Էփլ (Apple) ընկերության ամերիկյան նոր գլխավոր գրասենյակի շենքը, որը նախատեսվում է շահագործման հանձնել 2015 թ-ին, իր ընդհանուր մակերեսով կգերազանցի ԱՄՆ-ի Պաշտպանության նախարարության՝ Պենտագոնի շենքի մակերեսը, տեղեկացնում է macobserver.com ինտերնետային կայքը: Կայքի լրագրողների կատարած հաշվարկների արդյունքում, պարզ է դարձել, որ Էփլ ընկերության նոր գրասենյակի շրջանաձև շենքը կունենա մոտ 492 մետր տրամագիծ, այնինչ Պենտագոնի շենքի շրջանի տրամագիծը, որի սահմանում կառուցված է հնգանկյան տեսքով նախարարությունը, կազմում է 477 մետր: Նշենք, որ Պենտագոնը համարվում է աշխարհի խոշորագույն գրասենյակային շենքը: Կառույցի 5 հարկերի ընդհանուր մակերեսը կազմում է 604 հազար քառակուսի մետր, որտեղ աշխատում են ավելի քան 26 հազար աշխատակից: Մեկ այլ ինտերնետային cupertino.org կայքի տվյալներով, ընկերության նոր գլխավոր գրասենյակի շենքի շինարարությունը նախատեսվում է սկսել մյուս տարի: Համաձայն կայքի տարածած տվյալների՝ շրջանաձև և ամբողջովին ապակուց բաղկացած շինության ընդհանուր մակերեսը կլինի 260 հազար քառակուսի մետր, որտեղ կաշխատեն մոտ 13 հազար աշխատակից: Գրասենյակային տարածքներից բացի այնտեղ կլինեն նաև հետազոտական կենտրոններ, կենտրոնական արտադրամասը, հազար հոգու համար նախատեսված խորհրդակցությունների դահլիճ, ֆիթնես-կենտրոն և ավտոկայանատեղի: Այժմ իրականացվում է նախագծի էկոլոգիական փորձաքննությունը, պարզելու համար՝ ինչքանով այն կազդի շրջակա միջավայրի և երթևեկության վրա շինարարության վայրում՝ Կուպերտինո քաղաքում: Վերջնական որոշումը կկայացվի հանրային քննարկումների արդյունքում: Նշենք, որ այժմ Էփլ ընկերությունը մրցակցում է նավթային հսկա Էքսոն Մոբիլ (Exxon Mobil) ընկերության հետ, աշխարհի ամենաթանկ ընկերության տիտղոսի համար:

Էփլ (Apple) ընկերությունը սպասում է Նյու Յորքի Մետրոպոլիտենի ղեկավար մարմինների թույլտվությանը, որպեսզի Նյու Յորքյան մետրոյի Գրանդ Սենթրալ (Grand Central) կայարանում սկսի իր ամենամեծ խանութ-սրահի շինարարությունը, հաղորդում է constructiondigital.com կայքը: Աշխարհի համակարգչային և էլեկտրոնային տեխնիկայի ամենահայտնի արտադրող Էփլ ընկերությունը ցանկանում է Գրանդ Սենթրալ կայարանի սրահում բացել իր ամենամեծ խանութ-սրահը: Նախնական տվյալներով ընկերությունն առաջին 10 տարվա ընթացքում խանութ-սրահի տարածքը կվարձակալի տարեկան 800 հազար ԱՄՆ դոլարով, իսկ դրանից հետո հնարավոր է վարձավճարը կբարձրանա մինչև տարեկան 1.1 մլն ԱՄՆ դոլար: Այժմ վարձակալական տարածքը զբաղեցնում է Չառլի Պալմերի Մետրազուր (Charlie Palmer’s Metrazur ) ռեստորանը, որը տարեկան վճարում է մոտ 264 հազար ԱՄՆ դոլար: Նախատեսվում է, որ Մետրոպոլիտենի ղեկավարությունը այսօր՝ հուլիսի 27-ին կհաստատի տարածքը Էփլին հանձնելու որոշումը: Դրանից հետո ընկերությունը պատրաստ է ռեստորանին վճարել 5 մլն ԱՄՆ դոլար, սրահի արևելյան պատշգամբը անհապաղ ազատելու համար: Եթե Մետրոպոլիտենի ղեկավարությունը հաստատի նախագիծը, Էփլը անմիջապես կսկսի շինարարական աշխատանքները և կավարտի 4 ամսվա ընթացքում: Սրահում կկատարվեն վերանորոգման աշխատանքներ և այն կդարձնեն առևտրային տարածք: Էփլի նոր խանութ-սրահը կունենա 2136 քառակուսի մետր ընդհանուր տարածք և կդառնա ընկերության խոշորագույն առևտրային կենտրոնը: Այսօր ամենամեծ վաճառքի սրահը գտնվում է Լոնդոնում: Խանութ-սրահի ընդհանուր մակերեսն է 2320 քառակուսի մետր, բայց այդ տարածքի միայն 1520-ն է հասանելի հանրությանը:

Ինչպես տեղեկացնում է Reuters.com լրատվական գործակալությունը, Լոս Անջելեսում շինարարական աշխատանքների համար քաղաքի իշխանությունները փակել են հիմնական ավտոմայրուղիներից մեկը և նորից բացել նախատեսված ժամանակից 16 ժամ շուտ: Մայրուղու բացումից հետո Լոս Անջելեսի քաղաքապետ Անտոնիո Վիլլարայգոսան հայտարարել է. «առաքելությունն իրականացված է և մայրուղու վաղաժամկետ բացումը հնարավորություն է տվել տնտեսել մոտ 400 հազար ԱՄՆ դոլար՝ աշխատավարձերի և նախագծի այլ ծախսերի կտրվածքով»: Լոս Անջելեսի իշխանությունները հուլիսի 17-ի երեկոյան փակել էին մայրուղու 6.2 կիլոմետր երկարությամբ Ինթերսթեյթ 405 (Interstate 405) ծանրաբեռնված հատվածը, որպեսզի ապամոնտաժեն կամուրջի 2 հիմնասյուները, որոնք խանգարում են մայրուղու լայնացմանը: Նշենք, որ այս աշխատանքները կազմում են 1 մլրդ ԱՄՆ դոլար արժողությամբ ճանապարհային նախագծի մի մասը: Շինարարները քանդել են կամուրջի հարավային մասը և աշխատանքը կատարել են ընդամենը 37 ժամում: 11 ամիս հետո քաղաքի իշխանությունները կրկին կփակեն մայրուղու նույն հատվածը, այս անգամ կամուրջի հյուսիսային հատվածը ապամոնտաժելու համար: Մեկ այլ newser.com կայքի տվյալներով, մայրուղին փակելուց առաջ քաղաքի իշխանությունները մտավախություն էին հայտնել, որ ճանապարհի ծանրաբեռնված հատվածում կարող էին խցանումներ առաջանալ, ուստի, շինարարական աշխատանքները ուշացնելու դեպքում, տուգանք էին նշանակել: Քաղաքի տրանսպորտային մարմնի տվյալներով կապալառուն՝ Քիեվիթ Ինֆրաստրաքչր Վեստ (Kiewit Infrastructure West) ընկերությունը պարտավորվել էր ճանապարհի յուրաքանչյուր ուղղությամբ շարժման բացման ամեն 10 րոպե ուշացնելու դեպքում վճարել 6 հազար ԱՄՆ դոլար տուգանք: Ընդհանուր առմամբ շինարարական աշխատանքների 1 ժամ ուշացումը կպատժվեր 72 հազար ԱՄՆ դոլար գումարով: Բացի վերոնշյալից շաբաթներ շարունակ քաղաքի իշխանությունները զգուշացնում էին բնակիչներին՝ հանգստյան օրերին խուսափել մայրուղու տվյալ հատվածով երթևեկելուց հնարավոր խցանումներից խուսափելու համար: Իսկ Ջեթբլյու ավիաուղերը (JetBlue Airways) հատուկ ակցիա էին նախատեսել՝ Բերբանկ (Berbank) -Լոնգ Բիչ (Long-Beach) չվերթի համար սահմանելով ընդամենը 4 ԱՄՆ դոլար ուղեվարձ: Նման կազմակերպված աշխատանքների արդյունքում էլ, թերևս, հնարավոր դարձավ ոչ միայն չուշացնել, այլև ժամանակից շուտ ավարտել շինարարական աշխատանքները:

Անցած շաբաթ Կալիֆորնիայի Բլայթ քաղաքի մոտ, Մոխավե անապատի տարածքում, նահանգապետ Ջերի Բրաունի և ԱՄՆ-ի ներքին գործերի նախարար Քեն Սալազարի ներկայությամբ (այս դեպարտամենտը հիմնականում զբաղվում է բնական ռեսուրսների կառավարմամբ) սկսվեց աշխարհի խոշորագույն պարաբոլիկ տիպի արևային էլեկտրակայանի շինարարությունը, տեղեկացնում է constructiondigital.com կայքը: Շինարարության ավարտից հետո շահագործման կհանձնվեն 4 արևային էլեկտրակայան, որոնք միասին կկարողանան գեներացնել 1000 մեգավատ էլեկտրաէներգիա: Էներգիայի այսպիսի քանակն ի վիճակի է բավարարել մոտ 800 հազար ամերիկյան միջին տների պահանջարկը: Էլեկտրակայանը կզբաղեցնի մոտ 28,5 քռ. կիլոմետր տարածք: Էլեկտրակայանի շինարարության հիմնաքարի տեղադրման հանդիսավոր արարողության ժամանակ նահանգապետ Բրաունը հայտարարել է, որ այս արևային էլեկտրակայանի շինարարությունը կարևորագույն քայլ է Կալիֆորնիայի ապագա «կանաչ» տնտեսության ձևավորման գործում: Նա նաև ավելացրել է. «մենք պատրաստվում ենք դառնալ առաջատարն աշխարհում արևային էներգիայի արտադրման ոլորտում»: Շինարարության նախապատրաստական աշխատանքները սկսվել են դեռևս 2010 թ-ին, և նախատեսվում է, որ առաջին 2 էլեկտրակայանները կսկսեն աշխատել և կմիացվեն Կալիֆորնիայի էլեկտրացանցին արդեն 2014 թ-ին: Ապրիլին Բլայթ արևային նախագիծը 2.1 մլրդ ԱՄՆ դոլարի փոխառության երաշխիք է ստացել ԱՄՆ-ի Դաշնային ֆինանսավորման բանկից (US Federal Financing Bank), սակայն նախատեսվում է, որ ընդհանուր բյուջեն կհասնի 2.8 մլրդ ԱՄՆ դոլարի: Էլեկտրակայանի շինարարությունը կիրականացնեն աշխարհի արևային էներգիայի ոլորտի 2 առաջատար ընկերություններ՝ Սոլար Թրասթ օֆ Ամերիքան (Solar Trust of America) և Սոլար Միլլենիում Գրուփը (Solar Millennium Group): Ի դեպ Սոլար Միլլենիում Գրուփ ընկերությունը կառուցել է Եվրոպայի առաջին գործող պարաբոլիկ տիպի արևային էլեկտրակայանը: Այս տիպի էլեկտրակայանները տարբերվում են պանելային տիպի արևային կայաններից նրանով, որ այստեղ օգտագործվում է արևի ջերմությունը յուղի 400 աստիճան և ավելի տաքացման համար, որը հետագայում օգտագործվում է գոլորշի ստանալու և տուրբինների աշխատանքը ապահովելու համար, ինչպես սովորական էլեկտրակայաններում: Նշենք նաև, որ պարաբոլային տիպի արևային էլեկտրակայանները արևային էներգիայի օգտագործման միակ ձևն են այսօր, որը հնարավորություն է տալիս արտադրել էլեկտրաէներգիա արևտրային նպատակներով օգտագործելու համար:

Այս շաբաթ ամերիկյան հայտնի PNC ֆինանսական ծառայությունների խումբը (PNC Financial Group), հայտարարել է, որ պատրաստվում է կառուցել աշխարհի «ամենականաչ» երկնաքերը: PNC Պլազա աշտարակը (Tower at PNC Plaza) կկառուցվի Պիտսբուրգի կենտրոնում, այն նույն վայրում, որտեղ ավելի քան 150 տարի գործում է ընկերություն գլխավոր գրասենյակը: Ընկերության նոր գլխավոր գրասենյակի շենքը կունենա 40 հարկ և շահագործման կհանձնվի 2015թ-ին: Ընդհանուր 75 հազար քառակուսի մետր տարածքով PNC Պլազան կլինի ընկերության ամենամեծ շինությունը Պիտսբուրգում: Աշտարակը կունենա կանաչապատ տանիք և 300 տեղով ստորգետնյա ավտոկայանատեղի: Մոտ 400 մլն դոլար արժողությամբ նախագիծը կստեղծի ավելի քան 2500 նոր աշխատատեղ: Ընկերության նախկին շենքի ապամոնտաժման աշխատանքները նախատեսվում է սկսել 2011 թ-ի վերջին, իսկ նոր աշտարակի շինարարությունը 2012 թ-ի գարնանը: PNC Group-ն ակնկալում է աշտարակը շահագործման հանձնել 2015 թ-ի ամռանը: Նախագծի հեղինակն է աշխարհի խոշորագույն ճարտարապետական Գենսլեր (Gensler) ընկերության պիտսբուրգյան գրասենյակը: Պիտսբուրգյան ՓիՋեյ Դիք (PJ Dick) ընկերությունը հանդես կգա որպես շինարարության կառավարիչ, իսկ Բուրո Հափոլդ (Buro Happold) ընկերության բրիտանական գրասենյակը՝ որպես տեխնիկական խորհրդատու: Որպես կանաչ շինարարության խորհրդատու՝ հանդես կգա Պալադինո և Ընկերություն (Paladino & Company) ընկերությունը: Շինության ճակատային հատվածը կլինի երկշերտ ապակուց, ինչը կբարձրացնի էներգիայի խնայողության արդյունավետությունը, ինչպես նաև բնական օդափոխության հնարավորություն կտա: Գերժամանակակից սարքերն ու սենսորները հնարավորություն կտան բարձրացնել ջեռուցման և սառեցման համակարգերի էֆեկտիվությունը: Աշտարակի բոլոր աշխատասենյակներում առավելագույնս կօգտագործվի արևի լույսը՝ նվազեցնելով արհեստական լուսավորության անհրաժեշտությունը օրվա ընթացքում: Շինության նախագծման հարցերով զբաղվող խումբը այժմ ուսումնասիրում է բոլոր այլընտրանքային էներգիայի աղբյուրների օգտագործման տարբերակներ, որոնք հնարավորություն կտան շենքի շահագործման ընթացքում զգալիորեն նվազեցնել ածխաթթու գազի արտանետումը շրջակա միջավայր: Աշտարակի կանաչապատ տանիքը կհավաքի անձրևաջրերը շինության այլ ջրային կարիքները հոգալու նպատակով: PNC Group-ը, ներգրավված ավանդների ծավալով ԱՄՆ-ի 6-րդ բանկը, իր առաջին «կանաչ» շինությունը շահագործման է հանձնել 2000 թ-ին: 60 հազար քառակուսի մետր տարածքով PNC -ի Ֆըրսթսայդ կենտրոնն (Firstside Center) ժամանակին առաջին LEED-լիցենզավորված շինությունն էր աշխարհում: Նշենք նաև, որ PNC Group-ը տիրապետում է աշխարհի ամենաշատ քանակությամբ «կանաչ» կառույցների, իսկ վերջերս, ընկերությունը շահագործման է հանձնել իր Վաշինգտոնյան նոր գրասենյակի «կանաչ» շենքը՝ Սպիտակ Տնից մի քանի թաղամաս հեռավորությամբ: