Երևանի «Զվարթնոց» միջազգային օդանավակայանում կառուցվող նոր համալիրը նախատեսվում է շահագործման հանձնել մինչ տարվա վերջ, իսկ հանրային գոտու մասի շինարարությունը կավարտվի աշնան սկզբին: Համալիրը շահագործման հանձնելուց հետո «Զվարթնոցը» կդասվի միջազգային «B» դասի օդանավակայանների շարքին։ Նշենք, որ օդային տրանսպորտի միջազգային ասոցիացիայի (IATA) ստանդարտներով՝ օդանավակայանները բաժանվում են չորս դասի՝ A, B, C, D։ Ամենաբարձրը A դասն է: Ըստ «Արմենիա միջազգային օդանավակայաններ» ընկերության տնօրենի տեղակալ Անդրանիկ Շխյանի՝ օդանավակայանի հանրային գոտու նոր տերմինալի շինարարությունը կամբողջացնի նոր համալիրը: 34 հազար քառակուսի մետր տարածք զբաղեցնող շինությունն ամբողջովին կփոխարինի նախկին համալիրին: Հաշվառման սրահը կունենա ընդհանուր առմամբ 46 հաշվառման սեղան: Նոր համալիրի երրորդ փուլի շենքում կտեղակայվեն բարձրակարգ ուղևորների սպասարկման և դիվանագիտական սրահները: Հանրային սրահի մուտքի առջև կկառուցվի նոր կայանատեղի 600 ավտոմեքենայի համար: Նոր կայանատեղը ուղղակի կերպով կմիանա համալիրի յուրաքանչյուր շահագործվող մակարդակի հետ: Ա. Շխյանը լրագրողների հետ հանդիպման ժամանակ տեղեկացրեց նաև, որ նոր օդանավակայանի ընդհանուր բյուջեն կազմում է 224 մլն դոլար, որից մինչ այժմ կատարվել է 160 մլն դոլարի ներդրում: Եթե ներկայումս օդանավակայանը սպասարկում է 1.6 մլն ուղևոր, ապա շինարարության ավարտից հետո կկարողանա սպասարկել մոտ 3 մլն: Նոր օդանավակայանի կառուցումն անհրաժեշտություն էր, եթե հաշվի առնենք այն փաստը, որ Ա. Շխյանի խոսքերով վերջին 4 տարիների ընթացքում ուղևորահոսքերը տարեկան ավելանում են մոտ 10-12 տոկոսով: Նշենք, որ օդանավակայանի նոր համալիրի շինարարությունը սկսվել է դեռևս 2008 թ-ին: Օդանավակայանի հիմնական շինարարական աշխատանքներն իրականացնում է արգենտինական «Քուրթիլ Քորփորեյշն» (Courthil Corporation) ընկերությունը: Ավտոկանգառի շինարարական աշխատանքները իրականացնում է հայկական «ՍահակյանՇին» կազմակերպությունը: Վերջինս պատասխանատու է նաև թունելների, հենապատերի և բարեկարգման աշխատանքների համար: Կոյուղային և ներքին հարդարման աշխատանքներն իրականացնում է մեկ այլ հայկական կազմակերպություն՝ «ՄԼԼ Ինդասթրիս»-ը (MLL Industries): Կան նաև այլ կազմակերպություններ, որոնք իրականացնում են այլ շինարարական աշխատանքներ:

Հայաստանի բնակարանաշինության ոլորտում այս տարվա առաջին եռամսյակում նախորդ տարվա նույն ժամանակահատվածի համեմատ գրանցվել է 198.4 տոկոս աճ: Այս մասին ներկայացված է Ազգային վիճակագրական ծառայության զեկույցում: Ոլորտում կատարվել է ընդհանուր 14 մլրդ 655.7 մլն դրամի աշխատանքներ: Վերոնշյալ աճը պայմանավորված է կազմակերպությունների կողմից կատարված ներդրումների ավելացումով: Ի դեպ նախորդ տարվա առաջին եռամսյակի համեմատ, այս տարի հունվար-մարտ ամիսներին վերջիններիս միջոցների հաշվին կատարված աշխատանքների ծավալը աճել է 3.1 անգամ և կազմել 5 մլրդ 996.2 մլն դրամ: 15.5 տոկոսով ավելացել է նաև բնակչության միջոցներով կատարված բնակարանաշինության ծավալները՝ համապատասխանաբար կազմելով 5 մլրդ 629 մլն դրամ: Ինչպես ներկայացված է ուսումնասիրության մեջ, նախորդ տարվա համեմատ պետական ֆինանսավորմամբ իրականացվող բնակարանաշինության ծավալներում ոչ մի փոփոխություն չի եղել՝ 3 մլրդ 30.5 մլն դրամ: Բնականաբար բնակարանաշինության ծավալներով առաջատարը Երևանն է: Այստեղ նախորդ տարվա նույն ժամանակահատվածի համեմատ բնակարանաշինության ծավալներն աճել են 2.4 անգամ՝ կազմելով 7 մլրդ 391.4 մլն դրամ: Երևանում բնակիչների միջոցներով կատարված բնակարանաշինությունն աճել է 82.6 տոկոսով՝ կազմելով 1 մլրդ 382.5 մլն դրամ: Պետական ֆինանսավորման ծավալը մնացել է նույնը՝ 95.6 մլն դրամ: Երևանում կազմակերպությունների կողմից իրականացված բնակարանաշինության ծավալները կազմել են 5 մլրդ 913.3 մլն դրամ: Պետք է նշել, որ կազմակերպությունները բնակարանաշինական աշխատանքներ կատարել են հիմնականում Երևանում: Թերևս մարզերը բիզնեսի տեսանկյունից հրապուրիչ չեն: Վերջիններիս միջոցներով շինարարական աշխատանքներ են կատարվել միայն Տավուշի մարզում՝ 82.9 մլն դրամի: Բնակարանաշինության ծավալներով երկրորդ և երրորդ տեղերում են Շիրակի և Լոռվա մարզերը՝ համապատասխանաբար 1 մլրդ 854.3 մլն և 1 մլրդ 547.8 մլն դրամով: Ի դեպ մարզերում իրականացված բնակարանաշինության առյուծի բաժինը պատկանում է բնակիչներին: Պետական ֆինանսավորմամբ բնակարանաշինություն իրականացվել է միայն Շիրակի և Լոռվա մարզերում՝ համապատասխանաբար 1 մլրդ 776.3 մլն և 1 մլրդ 158.6 մլն դրամ ծավալներով: Հայաստանում 2011թ-ի հունվար-մարտ ամիսներին գործարկվել է 59.304 հազար քառակուսի մետր մակերեսով բնակելի տարածք, նախորդ տարվա նույն ժամանակահատվածի 29.888 հազար քառակուսի մետրի փոխարեն:

Fashion TV-ն և Դուբայի Ալ Հաբթուր Գրուփ (Al Habtoor Group) ընկերությունը համաձայնագիր են ստորագրել՝ Դուբայում կառուցել աշխարհի առաջին նորաձևության հյուրանոցը: Նորությունն այս շաբաթ Կաննի միջազգային կինոփառատոնի ժամանակ հայտարարել է Fashion TV-ի ներկայացուցիչը: Հյուրանոցը կլինի Դուբայի սրտում, սակայն հստակ տվյալներ վայրի և բացման ժամկետների մասին չի հայտարարվել: Հյուրանոցը կլինի Ալ Հաբթուր Գրուփ ընկերության սեփականությունը և կղեկավարվի վերջինիս կողմից: Հյուրանոցը կունենա 30 հարկ և ամբողջ ճակատային մասով կտեղադրվի 100 մետրանոց LED էկրան, որը շուրջօրյա կհեռարձակի Fashion TV-ի վերջին հաղորդումներն ու նորությունները: Հյուրանոցի 200 սենյակները կլուսավորվեն նորագույն տեխնոլոգիաներով և հագեցած կլինեն ամենաժամանակակից տեսաձայնային համակարգերով: Հյուրերն իրենց սենյակներից կկարողանան դիտել Fashion TV-ի բոլոր 30 հեռուստաալիքները և օգտվել ամենամեծ նորաձևության DVD գրադարանից: Հյուրանոցում կլինեն նաև բազմազան ռեստորաններ, բարեր, հյուրասրահներ, գիշերային ակումբներ, սպա կենտրոններ և կինոթատրոններ: Ալ Հաբթուր Գրուփ (Al Habtoor Group) ընկերության տնօրեն Մուհամեդ Ալ Հաբթուրի (Mohammed Al Habtoor) խոսքերով, նորաձևության հյուրանոցի կառուցումը սպասված ծրագիր է, որը հսկայական ազդեցություն կունենա Դուբայի հետագա զարգացման վրա՝ ապագայում վերածելով համաշխարհային նորաձևության մայրաքաղաքի: Անշուշտ, դրանից հետո քաղաքը երբեք նույնը չի լինի: Սա միակ նորաձևության հյուրանոցը չի լինի: Հարցազրույցի ժամանակ Fashion TV-ն և Ալ Հաբթուր Գրուփ ընկերութան ներկայացուցիչները հայտարարել են, որ նախագծեր կան նույնատիպ հյուրանոցներ կառուցել համաշխարային նորաձևության այնպիսի կենտրոններում, ինչպիսինն են՝ Փարիզը, Շանհայը, Նյու Յորքը և Միլանը: Ալ Հաբթուր Գրուփ (Al Habtoor Group) ընկերությունը աճել է Արաբական Միացյալ Էմիրությունների զարգացմանը զուգահեռ: Հայտնի լինելով որպես շինարարական ընկերություն՝ վերջինս համաշխարհային շուկայում ճանաչում է ստացել շնորհիվ տարբեր ոլորտներում ներգրավվածության, այդ թվում՝ հյուրանոցների կառուցման, ավտոմոբիլաշինության, կրթության, ապահովագրութաւն և տպագրության: Այս ընկերությունը կառուցել է Դուբայի միջազգային օդանավակայանը և Դուբայի հիվանդանոցը: Ալ Հաբթուր Գրուփ ընկերությունը նաև կառուցել է 321 մետր բարձրությամբ 7 աստղանի Բուրջ Ալ Արաբ (Burj Al Arab) և 26 հարկանի 600 սենյակներից բաղկացած Ջումեյրա Բիչ (Jumeirah Beach) հյուրանոցները:

Այս շաբաթ Փարիզի հյուսիս-արևմտյան շրջանի Դեֆանս գործարար թաղամասում կայացել է Ֆրանսիայի ամենաբարձր երկնաքերի՝ Առաջին աշտարակի (First Tower) բացման հանդիսավոր արարողությունը: 324 մետրանոց Էյֆելյան աշտարակի քաշը մոտ երկու անգամ գերազանցող (21000 տն) այս սպիրալաձև կառույցը Փարիզի Մոնպարնաս (Montparnasse) աշտարակին զրկել է Ֆրանսիայի ամենաբարձր շենքի տիտղոսից: Մոնպարնաս աշտարակի բարձրությունը 210 մետր է, այն դեպքում, երբ Առաջինինը հասնում է 231 մետրի: Չնայած երկնաքերի ճարտարապետական հաղթանակին` մինչ օրս աշտարակի միայն կեսն է վարձակալությամբ հանձնված: Դեռևս Առաջինի միայն 80 հազար քառակուսի մետր տարածք է վարձակալությամբ հանձնված: Աշտարակի շինարարական աշխատանքները սկսվել են 2008 թ-ին, իսկ բյուջեն կազմել է 300 մլն եվրո (440մլն դոլար): Աշտարակի առաջին վարձակալը Էռնստ Ընդ Յանգ (Ernst and Young) հաշվապահական ընկերությունն է: Այնուամենայնիվ, Առաջին աշտարակը երկար չի պահպանի Ֆրանսիայի ամենաբարձրի տիտղոսը, քանի որ արդեն շինթույլատվություն է տրվել մեկ այլ աշտարակի համար: Շուտով Դեֆանս թաղամասում կմեկնարկի Փարոս աշտարակի (Phare Tower) շինարարությունը, որի բարձրությունը կլինի 300 մետր: Աշտարակի շինարարության ավարտը նախատեսված է 2016թ-ին:

Տասներեք տարվա գործունեությունից հետո Google-ը որոշել է ունենալ իր սեփական հասցեն: Համացանցում ամենամեծ որոնողական ցանցի ղեկավարները որոշել են նախագծել և կառուցել ընկերության գլխավոր գրասենյակի շենքը: Շենքի նախագծման աշխատանքներով զբաղվելու է գերմանական Ինգենհովեն ճարտարապետական (Ingenhoven Architects) ընկերությունը: 2011 թ-ին Google-ը մտադիր է աշխատակազմը համալրել ևս 6 հազար մասնագետով, և սա շարունակական բնույթ է կրելու, ուստի նոր և մեծ գրասենյակը նաև անհրաժեշտություն է: Ինչպես տեղեկացնում է Mercury News ինտերնետային կայքը, Google-ն իր գլխավոր գրասենյակը կկառուցի Կալիֆորնիա նահանգում գտնվող փոքրիկ Մաունթին-Վյու (Mountain View) քաղաքում` Պալո-Ալտո (Palo Alto) քաղաքից հարավ Մոֆեթ (Moffett) դաշնային օդանավակայանի հարևանությամբ: Այս տարվա մարտին Google-ը և Մաունթին-Վյուի (Mountain View) քաղաքապետարանը համաձայնագիր են կնքել՝ ընկերությանը 53 տարով վարձակալության հանձնել 9,4 ակր հողատարածք: Նույն համաձայնագրով Google-ը պարտավորվել է վճարել 30 մլն դոլար կանխավճար: Նշենք, որ դեռևս 2007 թ-ին Google-ը և Մաունթին-Վյուի (Mountain View) քաղաքապետարանը մեկ այլ հողի (9,2 ակր) վարձակալության համաձայնագիր էին կնքել: Այս գործարքները թույլ կտան ինտերնետային հսկային սկսել կառուցապատման աշխատանքները և ստանալ մոտ 55 300 քռ. մ. գրասենյակային և հետազոտական տարածքներ: Ինգենհովեն ճարտարապետական ընկերությունն աշխարհում հայտնի է «կանաչ ճարտարապետության» ոլորտում իրականացված հետաքրքիր նախագծերով: Վերջինս նախագծեր է իրականացրել Եվրոպայում, Ասիայում և Ավստրալիայում, որոնց թվում են՝ Եվրոպական ներդրումային բանկի գլխավոր գրասենյակի շենքը՝ խողովակի տեսքով՝ պատրաստված պողպատից և ապակուց, Շտուտգարտի «էկոլոգիապես մաքուր» երկաթուղային կայանը, որը չունի ոչ մի թունավոր արտանետում, ինչպես նաև ջեռուցման, սառեցման և օդափոխության արհեստական համակարգեր: Google-ի ներկայացուցիչը Mercury News ինտերնետային կայքին հայտնել է, - «Մենք խնդրել ենք նախագծել ամենականաչ և հնարավորինս էկոլոգիապես ամենաանվնաս շենքը»: Այս նախագծի մանրամասները դեռևս հայտնի չեն, սակայն Մաունթին-Վյուի (Mountain View) քաղաքապետարանի ներկայացուցիչներն ասում են, որ շինարարությունը կսկսվի 2012 թ-ին: