Մեր օրերում նոր երկնաքերեր կառուցելով ոչ ոքի չես զարմացնի, հատկապես ասիական երկրներում: Սակայն Հարավային Կորեայի ճարտարապետներին հաջողվել է ինչ որ նոր բան ստեղծել և զարմացնել բոլորին: Վերջիններս որոշել են նախագծել և կառուցել այնպիսի աշտարակը, որը կիսով չափ անտեսանելի կլինի: Նշենք, որ շինարարության ավարտից հետո «Ինֆինիթի Թաուերը» (Infinity Tower) կդառնա աշխարհի առաջին անտեսանելի երկնաքերը: Ինչպես տեղեկացնում է «ՋիԴիԷս Արքիթեքթս» (GDS Architects) ընկերության պաշտոնական կայքը, երկնաքերի նախագիծը դեռ գտնվում է նախագծային փուլում: «Ինֆինիթի Թաուերը» նախատեսվում է կառուցել Ինչոն (Incheon) քաղաքում՝ Սեուլից ոչ հեռու: Աշտարակի կառուցման վայրը պատահական չէ ընտրված, քանի որ այս քաղաքը համարվում է կորեական մայրաքաղաքի «հիմնական դարպասը»: Այստեղ է գտնվում միջազգային օդանավակայանն ու նավահանգիստը: Շատերը կհարցնեն՝ ինչպես են ճարտարապետները նախատեսում կառուցել անտեսանելի աշտարակ: Բանն այն է, որ երկնաքերը կունենա թեք եզրերով բյուրեղի տեսք, իսկ անտեսանելիության անհավանական օպտիկական ազդեցություն ճարտարապետները նախատեսում են ստանալ հատուկ երեսպատման նյութերի, պրոեկտորների և գունավոր լուսավորման միջոցով: Նախագծի հիմնական կառուցապատողը «Կորեա Լենդ Քորփորեյշն ենդ Չեոնգնա Օրգընայզեյշն» (Korea Land Corporation and Cheongna Organization) ընկերությունն է: 450 մետր բարձրությամբ աշտարակի ընդհանուր մակերեսը կկազմի 145 հազար քառակուսի մետր: Սակայն նախագծի հիմնական բյուջեն, և շինարարությունը սկսելու ճշգրիտ տվյալները դեռ չեն հրապարակվում: Կայքի տվյալներով՝ այս աշտարակում 385 մետր բարձրության վրա կլինի աշխարհում իր բարձրությամբ երկրորդ դիտահարթակը, առևտրային կենտրոններ, սրճարաններ, հսկայական ջրաշխարհ, ինչպես նաև մարզական համալիրներ:

Նորվեգիայում կառուցում է աշխարհի «ամենականաչ» տվյալների կենտրոնը, որը կկոչվի «Գրին մաունթին» (Green Mountain): Ստորգետնյա տվյալների կենտրոնը գտնվում է Ստավանգեր քաղաքից ոչ հեռու, Նորվեգիայի հարավ-արևմտյա ծովափին տեղակայված լեռների ստորոտում: Աշխարհի «ամենականաչ» տվյալների կենտրոնի հովացման համար էլեկտրականություն գրեթե անհրաժեշտ չէ, քանի որ այն պիտի հովացվի ջրով, որը կվերցվի անմիջապես ֆյորդից, իսկ արդեն օգտագործված ջուրը կվերադարձվի մեկ այլ ֆյորդ, որտեղ էլ կրկին ձեռք կբերի անհրաժեշտ ջերմաստիճան: Նշենք, որ ֆյորդի ջուրը միշտ 8 աստիճան է՝ ըստ Ցելսուսի սանդղակի, ինչն էլ գերազանց համապատասխանում է հովացման նպատակներին: Ինչպես տեղեկացնում է Inhabitat կայքը, 21 հազար քառակուսի մետր ընդհանուր մակերեսով նախագծի իրագործմամբ զբաղվում են 3 նորվեգիական ընկերություններ՝ «Սմեդվիգ» (Smedwig), «Լայս Էներջի» (Lyse Energy) և «Էրգո գրուփ» (Ergo Group): Ըստ նախնական տվյալների՝ այստեղ կտեղակայվեն կենտրոնի ադմինիստրացիան, պահեստը և 9 սրահ՝ սերվերների տեղադրման համար: Այսօր աշխարհում շատ տվյալների կենտրոններ փորձում են օգտագործել ամենաէներգախնայող համակարգերը, իսկ «Գրին Մաունթինի» կառուցապատողներ միանգամից կրկնակի են շահել: Բանն այն է, որ նրանք կարող են որպես մոդերատոր օգտագործել հողն ու շրջակա բնությունը, իսկ կենտրոնն էլ կհովացվի ֆյորդերի ջրով: Նշենք, որ կենտրոնի էներգետիկ սնուցումը նույնպես կիրականացվի վերականգնվող էներգիայի մի քանի աղբյուրներից և արդյունքը՝ ածխաթթու գազի ոչ մի արտանետում: Ըստ նախնական տվյալների ստորգետնյա կենտրոնի շինարարությունը կավարտվի 2012 թ-ի վերջին: Ֆյորդը նեղ, ոլորուն և ժայռային ափերով ցամաքի մեջ մխրճված փոքրիկ ծովածոց է: Ֆյորդի երկարությունը հաճախ տասնյակ անգամներ գերազանցում է լայնությանը: Վերջիններս հաճախ ունենում են տեկտոնական ծագում և ձևավորված են լինում մինչև հազար մետր բարձրություն ունեցող ժայռերով: Այսօր աշխարհում հայտնի են 4 ֆյորդային շրջաններ՝ Նորվեգիայի արևմտյան ափերին, Չիլիում, Նոր Զելանդիայում և Հյուսիսային Ամերիկայում:

«Նուր Էներջի» (Nur-Engine) ընկերությունը նախատեսում է արևային էլեկտրակայան կառուցել Սահարա անապատի Թունիսյան հատվածում: Այս մասին հաղորդվում է ծրագրի գործընկեր «Դեսերտեք Ֆաունդեյշն» (Desertec Foundation) ընկերության տարածած մամլո հաղորդագրության մեջ: «ՏուՆուր» (TuNur) անվանումը ստացած նախագիծը կիրականացվի մի քանի փուլով: Ըստ նախնական տվյալների՝ առաջին փուլի շինարարությունը կսկսվի 2014 թ-ին և արդեն 2016 թ-ին Իտալիայի որոշ տարածքներ էլեկտրաէներգիա կմատակարարի հենց այս արևային կայանը: «ՏուՆուր» էլեկտրակայանի հզորությունը կկազմի մոտ 2 գիգավատ, որը 2 անգամ ավել է, քան ժամանակակից ատոմային էլեկտրակայանի միջին էներգաբլոկի հզորությունը: Նախատեսվում է նաև, որ էլեկտրակայանում կաշխատեն մոտ 20 հազար մարդ: Ընկերության տարածած հաղորդագրությունում ասվում է, որ էլեկտրակայանը բաղկացած կլինի 825 հազար արևային հայելիներից, իսկ հզորությունը հնարավորություն կտա էլեկտրականությամբ ապահովել 700 հազար տուն: Արևային էլեկտրակայանի շինարարությունն իրականացվում է Թունիսում, քանի որ Սահարայում արևային ռադիացիան 3 անգամ ավելին է, քան Կենտրոնական Եվրոպայում: «Դեսերտեք Ֆաունդեյշն» ընկերությունը ստեղծվել է 2009 թ-ին: Այն միջազգային կոնսորցիում է, որի նպատակն է Եվրոպան էլեկտրականությամբ ապահովել արևային էներգիայի միջոցով: Կոնսորցիումի կազմում են այնպիսի հսկա կազմակերպություններ, ինչպիսիք են՝ «ԷյԲիԲի»-ն (ABB) և «Սիմենսը» (Siemens), «ԱրՎիԻ» (RWE) ընկերությունը, «Դոյչե Բանկը» (Deutsche Bank), ինչպես նաև «Մունիք Ռի» (Munich Re) ապահովագրական ընկերությունը: «Դեսերտեք Ֆաունդեյշն» կոնսորցիումի ստեղծման ժամանակ հայտարարվեց, որ մասնակիցները պատրաստ են ծրագրում ներդնել մոտ 400 մլրդ եվրո, իսկ արևային էլեկտրակայաններ կկառուցվեն Աֆրիկայում և Մերձավոր Արևելքում: «Դեսերտեք Ֆաունդեյշն»-ը նախատեսում է գրավել Եվրոպական էլեկտրամատակարարման շուկայի 15 տոկոսը:

Էներգիան խնայելու նպատակով Վաշինգտոնի համալսարանի Մոլեկուլային ճարտարագիտության և գիտության մասնաճյուղի շենքի պատերն օդի տաք ջերմաստիճանի դեպքում սկսում են «հալվել», հաղորդում է The Tecca կայքը: Շենքի արտաքին կառուցվածքն, անշուշտ, կարծր է, բայց էներգիա խնայելու նպատակով գիտնականները ստեղծել են հատուկ մի գել, որը նրանք լցրել են շենքի արտաքին պատերի՝ ապակիների մեջ: Երբ դրսում ջերմաստիճանը բարձրանում է, պատերի մեջ եղած գելը սկսում է հալվել՝ ապահովելով զովություն շենքի ներսում: Գելի աշխատանքի յուրահատկությունն այն է, որ այն օգտագործում է թերմոդինամիկայի հիմնական սկզբունքը՝ նյութը պինդ վիճակից հեղուկի անցնելու ժամանակ և ընդհակառակը, կլանում է էներգիան` առանց ջերմաստիճանի փոփոխման: Օրվա ընթացքում, երբ դրսում ջերմաստիճանը բարձր է, գելը հալվում է` վերցնելով էներգիան: Գիշերվա ընթացքում գելը նորից անցնում է պինդ վիճակի՝ ցուրտ ջերմաստիճանի պատճառով, որպեսզի հաջորդ օրվա ընթացքում պատերը կարողանան էներգիա կլանել: Այս կերպ կարիք չի լինում օդորակիչներ օգտագործել և նվազում են շենքի էներգետիկ ծախսերը: Սա զովացնող նոր տեխնոլոգիաներից միայն մեկն է, որ ստեղծվել է գիտնականների կողմից: Եվ չնայած, որ այն լայն գործածություն չունի, գիտնականները կարծում են, որ մեկ տասնամյակ հետո նման տեխնոլոգիաները լայն տարածում կստանան շինարարության ոլորտում:

Ինչպես տեղեկացնում է Constructiondigital կայքը, աշխարհի խոշորագույն աստղադիտակի շինարարությունը նախատեսվում է սկսել այս տարի Չիլիի Սերրո Արմազոնես (Cerro Armazones) սարի վրա, գոյություն ունեցող աստղադիտարանի մոտ: 1.4 մլրդ ԱՄՆ դոլար բյուջեյով խոշորագույն աստղադիտակի կառուցումը հնարավորություն կտա հետաքրքրասերներին և աստղագետներին հիանալ տիեզերքի աննախադեպ պատկերով, բացահայտել նրա բոլոր գաղտնիքները, հայտնագործել նոր մոլորակներ, ինչպես նաև բացահայտել խորհրդավոր մութ նյութի և մութ էներգիայի գաղտնիքները: Աշխարհի խոշորագույն աստղադիտակի շինարարության նախագիծը ղեկավարում է Եվրոպական հարավային աստղադիտարանի խորհուրդը (European Southern Observatory): Ատակամա անապատում նախապատրաստական շինարարական աշխատանքները կսկսվեն արդեն մոտ ապագայում: Ըստ նախնական տվյալների՝ աստղադիտակը կունենա 5 հայելի, որոնցից գլխավորի տրամագիծը կկազմի ավելի քան 42 մետր: Նշենք, որ այն ավելի քան 30 մետրով մեծ կլինի Հավայան կղզիներում գտնվող, աշխարհի գործող ամենախոշոր՝ Կեկ (Keck) աստղադիտակի հայելուց: Եվրոպական հարավային աստղադիտարանի խորհուրդը հույս ունի, որ նոր աստղադիտակը շահագործման կհանձնվի առաջիկա տասնամյակում: Այնուամենայնիվ, խորհուրդը նշում է, որ նման մեծամասշտաբ նախագիծի իրականացումը կարող է ձգձգվել չնախատեսված ծախսերի առաջացման պատճառով: Աստղադիտարանի խորհուրդը նաև ընդունում է, որ նախապատրաստական աշխատանքները պետք է անհապաղ սկսել, որպեսզի հնարավոր լինի բուն շինարարական աշխատանքները սկսել արդեն 2012 թ-ին: