Ինչպես հաղորդում է www.today.az գործակալությունը, շինանյութերի գները Բաքվում 2010/2009-ի արդյունքներով աճել են 36.6%-ով: Այս թիվը հրապարակել է Ադրբեջանի Անշարժ գույքի միությունը, որն ուսումնասիրել է 88 անվանում շինարարական նյութերի գները: Միության կողմից 2009/2008 –ի համար կատարված նույնատիպ ուսումնասիրությունը ցույց էր տվել շինանյութի գների 21.2% աճ: Փաստորեն վերջին 2 տարիների ընթացքում շինանյութի գները մեր հարևան հանրապետությունում բարձրացել են 57.8%-ով: Ինչպես հաղորդում է Անշարժ գույքի միությունը, շինանյութի 2010-ի շուկան բնութագրվել է որոշ նյութերի գների քաոսային և անկայուն թռիչքներով: Ինչպես նախկինում հաղորդել էր Ադրբեջանի վիճակագրական վարչությունը, 2010 թվականի 9 ամսվա արդյունքներով, շինարարական աշխատանքների ծավալների աճը կազմել էր 31.9%: Շատ վերլուծաբաններ այս ցուցանիշի բարձր լինելը ուղղակիորեն կապում են շինանյութերի գների կտրուկ բարձրացման հետ: Հիմնական շինանյութերի գների կտրուկ աճը կապալային պայմանագրեր կնքած շատ շինարարական կազմակերպություններին դրել է բավականին ծանր կացության մեջ, որոնք պատվիրատուների հետ համատեղ խնդրի լուծումներ են փնտրում:
Երբ 2008-ին Capital Group ընկերության համասեփականատեր Վլադիսլավ Դորոնինը Կաննի կինոփառատոնի ժամանակ ծանոթացավ սուպերմոդել Նաոմի Քեմփբելին և նրանք սկսեցին հանդիպել, սիրահարված կառուցապատող-միլիարդատերը գրեթե մոռացավ ընկերության ղեկավարի իր պարտականությունները: Սակայն համաշխարհային ֆինանսական ճգնաժամը ոչ միայն իրեն ստիպեց վերադառնալ ղեկավարի բուռն պարտականություններին, այլև իր ընկերուհուն ևս: «Ցվետնոյի Լեգենդ» էլիտար բնակարանային համալիրի վաճառքները խթանելու համար Դորոնինը որոշեց օգտվել իր սիրելի «սև հովազի» համաշխարհային հռչակից: 60 վայրկյան տևողությամբ գովազդային հոլովակը բավական էր, որպեսզի Նաոմին մարզվի մարզասրահում, լուրջ խնդիրներ լուծի, լողա ջրավազանում, ընթրի ռեստորանում և վերադառնա իր բնակարանը, որտեղից բացվում է ապշեցուցիչ տեսարան դեպի երեկոյան Մոսկվա: Հոլովակի վերջում Նաոմին չի մոռանում ավելացնել,- «Ես լսում եմ քո սիրտը, Մոսկվա: Այժմ դուք գիտեք, թե որտեղ եմ ես կանգ առել »... Նաոմիի և Վլադիսլավի հարսանիքը պետք է տեղի ունենար 2009 թվականի օգոստոսին, սակայն միլիարդատիրոջ ամուսնալուծության հետ խոչընդոտներ ծագեցին... Նաոմի Քեմփբելն իր սիրահարի հետ միասին բնակություն հաստատեց Ռուսաստանում, մինչդեռ Դորոնինի կինը՝ Եկատերինան, ապրում է Մեծ Բրիտանիայի մայրաքաղաքում: Ըստ «GQ» ամսագրի, 2009 թվականին Ռուսաստանի ամենանորաձև տղամարդկանց ցուցակում միլիարդատերը զբաղեցրեց երկրորդ տեղը, իսկ ըստ Building.ru-ի վարկանիշի՝ նա ընդգրկվեց Ռուսաստանի առավել պրոֆեսիոնալ կառուցապատողների տասնյակի մեջ: Այսօր Դորոնինի ունեցվածքը մոտ երկու միլիարդ դոլար է գնահատվում, սակայն տարբեր աղբյուրներից տվյալները բավականին տարբերվում են՝ մեկից-վեց միլիարդ:
Դեռևս մի քանի տարի առաջ բավականին շահութաբեր էր Դուբայում անշարժ գույքի շուկայում ներդրումներ կատարելը և նույնիսկ այսօր որոշ անշարժ գույքի գործակալություններ չեն դադարում գովազդել այս ոլորտում ներդրումների նպատակահարմարությունը ՄԱԷ-ում, սակայն ... 2010-ի արդյունքներով անշարժ գույքի գները Դուբայում նվազել են միջինը 60%, իսկ Աբու Դաբիում՝ 45%-ով ՝ համեմատած 2008 թվականի հետ, երբ անշարժ գույքի գները գագաթնակետին էին հասել այս արաբական երկրում : Ըստ Ռոյթերս (Reuters) լրատվական գործակալության կողմից կատարված վերջին հետազոտությունների, ՄԱԷ-ում անշարժ գույքի գները 2011 և 2012 թվականներին կրկին կշարունակեն անկում ապրել, սակայն արդեն փոքր-ինչ ցածր տեմպերով: Դուբայում և Աբու Դաբիում կանխատեսված գների անկումը կլինի համապատասխանաբար 5% և 10% 2011 թվականին, իսկ 2012 թվականին՝ 4% յուրաքանչյուր քաղաքում: Նույնիսկ առավել լավատեսական տրամադրված վերլուծաբանները չեն կանխատեսում ԱՄԷ-ում անշարժ գույքի գների անկման կանգ առնվազն մինչ այս տարվա կեսերը: Միացյալ Արաբական Էմիրությունների որոշ կառուցապատող ընկերությունների պարտքերն արդեն միլիարդավոր դոլարների են հասել: Այսպես օրինակ, Աբու Դաբիի ամենամեծ կառուցապատող ընկերությունը՝ Ալդար Փրոպերթիսը, արդեն կառավարությունից ԱՄՆ $ 5,2 մլրդ օժանդակություն է ստացել: Արաբական Միացյալ Էմիրությունների որոշ խոշոր կառուցապատողներ, հետզհետե, իրենց ուշադրությունն են ուղղում դինամիկ զարգացող արևելյան շուկաների՝ Հնդկաստանի և Չինաստանի վրա, իսկ Էմիրությունների անշարժ գույքով ողողված շուկայի ճակատագիրն դեռևս անհայտ է մնում: Չնայած, երևի թե այս 2 տարիները ամենահարմար ժամանակահատվածը կարող են լինել այստեղ անշարժ գույքի ձեռքբերման համար իրական կարիքավորների կողմից, ով՞ գիտե: Հայաստանում անշարժ գույքի շուկայում տիրող իրավիճակը մասամբ նման է Էմիրություններին, բայց կան որոշ տարբերություններ: Սկսած 2009 թվականից նկատվում է գների ոչ կտրուկ, սակայն աստիճանաբար անկում: Սա, բնականաբար, հանգեցրել է անշարժ գույքի մեջ ներդրումների աննպատակահարմարությանը, որպես կապիտալի ավելացման միջոցի, իսկ գների դրական աճի միտումներ դեռ չեն նկատվում: Մայրաքաղաքում, ինչպես նորակառույց, այնպես էլ հին շենքերում, բնակարանների առաջարկների թիվն աճում է, և չնայած բնակարանի կարիք ունեցող մարդկանց բավական բարձր թվի, բնակչության ֆինանսական վատ վիճակը և հիփոթեքային վարկավորման բարձր տոկոսադրույքները չեն խթանում այս շուկայի ակտիվացմանը:
Այսօր տեղի ունեցավ աշխարհի ամենաթանկ բնակելի տարածքի՝ Ուան Հայդ Պարկ համալիրի (One Hide Park) բացումը: Այն գտնվում է Լոնդոնում՝ Նայթսբրիջի վրա (Knightsbridge) և բաղկացած է 65000 քռմ ընդհանուր մակերեսով 4 հիմնական շենքերից՝ 86 էլիտար բնակարաններով և երեք արևտրի սրահներով: Հիմնական շինարարական աշխատանքներն իրականացվել են 2007- 2010 թվականներին, իսկ 2006-ի վերջում քանդել են այստեղ գտնվող հին շենքը: Բնակելի համալիրի նախագիծն իրականացրել է Rogers Stirk Harbor+Partners ճարտարապետական բյուրոն, ներքին էկսկլյուզիվ դիզայնը՝ Candy&Candy-ն, իսկ որպես գլխավոր կապալառու հանդես է եկել բրիտանական Laing O'Rourke ընկերությունը: Համալիրը Փրոջեքթ Գրանդե-ի (Project Grande Guernsey Limited, PGGL) սեփականությունն է, որը հանդիսանում է Քենդի և Քենդի՝ (Candy & Candy) լյուքս դասի բնակարանների հայտնի կառուցապատողներ Նիք և Քրիստիան Քենդի եղբայրների և Կատարի վարչապետ և արտաքին գործերի նախարար՝ Շեյխ Համաս բին Ջասիմ բին Ջաբեր ալ-Թհանի՝ (Sheikh Hamad bin Jassim bin Jaber al-Thani) համատեղ ձեռնարկությունը: Ծրագրի ֆինանսավորումն իրականացրել է գերմանական Eurohypo AG բանկը: Համալիրի կառավարումը կիրականացնի հարևանությամբ գտնվող հայտնի հյուրանոցային օպերատոր Մանդարին Օրիենտալը (Mandarin Oriental), և դա այս ընկերության առաջին «բնակելի» փորձ է Եվրոպայում: Բացման արարողությանը մասնակցում են մոտ 350 հյուրեր, որոնց համար ճաշատեսակներ են պատրաստում այնպիսի հայտնի խոհարարներ, ինչպիսիք են Հեթսոն Բլյումենտալը (Heston Blumenthal) և Դանիել Բոլուդը (Daniel Boulud): Չնայած Մեծ Բրիտանիայում շարունակվող բնակարանների գների կայուն անկմանը, այս համալիրում բնակարանների մեկնարկային գինը սկսվում է £ 20 միլիոնից, իսկ անցյալ ամռանը պենթհաուսներից մեկը վաճառվել է երկրի համար ռեկորդային գնով՝ £ 140 միլիոնով (մոտ $ US222 մլն): Պենթհաուսը գտնվում է 2 մակարդակների վրա, բաղկացած է վեց ննջասենյակներից, պատուհանները գնդականթափանց ապակուց են, և այնտեղից բացվում է հիանալի տեսարան դեպի Հայդ Պարկի հիմնական գեղեցկությունը՝ Սերփենթայն լիճը: Չնայած SAS (SAS Security Services) անվտանգության ընկերության կողմից իրականացվող շուրջօրյա հսկողությանը, այս բնակարանն ունի նաև այսպես կոչված «զրահապատ սենյակ», որտեղ կարելի է թաքնվել արտառոց դեպքերում (ինչպես, օրինակ, ամերիկյան Դեվիդ Ֆինչերի « Խուճապի Սենյակ» թրիլլերում): Այս պենթհաուսի գնորդի անունը պահվում է խիստ գաղտնիության մեջ, սակայն որոշ անշարժ գույքի գործակալներ ենթադրում են, որ գնորդը ամենայն հավանականությամբ Մերձավոր Արևելքից կամ Նիգերիայից է:
Հայ-Իրանական սահմանին՝ Արաքս գետի վրա երկու հիդրոէլեկտրակայանների կառուցման մտադրությունը արդեն տասնամյա պատմություն ունի: Դեռ 2001-ին այս ծրագրի արժեքը գնահատվում էր 60-80մլն ԱՄՆ դոլլար: 2007-ի մարտի 19-ին Հայաստանի և Իրանի միջև կնքված միջպետական պայմանագրի համաձայն, հայտարարվեց երկու՝ 140ՄՎտ հզորությամբ և 140 մլն ԱՄՆ դոլլար արժողությամբ ՀԷԿ-երի շինարարության մասին: Այդ ժամանակ Հայաստանի Էներգետիկայի նախարար Արմեն Մովսիսյանը հայտարարեց 2008-ին նախատեսվող շինարարության սկզբի մասին: Եվ վերջապես նախարարի ամենավերջին և ճշտված հայտարարությունը ՀԷԿ-երի շինարարության վերաբերյալ՝ շինարարությունը կսկսվի 2011-ի սկզբին և կկառուցվեն 2՝ 130 ՄՎտ հզորությամբ կայաններ, բայց արդեն 323 մլն ԱՄՆ դոլլար արժողությամբ... Այս կայանների կառուցման հիմնական առանձնահատկությունը նա է, որ հայկական կողմը ոչ մի մասնակցություն չի ունենալու՝ ո՛չ նրանց շինարարության և ո՛չ էլ ֆինանսավորման հետ. ամեն ինչ իրականացնելու է իրանական կողմը: Կառուցվող ՀԷԿ-երից՝ հայկականը, որը կոչվում է Մեղրիի ՀԷԿ, անհատույց կփոխանցվի Հայաստանին 20 տարի հետո, որը ներառում է մոտ 5 տարվա շինարարական աշխատանքներ և իրանական կողմին էլեկտրաէներգիայի մատակարարմամբ փոխհատուցման 15-ամյա ժամանակահատված: Երկու կայաններն էլ կկառուցի իրանական Ֆարադ-Սեպասադ ընկերությունը, իսկ Իրանի կառավարությունը տվել է իր համաձայնությունը արտադրված էլեկտրաէներգիայի գնման վերաբերյալ: Մեղրիի ՀԷԿ-ը կարտադրի տարեկան 800մլն կՎտ/ժամ էլեկտրաէներգիա, իսկ Հայաստանին հանձնման պահին սարքավորումները պետք է ունենան օգտագործման առնվազն տաս տարվա, իսկ ինժեներական կառույցները՝ առնվազն 30 տարվա ներուժ: Հիդրոէլեկտրակայանների շինարարության հետ զուգահեռ նախատեսվում է կառուցել երկու երկրները միացնող երրորդ բարձրավոլտ (400կՎ) էլեկտրահաղորդման գիծը, որը կհասցնի պետությունների էներգահամակարգերի միջև էլեկտրաէներգիայի փոխանակման հզորությունը մինչև 1000ՄՎտ-ի: Իրան–Հայաստան բարձրավոլտ օդային գծի Հայաստանում կառուցվելիք հատվածի երկարությունը կկազմի մոտ 275կմ (Իրանի սահմանից մինչև «Նորավան» ենթակայան 80կմ, «Նորավանից» մինչև Հրազդանի 5-րդ էներգաբլոկ` 195կմ), իսկ Իրանում՝ 163կմ: Այս նախագծի արժեքը գնահատվում է մոտ 108 մլն Եվրո, իսկ շինարարական աշխատանքները կտևեն մոտ 18 ամիս:
