Սանկտ Պետերբուրգի քաղաքաշինության և ճարտարապետության խորհուրդը թույլատրել է Գազպրոմ ընկերությանը նախօրոք գնված Լախտա պատմական թաղամասում կառուցել մինչև 500 մետր բարձրությամբ երկնաքեր, տեղեկացնում է news.mail.ru կայքը: Գազպրոմ ընկերությունը, Սանկտ Պետերբուգի պատմական կենտրոնից 10 կիլոմետր հեռավորության վրա՝ Ֆիննական ծովածոցի ափին, նախատեսում է կառուցել գործարար-հասարակական «Լախտա կենտրոն» թաղամասը՝ ընկերության կենտրոնական գրասենյակի 470 մետր բարձրությամբ աշտարակով: Հուլիսի կեսին քաղաքի հողօգտագործման և կառուցապատման խորհուրդը քաղաքաշինության և ճարտարապետության խորհրդին էր ներկայացրել մինչև 500 մետր բարձրությամբ աշտարակի նախագիծը և խորհուրդ տվել թույլատրել շինարարությունը: Ընդ որում, տվյալ տարածքում կառուցապատումը օրենքով չպետք է գերազանցի 27 մետրը: Սկզբում Գազպրոմ ընկերությունը ցանկանում էր 400 մետր բարձրությամբ աշտարակ կառուցել քաղաքի Կարմիր գվարդիականների թաղամասում գտնվող Օխտինյան հրվանդանի վրա, իսկ աշտարակը կոչվում էր «Օխտա կենտրոն»: Սակայն հասարակական բողոքների արդյունքում ընկերությունը հրաժարվեց իր նախաձեռնությունից և վաճառեց շինարարության համար նախօրոք գնված տարածքը: «Օխտա Կենտրոնը» երկար ժամանակ փնտրում էր իր գտնվելու նոր վայրը և անգամ կիսալուրջ առաջարկվեց այն կառուցել Երևանում: Սակայն, միամտություն է այսօրվա Ռուսաստանում այլ «քաղաք» պատկերացնել Գազպրոմի այս նոր՝ ամբիցիոզ նախագծի համար, որտեղ 2018 թվականից պետք է գործի «Գազպրոմ Նավթ» ընկերության կենտրոնական գրասենյակը: Ավելի ուշ ընկերությունը Ֆիննական ծովածոցի ափին գտնվող Լախտա պատմական թաղամասում գնեց 140 հազար քառակուսի մետր տարածք և պատրաստվում է մինչև 2018 թ-ը այստեղ կառուցել երկար սպասված աշտարակը, բայց արդեն «Լախտա կենտրոն» անվանմամբ: Ներկայումս ճարտարապետական ԱրԷմՋէյԷմ (RMJM) ընկերությունը զբաղված է նախկին նախագիծը նոր տարածքին համապատասխանեցնելու խնդիրներով: Գազպրոմ ընկերությունը նախատեսում է այս գործընթացն ավարտել մինչև 2012 թ-ը և անմիջապես սկսել կենտրոնի շինարարությունը:

ՀՀ կառավարությանն առընթեր անշարժ գույքի կադաստրի պետական կոմիտեն հրապարակել է հաշվետվություն, որտեղ երևում է, որ Երևանի անշարժ գույքի շուկան նախորդ ամսվա համեմատ աշխուժացել է: Այսպես, 2011 թ-ի հունիսին Երևանում անշարժ գույքի նկատմամբ իրականացվել է 4.260 հազար գործարք: Ի դեպ այս ցուցանիշը նախորդ ամսվա համեմատ ավելացել է 4.8, իսկ նախորդ տարվա նույն ամսվա համեմատ 6.8 տոկոսով: Ի տարբերություն այս աճի, սույն տարվա հունիսի տվյալներով մայրաքաղաքում անշարժ գույքի միջին գները 2010թ հունիսի համեմատ նվազել են 9 տոկոսով (283000/256800), իսկ անցած ամսվա համեմատ նվազել են 0,3 տոկոսով: Այսինքն, մեկ տարվա կտրվածքով անշարժ գույքը բավականին էժանացել է, բայց վերջերս բավականին աճել է գործարքների քանակը: Միանշանակ եզրակացնել անհնար է, բայց այս հանգամանքը հնարավոր տնտեսական աճի հետ համատեղ կարող է հանգեցնել անշարժ գույքի գների որոշակի աճի: Իսկ այսօր, քանի անշարժ գույքի գները դեռ նվազում են, բնագավառը գրեթե լրիվ կորցրել է իր գրավչութունը ներդրողների համար, ինչն էլ իր հերթին բերել է շուկայի ոչ սպեկուլյատիվ հավասարակշռմանը: Հատկանշական է, որ գները մեկ տարվա կտրվածքով ամենաշատը նվազել են մայրաքաղաքի Արաբկիրի համայնքում՝ 13,5 տոկոսով (395500/342000), իսկ միակ համայնքը որտեղ գները մեկ տարվա կտրվածքով անգամ աճել են Նուբարաշենն է՝ աճի 0,6 տոկոսով (147800/148700), սակայն այստեղ այսօր գրանցված է մայրաքաղաքի անշարժ գույքի ամենացածր գները: Ավելի մանրամասն կարող եք կարդալ այստեղ:

Թայբեյ 101 երկնաքերը դարձել է աշխարհի ամենաբարձր «Կանաչ» կառույցը՝ արժանանալով LEED պլատինե վկայականի, էկոլոգիապես մաքուր շինությունների գնահատման ամենաբարձր մակարդակին: 509 մետր բարձրությամբ Թայբեյ 101 աշտարակը աշխարհի ամենաբարձր շինությունների ցուցակում գրավում է երկրորդ տեղը՝ զիջելով միայն 828 մետր բարձրությամբ Բուրջ Խալիֆաին: Վերջերս աշտարակը արդիականացվել է և համալրվել նորագույն էկոլոգիապես մաքուր տեխնոլոգիաներով: Աշտարակի արդիականացումն իրականացրել են էլեկտրոնային հսկա Սիմենս (Siemens) ընկերությունը՝ համագործակցելով ինտերիերի նախագծողներ Սթիվեն Լիչ Ասոշիեյթս (Steven Leach Associates) և Էկո Թեք Ինթերնեշնլ (Eco Tech International) ընկերությունների հետ: Մեկ այլ էլեկտրոնային աղբյուրի focustaiwan.tw-ի տվյալներով, շինության սերտիֆիկացումը 3 ռեկորդ է գրանցել՝ դառնալով աշխարհի ամենաբարձր «կանաչ» երկնաքերը (509 մետր), աշխարհի խոշորագույն «կանաչ» շինությունը (150 հազար քառակուսի մետր) և աշխարհի ամենաօգտագործվող «կանաչ» աշտարակը (90 վարձակալ): Շինության նորագույն տեխնոլոգիաները հնարավորություն են տալիս տարեկան խնայել 14.4 մլն կիլովատ ժամ էլեկտրաէներգիա, որը հավասար է 1.24 մլն ԱՄՆ դոլարի, բացի այդ օդում ածխաթթու գազի պարունակությունը հարաբերվում է 600-ը 1 մլն-ի, ինչն էլ հնարավորություն է տալիս աշտարակի վարձակալներին մշտապես մաքուր օդ շնչել: Հիշեցնենք, որ շենքի սեփականատերը՝ Թայբեյի ֆինանսական կենտրոն կորպորացիան 2009 թվականի նոյեմբերին հայտարարեց, որ մինչ 2011թվականի ամառը, Թայբեյ-101-ը կդառնա աշխարհի «ամենականաչ» ամենաբարձրահարկ շենքը LEED- ի ստանդարտներով (Leadership in Energy & Environmental Design- դա միջազգային ճանաչում ունեցող «կանաչ շինարարության» սերտիֆիկացման համակարգ է):

Օգոստոսի 2-ին Սաուդյան Արաբիայի արքայազն, միլիարդատեր Ալվալիդ իբն Թալալը (Alwaleed bin Talal) և երկրի խոշորագույն կառուցապատող Բեն Լադեն Գրուփ (Bin Laden Group – հիմնված է աշխարհի, արդեն հանգուցյալ, համար 1-ին ահաբեկչի հոր կողմից) ընկերությունը համաձայնագիր են ստորագրել՝ Կարմիր ծովի ափին գտնվող Ջեդդա քաղաքում կառուցել 1.2 մլրդ ԱՄՆ դոլար արժողությամբ աշխարհի ամենաբարձր երկնաքերը: Ինչպես տեղեկացնում է ctbuh.org կայքը, հազար մետր բարձրությամբ և 530 հազար քառակուսի մետր ընդհանուր մակերեսով Արքայական Աշտարակը (Kingdom Tower) հանդիսանում է 5.3 մլն քառակուսի մետր ընդհանուր մակերեսով Արքայական Քաղաք (Kingdom City) նախագծի գլխավոր կառույցը: Շինարարական աշխատանքներից հետո այս աշտարակը 172 մետրով կգերազանցի Էդրիան Սմիթի նախագծած (Skidmore, Owings and Merrill LLP), աշխարհի ներկայիս ամենաբարձր երկնաքերի՝ 828մ բարձրությամբ Բուրջ Խալիֆաի բարձրությունը: Արքայական Աշտարակը հանրությանը կառաջարկի բարձրակարգ բնակարաններ, հյուրանոց, գրասենյակային տարածքներ, ինչպես նաև այստեղ կտեղակայվի աշխարհի ամենաբարձր դիտահարթակը: Ծրագրի նախագիծն իրականացնում է ԱՍ+ՋիՋի (AS+GG) ճարտարապետական ընկերությունը: Նախագծման աշխատանքները ընթանում են արագ տեմպերով, իսկ շինարարական աշխատանքները շուտով կսկսվեն և արդեն հայտարարված է հիմքերի կառուցման աշխատանքների մրցույթ: Արքայական Քաղաքի շինարարական բյուջեն գնահատվում է 20 մլրդ ԱՄՆ դոլար, իսկ միայն աշտարակինը 1.2 մլրդ ԱՄՆ դոլար: Արքայական Աշտարակի բարձրությունը զարգացած վերելակային համակարգ է նախատեսում: Ըստ նախնական տվյալների՝ աշտարակը կսպասարկեն 12 շարժասանդուղք և 59 վերելակ, որից 5-ը երկխցիկանի (տեղադրված իրար վրա): Ի դեպ դիտահարթակ տանող վերելակները կաշխատեն 10 մետր/ վայրկյանում արագությամբ: Շինության մեկ այլ նախագծային առանձնահատկությունն էլ 157-րդ հարկում տեղակայված 30 մետր տրամագծով երկնային պատշգամբն է: Բացի աշտարակից ԱՍ+ՋիՋի ընկերությունը նախագծում է նաև 230 հազար քառակուսի մետր մակերեսով ափամերձ թաղամասը, որտեղ կլինեն բնակելի և առևտրային տարբեր շինություններ, առևտրի կենտրոն, գեղեցիկ բաց այգիներ և այլն:

Թաիլանդի Օդանավակայաններ (Airports of Thailand) պետական-մասնավոր միության ղեկավարությունը որոշել է մոտ 5.5 մլրդ ԱՄՆ դոլար հատկացնել Բանգկոկի Սուվարնաբհումի (Suvarnabhumi) օդանավակայանի վերակառուցման աշխատանքների իրականացման համար: Ինչպես տեղեկացնում է Bangkok Post պարբերականի էլեկտրոնային տարբերակը, այս ծրագիրի նպատակն է, որ երկրի գլխավոր միջազգային և ներքին թռիչքներ իրականացնող օդանավակայանը 2024 թ-ին սպասարկի տարեկան մոտ 103 մլն ուղևոր: Թաիլանդի Օդանավակայաններ միության նպատակն է, Ասիայի խոշորագույն օդանավակայններից մեկը համապատասխանեցնել Քաղաքացիական ավիացիայի միջազգային ասոցիացիայի (ICAO) կողմից ընդունված «Միացյալ օդանավակայան» հասկացության չափանիշներին: Օդանավակայանի վերանորոգումը կիրականացվի 3 փուլով: 732 մլն ԱՄՆ դոլար արժողությամբ առաջին փուլը կսկսի 2013 թ-ին և կավարտվի 2016-ին: 3 տարիների ընթացքում ներքին թռիչքների համար առանձին տերմինալ կկառուցվի, նույն տերմինալի համար առանձին ավտոկայանատեղի կկառուցվի, ինչպես նաև կկառուցվի օդանավակայանի 3-րդ թռիչքուղին: Երկրորդ փուլը կտևի 2017-2020 թթ-ը և կկազմի 1.47 մլրդ ԱՄՆ դոլար: Այս տարիներին կկառուցվի արդեն 4-րդ թռիչքուղին, ինչպես նաև կընդլայնվեն ներքին և միջազգային թռիչքները սպասարկող տերմինալները: Երրորդ և վերջին փուլի ընդհանուր բյուջեն կկազմի 3.30 մլրդ ԱՄՆ դոլար, իսկ վերանորագման աշխատանքները կսկեն 2021 թ-ին և օդանավակայանն ամբողջությամբ շահագործման կհանձնվի արդեն 2024թ-ին: Վերանորոգման վերջին փուլի ընթացքում կկառուցվի օդանավակայանի 5-րդ թռիչքուղին, ինչպես նաև հավելյալ ավտոկայանատեղիներ և շինություններ: Թաիլանդի Օդանավակայաններ միության ներկայացուցիչ Տիիրապոլ Նոպրամպայի (Teerapol Noprampa) խոսքերով, արդեն 2016 թ-ին մայրաքաղաքի հին Դոն Մյուանգ (Don Mueang) օդանավակայանում իրականացվող ներքին չվերթները հնարավոր կլինի սպասարկել Սուվարնաբհումի օդանավակայանի նորակառույց տերմինալից: Թաիլանդի Սուվարնաբհումի օդանավակայանը շահագործման է հանձնվել 2006 թ-ի հոկտեմբերին և արդեն 2007 թ-ին վերջին սպասարկվող ուղևորների քանակը հասել էր տարեկան 40 մլն-ի: 2010 թ-ին օդանավակայանը աշխարհում իրականացվող ուղևորափոխադրումների ծավալով գրավել է 17-րդ հորիզոնականը (տարեկան ավելի քան 42 մլն ուղևոր), իսկ Ասիայում 5-րդը ՝ զիջելով միայն Պեկինի, Տոկիոյի, Հոնկոնգի և Դուբայի օդանավակայաններին: