Նյու Յորքի անշարժ գույքի շուկայում նոր ռեկորդ է սահմանվել՝ Մանհեթենում դեռ անավարտ բնակարանի համար անհայտ գնորդը վճարել է 90 մլն ԱՄՆ դոլար, տեղեկացնում են ամերիկյան ԶԼՄ-ները: Գնային նոր ռեկորդը սահմանվել է 57-րդ փողոցում կառուցվող «Ուան 57» (One57) բազմաֆունկցիոնալ երկնաքերի 89-90-րդ հարկերում գտնվող փենթհաուսի համար: Ի դեպ, մյուս տարի շինարարության ավարտից հետո «Ուան 57»-ը կդառնա Նյու Յորքի ամենաբարձր բնակելի երկնաքերերից մեկը: Նշենք նաև, որ դեկտեմբերից մինչ օրս արդեն վաճառվել է երկնաքերի 92 բնակարանները: Մինչ այս վերջին գնումը, Նյու Յորքի ամենաթանկ բնակարանը համարվում էր ռուս միլիարդատեր Դմիտրի Ռիբոլովլևի կողմից Սենթրալ Փարկ վեսթ Ավենյուում (Central Park West Avenue) ձեռք բերված 88 մլն ԱՄՆ դոլար արժողությամբ բնակարանը: Վերջինս 626 քառակուսի մետր մակերեսով 10 սենյականոց փենթհաուս է՝ Նյու Յորքի Կենտրոնական զբոսայգուն նայող տեսարանով: Այժմ նա իր բնակարանով արդեն երկրորդ տեղում է, սակայն քառակուսի ֆուտի արժեքի տեսանկյունից Ռիբոլովլևը մնում է բացարձակ առաջատար: Բանն այն է, որ նա իր բնակարանի 1 քառակուսի մետրի համար վճարել է 140 հազար ԱՄՆ դոլար գումար, մինչդեռ «Ուան 57»-ում քառակուսի մետրի գինը կազմել է 88,6 հազար ԱՄՆ դոլար և առավելագույնը կարող է հասնել 100 հազարի: Ոլորտի մասնագետների խոսքերով, վերջին ամիսներին օտարերկրյա գնորդները, մասնավորապես՝ բրազիլացիները, չինացիները, ռուսները և ուկրաինացիները, բացարձակ մեծամասնություն են կազմում Նյու Յորքի և Մայամիի անշարժ գույքի շուկաներում: Սակայն ինչպես նշում է «Էքսթելլ Դեվելոփմենթ» (Extell Development) ընկերության տնօրեն Գարի Բարնեթը (Gary Barnett), նոր ռեկորդ Նյու Յորքի անշարժ գույքի շուկայում սահմանած գնորդը ոչ ռուս է, ոչ ուկրաինացի, նա անգամ նախկին Խորհրդային Միության երկրներից էլ չէ: Դա Ամերիկայում հայտնի ընտանիք է, ով պատրաստվում է բնակվել ձեռք բերված բնակարանում: 90-հարկանի «Ուան 57» երկնաքերի շինարարությունը սկսվել է 2010 թ-ին: Ըստ նախնական տվյալների՝ շինարարության ավարտից հետո 2013 թ-ին այն կունենա 306 մետր բարձրություն, կներառի 135 բնակելի տարածք և 210 հյուրանոցային համար: Նշենք նաև, որ այս գեղեցիկ երկնաքերի ճարտարապետն է Պրիցկերյան մրցանակի դափնեկիր Քրիսթիան դե Ատելիեր Փորթզամփարքը (Atelier Christian de Portzamparc), իսկ շինարարությունն իրականացնում է «Էքսթելլ Դեվելոփմենթ» (Extell Development) ընկերությունը:

Կալիֆորնիայի գիտնականները փորձեցին ավերել հինգհարկանի, նորակառույց, լրիվ համալրված ժամանակակից սարքավորանքով հիվանդանոցը, հաղորդում է BBC-ն: «Կեղծ» հիվանդանոցը կառուցված է մի մեծ փորձարկային հարթակի վրա, որը կարող է իմիտացնել երկրաշարժի ժամանակ առաջացող երկրակեղևի շարժումները: Կառույցի երկաթբետոնե հիմքերի տակ տեղադրվել են հատուկ ռետինե տակդիրներ, որոնց նպատակն է մեղմել տատանումերի ալիքները: Փորձարկումների ժամանակ գիտնականները «ստեղծեցին» երկրաշարժի ցնցումներ, որոնք կրկնօրինակում էին 1994 թվականի 6,7 մագնիտուդով Լոս Անջելեսի և 2010 թվականի 8,8 մագնիտուդով Չիլիի երկրաշարժերը: Կալիֆորնիայի համալսարանի պրոֆեսոր Հատչինսոնի խոսքերով, փորձարկումներից հետո շենքը միայն թեթև կոսմետիկ վնասվածքներ ունեցավ, իսկ սարքավորանքները բոլորը մնացել են աշխատանքային վիճակում, որը փորձարկման հիմնական պահանջներից էր: Մյուս փորձարկումը արդեն կիրականացվի առանց ռետինե տակդիրների՝ համեմատելու համար փափուկ տակդիրների արդյունավետությունը: Ճապոնիայում արդեն վաղուց է օգտագործվում այս եղանակը: Կալիֆորնիայում նույնպես կան կառուցված որոշ ադմինիստրատիվ շենքեր, սակայն դրանք «իրական երկրաշարժով» փորձարկում չեն անցել: Ամերիկացիները պատրաստվում են լայնորեն օգտագործել այս եղանակը հիվանդանոցների, տեղեկատվական կենտրոնների և այլ ստրատեգիկ նշանակության կառույցների շինարարության ժամանակ: Հայաստանում նույնպես կիրառվում է նմանատիպ մեթոդ, և մասնավոր կառուցապատողների կողմից անգամ մի քանի նորակառույցներ կան կանգնեցված ռետինե տակդիրների վրա: Նորարարության իրականացման հեղինակն է հանդիսացել տեխնիկական գիտությունների դոկտոր, ՀԱՀ-ի պրոֆեսոր Մ.Մելքոնյանը: Սակայն շենքերի սեյսմիկ անվտանգության ծրագրերը պետք է ունենան պետական մոտեցում և, անվտանգության առաջնահերթությունը պետք է տրվի նոր՝ սեյսմակայուն հիվանդանոցներին, պետական կառավարման կառույցներին, կրթական հաստատություններին և այլ ստրատեգիկ և կենսական նշանակության կառույցներին: Ըստ Սեյսմիկ պաշտպանության ազգային ծառայության տվյալների, երկրակեղևում հավաքված լարվածությունը արդեն կարող է գեներացնել 5,5 մագնիտուդից ավել ցնցումներ Հայաստանում, իսկ հաշվի առնելով, որ Երևանը սեյսմիկ խոցելիությամբ զբաղեցնում է աշխարհում առաջին հորիզոնականները, ապա ինչին՞ ենք մենք դեռ սպասում, լրիվ անհասկանալի է...

Չիկագոյի քաղաքային իշխանությունները քննարկման են ներկայացրել վերգետնյա հանրային այգու կառուցման նախագիծ, տեղեկացնում է Chicago Tribune պարբերականը: Ըստ տարածած հաղորդագրության` այգին կկառուցվի քաղաքի երկաթգծի «Բլումինգդեյլ Թրեյլ» (Bloomingdale Trail) ճյուղի վերակառուցման արդյունքում: Ինչպես տեղեկացնում է մեկ այլ ինտերնետային պարբերական The Inhabitat-ը, այս՝ գետնից բարձր երկաթգիծը, շահագործումից դուրս է եկել դեռևս 1990-ական թվականներին, և այդ օրվանից բազմաթիվ կարծիքներ են հնչել այն վերակառուցելու վերաբերյալ: Հակառակ անվանման «Բլումինգդեյլ Թրեյլ» երկաթգիծն այսօր նման չէ ծաղկող հովտի, բայց ամեն ինչ կփոխվի, եթե վերոնշյալ նախագիծը կյանքի կոչվի: «Օդային» այգու նախագիծն իրականացրել են «ԱՐՈՒՓ» (ARUP), «Ռոս Բարնի Արքիթեքթս» (Ross Barney Architects) և «Միշել վան Վալքենբերգ Ասոշիեյթս» (Michael van Valkenburg Associates) ճարտարապետական ընկերությունների մասնագետները: Նախագծի սկզբնական փուլը նախատեսում է 4.3 կիլոմետր երկարությամբ ճանապարհահատվածի վերակառուցում: Նախագծի իրականացումից հետո, փողոցից 4.6 մետր բարձրության վրա այգու այցելուները կկարողանան գտնել հեծանվային ուղիներ, զբոսնելու արահետներ, նստարաններ և խաղահրապարակներ, ինչպես նաև ցուցահանդեսային հրապարակներ բաց երկնքի տակ: Այգու առաջին ճյուղի վրա կկառուցվեն 8 մուտքեր, որոնք հարմարեցված կլինեն ինչպես ոտքով քայլելու, այնպես էլ հեծանիվով անցնելու համար: Նախագծի շինարարության առաջին փուլը, ըստ նախնական հաշվարկների, կկազմի 46 մլն ԱՄՆ դոլար, ընդ որում ողջ գումարն արդեն գտնված է: Գումարի 37 մլն ԱՄՆ դոլարը հավաքվել է քաղաքային հիմնադրամներից, իսկ մնացած 7 մլն-ը կտրամադրեն 3 մասնավոր ընկերություններ: Քննարկվող ամբողջական նախագիծը գնահատվում է 80 մլն ԱՄՆ դոլար: Նախագծի հեղինակները հույս ունեն, որ շինարարությունը կսկսվի արդեն 2013 թ-ին, և, եթե ամեն ինչ ըստ որոշվածի ընթանա, ապա հանրային այգու առաջին հատվածը հանրության առջև կբացվի արդեն 2014-ին: Նշենք, որ այս ծրագրի իրականացման համար ներշնչանքի աղբյուր է դարձել Նյու Յորքում հաջողությամբ իրականացված «Հայ Լայն» (High Line) վերգետնյա հանրային այգին: Ծաղիկներից, ծառերից, թփերից, դիտահրապարակներից և զբոսնելու արահետներից բաղկացած այս այգին կառուցվել է վաղուց լքված վերգետնյա երկաթգծի վերակառուցման արդյունքում: Նախագծի իրականացման գաղափարն առաջացել է 2006 թ-ին և անթերի իրականացվել 2009-ին: Այգին այնքան գրավիչ է ստացվել, որ 2010 թ-ին որոշում է ընդունվել այն կրկնակի երկարեցնել: 2011 թ-ին արդեն այս նախագիծը կյանքի է կոչվել և կա մշակված տարբերակ: Այգու շինարարության 3-րդ փուլը կգրավի քաղաքի «Հադսոն Ռեյլ Յարդս» (Hudson Rail Yards) հատվածը: Նախագիծն իրականացրել են «Ջեյմս Քորներ Ֆիլդ Օփերեյշնս» (James Corner Field Operations) կանաչապատման և «Դիլլեր Սքոֆիդիո և Ռենֆրո» (Diller Scofidio + Renfro) ճարտարապետական ընկերությունները: Ի դեպ այս 2 ընկերությունների համագործակցության արդյունքում էլ կառուցվել են ծրագրի առաջին 2 փուլերը: Ըստ նախնական տվյալների՝ այս նախագծի բյուջեն կկազմի 90 մլն ԱՄՆ դոլար, ընդ որում, ողջ գումարը նվիրատվությունների արդյունքում է հավաքվել: «Հայ Լայն» այգու 3-րդ, վերջնական փուլի ավարտը նախատեսված է 2014 թ-ին:

Նյու Ջերսի նահանգում վաճառքի է հանվել հանրաճանաչ երգչուհու այն առանձնատունը, որտեղ նա ապրել է մոտ 15 տարի: Նշենք, որ այստեղ է տեղի ունեցել Ուիթնի Հյուսթոնի և նրա նախկին ամուսին Բոբբի Բրաունի ամուսնությունը, ինչպես նաև այս տունը վկան է եղել նրանց համատեղ կյանքի վեճերին ու սկանդալներին: Ինչպես տեղեկացնում է The International Business Times ինտերնետային աղբյուրը, տունն առաջարկվում է 1.75 մլն ԱՄՆ դոլարով: Ի դեպ, դեռևս 2009 թ-ին տունը հանվել էր վաճառքի 2,5 մլն ԱՄՆ դոլարով, սակայն շուկայի անկայունության պատճառով մինչ այսօր չի վաճառվել: Վաճառվող առանձնատունը գտնվում է Նյու Ջերսի նահանգի Մենդհեմ Թաունշիփ (Mendham Township) փոքրիկ քաղաքում: 1170 քառակուսի մետր ընդհանուր մակերեսով առանձնատունը տեղակայված է 5 հեկտար հողի վրա: Տունը բաղկացած է 5 ննջասենյակից, 5 լողասենյակից և աչքի է ընկնում կլորավուն Ճակատային լուծումներով: Մեկ այլ աղբյուրի՝ Dailymail-ի հաղորդմամբ, տունը նախագծված է ազատ ոճով և ունի 12 հոգու համար նախատեսված ճաշասենյակ: Խոհանոցը ամբողջովին սպիտակ է, իսկ կենտրոնում տեղադրված է բար-կանգնակը: Բավականին շքեղ են առանձնատան լողասենյակները: Հարդարման մեջ օգտագործված են ապակյա պատեր, իսկ կենտրոնում տեղադրված է հսկա, շրջանաձև լոգարան: Հյուրասենյակը կառուցված է այնպես, որ շատ լուսավոր լինի, պատերը աղյուսից են, հսկայական պատուհաններով: Ազատ ոճով են կառուցված նաև ննջասենյակները: Վերջիններս ընդարձակ են, իսկ կենտրոնում պատվանդանի վրա տեղադրված է մահճակալը:

Էներգիան խնայելու նպատակով Վաշինգտոնի համալսարանի Մոլեկուլային ճարտարագիտության և գիտության մասնաճյուղի շենքի պատերն օդի տաք ջերմաստիճանի դեպքում սկսում են «հալվել», հաղորդում է The Tecca կայքը: Շենքի արտաքին կառուցվածքն, անշուշտ, կարծր է, բայց էներգիա խնայելու նպատակով գիտնականները ստեղծել են հատուկ մի գել, որը նրանք լցրել են շենքի արտաքին պատերի՝ ապակիների մեջ: Երբ դրսում ջերմաստիճանը բարձրանում է, պատերի մեջ եղած գելը սկսում է հալվել՝ ապահովելով զովություն շենքի ներսում: Գելի աշխատանքի յուրահատկությունն այն է, որ այն օգտագործում է թերմոդինամիկայի հիմնական սկզբունքը՝ նյութը պինդ վիճակից հեղուկի անցնելու ժամանակ և ընդհակառակը, կլանում է էներգիան` առանց ջերմաստիճանի փոփոխման: Օրվա ընթացքում, երբ դրսում ջերմաստիճանը բարձր է, գելը հալվում է` վերցնելով էներգիան: Գիշերվա ընթացքում գելը նորից անցնում է պինդ վիճակի՝ ցուրտ ջերմաստիճանի պատճառով, որպեսզի հաջորդ օրվա ընթացքում պատերը կարողանան էներգիա կլանել: Այս կերպ կարիք չի լինում օդորակիչներ օգտագործել և նվազում են շենքի էներգետիկ ծախսերը: Սա զովացնող նոր տեխնոլոգիաներից միայն մեկն է, որ ստեղծվել է գիտնականների կողմից: Եվ չնայած, որ այն լայն գործածություն չունի, գիտնականները կարծում են, որ մեկ տասնամյակ հետո նման տեխնոլոգիաները լայն տարածում կստանան շինարարության ոլորտում: