Հանրահայտ «Սագրադա Ֆամիլիա» (Sagrada Familia թարգմ. - Սուրբ Ընտանիքի Եկեղեցի) տաճարի շինարարությունը ձգվում է ավելի քան 130 տարի, և միայն 21-րդ դարի նորագույն տեխնոլոգիաների, մասնավորապես՝ 3D-տպիչների, շնորհիվ հնարավորություն է ստեղծվել 19-րդ դարի կառույցի շինարարությունն ավարտել 2026 թ-ին: Կարելի է հավաստել, որ «Սագրադա Ֆամիլիան» աշխարհում ամենաերկար շինարարական գործընթաց ունեցող կառույցներից մեկն է: Շինարարական աշխատանքները սկսվել են դեռևս 1882 թ-ին, իսկ 1926 թ-ին կառույցի գլխավոր ճարտարապետի մահվան ժամանակ կառուցվել էր տաճարի ընդամենը մեկ քառորդ մասը; Ինչպես տեղեկացնում է BBC լրատվական գործակալությունը, չնայած հանրահայտ տաճարի արտաքին ձևավորումն անավարտ է, և դեռ շատ անելիք կա Գաուդիի նախագիծը կյանքի կոչելու համար, այնուամենայնիվ, այս գլուխգործոցն բաց է հանրության առաջ: «Սագրադա Ֆամիլիա» տաճարի նախագիծը երկարատև շինարարական գործընթացի և գերազանց նախագծի շնորհիվ իր գոյության ընթացքում բազմաթիվ նախագծողների և ճարտարապետների ուշադրության կենտրոնում է եղել: Այսօր շատերն են ուրախ, որ նորագույն տեխնոլոգիաները հնարավորություն են տալիս ժամանակակից ճարտարապետական թիմին ավարտել տաճարի շինարարությունը բնօրինակին հնարավորինս մոտ: Նախագծի ներկայիս ղեկավարները շինարարական գործընթացում 3D-տեխնոլոգիաները սկսել են օգտագործել 2001 թ-ից, սակայն վերջին տարիներին այս տեխնոլոգիաների արագ զարգացումն էլ ավելի արագ թափ հաղորդեցին շինարարական աշխատանքերին: Նախագծի գլխավոր ճարտարապետ Ջորդի Քոլը (Jordi Coll) պնդում է, որ Գաուդին անձամբ կողմ կլիներ 3D տեխնոլոգիաների օգտագործմանը ճարտարապետության մեջ: Եթե նա այսօր կենդանի լիներ, նա միանշանակ առավելագույնս կօգտագործեր 3D տեխնոլոգիաներն իր տաճարի շինարարության ժամանակ, քանի որ դեռևս 19-րդ դարում նրա շինությունը նախագծված էր եռաչափ տարածության մեջ: «Սագրադա Ֆամիլիա» տաճարի շինարարական և ճարտարապետական թիմն ունի իր սեփական տեխնիկական ստուդիան, որտեղ տեղադրված Է 2 հատ 3D-տպիչ: Տպիչները հիմնականում օգտագործվում են տաճարի բնօրինակ հատվածների վերակառուցման համար: Բնօրինակ գիպսե մոդելներՆ ավերվել են Իսպանիայում քաղաքացիական պատերազմի ժամանակ: Ճարտարապետական թիմն ամեն ինչ անում է, որ նորագույն տեխնոլոգիաների օգնությամբ կարողանա վերստեղծել Գաուդիի բնօրինակը: Տաճարի այցելուներն այսօր հիանում են կատարված աշխատանքով և վստահ են, որ թիմը շինարարությունը կհասցնի իր տրամաբանական և գերազանց ավարտին:

Այսօր ամբողջ աշխարհում կան Էյֆելյան աշտարակի ավելի քան 41 կրկնօրինակներ, որոնցից 3-ը գտնվում են Չինաստանում: 2016 թ-ին չինական Մակաո քաղաքում նախատեսվում է շահագործման հանձնել այս երկրում կառուցվող չորրորդ կրկնօրինակը: Սակայն ամեն ինչ այսքանով չի ավարտվի և մոտ ապագայում ամբողջ աշխարհում կկառուցվեն այս բրենդային շինության տասնյակ կրկնօրինակներ: Անցած տարի «Լաս Վեգաս Սենդս» (Las Vegas Sands) ընկերության մասնաճյուղ «Ասիա Սենդս Չինաստան» (Asia Sands China) ընկերությունը հայտարարել էր, որ Մակաոյի իշխանությունները թույլատրել են քաղաքում փարիզյան թեմատիկայով հանգստավայր կառուցել: Իսկ արդեն այս տարվա սկզբին ասիական մասնաճյուղի նախագահ Էդվարդ Թրեյսին հայտարարեց, որ 2,7 մլրդ ԱՄՆ դոլար բյուջեով նախագըծի շինարարական աշխատանքները բուռն ձևով առաջ են ընթանում: Փարիզյան թեմատիկայով կառուցվող «Փարիզյան Մակաո» (Parisian Macao) հանգստավայրն այցելուներին առաջարում է մոտ 3000 հյուրանոցային համարներ, 45 հազար քառակուսի մետր ընդհանուր մակերեսով առևտրային տարածքներ, 5-աստղանի բազմաթիվ հանրային տարածքներ, ֆրանսիական ռեստորաններ և ամենագլխավորը՝ Էյֆելյան աշտարակի կրկնօրինակը՝ դիտահարթակով և 3-րդ հարկում տեղակայված ռեստորանով: Յուրօրինակ հանգստավայրի այցելուները հնարավորություն կունենան նաև վերելակով բարձրանալ աշտարակի գագաթը, որպեսզի զմայլվեն բացվող գեղեցիկ տեսարանով: «Փարիզյան Մակաոյի» առևտրային կենտրոնները կլինեն ամենանորաոճ տենդենցները ներկայացնող բրենդային խանութներ հագուստի, զարդերի, ժամացույցների և շքեղ աքսեսուարների ոլորտում: Հանգստավայրի բոլոր կառույցները կապված կլինեն կամուրջներով և շարժական քայլուղիներով, որոնք անկախ դրսի եղանակային պայմաններից կլինեն հարմարավետ այցելուների համար:

1800 թվականին Ֆրանսիայի կայսեր Նապոլեոն Բոնապարտի նստավայր հանդիսացած 74 սենյականոց առանձնատունը վաճառքի է հանվել ընդամենը 5,78 մլն ԱՄՆ դոլարով, տեղեկացնում է բրիտանական Daily Mail պարբերականը: Առանձնատան վաճառքով զբաղվում է «Բյուչեմփ Իսթեյթս» (Beauchamp Estates) անշարժ գույքի գործակալությունը, որն ինչպես պնդում է պարբերականը, զուգահեռ միևնույն գնով վաճառում է ընդամենը 3 սենյականոց բնակարան լոնդոնյան Բելգրավիա շրջանում: Իտալական Պյեմոնթում գտնվող «Լա Վոգլինա» (La Voglina) առանձնատունը կառուցվել է 18-րդ դարում՝ բարոկկո ոճի հայտնի ներկայացուցիչ, ճարտարապետ Ֆիլիպպո Յուվարայի կողմից: Պատմական կալվածքը և վերջինիս հարող հողատարածքի ընդհանուր մակերեսը կազմում է 240 հազար քառակուսի մետր, որտեղ տեղակայված են 13 ննջասենյակ, 9 լոգարան, 2 ճաշասրահ, 2 խոհանոց, 10 ընդունարան, հյուրերի տնակ և փոքրիկ մասնավոր մատուռ՝ նախատեսված 30 այցելուի համար: Պատմական առանձնատունը շրջապատված է այգիներով, ինչպես նաև տարածքում գտնվում են խաղողի այգիներ, որոնց վերամշակման պարագայում հնարավոր կլինի տարեկան ստանալ մոտ 100 հազար շիշ գինի: 215 տարի առաջ 1800-ական թվականներին Ֆրանսիայի կայսրը Մարենգոյի ճակատամարտի ընթացքում այս առանձնատունն օգտագործել է որպես գլխավոր գրասենյակ:

Երևանում Հայոց ցեղասպանության 100-րդ տարելիցին նվիրված միջոցառումների շրջանակներում այցելուների առաջ իր դռներն է բացել Կոմիտասի անվան թանգարան-ինստիտուտը: Նորաբաց թանգարանում տեղակայված են համերգասրահ, գիտահետազոտական կենտրոն, երաժշտական ստուդիա, գրադարան, հրատարակչություն և 8 սրահներ, որոնցում ամփոփված է մեծանուն մտավորականի հարուստ ժառանգությունը: Թանգարան-ինստիտուտ ստեղծելու առաջարկը հնչել է 2013 թվականի մայիսի 30-ին «Հայաստան» համահայկական հիմնադրամի Հոգաբարձուների խորհրդի նիստում: Նիստից հետո հիմնադրամը անհատույց օգտագործման իրավունքով ՀՀ կառավարությանն է տրամադրել Կոմիտասի անվան զբոսայգում գտնվող նախկին մշակույթի պալատի շենքը, որը սակայն կիսաքանդ էր: Կառուցապատման ծախսերը հոգացել է «Փյունիկ» հիմնադրամի սփյուռքահայ բարերար Գաբրիել Ջամբարջյանը: Թանգարանի բուն շինարարական աշխատանքները մեկնարկել են նույն թվականի սեպտեմբերի 19-ին: Թանգարան-ինստիտուտի ճարտարապետն է քաջ հայտնի Արթուր Մեսչյանը: Թանգարանի բացման արարողության ժամանակ Մեսչյանը հայտարարել է, որ գլխավորը միայն կառույցը չէ, ճարտարապետությունն իր տեղն ունի, բայց թանգարանը մարդիկ են: Ամեն դեպքում կառույցը նախագծելիս նա հավատարիմ է մնացել Կոմիտասին, հաշվի է առել յուրաքանչյուր մանրուք և ազնիվ եղել վարդապետի նկատմամբ:

Կենտրոնական Թուրքիայում՝ պատմական Կապադովկիայի տարածքում, ստորգետնյա հնագույն քաղաք է հայտնաբերվել, որի տարիքը, ըստ նախնական տվյալների, 5000 տարի է: Ինչպես պնդում են Թուրքիայում, այս ստորգետնյա քաղաքը իր տեսակի մեջ մինչ այսօր հայտնաբերված ամենամեծ հնագիտական գտածոն է: Ստորգետնյա քաղաքը հայտնաբերվել է թուրքական Նևշեհիր նահանգում բնակարանաշինության ծրագրի հիմնային աշխատանքների իրականացման ժամանակ: Թուրքիայի բնակարանաշինության զարգացման գործակալությունը (Turkey Housing Development Administration (TOKI)) վերոնշյալ տարածքում նախագծի իրականացման աշխատանքները սկսել է դեռևս 2012 թ-ին: Հետզհետե նախապատրաստական աշխատանքների ընթացքում ընկերությունը հայտնաբերել է հնագիտական որոշ կառույցներ: Առաջին ստորգետնյա սրահները հայտանաբերվել են 2013 թ-ին: Քաղաքն իր ամբողջ մակերեսով կառուցապատողների առաջ ի հայտ է եկել նախորդ տարվա վերջին և այդ օրվանից բոլոր շինարարական աշխատանքերը դադարեցված են: Հնագիտական ստորգետնյա քաղաքի ընդհանուր մակերեսը կազմում է 45 հեկտար, իսկ ստորգետնյա թունելների երկարությունը 7 կիլոմետր: Այստեղ գտնվել են նաև եկեղեցիներ և բազմաթիվ սրահներ: Թուրքիայի Մշակույթային և բնական ժառանգության խորհուրդն արդեն պաշտոնապես գրանցել է հնագիտական գտածոն: Ի դեպ, Նևշեհիր նահանգում սա առաջին ստորգետնյա գտածոն չէ, սակայն ամենամեծն է նախորդներից: