Ռուսական «Իտերա» (Итера) ընկերությունների խումբն ավարտել է Մինսկի կենտրոնում կառուցվող «Առագաստ» (Парус) բարձրահարկ բնակելի երկնաքերի մոնոլիտ կառուցվածքի շինարարությունը: Ինչպես տեղեկացնում է հոլդինգի մամուլի ծառայությունը, բարձրահարկը, որը ավարտվելուց հետո կդառնա երկրի ամենաբարձր երկնաքերը, նախատեսվում է շահագործման հանձնել 2013 թ-ին: Էլիտար «Առագաստ» բնակելի շենքը կառուցվում է Թիմիրյազեվա, Կալվարիյսկի և Մաքսիմ Թանկի փողոցների խաչմերուկում՝ «Ֆրունզենսկայա» մետրոյի կայարանի հարևանությամբ: Այս պահին շինության բարձրությունը կազմում է Բելոռուսիայի համար ռեկորդային 118.1 մետր: Ի դեպ, ավելի վաղ հայտարարվել էր, որ 204 բնակարանից բաղկացած երկնաքերի վերջնական բարձրությունը գագաթի պարույրով կկազմի 133 մետր: Ինչպես տեղեկացնում է կառուցապատող ընկերությունը, «Առագաստ» բնակելի համալիրը կազմելու է կառուցվելիք բազմաֆունկցիոնալ բիզնես-համալիրի մի մասը: Համալիրի առաջին 4 հարկերում կլինեն ադմինիստրատիվ և առևտրա-կենցաղային նշանակության տարածքներ: Վերևի 4 հարկերում կտեղակայվեն 4 երկհարկանի փենթհաուսներ: Բնակելի համալիրում նախատեսված են նաև գրասենյակներ, մարզական կենտրոն և ստորգետնյա ավտոկայանատեղի: Նշենք, որ բնակարանների մակերեսը կկազմի 61-179 քառակուսի մետր, իսկ առաստաղի բարձրությունը 3 մետր: «Իտերա» հոլդինգի մեջ ներառված են տասնյակ ընկերություններ ԱՊՀ, Բալթյան, արևմտաեվրոպական, ասիական երկրներից և ԱՄՆ-ից: Ընկերության գործունեության հիմնական ուղղությունը գազային բիզնեսն է: Վերջինիս ստրատեգիական ուղղություններից են նաև կառուցապատումը, գազաքիմիան, էներգետիկաի ոլորտը:
Պարսից Ծոցի տարածաշրջանում գտնվող երկրների շինարարական նախագծերի 43 տոկոսը սառեցված է համաշխարհային տնտեսական ճգնաժամի հետևանքով, տեղեկացնում է The National ինտերնետային կայքը: BNC ինտերնետային կայքի կատարած ուսումնասիրության համաձայն՝ տարածաշրջանում իրականացվող շինարարական նախագծերի ընդհանուր ծավալը կազմում է 1.68 տրլն ԱՄՆ դոլար, որոնցից սառեցված են ընդհանուր 735 մլրդ ԱՄՆ դոլար արժողությամբ նախագծեր: Բացի վերոնշյալից դեռ կան նաև նախագծեր, որոնք գտնվում են տենդերային, նախագծման և նախնական պլանավորման փուլերում: Այսպես՝ տենդերային փուլում են գտնվում 81մլրդ ԱՄՆ դոլար, նախագծման փուլում՝ 124,6 մլրդ ԱՄՆ դոլար, իսկ նախնական պլանավորման փուլում 264 մլրդ ԱՄՆ դոլար արժողությամբ նախագծեր: Ներկայացված ուսումնասիրության համաձայն՝ տարածաշրջանի խոշորագույն շինարարական շուկայում՝ Արաբական Միացյալ Էմիրություններում, իրականացվող նախագծերի ընդհանուր ծավալը կազմում է 681 մլրդ ԱՄՆ դոլար, որոնցից 62 տոկոսը, կամ 422 մլրդ ԱՄՆ դոլար արժողությամբ նախագծերը սառեցված են: Երկրորդ տեղը զբաղեցնող Սաուդյան Արաբիայում սառեցված են շինարարական նախագծերի 22.4 տոկոսը, որոնց ընդհանուր ծավալը կազմում է 103,2 մլրդ ԱՄՆ դոլար: Երրորդ տեղում է գտնվում Քուվեյթը, իսկ նրան հաջորդում է 2022 թ-ի Ֆուտբոլի աշխարհի առաջնության անցկացման իրավունքը շահած Քաթարը: Քաթարում շինարարական շուկայի ընդհանուր ծավալը կազմում է 170,2 մլրդ ԱՄՆ դոլար, որից սառեցված են 68, 6 մլրդ ԱՄՆ դոլար ընդհանուր արժողությամբ նախագծեր: Սակայն, չնայած տնտեսական աճի անկմանը, ֆինանսական ճգնաժամին և տարածաշրջանում սառեցված շինարարական նախագծերի հսկայական ծավալին, Մերձավոր Արևելքը համարվում է աշխարհի խոշորագույն շինարարական շուկաներից մեկը՝ զիջելով միայն Չինաստանին, նշվում է ուսումնասիրության մեջ: Բացի այդ, EC Harris ընկերության կատարած մեկ այլ ուսումնասիրության համաձայն՝ Մերձավոր Արևելքի երկրներն այսօր առևտրային համալիրներ կառուցելու համար լավագույն երկրների ցուցակում են: Վերոնշյալ ուսումնասիրության համաձայն՝ Սաուդյան Արաբիան, Քաթարը և Արաբական Միացյալ Էմիրությունները համապատասխանաբար զբաղեցնում են 8-րդ, 11-րդ և 15-րդ հորիզոնականները ներառված 40 երկրների ցուցակում: Իսկ Jones Lang LaSalle ընկերության կատարած ուսումնասիրությամբ՝ վերջին երկու տարիների ընթացքում Աբու Դաբիում 41 տոկոսով ավելացել է առևտրային կենտրոնների շինարարությունը:
Արաբական Միացյալ Էմիրությունների կառավարությունը հայտարարել է իր նպատակների մասին՝ կառուցել աշխարհի խոշորագույն դարպասները մայրաքաղաք Աբու Դաբիում: Այս երկիրը չի ցանկանում ետ մնալ նախկինում գրանցված ռեկորդներից և ուզում է այս տիտղոսն էլ կրել: Դուբայում են գտնվում աշխարհի ամենաբարձր շենքը՝«Բուրջ Խալիֆան» և աշխարհի ամենաբարձր բնակելի աշտարակը՝ «Փրինցես Թաուերը»: «Խալիֆան աշխարհի լեզուներով» (Khalifa in World Languages) անվանումը կրող նախագիծն իրականացնում է Սուլթան բեն Զաիդի անունը կրող մշակութային և լրատվական կենտրոնը: Նշենք, որ շինարարական աշխատանքները սկսվել են ամիսներ առաջ, սակայն շինարարության մասին պաշտոնապես հայտարարվել է օրերս: Նախագահ շեյխ Խալիֆաին նվիրված դարպասները կունենան 25 մետր բարձրություն, կներառեն տպագիր հանրագիտարան և ինտերնետ կայք: Ըստ նախնական տվյալների՝ նախագիծն արդեն գրանցվել է Գինեսի ռեկորդների գրքում և շահագործման կհանձնվի այս տարվա դեկտեմբերի 2-ին: Հանրագիտարանը կներառի աշխարհի 250 լեզուներով գրված նախագահի անունը, ինչպես նաև ԱՄԷ-ի պատմությունը: Սակայն նշենք, որ Աբու Դաբիի տարբերակն ունի իր մրցակիցը: Չինաստանի Սուչժոու (Suzhou) քաղաքում կառուցվում է դարպասանման աշտարակ: «Արևելյան դարպասներ» (Oriental Gate) անվանումը կրող աշտարակը մշակվել է բրիտանական «Առ-Էմ-Ջեյ-Էմ» (RMJM) ճարտարապետական բյուրոյի կողմից, շինարարությունը սկսվել է 2004 թ-ի սեպտեմբերին և կավարտվի այս տարվա վերջին: Ըստ նախնական տվյալների՝ 301.8 մետր բարձրությամբ աշտարակը կունենա 69 հարկ, որտեղ կտեղակայվեն հյուրանոց, գրասենյակային, բնակելի և առևտրային տարածքներ: Բացման արարողությունից հետո «Արևելյան դարպասները», որն արդեն համարվում է «աշխարհի համար առաջին դարպասը», կճանաչվի որպես աշխարհի խոշորագույն դարպասանման շինություն: Սակայն, ամենայն հավանականությամբ չինական մրցակիցը խաղից դուրս է, քանի որ շատերն այն ավելի նմանեցնում են «երկար վարտիքի»...
Սանկտ- Պետերբուրգում հասարակական-գործարար «Լախտա Կենտրոնի» շինարարությունը, որն իր մեջ ներառում է 463 մետր բարձրությամբ երկնաքեր, նախատեսվում է սկսել արդեն այս տարվա հոկտեմբերին, տեղեկացնում է ՌԻԱ Նովոստի կայքը, հղում կատարելով «Օխտա Հասարակական-Գործարար Կենտրոն» ՓԲԸ-ի գլխավոր տնօրեն Ալեքսանդր Բոբկովին: Սկզբում «Գազպրոմ» ընկերությունը նախատեսում էր 400 մետր բարձրությամբ «Օխտա Կենտրոն» երկնաքերը կառուցել Սանկտ-Պետերբուրգի Կարմիր գվարդիականների թաղամասում գտնվող Օխտինյան հրվանդանի վրա՝ Սմոլնիի տաճարի դիմաց: Սակայն բազմաթիվ քննադատությունների արդյունքում ընկերությունը որոշեց տեղափոխել շինարարության վայրը, և արդեն նոր անվանմամբ «Լախտա Կենտրոն» գործարար թաղամասը կառուցել քաղաքի պատմական կենտրոնից 10 կիլոմետր հեռավորության վրա՝ Ֆիննական ծովածոցի ափին գնված 140 հազար քառակուսի մետր մակերեսով տարածքում: Պրն. Ալեքսանդր Բոբկովի խոսքերով, շինարարությունը կիրանանա մի քանի փուլերով: Ամենաերկարը կտևի 463 մետր բարձրությամբ երկնաքերի շինարարությունը: Բոբկովի համոզմամբ արդեն հոկտեմբերի կեսին շինտեխնիկան կլինի հրապարակում, և կսկսվեն աշխատանքները: Շինարարության երկրորդ փուլը կսկսվի 1 տարի անց, իսկ 334 հազար քառակուսի մետր ընդհանուր մակերեսով ամբողջական «Լախտա Կենտրոն» գործարար թաղամասը շահագործման կհանձնվի 2018 թ-ին: Ընկերության գլխավոր տնօրենը չի ներկայացրել շինարարության ընդհանուր բյուջեն, սակայն նշել է, որ շինարարության 1 քառակուսի մետրը մոտավորապես կարժենա 2500-3500 ԱՄՆ դոլար, և նախագծի վերջնական տարբերակն ավելի մատչելի կլինի, քան նախապես առաջարկված «Օխտա Կենտրոնը», որի բյուջեն գնահատվում էր 1.9 մլրդ ԱՄՆ դոլար:
Մոռացեք ստորգետնյա ավտոտնակի մասին: Սինգապուրում արդեն կառուցել են այնպիսի բարձրահարկ բնակելի երկնաքեր, որն առաջարկում է ավտոկայանատեղի անմիջապես ձեր բնակարանում՝ անկախ թե որ հարկում է այն գտնվում: Նոր 30 հարկանի «Հեմիլթոն Սքոթս» (Hamilton Scotts) երկնաքերը գտնվում է Օրչարդ-Ռոուդ (Orchard Road) շքեղ թաղամասում: Այն ունի յուրօրինակ վերելակ՝ նախատեսված ավտոմեքենաների համար, որոնց բարձրացնում է անմիջապես սեփականատերերի բնակարաններում գտնվող հյուրասենյակի հարևանությամբ տեղակայված ապակե ավտոտնակներ: Վերելակն այսպես է աշխատում՝ մեքենայի սեփականատերը մտցնում է այն վերելակի մեջ, կանգնեցնում պտուտակադռնակի վրա, այնուհետև կենսաչափական սկաների վրա թողնում է իր մատնահետքերը, որպեսզի համակարգիչը որոշի, թե որ հարկ ու որ բնակարան այն բարձրացնի: Սակայն այս յուօրինակ նախագիծն ունի իր թերությունը. բնակարանները չափազանց թանկ են: Ամենամատչելի բնակարանը, որն ունի 2 ավտոմեքենայի համար նախատեսված կայանատեղի, գնահատվում է 7.5 մլն ԱՄՆ դոլար, իսկ 4 ավտոմեքենայի համար նախատեսված ավտոտնակ ունեցող փենթհաուսները գնահատվում են 24 մլն ԱՄՆ դոլար: Պարզ է, որ միջին եկամուտներով ապրող մարդկաց համար այն անհասանելի երազանք է: Նախագծի կառուցապատող «ՔՈՓ Փրոփերթիս» (KOP Properties) ընկերության գործադիր տնօրեն Լենի Սուպարմանի խոսքերով, այս բնակարանները նախատեսված են հատուկ գնորդների համար, ովքեր այս աշխարհում շատ բան են տեսել, և նրանց գրավելու համար անհրաժեշտ է յուրօրինակ նախագծեր մշակել: Անցած տարի գերմանական Պորշե Դիզայն Գրուփ (Porsche Design Group) և տեղական Դեզեր Փրոփերթիս (Dezer Properties) ընկերությունները հայտարարեցին Մայամիում Պորշե Աշտարակի (Porsche Tower) կառուցման մասին: Նրանց խոսքերով, այս նախագիծն առաջինը պիտի դառնար աշխարհում, որը հնարավորություն կտար բնակիչներին սեփական ավտոմեքենայով հասնել բարձրահարկում տեղակայված իրենց բնակարան: Սակայն նրանք արդեն ուշացել են: Բանն այն է, որ հայտարարված նախագիծը կմեկնարկի 2013 թ-ի երկրորդ եռամսյակում և շահագործման կհանձնվի 2016-ին, իսկ Սինգապուրում արդեն վաճառվում են նմանատիպ բնակարաններ: Իսկ 2010 թ-ին հայտնի Հոլիվուդյան աստղ Նիկոլ Քիդմանը և իր ամուսին Կիտ Ուրբանը Մանհեթենի էլիտար թաղամասում՝ Չելսիում (Նյու Յորք), ձեռք էին բերել մի փենթհաուս, որը նույնպես ունի 32.5 քառակուսի մետր մակերեսով վերելակով հասանելի ավտոտնակ, որը խոհանոցի հետ նույն հարկում է գտնվում:
