Թաիլանդի Օդանավակայաններ (Airports of Thailand) պետական-մասնավոր միության ղեկավարությունը որոշել է մոտ 5.5 մլրդ ԱՄՆ դոլար հատկացնել Բանգկոկի Սուվարնաբհումի (Suvarnabhumi) օդանավակայանի վերակառուցման աշխատանքների իրականացման համար: Ինչպես տեղեկացնում է Bangkok Post պարբերականի էլեկտրոնային տարբերակը, այս ծրագիրի նպատակն է, որ երկրի գլխավոր միջազգային և ներքին թռիչքներ իրականացնող օդանավակայանը 2024 թ-ին սպասարկի տարեկան մոտ 103 մլն ուղևոր: Թաիլանդի Օդանավակայաններ միության նպատակն է, Ասիայի խոշորագույն օդանավակայններից մեկը համապատասխանեցնել Քաղաքացիական ավիացիայի միջազգային ասոցիացիայի (ICAO) կողմից ընդունված «Միացյալ օդանավակայան» հասկացության չափանիշներին: Օդանավակայանի վերանորոգումը կիրականացվի 3 փուլով: 732 մլն ԱՄՆ դոլար արժողությամբ առաջին փուլը կսկսի 2013 թ-ին և կավարտվի 2016-ին: 3 տարիների ընթացքում ներքին թռիչքների համար առանձին տերմինալ կկառուցվի, նույն տերմինալի համար առանձին ավտոկայանատեղի կկառուցվի, ինչպես նաև կկառուցվի օդանավակայանի 3-րդ թռիչքուղին: Երկրորդ փուլը կտևի 2017-2020 թթ-ը և կկազմի 1.47 մլրդ ԱՄՆ դոլար: Այս տարիներին կկառուցվի արդեն 4-րդ թռիչքուղին, ինչպես նաև կընդլայնվեն ներքին և միջազգային թռիչքները սպասարկող տերմինալները: Երրորդ և վերջին փուլի ընդհանուր բյուջեն կկազմի 3.30 մլրդ ԱՄՆ դոլար, իսկ վերանորագման աշխատանքները կսկեն 2021 թ-ին և օդանավակայանն ամբողջությամբ շահագործման կհանձնվի արդեն 2024թ-ին: Վերանորոգման վերջին փուլի ընթացքում կկառուցվի օդանավակայանի 5-րդ թռիչքուղին, ինչպես նաև հավելյալ ավտոկայանատեղիներ և շինություններ: Թաիլանդի Օդանավակայաններ միության ներկայացուցիչ Տիիրապոլ Նոպրամպայի (Teerapol Noprampa) խոսքերով, արդեն 2016 թ-ին մայրաքաղաքի հին Դոն Մյուանգ (Don Mueang) օդանավակայանում իրականացվող ներքին չվերթները հնարավոր կլինի սպասարկել Սուվարնաբհումի օդանավակայանի նորակառույց տերմինալից: Թաիլանդի Սուվարնաբհումի օդանավակայանը շահագործման է հանձնվել 2006 թ-ի հոկտեմբերին և արդեն 2007 թ-ին վերջին սպասարկվող ուղևորների քանակը հասել էր տարեկան 40 մլն-ի: 2010 թ-ին օդանավակայանը աշխարհում իրականացվող ուղևորափոխադրումների ծավալով գրավել է 17-րդ հորիզոնականը (տարեկան ավելի քան 42 մլն ուղևոր), իսկ Ասիայում 5-րդը ՝ զիջելով միայն Պեկինի, Տոկիոյի, Հոնկոնգի և Դուբայի օդանավակայաններին:

Օգոստոսի 1-ից Երևանի կրկեսում կսկսվեն հիմնանորոգման աշխատանքներ: Այս մասին հուլիսի 24-ին մամուլի ասուլիսի ժամանակ լրագրողներին հայտնել է կրկեսի տնօրեն Հովհաննես Գասպարյանը: Ըստ պրն. Գասպարյանի՝ կրկեսի հիմնանորոգման համար անհրաժեշտ կլինի 10 մլն ԱՄՆ դոլարից ավելի գումար: Հիմնանորոգման աշխատանքների ընթացքում նախատեսվում է ամբողջությամբ վերանորոգել կրկեսի շենքը, տեղադրել ժամանակակից օդափոխության համակարգ, կլուծվի նաև ջեռուցման խնդիրը, որը թերևս ամենակարևորն է, իսկ կենդանիները ‹‹կբնակվեն›› ոչ թե կրկեսում, այլ կրկեսին կից հատուկ իրենց համար նախատեսված վայրում: Բացի շինության վերանորոգման աշխատանքերից, կթարմացվի նաև կրկեսի տեխնիկական բազան, նորագույն տեխնոլոգիաներով կհամալրվի բեմը, կավելանան հնչյունային և ձայնային հնարավորությունները: Կրկեսի վերջին ներկայացումը կկայանա հուլիսի 31-ին, իսկ վերանորոգումից հետո կրկեսը հանդիսատեսի առաջ իր դռները կբացի 2013 թ-ին: Դեռևս այս տարվա ապրիլին, երբ լրացավ նոր քաղաքապետի պաշտոնավարման 100 օրը, լրագրողներին տրված հարցազրույցի ժամանակ Կարեն Կարապետյանը հայտարարեց, որ «Տաշիր Գրուփ» ընկերության տնօրեն Սամվել Կարապետյանի հետ համաձայնագիր է ստորագրվել 8 մլն ԱՄՆ դոլար հատկացնել Երևանի կրկեսի վերածննդին: Կրկեսի ղեկավարության հրավիրած մամուլի ասուլիսի ժամանակ այս փաստը հաստատվեց, սակայն կրկեսի գեղարվեստական ղեկավար Սոս Պետրոսյանը հայտարարեց, որ «Տաշիր Գրուփը» 6 մլն ԱՄՆ դոլար է հատկացրել կրկեսի վերանորոգմանը: Երևանի կրկեսը հիմնադրվել է 1962 թ-ին և սա առաջին վերանորոգումն է, որ պիտի իրականացվի շենքում: Ի դեպ, կրկեսի ադմինիստրացիան դեռ չի տեղեկացրել թե ով է լինելու շինարարության գլխավոր կապալառուն:

Էփլ (Apple) ընկերությունը սպասում է Նյու Յորքի Մետրոպոլիտենի ղեկավար մարմինների թույլտվությանը, որպեսզի Նյու Յորքյան մետրոյի Գրանդ Սենթրալ (Grand Central) կայարանում սկսի իր ամենամեծ խանութ-սրահի շինարարությունը, հաղորդում է constructiondigital.com կայքը: Աշխարհի համակարգչային և էլեկտրոնային տեխնիկայի ամենահայտնի արտադրող Էփլ ընկերությունը ցանկանում է Գրանդ Սենթրալ կայարանի սրահում բացել իր ամենամեծ խանութ-սրահը: Նախնական տվյալներով ընկերությունն առաջին 10 տարվա ընթացքում խանութ-սրահի տարածքը կվարձակալի տարեկան 800 հազար ԱՄՆ դոլարով, իսկ դրանից հետո հնարավոր է վարձավճարը կբարձրանա մինչև տարեկան 1.1 մլն ԱՄՆ դոլար: Այժմ վարձակալական տարածքը զբաղեցնում է Չառլի Պալմերի Մետրազուր (Charlie Palmer’s Metrazur ) ռեստորանը, որը տարեկան վճարում է մոտ 264 հազար ԱՄՆ դոլար: Նախատեսվում է, որ Մետրոպոլիտենի ղեկավարությունը այսօր՝ հուլիսի 27-ին կհաստատի տարածքը Էփլին հանձնելու որոշումը: Դրանից հետո ընկերությունը պատրաստ է ռեստորանին վճարել 5 մլն ԱՄՆ դոլար, սրահի արևելյան պատշգամբը անհապաղ ազատելու համար: Եթե Մետրոպոլիտենի ղեկավարությունը հաստատի նախագիծը, Էփլը անմիջապես կսկսի շինարարական աշխատանքները և կավարտի 4 ամսվա ընթացքում: Սրահում կկատարվեն վերանորոգման աշխատանքներ և այն կդարձնեն առևտրային տարածք: Էփլի նոր խանութ-սրահը կունենա 2136 քառակուսի մետր ընդհանուր տարածք և կդառնա ընկերության խոշորագույն առևտրային կենտրոնը: Այսօր ամենամեծ վաճառքի սրահը գտնվում է Լոնդոնում: Խանութ-սրահի ընդհանուր մակերեսն է 2320 քառակուսի մետր, բայց այդ տարածքի միայն 1520-ն է հասանելի հանրությանը:

Հուլիսի 25-ին Իրանը, Սիրիան և Իրաքը համաձայնագիր են ստորագրել կառուցել նոր գազատար Հարավային Իրանից դեպի Միջերկրական ծովի արևելյան երկրներ և Եվրոպա, հաղորդում է ռուսական ԻՏԱՌ-ՏԱՍՍ-ը: Նշենք, որ այս նոր գազատարը կդառնա Եվրոմիության «Նաբուկո» նախագծի հզոր մրցակիցը: Նոր գազատարն արդեն ստացել է «Իսլամական մայրուղի» անվանումը: Նոր գազատարի բյուջեն նախնական հաշվարկներով կկազմի մոտ 10 մլրդ ԱՄՆ դոլար, իսկ ընդհանուր երկարությունը՝ 5000-5500կմ: Իրանի հարավից դեպի Դամասկոս 1500 կիլոմետր երկարությամբ ձգվող գազատարի հատվածը նախատեսվում է շահագործման հանձնել 2014-2016 թթ-ին: Գազատարի նախագծային հզորությունը գնահատվում է օրեկան մոտ 110 մլն խորանարդ մետր: Մասնագետների կարծիքով նոր կառուցվող գազատարով հնարավոր կլինի գազ առաքել Իրանի հարավում գտնվող աշխարհի խոշորագույն նավթագազային աղբյուր Պարսից դեպի Սիրիա, Լիբանան, ինչպես նաև Միջերկրականի ծովի արևելյան շրջաններ և Եվրոպա: Գազատարի կառուցման նպատակով մասնակից 3 պետությունները ստեղծել են կոնսորցիում, որտեղ կարող են ներգրավվել նաև մասնավոր կազմակերպություններ: Ինչպես հաղորդում է IRNA գործակալությունը, Իրանի նաֆթի նախարար Մոհամմադ Ալիաբադին հայտնել է, որ Եվրոպան իրանական գազի սուր կարիք ունի: Նա միաժամանակ ավելացրել է, որ այս նախագիծը կամրապնդի երեք մահմեդական պետությունների համագործակցությունը և կկայունացնի տարածաշրջանի տնտեսական իրավիճակը: Նշենք, որ Իրանի գազի պաշարների ծավալները երկրորդն են աշխարհում և կազմում են 28 տրիլիոն խորանարդ մետր, իսկ առաջինը Ռուսաստանն է՝ 45 տրիլիոն խորանարդ մետր պաշարներով:

Մոտ 3 ամսից Ռուսաստանի Մեծ Թատրոնը կվերաբացի իր դռները արվեստի սիրահարների և լայն հասարակության առջև: Հոկտեմբերի 28-ին տեղի կունենա բացման հանդիսավոր արարողությունը, որը ուղիղ եթերով կհեռարձակվի աշխարհի ավելի քան 600 կինոդահլիճներում: Մեծ Թատրոնը լայնածավալ վերականգնողական աշխատանքների համար փակվել էր դեռևս 2005 թ-ի հուլիսի 2-ին: Նախնական ծրագրի համաձայն՝ այն պետք է վերաբացվեր 2008 թ-ին, սակայն շինարարական աշխատանքները սկսելուց հետո պարզ դարձավ, որ շինարարները չեն կարող տեղավորվել նշված ժամանակահատվածում, արդյունքում փոխվեց նաև գլխավոր կապալառուն: Վերականգնողական աշխատանքների սկսելուն Թատրոնը սպասում էր ավելի քան 115 տարի: Հիմնական խնդիրներից մեկը թատրոնի շենքը նոր հիմքի վրա տեղափոխելն էր, քանի որ հինը քանդվելու եզրին էր, շինարարներն անգամ վախենում էին մոտենալ: Վերականգնողական աշխատանքների արդյունքում Մեծ Թատրոնի հիմքում ներդրվել էն մոտ 7 հազար պողպատե խփովի ցցեր, իսկ նախկին կաղնե ցցերը հանվել են: Ռուսաստանի Պետական ակադեմիական մեծ թատրոնի տնօրեն Գենադի Իսկանովի խոսքերով, նա ամենից շատը վախենում էր կդիմանա՞ արդյոք շինությունը տեղափոխմանը, չի փլուզվի հին հիմքից նորին տեղափոխելու ժամանակ: Նոր հիմքի շնորհիվ թատրոնի նկուղային հարկում հսկա տարածք է ազատվել տարբեր տեխնիկական սարքավորումներ տեղադրելու համար: Արդյունքում թատրոնի ընդհանուր մակերեսը 40 հազար քառակուսի մետրից դարձել է 80 հազար: Ստորգետնյա 5 հարկերում կտեղադրվեն բեմի բարձրացման, թեքման բարդ մեխանիզմները, կպահվեն դեկորացիաները, կլինի նաև փորձերի մեծ դահլիճ: Ծրագրի գլխավոր կապալառու Սումա Կապիտալ (Сумма Капитал) ընկերության ներկայացուցիչ Միխայիլ Սիդորովի խոսքերով, վերանորոգման աշխատանքների հիմնական ձեռքբերումը թատրոնի 19-րդ դարի ակուստիկայի վերականգնումն է: Դրա համար հիմնական դահլիճը դարձրել են ավելի ընդարձակ՝ նախկին 2100 նստատեղի փոխարեն թողնելով միայն 1740-ը: Շինարարական աշխատանքների ընթացքում դահլիճի հատակից և նվագախմբի պատվանդանից հանել են ամբողջ բետոնե ծածկը՝ փոխարինելով այն եղևնու փայտով, ինչպես նաև փոխել են նստատեղերի ծածկոցներն ամեն ինչ ավելի համահունչ դարձնելու նպատակով: Այժմ իրականացվում է թատրոնի գլխավոր ճակատի արտաքին հիմնասյուների մաքրման աշխատանքների 2-րդ փուլը: Ամեն ինչ արվում է, որպեսզի վերջիններիս վերադարձնեն իրենց բնական՝ փղոսկրի գույնը: