Մաքսիմ Գալկինը Գրյազ (Կեղտ) գյուղում կառուցում է $ 10 միլիոն արժողությամբ վեց հարկանի «պալատ», որը շատ նման է Հարի Փոթերի դղյակին: Կառույցի ընդհանուր տարածքը 2300 քառակուսի մետր է, և այնտեղ ավելի քան 20 սենյակ կա, որոնցից հինգը ննջասենյակներ են, իսկ մնացածը՝ աստղադիտարան, գրադարան, բուխարու սենյակ, ձմեռային այգի, սպորտային դահլիճ՝ լողավազանով, իսկ սենյակներից մեկն էլ նախտեսված է անձամբ Ալլա Պուգաչյովայի համար: Բոլոր տարածքները զարդարված են անտիկվար արձաններով և նկարներով, որոնք դերասանը բերում է աշխարհի տարբեր վայրերից: Դղյակը գրեթե ամբողջովին պատրաստ է, մնում է միայն ավարտել դարպասները, սալապատել ճանապարհը և երեսապատել «Կոլիզեյը» (հունական ամֆիթատրոնի տիպի կառույց, որը դղյակը կթաքցնի անցորդների անցանկալի հայացքներից): Բացմաթիվ աղբյուրներ հայտնում էին, թե Մաքսիմ Գալկինը պլանավորում էր բնակարանամուտը նշել նոյեմբերյան տոներին, սակայն նա որոշեց չշտապել և հետաձգեց այս երկար սպասված իրադարձությունը մինչ հաջորդ տարի: Մաքսիմ Գալկինի խոսքերով, 200 տարի առաջ այս նույն վայրում, որտեղ նա այժմ կառուցում է իր դղյակը, կանգնած էր մեկ այլ կալվածք, որը պատկանում էր Լև Տոլստոյի տոհմին: Սակայն, ի տարբերություն Տոլստոյի, «Մեծն Կախարդ» Գալկինը դժվար թե Կոմսի նման բաժանի իր ունեցվածքը, և կվայելի մինչև իր «կախարդական» կյանքի վերջը:

Դուբայը ցանկանում է սահմանել բարձրահարկ շինարարության բոլոր ռեկորդները: Տարվա սկզբին աշխարհի ամենաբարձր շենքը՝ 823 մ բարձրությամբ Բուրջ Խալիֆան իր դռներն էր բացել հասարակության առջև, իսկ հաջորդ տարվա վերջում Դուբայը պատրաստվում է մեկ այլ նոր համաշխարհային ռեկորդ սահմանել, այժմ «ամբողջովին բնակելի» երկնաքերերի մրցությունում: Ինչպես հաղորդում է Tameer կառուցապատող ընկերությունը, 414 մետր բարձրությամբ Արքայադստեր Աշտարակը (The Princess Tower) պատրաստ կլինի 2011 թվականի չորրորդ եռամսյակում: Դուբայ Մարինա (Dubai Marina) էլիտար թաղամասում գտնվող այս 723 բնակարան ունեցող 107 հարկանի երկնաքերը, սակայն, իր ռեկորդը երկար չի պահպանի, քանի որ 2013 թվականին, նույն թաղամասում, կավարտվի 516 մ բարձրությամբ 120 հարկանի լյուքս Pentominium Tower- ի շինարարությունը, որի նախագիծն արդեն արժանացել է մի քանի մասնագիտական մրցանակների: Ըստ Council on Tall Buildings and Urban Habitat-ի սահմանման, աշխարհի թիվ մեկ «ամբողջովին բնակելի» շենքի ռեկորդը այժմ պատկանում է 323 մ բարձրութամբ 78 հարկանի Q 1 երկնաքերին (Queensland Number One), որը գտնվում է Ավստրալիայում (Surfers Paradise, Gold Coast).

Այս հրաշք ակվարիումը կառուցվել է 2003 թվականի վերջին, Բեռլինում՝ «Radisson SAS Hotel» հյուրանոցի ատրիումում, թափանցիկ պանորամային վերելակի շուրջ: Այս ամենը հնարավոր դարձավ շնորհիվ «International Concept Management, Inc.» և «Reynolds Polymer Technology» կազմակերպությունների համատեղ ջանքերի: «International Concept Management, Inc.» կազմակերպության նախագծողներն ու շինարարներն վարում էին շինարարական և նախագծման աշխատանքները իսկ «Reynolds Polymer Technology»-ին բաժին էր ընկել նախագծի ամենաբարդ մասը՝ 11 մետր տրամագծով ու 25 մետր բարձրությամբ ակրիլային ապակուց գլանաձև ակվարիումի պատրաստումը: Ակվարիումի ներքին շերտը, որի միջով անցնում է հյուրանոցի վերելակը, տեղափոխվել և տեղադրվել է մեկ ամբողջական կտորով, իսկ արտաքին շերտը հավաքվել է 4 առանձին կտորներից, հենց հյուրանոցում: ԱկվաԴոմի ողջ կոնստրուկցիան կանգնած է 9 մետրանոց հիմքի վրա, որը կարող է կրել 900.000 լիտր ծովաջրի ծանրությունը: Ակվարիումում բնակվում են 56 տեսակի մոտ 2600 ձուկ, իսկ այն մաքրում ու ձկներին կերակրում են երկու ջրասուզակներ, որոնք մշտական աշխատանքի են ընդունվել: Այս հսկա ակվարիումը նման կառույցների մեջ աշխարհում ամենամեծն է և, արդարացիորեն, ասօր այն Բեռլինի առավել հաճախ այցելվող տեսարժան վայրերից է:

Նոյեմբերի 17-ին Քենիայի մայրաքաղաք Նայրոբիում կայացած ՅՈՒՆԵՍԿՕ -ի հանձնաժողովի նիստի ժամանակ, ՅՈՒՆԵՍԿՕ -ի համաշխարհային մշակութային ժառանգության ոչ նյութական արժեքների ցանկը համալրվել է աշխարհի 47 ժողովուրդների մշակութային ավանդույթներով: Այս ցուցակի մեջ է ընդգրկվել նաև հայկական խաչքարերի ստեղծման արվեստը, որպես սերնդեսերունդ փոխանցվող հայ ժողովրդի դարավոր ավանդույթ: Ինչպես հաղորդում է ՅՈՒՆԵՍԿՕ -ի պաշտոնական կայքը, գոյություն ունեն ավելի քան 50,000 հայկական խաչքարեր, որոնց քանդակները նման չեն միմիանց և նույնիսկ հնարավոր չէ գտնել երկու միանման խաչքար: Աղբյուրը նաև նշում է, որ խաչքարերը կարող են մինչև 1.5 մ բարձրության հասնել. ամենայն հավանականությամբ հեղինակները մոռացել են այնպիսի հիասքանչ արվեստի գործերի մասին, ինչպիսին Սանահինի վանական համալիրի խաչքարերն են (Սանահինի վանքը 2000թ. ընդգրկվել է ՅՈՒՆԵՍԿՕ-ի «Համաշխարհային մշակութային արժեքների» ցանկում), կամ Գոշավանքինը, որոնք զարմացնում են ոչ միայն իրենց չափսերով, այլ նաև վարպետների զարմանալի աշխատանքով: Կցանկանայինք նաև նշել, որ երբ նման նորություն հայտնվում է REGNUM.RU-ի պես հայտնի տեղեկատվական կայքում, (http://www.regnum.ru/news/fd-abroad/armenia/1347782.html), լուրը պետք է ուղեկցվի այնպիսի լուսանկարներով , որոնք իրական հնարավորություն կտան ընթերցողին ավելի լավ պատկերացնել խաչքարերի ստեղծման արվեստի արժանիքները: Ներկայացնենք այս «մշակութային ժառանգության» հանդեպ վերջերս տեղի ունեցած վանդալիզմի մի տխուր փաստ: 1987-2005 թվականներին Ադրբեջանի կազմում գտնվող Նախիջևանի Ինքնավար Հանրապետության տարածքում՝ Նոր Ջուղայի վանքային համալիրում, հազարավոր գեղեցիկ խաչքարեր ամբողջությամբ ոչնչացվել են, և այս սարսափելի վանդալիզմի փաստերի մասին հայկական կողմը երկար տարիներ ահազահգում էր ՅՈՒՆԵՍԿՕ-ին ու այլ միջազգային կազմակերպություններին: Նախիջևանում ընդհանուր առմամբ ոչնչացվել են 218 հայկական եկեղեցիներ և ավելի քան 500 գերեզմանոցներ խաչքարերով: Ադրբեջանական կողմի խաչքարերի ու եկեղեցիների այս ամբողջական ոչնչացման պատճառը, իհարկե, հասկանալի է. դա հայերի այս հողի վրա դարեր շարունակ գտնվելու բոլոր ապացույցների ոչնչացումն է: Բայց մենք այնքան ենք ուզում ապրել մի աշխարհում, որտեղ իսկապես գնահատվի այն ամենը, ինչ վերաբերում է պատմությանն ու մշակույթին, ապրել մի աշխարհում, որտեղ հարևանները, ի վերջո, կսկսեն հարգել միմյանց՝ ճանաչելով և հարգելով միմիանց պատմությունը ու ընդունելով իրականությունը: Դիտել տեսանյութ Նոր Ջուղայի խաչքարերի ոչնչացման մասին:

Այս բարձրահարկ 230 մետրանոց, 69 հարկանի բնակելի շենքը 370 բնակարան է պարունակում: Շնորհիվ բաց տարածությունների, որոնք «թափանցում» են կառույցը, հնարավոր դարձավ հրաժարվել օդորակիչներից, լիովին վստահելով բնական օդափոխությանը: Նախագիծը հաշվի է առնում Բանգկոկի արևադարձային խոնավ ու տաք կլիման և մեգապոլիսներին յուրահատուկ բաց տարածությունների պակասն ու բուսականության բացակայությունը: Ճարտարապետները բոլոր բնակարանները ապահովել են կանաչապատված բաց պատշգամբերով, որոնք միաժամանակ ուղղված են շենքի թե հյուսիսային և թե հարավային ճակատներին, ինչը նաև օժանդակ սառնություն է ապահովում: Շենքի ճակատները երեսպատված են կերամիկական սալիկներով, փայտով և գործվածքով՝ իբրև հարգանքի տուրք Թայլանդի ավանդական ճարտարապետությանը: Շենքի կառուցապատողին՝ Pebble Bay կազմակերպությանը, Էկոլոգիական այս հիանալի նախագծի իրամանացման համար, 50 000 եվրո IHA (International Highrise Award) դրամական մրցանակ է շնորհվել: Pebble Bay-ը իր հերթին մտադիր է այս գումարը փոխանցել թայլանդական բարեգործական ընկերությանը: