Ինչպես տեղեկացնում է Reuters գործակալությունը, Ալսթոմ (Alstom) ընկերությունը, ֆրանսիական կառավարության և բանկերի ֆինանսավորմամբ, կկառուցի Բաղդադի մետրոպոլիտենի վերգետնյա գիծը: 22 կմ երկարությամբ գծի կառուցումը կտևի չորսից հինգ տարի: Շինարարության բյուջեն, ըստ նախնական հաշվարկների, կկազմի US$1.5 մլրդ: 14 կայարանից բաղկացած մետրոպոլիտենի գիծը ժամում կսպասարկի մոտ 30 հազար ուղևոր և իրար կկապի մայրաքաղաքի հյուսիսային և կենտրոնական հատվածները: Ֆրանսիական Ալսթոմ ընկերությունը մետրոպոլիտենի շինարարության վերաբերյալ Բաղդադի քաղաքապետարանի հետ բանակցություններ սկսել է վարել դեռևս այս տարվա հունվարից: Իսկ արդեն մայիսի 30-ին ընկերության ղեկավարության և քաղաքապետարանի միջև մետրոպոլիտենի շինարարության վերաբերյալ կնքվել է նախնական համաձայնագիր: Սակայն բանակցությունների վերջնական հանգուցալուծումը կախված է Իրաքի կառավարությունից, որը պետք է ուսումնասիրի նախագիծը և հաստատի վերջնական բյուջեն: Մետրոպոլիտենի շինարարության համար վերցված վարկը Իրաքի կառավարությունը կսկսի մարել վերջինիս շահագործումից հետո: Երկարատև պատերազմի ընթացքում Իրաքի ճանապարհները, երկաթուղային կայարանները, էկեկտրակայանները և նավահանգիստները ավերվել են անընդմեջ ռմբակոծություններից, տնտեսական պատժամիջոցներից և ներդրումների պակասից: Ալսթոմը խոշորագույն ֆրանսիական ընկերություն է, որը համարվում է երկաթգծային տրանսպորտի և էներգետիկ ոլորտների աշխարհի առաջատարներից մեկը:

Ինչպես տեղեկացնում է Սինխուա լրատվական գործակալությունը, հունիսի 1-ին Չինաստանի հյուսիս-արևմտյան Սիչուան նահանգում սկսվել է աշխարհի ամենաբարձր ավտոթունելի շինարարությունը: 7 կմ երկարությամբ ավտոթունելը կառուցվում է ծովի մակերևույթից 4.24 – 4.38 կմ բարձրության վրա: Թունելը գտնվում է Սիչուան նահանգի Չենդու քաղաքը Տիբեթի մայրաքաղաք Լհասային կապող մայրուղու վրա: Շինարարության պատասխանատու Լի Մինի խոսքերով, ավտոթունելի շահագործումից հետո մայրուղու տվյալ հատվածի երթևեկության տևողությունը կկրճատվի 12 անգամ՝ 2 ժամվա փոխարեն դառնալով 10 րոպե: Նա նաև ավելացրել է, որ շինարարները սկզբում պետք է կառուցեն դեպի թունել տանող 14 կմ երկարությամբ նախամուտքը: 172 մլն դոլար արժողությամբ ավտոթունելը նախատեսվում է շահագործման հանձնել 4 տարուց: 2.4 հազար կմ երկարությամբ Սիչուան-Տիբեթ մայրուղին հատում է տասնյակ գետեր և ծովի մակերևույթից 4-5 կմ բարձրությամբ 14 լեռ: 2005-2010 թթ-ին Չինաստանը մոտ 21.6 մլրդ դոլլար է ներդրել Տիբեթի զարգացման 188 կարևորագույն նախագծերում: Սիչուանի և Տիբեթի կառավարությունները ներկայումս քննարկում են մի շարք ավտոթունելների կառուցման առաջնային նախագծեր, երթևեկության պայմանների հետագա բարելավվման նպատակով:

Այս շաբաթ ամերիկյան հայտնի PNC ֆինանսական ծառայությունների խումբը (PNC Financial Group), հայտարարել է, որ պատրաստվում է կառուցել աշխարհի «ամենականաչ» երկնաքերը: PNC Պլազա աշտարակը (Tower at PNC Plaza) կկառուցվի Պիտսբուրգի կենտրոնում, այն նույն վայրում, որտեղ ավելի քան 150 տարի գործում է ընկերություն գլխավոր գրասենյակը: Ընկերության նոր գլխավոր գրասենյակի շենքը կունենա 40 հարկ և շահագործման կհանձնվի 2015թ-ին: Ընդհանուր 75 հազար քառակուսի մետր տարածքով PNC Պլազան կլինի ընկերության ամենամեծ շինությունը Պիտսբուրգում: Աշտարակը կունենա կանաչապատ տանիք և 300 տեղով ստորգետնյա ավտոկայանատեղի: Մոտ 400 մլն դոլար արժողությամբ նախագիծը կստեղծի ավելի քան 2500 նոր աշխատատեղ: Ընկերության նախկին շենքի ապամոնտաժման աշխատանքները նախատեսվում է սկսել 2011 թ-ի վերջին, իսկ նոր աշտարակի շինարարությունը 2012 թ-ի գարնանը: PNC Group-ն ակնկալում է աշտարակը շահագործման հանձնել 2015 թ-ի ամռանը: Նախագծի հեղինակն է աշխարհի խոշորագույն ճարտարապետական Գենսլեր (Gensler) ընկերության պիտսբուրգյան գրասենյակը: Պիտսբուրգյան ՓիՋեյ Դիք (PJ Dick) ընկերությունը հանդես կգա որպես շինարարության կառավարիչ, իսկ Բուրո Հափոլդ (Buro Happold) ընկերության բրիտանական գրասենյակը՝ որպես տեխնիկական խորհրդատու: Որպես կանաչ շինարարության խորհրդատու՝ հանդես կգա Պալադինո և Ընկերություն (Paladino & Company) ընկերությունը: Շինության ճակատային հատվածը կլինի երկշերտ ապակուց, ինչը կբարձրացնի էներգիայի խնայողության արդյունավետությունը, ինչպես նաև բնական օդափոխության հնարավորություն կտա: Գերժամանակակից սարքերն ու սենսորները հնարավորություն կտան բարձրացնել ջեռուցման և սառեցման համակարգերի էֆեկտիվությունը: Աշտարակի բոլոր աշխատասենյակներում առավելագույնս կօգտագործվի արևի լույսը՝ նվազեցնելով արհեստական լուսավորության անհրաժեշտությունը օրվա ընթացքում: Շինության նախագծման հարցերով զբաղվող խումբը այժմ ուսումնասիրում է բոլոր այլընտրանքային էներգիայի աղբյուրների օգտագործման տարբերակներ, որոնք հնարավորություն կտան շենքի շահագործման ընթացքում զգալիորեն նվազեցնել ածխաթթու գազի արտանետումը շրջակա միջավայր: Աշտարակի կանաչապատ տանիքը կհավաքի անձրևաջրերը շինության այլ ջրային կարիքները հոգալու նպատակով: PNC Group-ը, ներգրավված ավանդների ծավալով ԱՄՆ-ի 6-րդ բանկը, իր առաջին «կանաչ» շինությունը շահագործման է հանձնել 2000 թ-ին: 60 հազար քառակուսի մետր տարածքով PNC -ի Ֆըրսթսայդ կենտրոնն (Firstside Center) ժամանակին առաջին LEED-լիցենզավորված շինությունն էր աշխարհում: Նշենք նաև, որ PNC Group-ը տիրապետում է աշխարհի ամենաշատ քանակությամբ «կանաչ» կառույցների, իսկ վերջերս, ընկերությունը շահագործման է հանձնել իր Վաշինգտոնյան նոր գրասենյակի «կանաչ» շենքը՝ Սպիտակ Տնից մի քանի թաղամաս հեռավորությամբ:

Bloomberg լրատվական գործակալությանը տրված հարցազրույցում, Մորի Թրասթ (Mori Trust Co) ընկերության նախագահ, միլիարդատեր Ակիրա Մորին հայտարարել է, որ մարտին Ճապոնիայում տեղի ունեցած ավերիչ երկրաշարժից հետո երկիրը պետք է հրաժարվի երկնաքերերի կառուցումից: Երկրի ամենահարուստ գործարարներից մեկը խորհուրդ է տվել ճապոնական կառավարությանը հաստատել կառույցների բարձրության նոր չափանիշներ` ոչ ավել քան 100 մետրը: Ըստ նրա, այս բարձրությունը, հաշվի առնելով հիմքերի սեյսմակայուն բարձիկների աշխատանքը, առավել բարենպաստ է երկրաշարժի ալիքների մարման համար: Նա նաև ավելացրել է, որ վարձակալների հետզհետե ավելացող հետաքրքրությունը շինությունների ավելի ցածր հարկերի նկատմամբ աստիճանաբար կնվազեցնի երկնաքերերի գրավչությունը: Այնպիսի շինարարական հսկաները, ինչպիսին է Ճապոնիայի ամենամեծ անշարժ գույքի Միցուի Ֆուդոսան (Mitsui Fudosan Co) ընկերությունը ետպատերազմյան տնտեսական բումից, 1960-ական թթ-ից ի վեր նախապատվությունը տալիս են բարձրահարկ աշտարակներին: Արդյունքում երկրում կառուցվում են այսպես կոչված «Մատիտ» կառույցներ, որոնց հիմքի մակերեսն անհամապատասխան է շինության բարձրությանը: Ակիրա Մորիի խոսքերով, կառուցապատողներն ուժերը համատեղելով, այսպես կոչված «Մատիտ» կառույցների փոխարեն կարող են կառուցել ոչ թե «Մատիտներ», այլ տարածական շինություններ: Ճապոնիայի 1-ին, իսկ աշխարհի 58-րդ ամենաբարձր երկնաքերը գտնվում է Տոկիոյից հարավ Յոկոհամա քաղաքում: 73 հարկանի, 296 մետր բարձրություն ունեցող Նշանաձող Աշտարակը (Landmark Tower) կառուցել է Միթսուբիշի Իսթեյթ (Mitsubishi Estate) ընկերությունը 1993 թ-ին: Տոկիոյի կենտրոնում է գտնվում մայրաքաղաքի ամենաբարձր Միդթաուն աշտարակը (Midtown Tower): 248 մետր բարձրությամբ երկնաքերը կառուցել է Միցուի Ֆուդոսան (Mitsui Fudosan Co) ընկերությունը: Իսկ այս տարվա դեկտեմբերին, շինարարության ավարտից հետո երկրի ամենաբարձր կառույցի տիտղոսը կպատկանի Տոկիոյի Երկնային Ծառ ( Tokyo Sky Tree) հեռուստաաշտարակին, որի բարձրությունը կկազմի 634 մետր: Ինչպես նշված է Ճապոնիայի ճարտարապետների ինստիտուտի ուսումնասիրության մեջ՝ երկրի 2568 շենքերի մոտ 30 տոկոսն ունի ավելի քան 20-25 հարկ և բարձր է 100 մետրից: Ի դեպ մարտի 11-ի ավերիչ՝ 9,0 մագնիտուդով եկրաշարժի արդյունքում Տոկիոյի շինությունները գրեթե չեն տուժել: Համաձայն Ճապոնիայի օդերևութաբանական ծառայության տվյալների՝ ամեն տարի Ճապոնիայում գրանցվում է ամենաքիչը 2 երկրաշարժ 6.8 և ավելի մագնիտուդով: Համեմատության համար նշենք, որ Սպիտակի 1988 թվականի երկրաշարժի մագնիտուդը եղել է մոտ 7,0:

Ռիելթի Քեփիթալ (Realty Capital) ընկերությունն ավարտեց է Դուբայում կառուցվող Այ-Րայզ (i-Rise Tower) գրասենյակային աշտարակի շինարարությունը: 150 հազար քառակուսի մետր ընդհանուր մակերեսով տարածաշրջանի ամենամեծ գրասենյակային աշտարակներից մեկը գտնվում է Դուբայի Թեքոմ (Tecom Site-C) թաղամասի հանգույցային հատվածում: Ռիելթի Քեփիթալ ընկերությունը հայտարարել է, որ բազմաթիվ վարձակալներ արդեն սկսել են 36 հարկանի աշտարակում իրենց էլիտար գրասենյակների ներքին հարդարման աշխատանքները: Սակայն պետք է նշել, որ մինչ օրս աշտարակի միայն կեսն է վարձակալության հանձնված: Աշտարակի շինարարական աշխատանքների ընթացքում Ռիելթի Քեփիթալ ընկերությունը համագործակցել է համաշխարհային համբավով մի շարք նախագծային, շինարարական և ռիելթորական ընկերությունների հետ, այդ թվում՝ տարածաշրջանի առաջատար ճարտարապետա-շինարարական Խաթիբ և Ալամի (Khatib & Alami Consolidated Engineering Company) և համաարաբական ամենամեծ նախագծային և շինարարական խորհրդատվական Պրոջաքս Ինթերնեշնլ (Projacs International) ընկերությունների հետ: Շինարարական աշխատանքները ժամանակին ավարտելու նպատակով կառուցապատողը վստահել է շինարարության գլխավոր կապալառուի դերը Ալ Նաբուդահ (Al Naboodah) ընկերությանը: 36 հարկանի աշտարակն առաջարկում է բարձրակարգ գրասենյակային տարածքներ՝ յուրաքանչյուր հարկում 3 հազար քառակուսի մետր մակերեսով: Գրասենյակային տարածքներն աշտարակում բնութագրվում են ինչպես՝ ժամանակակից և ճկուն՝ 50 – 330 քառակուսի մետր տարածքների ընտրությամբ: Անհատական գրասենյակները 2 մոդուլով են՝ գործադիր և կորպորատիվ: Գործադիր գրասենյակներն ունեն առանձնացված զուգարանասենյակներ, բուֆետ և պահեստներ: Այ-Ռայզ բիզնես աշտարակի բոլոր գրասենյակային տարածքներում գերիշխում է արևի լույսը՝ հնարավորություն ընձեռելով էլեկտրաէներգիայի խնայողության համար և միաժամանակ բարձրացնելով կառույցի բնապահպանական ցուցանիշները: Աշտարակն ունի հարմարավետ դիրք՝ անմիջապես Շեյխ Զայեդ (Sheikh Zayed) փողոցից մուտքով և մետրոյի կայարանի հարևանությամբ, իսկ գրասենյակների լուսամուտներից բացվում են հիանալի տեսարաններ դեպի Արաբական ծովածոցը և Նոր Դուբայի հորիզոնը: