Հաշված օրեր հետո կավարտվեն Երևան - Սևան - Իջևան - Ադրբեջանի սահման միջպետական նշանակության (Մ-4) ավտոճանապարհի հիմնական հատվածի շինարարական աշխատանքները։ Հատված առ հատված շահագործման հանձնվող ճանապարհը արդեն հասցրել են գնահատել ուղևորները։ «Չզգացինք թե ինչպես անցանք հատկապես Դիլիջան -Իջևան ճանապարհը։ Այդ ճանապարհը միշտ խորդուբորդ էր ՝ անհարմար երթևեկության համար։ Ընդհանրապես Երևան - Սևան - Իջևան ճանապարհը այս պահին շատ որակով է, ինչը զգալի թեթևացրել է ճամփորդությունը»,- նշում էին մեր կողմից հարցման ենթարկված վարորդները։ Ինչ խոսք որակը լավ ճանապարհի կարևոր երաշխիքն է, իսկ որակի համար պատասխանատու են և´ շինարարական ընկերությունները և´ նրանց կողմից ընտրված շինարարական նյութերը։ Թե ինչ եղանակով են իրականացվել շինարարական աշխատանքները, տեղեկացանք տարածքային կառավարման և ենթակառուցվածքների զարգացման նախարարությունից։ Ըստ տրված տեղեկության, միջին նորոգման աշխատանքների շրջանակներում կատարվում են. հին ասֆալտբետոնե ծածկի ֆրեզավորում, փոսային նորոգում, հարթեցում և ասֆալտբետոնե ծածկի տեղադրում: Որոշ հատվածներում իրականացվել են հիմնանորոգման աշխատանքներ։ Նախարարությունը վստահեցրեց, որ այս ճանապարհը կառուցվում է ասֆալտբետոնե տեխնոլոգիաի պահպանմամբ, ճանապարհը բաղկացած է 1 շերտից՝ շերտի հաստությունը կազմում է 5սմ։ Ըստ ՀՀ տարածքային կառավարման և ենթակառուցվածքների նախարարության կողմից տրամադրված տեղեկության, ճանապարհի տարբեր հատվածների շինարարությունը իրականացրել են հետևյալ շինարարական ընկերությունները. «Ճանապարհ» ՍՊԸ, «ԱԱԲ պրոեկտ» ՍՊԸ, «Արարատ-Ճանշին» ՍՊԸ։ Վերջինիս կողմից իրականացվող Ա/ճ Մ-4, Երևան - Սևան - Իջևան -Ադրբեջանի սահման 129.1 կմ և 135.4 կմ հատվածների հիմնանորոգման աշխատանքների ավարտը նախատեսվում է 2019-ի դեկտեմբերի 10-ին։ Մ-4՝ Երևան - Սևան - Իջևան -Ադրբեջանի սահման միջպետական նշանակության ավտոճանապարհի վերանորոգված հատվածի երկարութունը կազմում 58.9 կմ։ Նախագծի իրականացման համար տրամադրվել է 3 մլրդ. 271 մլն. դրամ։ Որից 249.2 մլն. դրամ հատկացվել է «Ճանապարհ» ընկերությանը, 1մլրդ. 308 մլն. Դրամ՝ «ԱԱԲ պրոեկտ» ընկերությանը և 1մլրդ. 714 մլն. Դրամ՝ «Արարատ-Ճանշին» ընկերությանը։ Արդյոք 2020թ-ին ճանապարհաշինարարական նմանատիպ ծրագրեր նախատեսվում են, և ինչքան գումար է նախատեսվում, ճշտեցինք տարածքային կառավարման և ենթակառուցվածքների նախարարությունից։ «Իհարկե այո։ Ինչ վերաբերվում է հատկացվող գումարին, ապա այս պահին հստակ չեմ կարող ասել, այժմ մենք նախագծերն ենք պատվիրում։ Այս պահի դրությամբ հիմնանորագման ծրագրով նախատեսվում է 244,4 կմ ճանապարհի վերանորոգում»,- մեզ հետ հեռախոսազրույցում պարզաբանեց ճանապարհային ոլորտի քաղաքականության վարչության պետ Դավիթ Քարտաշյանը։

Մայրաքաղաքի կարևոր խնդիրներից մեկի, հանձինս գետնանցումների վերանորոգման հարցը վերջերս «տեղից շարժվեց»։ Քաղաքապետարանը գետնանցումների վերանորոգումը իր գլխավոր ծրագրերից մեկն է համարում․ «Ծրագրի իրագործման համար հատկացվել է 300,0 մլն. դրամ, սակայն շինարարական աշխատանքներն ընթանում են 3 գետնանցումներում, որոնց համար կնքվել են 44,0 մլն. դրամի կապալի պայմանագրեր»,-հայտնեցին քաղաքապետարանից: Ներկայիս պահին հիմնանորոգման աշխատանքներ ընթանում են Հալաբյան-Լենինգրադյան, մետրոյի Մարշալ Բաղրամյան կայարան, Ազատության պողոտայի՝ «Հաղթանակ» զբոսայգու հարակից ստորգետնյա անցումներում։ Ըստ քաղաքապետարանի կայքի նոյեմբերի 15-ին տեղադրված հայտարարության. «Քաղաքացիների տեղաշարժը հարմարավետ դարձնելու նպատակով Երևանի քաղաքապետարանի միջոցներով մասնակի նորոգվել է Գրիգոր Լուսավորիչ փողոցի և Մաշտոցի պողոտայի խաչմերուկում գտնվող ստորգետնյա հետիոտնային անցումը: Թարմացվել է նաև լուսավորությունը»: «Վաղուց պետք է վերանորոգվեին այս գետնանցումները։ Իհարկե շատ ավելի լավ կլիներ, որ վերանորոգումը ավելի լավ արվեր՝ հուսանք, որ աշխատանքները դեռևս կշարունակվեն»,- մեր հարցման ընթացքում այսպես գնահատեցին Գրիգոր Լուսավորիչ փողոցի և Մաշտոցի պողոտայի խաչմերուկում գտնվող ստորգետնյա հետիոտնային անցումի անցուդարձ անող մարդիկ։ Պարզվեց, որ քաղաքացիները իրենց գնահատականներում չեն սխալվում՝ քաղաքապետարանից տեղեկացանք, որ ինչպես վերը նշված այնպես էլ Ազատություն պողոտա, Դ.Անհաղթ փողոցի գետնանցումներում շինարարության նախագծման աշխատանքները չեն կատարվել, քանի որ նախագծող կազմակերպության հետ պայմանագրերը լուծարվել էին: Սակայն միևնույն ժամանակ քաղաքապետարանից մեզ վստահեցրին, որ Գրիգոր Լուսավորիչ փողոցի և Մաշտոցի պողոտայի խաչմերուկում գտնվող ստորգետնյա հետիոտնային անցումների վերանորոգման համար կպատվիրվեն նոր նախագծանախահաշվային փաստաթղթեր: Ծրագրի շրջանակներում այս պահին շինարարական աշխատանքները իրականացնում են մի քանի շինարարական կազմակերպություններ։ Ազատության պողոտայի՝ «Հաղթանակ» զբոսայգու հարակից ստորգետնյա անցումի վերանորոգման աշխատանքները իրականացնում է «ԳՈՌՏԻԳ» ՍՊԸ-ն, Մարշալ Բաղրամյան կայարան տանող ստորգետնյա անցումինը՝ «Տ-Քընսթրաքշն» ՓԲԸ-ն, Հալաբյան- Լենինգրադյան խաչմերուկի ստորգետնյա անցումինը ՝ «Նագշին» ՍՊԸ-ն։ Ի պատասխան մեր հարցին, թե արդյո՞ք գետնանցումների վերանորոգման ծրագիրը շարունակական է լինելու, քաղաքապետարանից մեզ պատասխանեցին․ «Այո, ծրագիրը շարունակական է լինելու: 2020թ-ին ևս նախատեսվել են մի շարք գետնանցումների վերանորոգման աշխատանքներ»։

Ամիրյան 2 հասցեում գտնվող պատմական հուշարձան-շենքը վերակառուցումից հետո գործելու է որպես «Հոլիդեյ ինն» հյուրանոց։ InterContinental Hotels Group (IHG) ցանցի մաս հանդիսացող «Հոլիդեյ ինն» հյուրանոցները սպասարկում են միջին դասին աշխարհի ավելի քան 90 երկրներում։ Հայաստանը IHG ցանցի քարտեզում նշվեց այս տարվա սկզբից, երբ բացվեց «Հոլիդեյ ինն էքսպրես» հյուրանոցը, այժմ կառուցվում է «Հոլիդեյ ինն» հյուրանոցը, որը շահագործման կհանձնվի հաջորդ տարի գարնանը։ Արական գիմնազիայի վերակառուցվող շենքը Արական գիմնազիայի շենքը կառուցվել է 1896 թ. Միխայիլ ֆոն դեր Նոննե ճարտարապետի նախագծով։ 1936 թվականից այստեղ գործել է Ավ. Իսահակյանի անվան գրադարանը։ Քչերը գիտեն, որ շենքի բակում կա ևս մեկ նմանատիպ շենք, որը պատկանել է գիմնազիային։ Փողոցին հարող շենքի աջ թևը ապամոնտաժվել է դեռևս 1950-ականներին՝ Կառավարական N2 շենքի կառուցման ժամանակ: 1970-ականների վերջին շենքի ձախ հատվածում կառուցվել էր լրացուցիչ ծավալ, որը քանդվեց 2005 թվականին գրադարանի տեղափոխվելուց հետո։ Ավելի ուշ ապամոնտաժվեց շենքն ամբողջությամբ, պահպանվեց միայն ճակատային մասը։ Այստեղ նախատեսվում էր բիզնես կենտրոն կառուցել, բայց կառուցումը ձգձգվեց ու ընդհատվեց։ Հյուրանոցի կառուցումը սկսվեց 2017 թվականից: «Մենք ստիպված էինք մեր նախագիծը հարմարեցնել այստեղ արված աշխատանքներին, որովհետև արդեն կար շենքի կարկասը (հիմնակմախքը), որը 10 տարի առաջ էր արվել։ Դա է պատճառը, որ մենք երկու նմանատիպ հյուրանոցային համար չունենք։ Չնայած՝ մյուս կողմից էլ ինչքան բարդ էր խնդիրը, այնքան հետաքրքիր էր աշխատանքը»,- ասում է «Հոլիդեյ ինն» հյուրանոցի շենքի ճարտարապետ Իսահակ Ներսիսյանը։ Հետաքրքիր էր ու բարդ նաև այն առումով, որ հյուրանոցը պետք է հարմարեցվեր առկա պատմամշակութային միջավայրին՝ արական գիմնազիայի շենքին և Կառավարության N2 շենքին։ Հրապարակը շրջապատող բոլոր շենքերը՝ Կառավարության N1 շենքը, «Արմենիա» հյուրանոցը, Փոստի կենտրոնական շենքը, շարունակություններ ունեն դեպի հարակից փողոցներ, միայն Սամվել Սաֆարյանի նախագծած Կառավարության N2 շենքի՝ դեպի Ամիրյան շարունակվող հատվածը ժամանակին չի կառուցվել։ «Մի կողմից մենք փորձել ենք շարունակության նմանություն ստեղծել վերին հատվածում՝ Նոյեմբերյանի ֆելզիտային տուֆե շարվածքով։ Եվ մյուս կողմից էլ արական գիմնազիայի շենքն ընդգծելու համար վերին հարկերը հետ ենք տվել և ապակե ծավալով անջատել սև տուֆե և ֆելզիտե շարվածքները։ Ապակին ընդգծում է պատմական շենքը, այն դարձնում դոմինանտ ընդհանուր ֆոնի վրա։ Այսպես մենք նպատակ ենք ունեցել զարգացնել միջավայրը՝ ընգծելով այս երկու շենքերի կարևորությունն ու արժեքը, որ նորը երկրորդական դիտվի նրանց նկատմամբ։ Հենց դրանով են պայմանավորված ֆասադի բացվածքների առիթմիկ բաժանումները։ Ճիշտ է՝ այդ լուծումը կարող է արդի ճարտարապետության տուրք համարվել, բայց այն առաջին հերթին նպատակ է ունեցել ընդգծել պատմական շենքը, որը հստակ ռիթմ ունի և եռամաս դասական կոմպոզիցիա, իսկ նորակառույց հատվածը իրականացվել է չեզոք ոճով, որպես ֆոն, background»,- ներկայացնում է ճարտարապետը։ Հոլիդեյ ինն բազմաֆունկցիոնալ հյուրանոց «Հոլիդեյ իննը» զբոսաշրջային աշխարհում մեծ ճանաչում ունեցող հյուրանոցային ցանց է։ Հայաստանյան «Հոլիդեյ ինն» հյուրանոցն էլ նախագծվել է այնպես, որ այլ երկրներում այս ցանցի ծառայություններից օգտվող հյուրերը հենց մուտքից հասկանան, որ իրենք արդեն ծանոթ միջավայրում են։ Երևանյան «Հոլիդեյ իննը» միջին կարգի 4-աստղանի հյուրանոց է, որը զբաղեցնում է ընդհանուր 23700 քմ մակերես։ Հյուրանոցը ունենալու է 191 համար, որոնցից 11 –ը կլինեն առանձին ննջարանով ու հյուրասենյակով սուիթ (suite) համարներ, մնացածը՝ հիմնականում երկտեղանոց՝ ստանդարտ և բարելավված (executive) համարներ։ Հյուրանոցը կունենա երկու մուտք, մեկը՝ Ամիրյան փողոցից, մյուսը՝ ներքին բակից։ Ներքին բակ կարելի է անցնել պատմական շենքի դալանով։ Ամիրյանի կողմից հյուրանոցն ունի 6 հարկ. պատմական շենքի երկու հարկին ավելացել են երկու ապակեպատ և երկու ֆերզիտե տուֆից շարված հարկերը։ Ամիրյանի վրա գտնվող պատմական շենքի առաջին հարկերը վարձակալության են տրվելու որպես հասարակական նշանակության տարածքներ. այստեղ կգործեն արագ սննդի սրճարան, գրախանութ, բանկի մասնաճյուղ, բոլորն առանձին մուտքերով։ Իսկ շենքի վերևում բացօթյա սրճարան է լինելու՝ պերգոլային մարկիզաներով՝ շարժական արևանոցներով։ Այստեղից տեսարան է բացվելու դեպի Ամիրյան, ներքին բակ և Հանրապետության հրապարակ։ Ներքին բակում գտնվող երկրորդ պատմական շենքի առաջին հարկը նույնպես կտրվի վարձակալության: Այստեղ կգործի ռեստորան, որը հավանական է՝ կրի «Ջիվան» անունը։ Հյուրանոցային համալիրը կունենա 6-7 վերգետնյա և 3 ստորգետնյա հարկեր։ Առաջին հարկում լինելու է հյուրանոցի սպասասրահը, ընդունարանը, բարը, ռեստորանը և այլ հասարակական տարածքներ, որոնք, Հոլիդեյ ինն հյուրանոցների ոճին համապատասխան, արվելու են open lobby սկզբունքով, այսինքն՝ առանց բաժանող պատերի. տարածքների անջատումը իրականացվելու է դիզայներական լուծումներով։ Հյուրանոցի երկրորդ հարկը զարգացած միջոցառումների գոտի է լինելու՝ տարբեր ֆորմատների նիստերի դահլիճներով՝ 3 մեծ և 4 փոքր։ Թե՛ մեծ, թե՛ փոքր դահլիճներից երկուսը կլինեն շարժական պատերով, կարող են միանալ՝ դառնալով մեկ ընդարձակ տարածք։ Երրորդ հարկից արդեն տեղակայված կլինեն համարները։ Համարները նախագծվել են «Հոլիդեյ ինն» ցանցին հատուկ ընդհանուր ոճով՝ հատակից առաստաղ տեղադրված պատուհան, արդի ոճի կահույք, անկյունային բազմոց, կլոր լրագրասեղան, վառ գունային գամմա։ Ճարտարապես Իսահակ Ներսիսյանը նշում է, որ խնդիր չեն դրել հայկական ինչ-որ շեշտադրումներ անելու, միակ տարբերությունը մյուս «Հոլիդեյ ինն» հյուրանոցներից կնկատվի գորգերի դիզայնում. «Համարների գորգերը գործվել են հատուկ պատվերով՝ հայկական զարդանախշերով և հին տեսք հաղորդելու համար դրանց արհեստական մաշվածություն է տրվել»։ Հյուրանոցի 7-րդ հարկում լինելու է ֆիթնես և սպա կենտրոն, մարզադահլիճներ և մեծ լողավազան։ Հյուրանոցի շենքում կգործի տասնմեկ հասարակական ու ծառայողական վերելակ։ Հյուրանոցի համարների ու միջանցքների ինտերիերի դիզայնն իրականացրել է Իսահակ Ներսիսյանի ղեկավարած «NST Architects» ճարտարապետական արվեստանոցը։ Իսկ հյուրանոցի հասարակական տարածքների, նիստերի դահլիճների և մարզասրահի դիզայնը մշակել է ռուսական AD Design ընկերությունը, որն ունի «Հոլիդեյ իննի» հետ աշխատելու փորձ։ Հայկական դիզայներական ընկերություններից ներգրավվել է նաև «Արխանգել» ճարտարապետական ստուդիան, որն իրականացրել է ներքին բակի և «Ջիվանի» ռեստորանի դիզայնը։

Մնջախաղի թատրոնն իր գոյության 45 տարիներն ապրեց ուրիշ հարկի տակ, ուրիշ բեմերում։ Ու չնայած դրան այս թատերական կոլեկտիվը ճանաչվեց, սիրվեց, ուր էլ տեղափոխվեց իր հետ տարավ իր հանդիսատեսին, պահպանեց ու զարգացրեց մնջախաղային արվեստը։ Այսօր արդեն մնջախաղցիները դե յուրե ունեն տարածք, ու այդ տարածքի վերակառուցման հաստատված նախագիծ և սպասում են նախագծի կյանքի կոչվելուն, երբ դե ֆակտո կսկսեն բեմադրվել սեփական տարածքում։ Որտե՞ղ և ինչպիսի՞ն է լինելու Մնջախաղի թատրոնը Երևանի մնջախաղի պետական թատրոնն արդեն երկու տարի է ունի սեփական հասցեն՝ Գևորգ Քոչարի 21։ Շենքը, որ գտնվում է այս հասցեում՝ Կորյուն – Գ. Քոչար խաչմերուկում, կառուցվել է 1950 թ. որպես Գրքերի պալատի շենքի տպարանի մի մաս։ Այն երկհարկանի շենք է՝ գետնախարսխային հարկով։ 1995 թվականից ներքևի հարկերը սեփականաշնորհվել են ու չեն շահագործվել, իսկ երկրորդ հարկում մինչև 2017 թ. գործել է գրապալատը, որը տեղափոխվել է Ազգային գրադարանի շենք։ Հենց այդ երկրորդ հարկում էլ նախատեսվում է կառուցել թատրոնը։ Շենքը պահպանվող հուշարձան է, հետևաբար վերակառուցման նախագծում էլ հաշվի են առնվել հուշարձան շենքի պահպանման բոլոր անհրաժեշտ պայմանները։ Կրթության, գիտության, մշակույթի և սպորտի նախարարությունն արդեն դրական եզրակացություն է տվել Երևանի մնջախաղի պետական թատրոնի հուշարձան – շենքի ամրակայման, նորոգման ու փոփոխման աշխատանքային նախագծին, որը մշակել է «Աստիճան» ՍՊԸ-ն (ճարտարապետ` Խաչատուր Գրիգորյան)։ Թատրոնի գեղարվեստական ղեկավար Ժիրայր Դադասյանը նշում է, որ իրենք վերակառուցման ոչ մի առանձնահատուկ պահանջ չեն առաջադրել. իրենց համար առաջնահերթ է սեփական տարածքում հնարավորինս շուտ գործելու հնարավորությունը։ Միակ խնդիրը կապված տանիքը բարձրացնելու հետ, որն անհրաժեշտ է բեմի վերևում բեմական տուփի, ամֆիթատրոնի կառուցման և ակուստիկայի խնդիրների լուծման և թատերական համապատասխան միջավայր ստանալու համար նույնպես լուծվել է. ըստ վերակառուցման նախագծի կփոփոխվեն բեմահարթակի մասի տանիքի լանջերի թեքությունը և պարապետի բարձրությունը։ Մնջախաղի թատրոնին տրամադրվել է շուրջ 950 քմ տարածք։ Այն բաղկացած է լինելու երկու բլոկից. թատրոնի բլոկ (320 քմ) և վարչատնտեսական բլոկ (630 քմ)։ Թատրոնի բլոկը՝ բեմական մասով ու հանդիսասրահով կառուցվելու է ճակատային մասով Կորյունի փողոցին նայող շենքում։ Բեմը ըստ էության թատրոնի սիրտն է, ու մնջախաղի թատրոնի գեղարվեստական ղեկավար Ժիրայր Դադասյանը մեծապես ու առաջնահերթ կարևորում է հենց բեմի հարմարությունն ու համապատասխանությունը թատրոնի պահանջներին. «Մնջախաղի թատրոնն ունի իր ժանրային առանձնահատկությունները, այն ավելի կամերային է, այստեղ կարևոր է մարմնի խաղը, միմիկան, և բեմի ու հանդիսատեսի միջև տարածությունն էլ պետք է մեծ չլինի՝ 100-130 մետր։ Նախագծով մենք փորձել ենք մաքսիմում ստեղծել բեմի համար անհրաժեշտ պայմանները, ունենալ հետնաբեմ, որ հնարավոր լինի նորմալ աշխատել։ Այդ պատճառով էլ մեր բեմական հատվածը բավական մեծ տարածք է գրավում»։ Բեմական մասը կունենա 9,5x10,5 չափեր։ Իսկ հանդիսատեսի սրահը կկազմեն 10,2x11,8 մ չափերով 133 տեղանոց դահլիճը, լուսային և ձայնային կառավարման սենյակը, սպասասրահը, միջանցքը, բուֆետը։ Վարչական տարածքում կլինեն դիմահարդարման սենյակներ, հանդերձարան, զգեստապահարաններ, փորձասենյակ, աշխատասենյակներ, սանհանգույց։ Թատրոնի մուտքը լինելու է շենքի միջնամասից՝ դրամատիկական թատրոնի ծառայողական շքամուտքից։ Այստեղ կվերակառուցվի գոյություն ունեցող ընդհանուր օգտագործման աստիճանավանդակը սակավաշարժություն և հաշմանդամության աստիճան ունեցող մարդկանց համար կգործի վերելակ։ Ճիշտ է՝ թատրոնի մուտքը դահլիճից բավական հեռու է գտնվում, հանդիսատեսը դահլիճ հասնելու համար պետք է անցնի թատրոնի վարչական մասի միջանցքով՝ մոտ 50 մետր պետք է քայլի, որ հասնի դահլիճի սպասարահ։ Ի դեպ Կորյունի փողոցին նայող հուշարձան-շենքի բակի կողմից ևս կա շքամուտք և գործող աստիճանավանդակ վերելակով, որն ավելի հարմար կլիներ շահագործել թատրոնի համար, քանի որ բարձրանում է ուղիղ դեպի դահլիճ։ Սակայն այն պատկանում է ներքևի հարկերի սեփականատիրոջը և թատրոնին կծառայի միայն որպես տարհանման երկրորդ ելք։ Փաստորեն նախորդ նախագծով նախատեսված առանձին ապակեպատ մուտքը՝ վերելակներով, լեդ-էկրանով, չի կառուցվի, քանի որ այն կարող էր աղավաղել հուշարձան-շենքի տեսքը։ Մնջախաղի թատրոնը մունջ սպասման մեջ Ժիրայր Դադասյանին հաստատված նախագիծը բավարարում է։ Գեղարվեստական ղեկավարն անհասցե թափառումների մոտ 20 տարիների ընթացքում հետաքրքրվել է Երևանի կենտրոնում գտնվող բոլոր այն շենքերով ու տարածքներով, որոնք կարող էին ծառայել որպես թատրոն, բայց բոլորը վաճառված ու վերավաճառված են. սա միակ հարմար տարբերակն է, ու իրենք այն լիովին կհարմարեցնեն իրենց պահանջներին։ Եթե մինչև հիմա սեփական տարածք ու բեմ չունենալով կարողացել են այսպիսի ճանաչում ձեռք բերել, մասնակցել տարեկան 5-6 միջազգային փառատոններում, Հայաստանում կազմակերպել մնջախաղի միջազգային փառատոն, ունենալ պրեմիերաներ, որոնցից վերջինը՝ «Պիերոյի երազը», ներկայացվեց այս հոկտեմբերին, ապա սեփական տարածքում արդեն ավելի բեղմնավոր ու մեծ թափով աշխատանքներ ծավալելու հնարավորություն կունենան։ Թատրոնն իր 45 –ամյակը սեփական բեմում չկարողացավ նշել, բայց հուսով է, որ մյուս տարի արդեն տեղափոխված կլինեն սեփական տարածք։ Քաղաքաշինության կոմիտեն դեռ օգոստոսին հայտարարել է թատրոնի շենքի վերակառուցման շինարարական աշխատանքների գնման գործընթացի մասին, որը դեռ չի ավարտել: Կառուցապատողի հայտնի լինելուց 14 ամիս անց միայն թատրոնի կոլեկտիվը կկարողանա տեղափոխվել սեփական տարածք:

Այս ամառ մեկնարկել է «Պոլ Էլյուարի Տուն Ֆրանկոֆոնիայի Կենտրոն» նախագծի շինարարությունը։ Նախագիծն իրականացնում է «Պորտալ» ճարտարապետական արվեստանոցը, իսկ ծրագիրն իրականացվում է Հայաստանի համահայկական հիմնադրամի և Արցախի կառավարության կողմից։ Տարածքը գտնվում է Ստեփանակերտ քաղաքի Թումանյան փողոցին կից՝ 2277 մ2 մակերեսով, Շառլ Ազնավուրի մշակույթի կենտրոնի հարևանությամբ։ Շենքը զբաղեցնում է 700 մ2 տարածք: Նախագիծը կատարված է ըստ ճարտարապետահատակագծային առաջադրանքի և գործող շինարարական նորմերի: Շինարարության ավարտը նախատեսվում է 2020թ.-ի ամռանը։ Ֆրանկոֆոնիայի Կենտրոնի անմիջապես հարևանությամբ նախատեսվում է կառուցել նաև ՏՏ դպրոց 450 աշակերտի համար և մատուռ: Ֆրանկոֆոնիայի կենտրոնը բաղկացած է երեք մասից՝ ոչ կոմերցիոն մաս, կոմերցիոն մաս և պարտեզ: Գլխավոր մուտքը կազմակերպված է Թումանյան փողոցից: Ծածկած միջանցքը կապ է հանդիսանում մայթի և պարտեզի միջև, որտեղից և կազմակերպված են կոմերցիոն և ոչ կոմերցիոն մասերի գլխավոր մուտքերը: Ունենք նաև երկրորդ մուտք, որը կազմակերպված է արևմտյան կողմից, այս մուտքին կից կազմակերպված են նաև ավտոկանգառներ: Գլխավոր մուտքին կից կտեղադրվի Պոլ Էլյուարի քանդակը: Բնականաբար, այս նախագծի շուրջ հետաքրքրությունը մեծ է։ Կենտրոնը բաղկացած է լինելու երեք մասից, որի շուրջ զրուցեցինք «Պորտալ» ճարտարապետական արվեստանոցի ճարտարապետ Սևակ Ասրյանի հետ։ -Սկսեմ ոչ կոմերցիոն մասից, այն կազմում է 488քմ։ Այս մասում տեղակայված է գլխավոր դահլիճը՝ 135 մ2 մակերեսով, 5մ առաստաղի բարձրությամբ։ Այն ունիվերսալ տրանսֆորմացվող դահլիճ է, որը շարժական միջնապատի միջոցով բաժանվում է երկու մասի՝ այստեղ կարելի է կազմակերպել բազմազան միջոցառումներ, փոխելով աթոռների և սեղանների դիրքերը։ Դահլիճը բացվող վիտրաժների միջոցով ունի ելք դեպի պարտեզ։ Նույն հարկի +600 նիշի վրա կազմակերպված են. նիստերի դահլիճ, դասասենյակ, գրադարան-դասասենյակ, հանդերձարան, սանհանգույց և տեխնիկական սենյակ: Երկրորդ հարկում կազմակերպված են երեք հյուրասենյակներ, որոնց պատշգամբները բացվում են դեպի Շառլ Ազնավուրի զբոսայգի: Հարկում նախատեսված է նաև տնօրենի կաբինետ, բացօթյա տեռաս և լվացքատուն: Իսկ կոմերցիոն մասի մակերեսը կազմում է 327 քմ։ Այստեղ կազմակերպված են ճաշասրահը՝ 127 մ2 մակերեսով, սպասարկող խոհանոցային մասով, որն ունի անմիջապես ելք դեպի պարտեզ և բացօթյա ճաշասրահ: Այս նիշի վրա կազմակերպված է նաև հացաբուլկեղենի պատրաստման և վաճառքի մասը, տեխնիկական սենյակ, հանդերձարան և սանհանգույցներ: Կոմերցիոն մասի ստորգետնյա հարկում նախատեսվում է մառան, որի մուտքը լինելու է պարտեզից: -Պարոն Ասրյան որքան գիտեմ, երրորդ մակերեսը հատկացված է պարտեզի համար, որքա՞ն տարածք է այն կազմելու և ինչպիսի՞ն է այն լինելու։ - Պարտեզի մակերեսը կազմում 850 քմ։ Պարտեզը կանաչապատ, ընդհարձակ տարածք է լինելու, որի կենտրոնական մասում լինելու է ջրային ոչ մեծ մակերես՝ շատրվաններով: Այստեղ նախատեսված է կազմակերպել տարբեր միջոցառումներ, ունենք նաև պերգոլաներով շվաքարան: Պարտեզը կից է նախագծվող ՏՏ դպրոցի տարածքին՝ իր սպորտային խաղադաշտով, որը կսպասարկի նաև ֆրանկոֆոնիայի կենտրոնին: Պարտեզում կտեղադրվեն փայտե 3 արձանիկներ: -Ին՞չ ոճի մեջ է կառուցվելու կենտրոնը։ -Նախագծի ճարտարապետությունը կատարված է ժամանակակից ոճով, տանիքները հարթ են, արտաքին հարդարման աշխատանքներում օգտագործված է տեղի բնական քար, տուֆ, փայտ, ապակի և մետաղ: Բնական նյութեր են օգտագործված նաև ինտերյերներում: