ 15 աստիճանով թեքված են ուղղահայացից: Ի դեպ Բելլա Սքայ (Bella Sky) հյուրանոցի թեքությունը չորս անգամ գերազացում է հայտնի Պիզայի աշտարակի թեքությունը: Հյուրանոցի աշտարակների բարձրությունը 76.5 մետր է, իսկ ընդհանուր տարածքը 44.173 հազար քառակուսի մետր: Հյուրանոցում կա 814 սենյակ, 32 խորհրդակցական դահլիճ, 3 ռեստորան, հյուրասրահ, սքայ-բար, առողջարանական կենտրոն՝ 850 քառակուսի մետր մակերեսով: 3XH Ճարտարապետական բյուրոյի հիմնադիր և տնօրեն Կիմ Հերֆորդ Նիլսենի (Kim Herforth Nielsen) խոսքերով, աշխարհի գրեթե բոլոր միջազգային հյուրանոցները կառուցված են գործնական ոճով: Նրանք որոշել են շեղվել այս համընդհանուր կանոնից և նախագծել այնպիսի շինություն, որն իր ոճով կլինի ոչ թե գործնական, այլ կընդգծի սկանդինավյան օջախների ջերմությունը, լույսը և կապը բնության հետ:

Ինչպես տեղեկացնում է Inhabitat.com ինտերնետային կայքը, անցած շաբաթ Սեուլում Հանգան գետի վրա բացվել է աշխարհի ամենամեծ լողացող կղզին: 700 տեղանոց հյուրասրահից, ռեստորաններից և առևտրային պատկերասրահներից բաղկացած Վիվա (Viva) լողացող կղզին կազմում է 83.9 մլն դոլար արժողությամբ պետական նախագծի միայն մի մասը: Բացի 3.2 հազար քառակուսի մետր ընդհանուր տարածքով Վիվա կղզուց, որը բացվելուց անմիջապես հետո սկսել է հավաքել այցելուների հսկա բանակ, օգոստոս – սեպտեմբեր ամիսներին նախատեսվում է շահագործման հանձնել տարածքով ավելի փոքր ևս 2 կղզի՝ Վիսթան (Vista) 1.3 հազար քառակուսի մետր տարածքով և Տերան (Tera) 371 քառակուսի մետր տարածքով: Կղզիների ամբողջական շահագործումից հետո նախատեսվում է, որ վերջիններս կդառնան միջազգային գիտաժողովների, մշակութային միջոցառումների, ցուցահանդեսների, ինչպես նաև ջրային մարզաձևերի մրցումների կենտրոններ: Շինարարության ավարտից հետո բոլոր 3 կղզիներն իրար հետ կկապվեն շղթաներով: Սեուլի կղզիները տարբերվում են Դուբայի արհեստական կղզիներից, որոնք կառուցվել են ծովի հատակը լցված ավազային հիմքի վրա: Ի տարբերություն վերջիններիս՝ Վիվան և նրան ուղեկցող մյուս 2 կղզիները լողում են ջրի վրա և հաշվի առնելով գետի հեղեղումները, կղզիները նախագծված են այնպես, որ ջրի մակարդակին զուգահեռ իրենք էլ բարձրանան և իջնեն: 2 հազար տոննա կշռով Վիվա կղզին, որն ընդունակ է պահելու ևս 6.4 հազար տոննա ծանրություն, գետի երեսին լողում է շնորհիվ 24 հսկա օդային բարձիկների: Կղզին ամրացված է 500 տոննա կշռով բետոնե հիմքին, որն էլ կղզին պահում է իր տեղում: Բացի այդ կղզու վրա տեղադրված է հատուկ անվտանգության համակարգ, որը պետք է անմիջապես ահազանգի, եթե վերջինս հեռանա իր նախատեսված հատվածից: Վիվա կղզու վրա կառուցված 3 հարկանի շինությունը ծածկված է 54 քառակուսի մետր ընդհանուր տարածքով արևային պանելներով, որոնց շնորհիվ գիշերը լուսավորվում է կառույցի ճակատը: