Թվով վեցերորդ «Դիսնեյլենդ» զվարճանքների այգու շինարարությունը սկսվեց այսօր՝ ապրիլի 8-ին Շանհայում: Ինչպես նախկինում հաղորդել էինք, անցյալ տարի ամերիկյան Walt Disney Company մեդիա հոլդինգը համաձայնագիր էր ստորագրել չինական Shanghai Shendi Group Co. Ltd ընկերության հետ` Շանհայում «Դիսնեյլենդի» շինարարություն սկսելու շուրջ: Շանհայի «Դիսնեյլենդը» իր մեջ կներառի 2 հյուրանոց, լիճ, ռեստորան և առևտրի կենտրոն: Disney զվարճանքների ու հանգստավայրերի բաժնի ղեկավար Թոմ Սթագասի խոսքերով, Շանհայի «Դիսնեյլենդի» շինարարությունը կավարտվի հինգ տարուց: Ըստ Շանհայի քաղաքապետարանի շինարարությունը կարժենա $3.7 միլլիարդ և կհանդիսանա Չինաստանում խոշորագույն ներդրումներից մեկը:

Այս շաբաթ Ավիլեսում (քաղաք Իսպանիայի հյուսիսում) տեղի ունեցավ Նիմեյերի մշակութային կենտրոնի(Centro Niemeyer) բացման արարողությունը: Այս հավակնոտ նախագիծը կյանքի է կոչել հռչակավոր և փայլուն բրազիլացի ճարտարապետ Օսկար Նիմեյերը (ծնվել է 15.12.1907թ): Մշակութային կենտրոնի շինարարությունը սկսվել է 2007 թվականի ապրիլին: Պարուրաձև աստիճաններով այս արտասովոր կառույցը բաղկացած է եռահարկ գմբեթավոր թանգարանից, 1000 հանդիսատեսի համար նախատեսված դահլիճից, մոտ 4.000 քառակուսի մետր ցուցասրահից և դիտահարթակից, որից հիանալի տեսարան է բացվում դեպի քաղաքը և գետը: Ի հավելումն ցուցասրահների և դահլիճի, Centro Niemeyer-ում նախատեսված է կինոթատրոն, փորձերի համար նախատեսված սենյակներ, կոնֆերանս դահլիճներ և բաց տարածքեր տարաբնույթ մշակույթային ու հասարակական միջոցառումներ անցկացնելու համար: Centro Niemeyer-ը 103 տարեկան ճարտարապետի միակ ստեղծագործությունն է Իսպանիայում: Նախնական, սև հաստ մարկերով կատարված էսքիզները, այս մշակութային կենտրոնի ստեղծման հիմք են հանդիսացել, իսկ Օսկար Նիմեյերի խոսքերով, Centro Niemeyer-ը Բրազիլիայից դուրս եղած իր ստեղծագործություններից ամենասիրվածն է: «Ես առաջին անգամ եմ այսպիսի եզակի աշխատանք կատարում, և այն իմ ջանքերի ամենաբարձր կետերից է հանդիսանում՝ որպես ճարտարապետության փոխակերպումը դեպի արվեստ», - ասում է ճարտարապետը: Ըստ հեղինակի մտահաղացման, կենտրոնն իր դռներն է բացում դեպի արվեստը իր բոլոր ուղղվածություններով, ոճերով և ավանդույթներով՝ երաժշտություն, թատրոն, կինո, կոնֆերանսներ, կրթական ծրագրեր, ցուցահանդեսներ բաց երկնքի տակ և փակ սրահներում: Օսկար Նիմեյերը ժամանակակից բրազիլական ճարտարապետական դպրոցի հիմնադիրներից մեկն է, իսկ երկաթբետոնե ճարտարապետության առաջին նախաձեռնողներից ու փորձարկողներից է հանդիսանում: Նիմեյերի ճարտարապետությունը տարբերվում է ճկունությամբ, արտահայտչությամբ և ջերմությամբ: Ինչպես ճարտարապետն ինքն է նշում, - « Ինձ գրավում են ոչ՞ թե մարդու ձեռքով ստեղծված ուղիղ և անծռելի գծերն ու անկյունները: Այն ինչն ինձ գերում է, ազատ և զգայական գծերն են, որոնք ես գտնում եմ իմ երկրի սարերում, գետերի ոլորապտույտ հոսքում, սիրելի կնոջ մարմնում: »

Այս գարնանը Skype-ը իր հյուսիսամերիկյան գրասենյակը տեղակայել է Պալո-Ալտո (գտնվում է Սան Ֆրանցիսկոյից 60 կմ հեռու, Սիլիկոնային հովտում) քաղաքում : Այստեղ Skype-ը 5000 քառակուսի մետր գրասենյակային և տեխնիկական տարածք է զբաղեցնում նախատեսված 250 աշխատատեղերի համար: Գրասենյակի դիզայնը կատարել է ամերիկյան Blitz ճարտարապետական և դիզայնի ստուդիան: Blitz –ի մասնագետները ուսումնասիրել են աշխատանքային տարածքի տիպաբանությունը և թե ինչպես է շրջակա միջավայրը ազդում մտածական գործընթացի վրա: Այս հետազոտությունը հնարավորություն տվեց լիարժեքորեն հաղորդել Skype-ի հայեցակարգը և քաղաքականությունը: Ճարտարապետների ստեղծագործական խմբի ստեղծած այս ինտերիերի դիզայնը արտահայտում է Skype-ի «ազատ ոգին», իսկ մանրամասն մտածված հատակագիծը, դեկորի տարրերը, կահավորանքը և տեխնիկական հնարքները, ինչպես օրինակ “skype-its” շարժական սպիտակ գրատախտակներն են, օգնում են զգալ այդ ամենը: «Ազատ ոգին» ավելի վառ ընդգծելու համար Blitz-ի մասնագետները տեխնիկական տարածքների նախագծումն իրականացրել են լոֆտ ոճով (լոֆտ – տարածքների «բաց» դիզայնի տեսակ է, որը հիմնականում արդյունաբերական նշանակության տարածքները բնակելի կամ գրասենյակային տարածքների ձևափոխման արդյունք է), իսկ արդունավետ հանգստի համար աշխատանքային տարածքներին մոտ բազմաթիվ փոքրիկ «հանգստի կղզյակներ» են տեղակայված, որտեղ կարելի է ճաշել, սուրճ վայելել կամ սեղանի խաղեր խաղալ: Skype –ը հիմնադրվել է 2003 թվականին երկու ձեռներեցների ՝ շվեդացի Նիկլաս Զեննստրյոմի և դանիացի Յանուս Ֆրիիսի կողմից, իսկ ծրագրավորման հեղինակներն են էստոնացի ծրագրավորողներ Ահտի Հեյնլան, Պրիիթ Կասեսալուն և Յան Տալինը:

ՀՀ ԱԺ-ի կողմից 2010 թվականի վերջին ընդունված «Պետական տուրքի մասին» օրենքի փոփոխությունները, որոնցով չորս անգամ բարձրացվել է (100000 դրամից մինչև 400000 դրամ) քաղաքաշինության բնագավառում շինարարության իրականացման համար պետական տուրքի գանձվող տարեկան գումարը, արդեն բերել է բազմաթիվ շինարարական ընկերությունների դժգոհությունների: Վերջերս ԶԼՄ-ների կողմից լայնորեն լուսաբանված գյումրեցի շինարարների բողոքները, այս դժգոհությունների լողացող սառցալեռի միայն փոքր՝ երևացող մասն են կազմում: Պետք է համաձայնվենք գյումրեցիների հետ, որ այս փոփոխությունների ժամանակը բոլորովին էլ հարմար չի ընտրվել: Համաշխարհային տնտեսական ճգնաժամը, որը առաջնահերթ հուժկու հարվածեց հանրապետության շինարարական ոլորտին, կանգնեցրեց շատ շինարարական կազմակերպությունների սնանկացման վտանգի առաջ: Ստեղծված իրավիճակում իշխանությունների կողմից ճիշտ կլիներ ամեն կերպ օգնել այս կազմակերպություններին ոտքի կանգնել և ոչ թե ավելի սրել ստեղծված իրավիճակը: Նշենք, որ այս փոփոխությունները առավել աղետալի հետևանքներ կունենան փոքր և միջին շինարարական կազմակերպությունների համար, որոնք այսօր արդեն իսկ անմխիթարելի վիճակում են գտնվում: Չէ որ «շինարարության իրականացում» հասկացողությունը վերաբերում է անգամ շատ փոքրածավալ աշխատանքներին, ինչպիսիք են բնակարնների ծածկերի ամրացումը, որմնաանցքերի բացումը կամ ամենափոքր տան կամ շինության կառուցումը, այսինքն այն բոլոր աշխատանքները, որոնք պահանջում են շինթույլտվություն: Նշենք, որ այս կազմակերպությունները անգամ մինչև ճգնաժամը ոչ մի զարգացման հնարավորություն չունեին, քանի որ տիրապետելով շինարարական լիցենզիայի, նրանք մեխանիկորեն դառնում են ԱԱՀ-ի վճարող և հայտնվում «հարկային անհավասար մրցակցային դաշտում» (կարդալ հոդվածը): Իշխանությունների կողմից իրականացվող բյուջետային մուտքերի ավելացման ձգտումը միանգամայն հասկանալի է, բայց ձեռնարկված քայլերը, տնտեսության ( ոլորտի) և գործարար հասարակության տրամադրությունների այսօրվա տիրող իրականության մեջ , վերջնականապես սպանում են առանց այդ էլ ահռելի արագությամբ մարող ձեռնարկատիրական ձգտումները: Ցավալի է, որ այսօր շատ հայ գործարարներ մտածում են իրենց գործնեության տեղափոխման կամ կասեցման մասին, իսկ մեր երեխաները ավելի դժվարությամբ են պատկերացնում իրենց ապագա տեղը մեր հայրենիքում: Կարդալ օրենքի փոփոխությունները այստեղ P.S. Հայաստանի երրորդ ազգային մրցունակության զեկույցի շնորհանդեսի ողջույնի խոսքում նորանշանակ ՀՀ էկոնոմիկայի նախարար Տիգրան Դավթյանը ասաց,- «Ամենակարևորն այն է, որ պետք է տնտեսական գործունեությունն իրականացնենք պրակտիկ գործունեությամբ և ռեալ արդյունքներով, ինչի համար պետք է գնահատենք իրական իրավիճակը»:

Գերմանիայում, Ֆրանկֆուրտի օդանավակայանի տարածքում, ավարտվեց երկրի ամենամեծ կառույցի և աշխարհի ամենամեծ շենքերից մեկի՝ The Squaire առևտրային կենտրոնի շինարարությունը: Շենքի այս տարօրինակ անվանումն առաջացել է Square (հրապարակ) և Air (օդ) բառերի միացումից: The Squaire-ն ունի 660 մետր երկարություն, 9 հարկ բարձրություն և 140.000 քառակուսի մետր տարածք: Շինարարության արժեքն արդեն գերազանցել է մեկ միլիարդ եվրոն, չնայած նախահաշիվը կազմել էր € 660 մլն, իսկ ավարտը պլանավորված էր 2009 թվականին: Նախագծի հեղինակն է հայտնի ճարտարապետ Հելմուտ Ջոոսը, ով շենքի արտաքին տեսքը նմանեցրել է ապակեպատ կետի: The Squaire-ը կանգնած է օդում՝ 240 սյուների վրա և կոնստրուկտիվ տեսակետից շատ բարդ կառույց է: Այս հսկայական շենքի ներսում տեղակայված են 2 Hilton հյուրանոցներ՝ 580 համարներով, խոշոր բժշկական կենտրոն, սուպերմարկետ, խանութներ, բուտիկներ, ռեստորաններ և բազմաթիվ գրասենյակներ, ինչպես նաև առատ բնական լույսով երեք ատրիումներ բազմաթիվ հանգստյան տարածքներով: Գործարարության իրականացման տեսակետից The Squaire-ը նորարարություն է հանդիսանում, իր մեջ ներառելով «գործարար» քաղաքի բոլոր հատկանիշները՝ ապրելու, աշխատելու և բուժվելու համար: Ըստ նախագծի կառուցապատողի՝ Բոննի IVG (Immobilienkonzern IVG) անշարժ գույքի կոնցեռնի տվյալների, տարածքների 66% արդեն գտել են իրենց տերերին: Այս շենքի գրասենյակային տարածքների վարձակալության գները կազմում են մինչև € 30 յուրաքանչյուր 1 քառակուսի մետրի համար, այն ժամանակ, երբ Ֆրանկֆուրտում գրասենյակների վարձակալման առավելագույն արժեքն է €35, իսկ միջինը՝ մոտ €20 -1քռ.մ-ի համար: Գրասենյակային տարածքների գլխավոր վարձակալն է KPMG միջազգային աուդիտորական ընկերությունը, ով վարձակալել է 33 հազար քառակուսի մետր տարածք և պատրաստվում է իր Եվրոպական կենտրոնական գրասենյակը տեղափոխել Ֆրանկֆուրտ: Ֆրանկֆուրտի միջազգային օդանավակայանը Եվրոպայի խոշորագույններից է: Ուղևորափոխադրումների թվով այն զբաղեցնում է երրորդ տեղը՝ Լոնդոնի «Հիթրոու» և Փարիզի «Շառլ դե Գոլ» օդանավակայաններից հետո, և երկրորդն է բեռնափոխադրումների գծով «Շառլ դե Գոլից» հետո: