Ինչպես տեղեկացնում է constructiondigital.com կայքը, Վլադիվոստոկ կատարած պաշտոնական այցի ժամանակ Ռուսաստանի նախագահ Դմիտրի Մեդվեդևը մտավախություն է հայտնել, որ 2012թ-ի Ասիա-խաղաղօվկիանոսյան տնտեսական համագործակցության (APEC) գագաթնաժողովի անցկացման նպատակով կառուցվող շինությունները պատրաստ չեն լինի նախատեսված ժամկետներում: Պետք է նշել, որ վերոնշյալ գագաթնաժողովն առաջինն է այն միջազգային իրադարձություններից, որ առաջիկա տասնամյակում անց կկացվի Ռուսաստանում: Երկիրը կհյուրընկալի նաև 2014թ-ի ձմեռային օլիմպիական խաղերը, 2015թ-ի Ֆորմուլա 1 ավտոմրցաշարը, նույն տարում հոկեյի աշխարհի առաջնությունը և 2018թ-ի ֆուտբոլի աշխարհի առաջնությունը: Վլադիվոստոկում և Ռուսական կղզում իրականացվող շինարարական աշխատանքների համար պետական բյուջեից հատկացվել է ավելի քան 23.8 մլրդ ԱՄՆ դոլար: Նշենք, որ 150 ամյա Վլադիվոստոկում ապրում է մոտ 616 740 մարդ: Մեկ այլ ինտերնետային աղբյուր komerssant.ru–ն նշում է, որ նախագահի Վլադիվոստոկ կատարած այցի ժամանակ պարզվել է, որ գագաթնաժողովի անցկացման համար կղզում նախատեսված 5-աստղանի հյուրանոցների միայն 20 տոկոսն է պատրաստ: Ի դեպ, կարևորագույն միջազգային միջոցառմանը մնացել 1 տարուց մի քիչ ավել, իսկ այդ 20 տոկոսն իրենցից ներկայացնում են մի քանի բետոնե կմախքներ: Պետական պաշտոնյաների հետ հանդիպման ժամանակ նախագահ Մեդվեդևը հրամայել է, այլընտրանքային տարբերակ մշակել, այն դեպքում, եթե հանկարծ կախովի կամուրջը ժամանակին պատրաստ չլինի: Մեկ տարի նախատեսված ժամկետից ետ է մնում նաև մեկ այլ կամուրջի շինարարությունը, Ոսկե Եղջյուր ծովախորշի վրայով: Արդյունքում կղզում իրականացված է ընդհանուր շինարարական աշխատանքների միայն 53.7 տոկոսը: Կառուցվող 96 շինություններից միայն 6-ն է հանձնվել շահագործման, 69 կառույցներում դեռ շարունակվում են շինարարական աշխատանքները, 13-ը դեռ նախագծման փուլում են, իսկ 6 կառույց անգամ չեն էլ սկսել նախագծել: Պաշտոնական տվյալներով շինարարական աշխատանքներում ներառված են 26.5 հազար մարդ, որոնցից 11 հազարը օտարերկրացիներ են, գրում է komersant.ru-ն: Վլադիվոստոկում կայացած հանդիպումը նախագահ Մեդվեդևն այսպես է եզրափակել. «Ինչքան ցանկանաք կարող եք փոփոխել շինարարության վերջնաժամկետները: Սակայն գագաթնաժողովը կբացվի 2012 թ-ի սեպտեմբերի 1-ին և այդ ամսաթիվն անհնար է փոփոխել»: Ռուսաստանը դարձել է 2012 թ-ի Ասիա-խաղաղօվկիանոսյան տնտեսական համագործակցության գագաթնաժողովը հյուրընկալող երկիր 2007 թ-ին Սիդնեյում կայացած հերթական ամենամյա հանդիպման ժամանակ: Նման քայլով Ռուսաստանի նախկին նախագահ, ներկայիս վարչապետ Վլադիմիր Պուտինը ձգտում էր բարձրացնել Ռուսաստանի դերը ասիական երկրների շրջանում: Ի դեպ, նախորդ տարի Չինաստանը դարձել է Ռուսաստանի գլխավոր առևտրային գործընկերը, և նրանց միջև ապրանքաշրջանառությունն ավելացել է 50 տոկոսով՝ կազմելով 59 մլրդ ԱՄՆ դոլար:

ՀՀ կառավարությանն առընթեր անշարժ գույքի կադաստրի պետական կոմիտեն հրապարակել է հաշվետվության, որտեղ երևում է, որ Հայաստանի անշարժ գույքի շուկան 1 տարվա կտրվածքով ակտիվացել է, ավելացել են անշարժ գույքի նկատմամբ իրականացված գործարքները, բայց որոշակիորեն նվազել են անշարժ գույքի գները: 2011 թ-ի մայիսին հանրապետությունում անշարժ գույքի նկատմամբ իրականացվել է 16.643 հազար գործարք: Ի դեպ այս ցուցանիշը նախորդ ամսվա համեմատ ավելացել է 2, իսկ նախորդ տարվա նույն ամսվա համեմատ 23.1 տոկոսով, ներկայացված է ՀՀ կառավարությանն առընթեր անշարժ գույքի կադաստրի պետական կոմիտեի հաշվետվության մեջ: Անշարժ գույքի նկատմամբ իրականացված գործարքների ծավալներով առաջատարը Երևանն է (32.3%), նրան հաջորդում է Կոտայքի մարզը (15%), իսկ երրորդ տեղում է Լոռվա մարզը (8.2%): Ինչպես ներկայացված է Անշարժ գույքի կադաստրի պետական կոմիտեի հաշվետվության մեջ 2011 թ-ի մայիսին անշարժ գույքի նկատմամբ իրականացված ընդհանուր գործարքներից 4.065 հազար օտարման գործարք է, որից 79.6 տոկոսը կազմել են առուվաճառքները, 19.5 տոկոսը նվիրատվությունները և 1 տոկոսը փոխանակությունները: Ի դեպ օտարման գործարքների 39.1 տոկոսը գրանցվել է Երևանում և օտարված անշարժ գույքի 37.1 տոկոսը բազմաբնակարան շենքերի բնակարաններն են: Նախորդ ամսվա համեմատ այս ամիս օտարման գործարքներն աճել են 1.5 տոկոսով, իսկ նախորդ տարվա նույն ամսվա համեմատ 21.7 տոկոսով: Պետք է նշել, որ Երևանում 2011 թ-ի մայիսին առուվաճառքի գործարքների 66.2 տոկոսը արձանագրվել է բազմաբնակարան շենքերի բնակարանների նկատմամբ, ի դեպ նախորդ ամսվա համեմատ նմանատիպ գործարքների ծավալները նվազել են 3.9 տոկոսով, իսկ նախորդ տարվա նույն ամսվա համեմատ 30.4 տոկոսով աճել են: Անշարժ գույքի կադաստրի պետական կոմիտեի ներկայացրած հաշվետվությունը ներառում է նաև Երևանի վարչական շրջանների և Հայաստանի այլ քաղաքների բազմաբնակարան բնակելի շենքերի բնակարանների միջին գները: Բնականաբար Երևանում առաջատարը Կենտրոն վարչական շրջանն է 1 քառակուսի մետրը 443.900 հազար դրամով, նրան նախորդում է Արաբկիրը՝ 342.500 հազար դրամով, իսկ երրորդ հորիզոնականում է Քանաքեռ-Զեյթուն վարչական շրջանը՝ 264.300 հազար դրամով: Ի դեպ ամենաէժան բնակարաններ քաղաքացիները կարող են ձեռք բերել Նուբարաշենում՝ 1 քառակուսի մետրի համար վճարելով 147.000 հազար դրամ: Արդյունքում հաշվետվությունից հետևում է, որ Երևան քաղաքում բազմաբնակարան շենքում բնակարանի 1 քառակուսի մետրի միջին գինը կազմում է 257.500 հազար դրամ, իսկ այս ցուցանիշը նախորդ ամսվա համեմատ աճել է ընդամենը 0.2 տոկոսով: 2011 թ-ի մայիսին մարզերում վաճառվել է 315 բնակարան, որոնց քանակը նախորդ ամսվա համեմատ աճել է 1.3 տոկոսով, իսկ նախորդ տարվա նույն ամսվա համեմատ 14.1 տոկոսով: Երևանից հետո ամենաթանկ բնակարանները Վաղարշապատում են 1 քառակուսի մետրը 165.800 հազար դրամ, նրան աննշան զիջում է Աբովյանը՝ 162.400 հազար դրամով: Հաշվետվության համաձայն՝ 2011թ-ի մայիսին հանրապետությունում իրականացվել են հիփոթեքային գրավադրմամբ 211 գործարք, որից 141-ը՝ Երևանում: Ընդ որում նմանատիպ գործարքների 81.5 տոկոսն իրականացվել է բազմաբնակարան բնակելի շենքերի բնակարանների նկատմամբ: Նախորդ ամսվա համեմատ այս ցուցանիշը նվազել է 2.3 տոկոսով, ի դեպ, Երևանում նվազել է 17.5 տոկոսով, իսկ մարզերում, ընդհակառակը, աճել է 55.6 տոկոսով: Անցած տարվա նույն ամսվա համեմատ հիփոթեքային գրավադրմամբ գործարքների քանակն աճել է 37 տոկոսով, որից Երևանում 22.6 տոկոսով, իսկ մարզերում միասին վերցրած՝ 79.5 տոկոսով: Մարզերում հիփոթեքային վարկերի նկատմամբ նման հետաքրքրությունը, թերևս, կապված է «Մատչելի բնակարան երիտասարդ ընտանիքներին» ծրագրի ներդնմամբ:

33 մլրդ ԱՄՆ դոլար արժողությամբ Պեկին-Շանհայ արագընթաց երկաթգիծը բացվել է հունիսի 30-ին, տեղեկացնում է constructiondigital.com կայքը: Այս տարվա մայիսից արագընթաց գնացքը աշխատում էր փորձնական հիմունքներով, իսկ լայն հասարակության համար հասանելի է դարձել միայն հունիսի վերջին: Ինչպես նախատեսված է, նոր արագընթաց երկաթգիծը կթեթևացնի Չինաստանի տրանսպորտային ցանցի ծանրաբեռնվածությունը: Ի դեպ, երկիրն այս նպատակով իրականացնում է մի շարք խոշոր ենթակառուցվածքային նախագծեր: Նոր արագընթաց երկաթգծի բացումն արդեն ստիպել է որոշ ավիաընկերությունների շուրջ 65 տոկոսով իջեցնել ավիատոմսերի գները՝ վախենալով, որ նոր գիծը կարող է բացասական ազդեցություն ունենալ ավիափոխադրումների ոլորտի վրա: Երկաթգծի 1 ուղղությամբ տոմսերի արժեքը տատանվում է 63-270 ԱՄՆ դոլարի միջև, մինչդեռ Պեկին-Շանհայ ավիատոմսի արժեքն է 200 ԱՄՆ դոլար: Երկաթգծի շինարարությունը սկսվել է 2008 թ-ի ապրիլի 18-ին, և ավարտվել է նախատեսված ժամկետից 1 տարի շուտ: Նոր, 1318 կիլոմետր երկարությամբ Պեկին-Շանհայ երկաթգիծը երկու քաղաքների միջև ընկած ճանապարհի տևողությունը կրճատել է 2 անգամ՝ դարձնելով ընդամենը 5 ժամ: Այն տարեկան ի վիճակի է սպասարկել մոտ 80 մլն ուղևոր: Երկաթուղային մայրուղին նախատեսված է 90 զույգ արագընթաց գնացքների համար, որոնցից 63-ը կսլանան 300 կիլոմետր ժամ արագությամբ ծախսելով ճանապարհին 4 ժամ 48 րոպե, իսկ 27-ը՝ 250 կիլոմետր ժամ արագությամբ, անցնելով հեռավորությունը մոտ 8 ժամում:

Անցած շաբաթ Կալիֆորնիայի Բլայթ քաղաքի մոտ, Մոխավե անապատի տարածքում, նահանգապետ Ջերի Բրաունի և ԱՄՆ-ի ներքին գործերի նախարար Քեն Սալազարի ներկայությամբ (այս դեպարտամենտը հիմնականում զբաղվում է բնական ռեսուրսների կառավարմամբ) սկսվեց աշխարհի խոշորագույն պարաբոլիկ տիպի արևային էլեկտրակայանի շինարարությունը, տեղեկացնում է constructiondigital.com կայքը: Շինարարության ավարտից հետո շահագործման կհանձնվեն 4 արևային էլեկտրակայան, որոնք միասին կկարողանան գեներացնել 1000 մեգավատ էլեկտրաէներգիա: Էներգիայի այսպիսի քանակն ի վիճակի է բավարարել մոտ 800 հազար ամերիկյան միջին տների պահանջարկը: Էլեկտրակայանը կզբաղեցնի մոտ 28,5 քռ. կիլոմետր տարածք: Էլեկտրակայանի շինարարության հիմնաքարի տեղադրման հանդիսավոր արարողության ժամանակ նահանգապետ Բրաունը հայտարարել է, որ այս արևային էլեկտրակայանի շինարարությունը կարևորագույն քայլ է Կալիֆորնիայի ապագա «կանաչ» տնտեսության ձևավորման գործում: Նա նաև ավելացրել է. «մենք պատրաստվում ենք դառնալ առաջատարն աշխարհում արևային էներգիայի արտադրման ոլորտում»: Շինարարության նախապատրաստական աշխատանքները սկսվել են դեռևս 2010 թ-ին, և նախատեսվում է, որ առաջին 2 էլեկտրակայանները կսկսեն աշխատել և կմիացվեն Կալիֆորնիայի էլեկտրացանցին արդեն 2014 թ-ին: Ապրիլին Բլայթ արևային նախագիծը 2.1 մլրդ ԱՄՆ դոլարի փոխառության երաշխիք է ստացել ԱՄՆ-ի Դաշնային ֆինանսավորման բանկից (US Federal Financing Bank), սակայն նախատեսվում է, որ ընդհանուր բյուջեն կհասնի 2.8 մլրդ ԱՄՆ դոլարի: Էլեկտրակայանի շինարարությունը կիրականացնեն աշխարհի արևային էներգիայի ոլորտի 2 առաջատար ընկերություններ՝ Սոլար Թրասթ օֆ Ամերիքան (Solar Trust of America) և Սոլար Միլլենիում Գրուփը (Solar Millennium Group): Ի դեպ Սոլար Միլլենիում Գրուփ ընկերությունը կառուցել է Եվրոպայի առաջին գործող պարաբոլիկ տիպի արևային էլեկտրակայանը: Այս տիպի էլեկտրակայանները տարբերվում են պանելային տիպի արևային կայաններից նրանով, որ այստեղ օգտագործվում է արևի ջերմությունը յուղի 400 աստիճան և ավելի տաքացման համար, որը հետագայում օգտագործվում է գոլորշի ստանալու և տուրբինների աշխատանքը ապահովելու համար, ինչպես սովորական էլեկտրակայաններում: Նշենք նաև, որ պարաբոլային տիպի արևային էլեկտրակայանները արևային էներգիայի օգտագործման միակ ձևն են այսօր, որը հնարավորություն է տալիս արտադրել էլեկտրաէներգիա արևտրային նպատակներով օգտագործելու համար:

Ֆրանսիական Սոսյիտե Ջենեղալ (Societe Generale) բանկի վերլուծաբանների հաշվետվության համաձայն՝ նախորդ տարվա աճից հետո Չինաստանում շինարարական ծառայությունների և արտադրանքի նկատմամբ նվազել է պահանջարկը և դեռ կշարունակի նվազել, հաղորդում է constructiondigital.com կայքը: Վերլուծաբանները նաև ավելացրել են. «շինարարական աշխատանքների ներկայիս տեմպերն արհեստական են, և վաղ թե ուշ ոլորտը պիտի ցավալիորեն համակերպվի ավելի դանդաղ տեմպերի»: Համաձայն հաշվետվության՝ Չինաստանում 2011 թ-ի մայիսին նախորդ տարվա նույն ամսվա համեմատ 65 տոկոսով նվազել են էքսկավատորների վաճառքը, ինչպես նաև զգալի անկում է գրանցվել բուլդոզերիների և բեռնման սարքավորումների վաճառքի ծավալներում: Հակառակ դրան երկրում ցեմենտի օգտագործման ծավալներն անհավանական մակարդակի են հասել: Միայն 2010 թ-ին Չինաստանն օգտագործել է ամբողջ աշխարհի ցեմենտի 55 տոկոսը: Բանկի վերլուծաբանների կարծիքով, Չինասատանն իր առջև այնպիսի նպատակներ է դնում, որոնք վաղ թե ուշ փուչիկի նման հօդս են ցնդելու: Անցած տարի Չինաստանում մեծացավ բնակարանների նկատմամբ պահանջարկը՝ գյուղերից քաղաք տեղափոխված մարդկանց հաշվին: Միայն 2010 թ-ին Չինաստանում շահագործման հանձնվեց 60 մլն բնակչի համար նախատեսված 1.8 մլրդ քառակուսի մետր ընդհանուր մակերեսով բնակարաններ: Բացի այդ Կառավարության 5 տարվա նախագծի համաձայն նախատեսվում է մինչև 2015 թ-ը կառուցել ևս 36 մլն բնակարան 300 մլն բնակչի համար: Սակայն Միջազգային արժութային ֆոնդի տվյալներով՝ հաջորդ 4 տարիների ընթացքում Չինաստանն այնքան բնակարան կկառուցի, որքան կկարողանա սպառել միայն ապագա 2 տասնամյակի ընթացքում: