Դուբայում ավարտին են մոտենում աշխարհում առաջին էկոլոգիապես մաքուր մզկիթի շինարարական աշխատանքները: Ինչպես տեղեկացնում են տեղական ԶԼՄ-ները, նախագծի 85 տոկոսն արդեն պատրաստ է: Նորագույն էկո-մզկիթը շինարարության ավարտից հետո կդառնա իր տեսակի մեջ միակը Դուբայում և ամբողջ աշխարհում: Ըստ նախնական տվյալների` մզկիթի ընդհանուր մակերեսը կկազմի 9750 քառակուսի մետր, իսկ շինության մակերեսը` 4200 քառակուսի մետր, որտեղ միաժամանակ կկարողանան աղոթել 3500 հավատացյալներ: Էկո-մզկիթը, որը տեղակայված է Դուբայի Դեյրա շրջանի «Քլոք Թաուերի» (Clock Tower) հարևանությամբ, մյուս աղոթատներից կտարբերվի ոչ միայն իր արտաքին յուրօրինակ տեսքով, այլև օգտագործած էներգիայի ծավալներով: Շինության ներսում հարմարավետ ջերմաստիճանը կապահովվի նորագույն տեխնելոգիաների շնորհիվ: Ինքնամգեցվող ապակիները կնվազեցնեն արևի ճառագայթների ներթափանցումը, իսկ հարդարման ժամանակ օգտագործված նյութերը հնարավորություն կտան պահպանել ներքին զովությունը: Նախագիծը հավակնում է LEED Արծաթե Հավաստագրման (Leadership in Energy and Environmental Design, Առաջնորդություն էներգիայի և շրջակա միջավայրի դիզայնի ոլորտում): Մզկիթը կօգտագործի բացառապես վերականգնվող աղբյուրներից արտադրվող էներգիա: Շինության տանիքին և հիմնասյուներին կտեղադրվեն արևային վահանակներ, իսկ օգտագործված և անգամ տեղումների հետևանքով հավաքված ջուրը կենթարկվի մաքրման: Որոշ ժամանակ անց այն կրկին կօգտագործվի ոռոգման կամ այլ նպատակներով: Նշենք, որ անցած տարի Թուրքիան ևս հայտարարել էր նմանատիպ էկո-մզկիթի կառուցման մասին: Ըստ տարածված տեղեկատվության` մզկիթի շինարարությունը կավարտվի արդեն 2015 թ-ին և այնտեղ նույնպես կօգտագործվեն «կանաչ» տեխնոլոգիաներ:

Ճապոնիայի Օսակա քաղաքում շահագործման է հանձնվել երկրի ամենաբարձր աշտարակը: 300 մետր բարձրությամբ երկնաքերի շինարարությունը տևել է 4 տարի: Նախագծի գլխավոր կառուցապատող «Կինտեցու Քորփորեյշնը» (Kintetsu Corporation) ավելի քան 1.3 մլրդ ԱՄՆ դոլար է ներդրել երկնաքերի շինարարության մեջ: «Աբենո Հարուկաս» (Abeno Harukas) անվանումը ստացած երկնաքերն իր նախկին տիտղոսակրին առաջ է անցել ընդամենը 4 մետրով: Մինչ օրս Ճապոնիայի ամենբարձր երկնաքերը համարվում էր 296 մետր բարձրությամբ «Լենդմարք Թաուերը» (Landmark Tower) Յոկոհամա քաղաքում: 60 հարկանի նորակառույց աշտարակում տեղակայված են բազմաթիվ նշանակության տարածքներ, «Մարրիոթ Ինթերնեշնլ» հյուրանոցը, հսկայական խաղասրահ, ինչպես նաև «Հարուկաս 300» (Harukas 300) դիտահարթակը, որը գտնվում է աշտարակի 58-60-րդ հարկերում 288 մետր բարձրության վրա: ի դեպ, երկրի ամենաբարձր դիտահարթակը տեղակայված է 450 մետր բարձրության վրա «Երկնային ծառ» (Sky Tree) աշխարհի ամենաբարձր հեռուստաաշտարակում:

Հնդկաստանը պատրաստվում է կառուցել աշխարհի խոշորագույն արևային էլեկտրակայանը: Ըստ նախնական տվյալների` վերջինիս նվազագույն հզորությունը կլինի 4000 մեգավատ, ինչը համահավասար է 4 լայնամասշտաբ ատոմային ռեակտորների հզորությանը: Փաստացիորեն, հնդկական էլեկտրակայանը մինչ այժմ կառուցված էլեկտրակայանների հզորությունը կգերազանցի 10 անգամ: «Ուլտրա-Մեգա Կանաչ Արևային Էլեկտրակայանի» (Ultra-Mega Green Solar Power Project) ընդհանուր մակերեսը կկազմի 77 հազար քառակուսի կիլոմետր: Համաձայն տարածված տվյալների` նախագծի առաջին 1000 մեգավատ հզորությամբ փուլը կավարտվի 3 տարում: 4,4 մլրդ ԱՄՆ դոլար բյուջեով այս նախագծի իրականացման համար համախմբվել են հնդկական 6 պետական ընկերություններ: Հնդկաստանի հյուսիսային Ռաջաստան նախանգում գտնվող Սամբհար աղի լճի հարևանությամբ էլ նախատեսվում է իրականացնել այս նախագիծը, որի շինարարությունը կտևի 7 տարի: Համաձայն նախագծի` այս արևային էլեկտրակայանի շահագործման ժամկետը կլինի ամենաքիչը 25 տարի: Հնդկաստանի իշխանությունների պնդմամբ` վերոնշյալ էլեկտրակայանը տարեկան կարտադրի 6.4 մլրդ կիլովատ-ժամ էլեկտրաէներգիա, ինչը հնարավորություն կտա տարեկան 4 մլն տոննայով կրճատել մթնոլորտ արտանետվող ածխաթթու գազի ծավալները: Նշենք, որ 2010 թ-ին Հնդկաստանի բոլոր արևային էլեկտրակայանների հզորությունը միասին կազմել է 17,8 մեգավատ, իսկ արդեն 2013 թ-ին հասել է 2208 մեգավատի: Համաձայն ավելի վաղ իշխանությունների որդեգրած քաղաքականության` 2022 թ-ին արդեն երկրում բոլոր արևային էլեկտրակայանների ընդհանուր հզորությունը պետք է հասնի 20 գիգավատի:

Reuters լրատվական գործակալության փոխանցմամբ Լոս Անջելեսում կառուցվող «Նյու Վիլշայեր Գրանդ Աշտարակի» (The New Wilshire Grand Tower) հիմնային աշխատանքների իրականացման ժամանակ իրականացվել է բետոնի ռեկորդային քանակությամբ լցոնում: Ընդհանուր առմամբ աշտարակի հիմքում լցոնվել է 38200 տոննա կշռով 16210 խորանարդ մետր բետոն: Այս ամենի իրականացման համար անհրաժեշտ է եղել 19 ժամ, որի ընթացքում մոտ 200 բետոնատար մեքենաներ կատարել են 2120 ուղերթ: Մասնագետները գտնում են, որ ամրանալու համար նմանատիպ քանակությամբ բետոնին անհրաժեշտ կլինի 2 շաբաթ, որի ընթացքում բետոնը կհովացվի հիմքում տեղադրված ջրի խողովակներով: Նշենք, որ բետոնի լցոնման արարողության ժամանակ ներկա են եղել նաև Գինեսի ռեկորդների գրքի ներկայացուցիչները, ովքեր արդեն հաստատել են նոր նվաճումը: Բետոնի անդադար լցոնման նախորդ ռեկորդը` ընդամենը 152 խորանարդ մետր, պատկանում է 1999 թ-ին կառուցված «Վենետիկյան հանգստավայր հյուրանոց, խաղատանը» (Venetian Resort Hotel and Casino), որը գտնվում է Լաս-Վեգասում: 335 մետր բարձրությամբ «Նյու Վիլշայեր Գրանդ Աշտարակի» բացումը նախատեսված է 2017 թ-ին: 73 հարկանի աշտարակում կտեղակայվեն 900 սենյակ ունեցող 5-աստղանի հյուրանոց, գրասենյակներ և առևտրային կենտրոններ: Շինարարության գլխավոր կառուցապատողը «Կորեական ավիաուղիներ» (Korean Airlines) ընկերությունն է, որը պատրաստվում է նախագծում ներդնել ավելի քան 1 մլրդ ԱՄՆ դոլար:

Լոնդոնյան «Բլեքֆրեյրս» (Blackfriars) կայարանում բացվել է աշխարհի խոշորագույն արևային կամուրջը: 4400 արևային վահանակներից բաղկացած ծրագիրն իրականացվել է անգլիական 2 ընկերությունների համագործակցության արդյունքում` «Սոլարսենչըրի» (Solarcentury) և «Նեթվըրք Ռեյլ» (Network Rail): Բացվելուց հետո արևային կամուրջը կարողանում է բավարարել կայարանի էներգետիկ պահանջմունքի ուղիղ կեսը; Նշենք, որ աշխարհի խոշորագույն արևային կամուրջի շինարարությունը պաշտոնապես սկսվել է 2011 թ-ի հոկտեմբերին: «Բլեքֆրեյրս» արևային կամուրջը ձգվում է Թեմզա գետի վրայով և Հարավային Լոնդոնից քաղաքի այլ շրջաններ է տեղափոխում հազարավոր ուղևորների: Նշենք, որ մինչև արևային կամուրջի բացումը կայարանում արդեն աշխատում էին էլեկտրական գնացքներ` դրանով իսկ հանրային տրանսպորտը դարձնելով «կանաչ», սակայն նորագույն կամուրջի բացումից հետո կայարանը դարձել է առավել «կանաչ»: Ըստ նախնական տվյալների` կամուրջի տանիքին տեղադրված 4400 արևային վահանակները տարեկան կկարողանան արտադրել 900,000 կվտ-ժամ էլեկտրաէներգիա, ինչը կօգնի տարեկան 511 տոննայով կրճատել ածխաթթու գազի արտանետումը մթնոլորտ: Բացի կայարանի համար էներգիայի աղբյուր հանդիսանալը, «Բլեքֆրեյրս» արևային կամուրջը դարձել է Լոնդոնի «կայուն զարգացման» խորհրդանիշը: Արևային վահանակները երևում են կամուրջի երկու կողմերից էլ` դրանով իսկ տեղաբնիկների և զբոսաշրջիկների ուշադրությունը սևեռելով էներգիայի վերականգնվող աղբյուրների օգտագործմանը: