Ինչպես տեղեկացնում է Reuters.com լրատվական գործակալությունը, Լոս Անջելեսում շինարարական աշխատանքների համար քաղաքի իշխանությունները փակել են հիմնական ավտոմայրուղիներից մեկը և նորից բացել նախատեսված ժամանակից 16 ժամ շուտ: Մայրուղու բացումից հետո Լոս Անջելեսի քաղաքապետ Անտոնիո Վիլլարայգոսան հայտարարել է. «առաքելությունն իրականացված է և մայրուղու վաղաժամկետ բացումը հնարավորություն է տվել տնտեսել մոտ 400 հազար ԱՄՆ դոլար՝ աշխատավարձերի և նախագծի այլ ծախսերի կտրվածքով»: Լոս Անջելեսի իշխանությունները հուլիսի 17-ի երեկոյան փակել էին մայրուղու 6.2 կիլոմետր երկարությամբ Ինթերսթեյթ 405 (Interstate 405) ծանրաբեռնված հատվածը, որպեսզի ապամոնտաժեն կամուրջի 2 հիմնասյուները, որոնք խանգարում են մայրուղու լայնացմանը: Նշենք, որ այս աշխատանքները կազմում են 1 մլրդ ԱՄՆ դոլար արժողությամբ ճանապարհային նախագծի մի մասը: Շինարարները քանդել են կամուրջի հարավային մասը և աշխատանքը կատարել են ընդամենը 37 ժամում: 11 ամիս հետո քաղաքի իշխանությունները կրկին կփակեն մայրուղու նույն հատվածը, այս անգամ կամուրջի հյուսիսային հատվածը ապամոնտաժելու համար: Մեկ այլ newser.com կայքի տվյալներով, մայրուղին փակելուց առաջ քաղաքի իշխանությունները մտավախություն էին հայտնել, որ ճանապարհի ծանրաբեռնված հատվածում կարող էին խցանումներ առաջանալ, ուստի, շինարարական աշխատանքները ուշացնելու դեպքում, տուգանք էին նշանակել: Քաղաքի տրանսպորտային մարմնի տվյալներով կապալառուն՝ Քիեվիթ Ինֆրաստրաքչր Վեստ (Kiewit Infrastructure West) ընկերությունը պարտավորվել էր ճանապարհի յուրաքանչյուր ուղղությամբ շարժման բացման ամեն 10 րոպե ուշացնելու դեպքում վճարել 6 հազար ԱՄՆ դոլար տուգանք: Ընդհանուր առմամբ շինարարական աշխատանքների 1 ժամ ուշացումը կպատժվեր 72 հազար ԱՄՆ դոլար գումարով: Բացի վերոնշյալից շաբաթներ շարունակ քաղաքի իշխանությունները զգուշացնում էին բնակիչներին՝ հանգստյան օրերին խուսափել մայրուղու տվյալ հատվածով երթևեկելուց հնարավոր խցանումներից խուսափելու համար: Իսկ Ջեթբլյու ավիաուղերը (JetBlue Airways) հատուկ ակցիա էին նախատեսել՝ Բերբանկ (Berbank) -Լոնգ Բիչ (Long-Beach) չվերթի համար սահմանելով ընդամենը 4 ԱՄՆ դոլար ուղեվարձ: Նման կազմակերպված աշխատանքների արդյունքում էլ, թերևս, հնարավոր դարձավ ոչ միայն չուշացնել, այլև ժամանակից շուտ ավարտել շինարարական աշխատանքները:
Կալկաթայում սկսվել է Ասիայի ամենամեծ Ժամանակակից արվեստի թանգարանի (Kolkata Museum of Modern Art) շինարարությունը, հաղորդում է artmediaagency.com կայքը: Չնայած Կալկաթան համարվում է Հնդկաստանի մշակութային մայրաքաղաքը, մինչ օրս, ի տարբերություն Դելլիի և Մումբայի, չունի ժամանակակից արվեստի թանգարան: Թանգարանի շինարարությունը նախատեսվում է ավարտել 2015 թ-ին: Business-standard.com կայքի տվյալներով, 90.5 մլն ԱՄՆ դոլար արժողությամբ արվեստի թանգարանը նախագծել է շվեյցարական Հերցոգ և դե Մյուրոն (Herzog & de Meuron) ճարտարապետական ընկերությունը: 70 հազար քառակուսի մետր ընդհանուր մակերեսով Ժամանակակից արվեստի թանգարանը կառուցվում է Արևելյան Կալկաթայում: 9 հարկանի շինությունը կներառի ոչ միայն ասիական և արևմտյան մշակույթների հավաքածուներ, այլև կունենա 44 պատկերասրահ, կինոդահլիճ, գրադարան, ամֆիթատրոն 1500 հանդիսատեսի համար: Թանգարանի հարևանությամբ կկառուցվեն նաև ռեստորաններ և խանութներ: Ժամանակակից արվեստի թանգարանի նախնական բյուջեն կազմում է 90.5 մլն ԱՄՆ դոլար, իսկ ֆինանսավորումը նախատեսվում է իրականացնել մասնավոր-պետություն համագործակցության շնորհիվ: Շինարարության իրականացման համար Արևմտյան Բենգալիայի ղեկավարությունը կտրամադրի 30.2 մլն ԱՄՆ դոլար, Հնդկաստանի կառավարությունը կտրամադրի 33.1 մլն ԱՄՆ դոլար, իսկ մնացած գումարն էլ կտրամադրեն մասնավոր ներդրողները:
Ինչպես տեղեկացնում է Spiegel.de կայքը, Եգիպտոսը վերջապես համաձայնվել է Կարմիր ծովի վրա կառուցել հսկա կամուրջ, որն իրար կկապի Հյուսիսային Աֆրիկան ու Մերձավոր Արևելքը: Թվում է՝ նման նախագիծը պետք է միայն ուրախացներ, սակայն այն կարող է լարվածություն առաջացնել տարածաշրջանում: Իսրայելն ու Հորդանանը դեմ են կամուրջի կառուցմանը: Spiegel գերմանական ամսագրին տրված հարցազրույցում Եգիպտոսի Տրանսպորտի նախարարությունից հայտնել են, որ 1988 թ-ից քննարկվող նախագիծը հաստատվել է եգիպտական կառավարության կողմից: Երկրի վարչապետ Էսամ Շարաֆը շինարարության գլխավոր պատասխանատու է նշանակել Արաբական ճանապարհների ասոցիացիայի նախագահ Աբդուլ Ազիզին: Նախատեսվում է կառուցել 32 կիլոմետր երկարությամբ կամուրջ, որն իրար կմիացնի Շարմ Էլ Շեյխից ոչ հեռու գտնվող Ռաս Նասրանա փոքրիկ քաղաքը Սաուդյան Արաբիայի հյուսիս-արևմուտքում գտնվող Ռաս Համիդ քաղաքին: Արաբների համար նման կամուրջի կառուցումը մեծ ձեռքբերում կլինի: Կամուրջի կառուցումից հետո Հյուսիսային Աֆրիկայի արաբական պետությունները ցամաքով կկարողանան կապվել Մերձավոր Արևելքի արաբական պետությունների հետ՝ շրջանցելով հրեական պետությունը: Ի դեպ Իսրայելի կազմավորումից հետո (1948թ) դա առաջին անգամ կլինի և էականորեն կթեթևացնի նաև Կարմիր և Միջերկրական ծովերով իրականացվող լաստանավային փոխադրումները: Նախագծի հեղինակները համոզված են, որ կամուրջի կառուցման բյուջեն հիմնականում կկազմվի շնորհիվ միլիոնավոր ուխտավորների, որ ամեն տարի այցելում են Սաուդյան Արաբիա: Ի դեպ նախագծի բյուջեն, համաձայն նախնական հաշվարկների, 5 մլրդ. ԱՄՆ դոլար է: Ենթադրվում է նաև, որ կամուրջի կառուցումից հետո զգալիորեն կավելանա երկիր այցելող ուխտավորների թիվը: 5 տարի առաջ Կահիրեն արդեն սկսել էր կամուրջի շինարարությունը, երբ այն ժամանակվա երկրի նախագահ Հոսնի Մուբարաքը հանկարծակի հետաձգեց շինարարությունը: Նա զիջեց Թել-Ավիվի ճնշումներին, որը կարծում էր, թե կամուրջի կառուցումը էլ ավելի կսրի տարածաշրջանի լարվածությունը: Նախագծից դժգոհ են նաև Ամմանում, քանի որ Կարմիր ծովի այս հատվածը ոչ միայն Իսրայելի, այլև Հորդանանի համար ելք է դեպի Հնդկական օվկիանոս:
Անցած շաբաթ Լիբանանում սկսվել է Վոթերֆրոնթ Սիթի (Waterfront City) նախագծի շինարարությունը, տեղեկացնում է Zawya.com կայքը: Բնակելի և առևտրային համալիրներից, ինչպես նաև հանգստի գոտուց բաղկացած այս նախագիծը կկառուցվի մի քանի փուլով առաջիկա տարիների ընթացքում: Հուլիսի 13-ին սկսվել է նախագծի առաջին փուլի շինարարությունը, որը ներառում է 7 հիանալի կառույց, ափամերձ ռեստորաններ և առևտրային գոտի: Վոթերֆրոնթ Սիթի նախագիծը տեղակայված է Միջերկրական ծովի ափին՝ հեռու քաղաքի աղմուկից, մայրաքաղաք Բեյրութից 15 կիլոմետր դեպի հյուսիս, հայտնի Մարինա Քլաբի (Marina Club) շրջակայքում: Նախագծի կառուցապատողներն են Սթե Ժոսեֆ Գ. Խորի էթ Ֆիլս Հոլդինգ (Ste Joseph G. Khoury et Fils Holding) և Մեջիդ Ալ Ֆութեյմ Փրոփերթիս (Majid Al Futtaim Properties) կազմակերպությունները, իսկ ճարտարապետական դիզայնն իրականացրել են ԷՐԳԱ Գրուփ (ERGA Group) և ամերիկյան ՍԲ Արքիթեքթս (SB Architects) ընկերությունները: Ընդհանուր 193.6 հազար քառակուսի մետր տարածքով Վոթերֆրոնթ Սիթի նախագիծը մեծ դեր կխաղա Լիբանանի զարգացման գործում: Վերջինս ներառում է 5 հազար ճոխ բնակարան, առևտրային թաղամաս, հսկա միջազգային առևտրային կենտրոն, ռեստորաններ, ժամանցի կենտրոններ, մարզասրահ, առողջարանային համալիր, լողավազան՝ ամբողջ տարին, ինչպես նաև հանրաճանաչ հյուրանոցների ցանց:
Հունիսի 15-ին Սյունիքի մարզում շահագործման են հանձնվել «Հազարամյակի մարտահրավերներ հիմնադրամ-Հայաստան» ծրագրի շրջանակներում վերականգնված Ախլաթյանի, Գորիսի 3-րդ կարգի ջրանցքները և Որոտան-2 պոմպակայանը, տեղեկացնում է ՀՀ տարածքային կառավարման նախարարության մամուլի ծառայությունը: Ախլաթյանի և Գորիսի ջրանցքների վերականգնման համար ներդրվել է համապատասխանաբար 30 և 120 մլն դրամ: Նշենք, որ այս երկու ջրանցքները միասին կոռոգեն մոտ 160 հա հողատարածք: Խնձորեսկ համայնքի հարևանությամբ վերականգնված Որոտան-2 պոմպակայանի վերականգնման բյուջեն էլ կազմել 2 մլն 228 հազար ԱՄՆ դոլլար: Վերջինս ոռոգման ջուր կմատակարարի մարզի Քարաշեն, Խնածախ, Խնձորեսկ և Տեղ համայնքների ավելի քան 5797 շահառուների: Ինչպես տեղեկացնում է նախարարության մամուլի ծառայությունը, «Հազարամյակի մարտահրավերներ հիմնադրամ-Հայաստան» ծրագրի շրջանակներում Սյունիքի մարզում կատարվել է մոտ 1 մլրդ դրամի ներդրում, ինչի արդյունքում ակնկալվում է մարզում ոռոգման ջրի մատակարարման բարելավում և ոռոգելի հողատարածքների ավելացում:
