Այսօր, հոկտեմբերի16-ին, ինչպես և նախատեսված էր շահագործման հանձնվեց Տաթևի վանական համալիր տանող 5,7 կմ երկարությամբ ռեվերսային ճոպանուղին, որն անցնում է Հալիձորի կիրճի վրայով: Ճոպանուղին ներկայումս աշխարհում ամենաերկարն է հանդիսանում. այն «Տաթևի Վերածնունդ» ծրագրի մասն է կազմում, որը նաև ընդգրկում է վանքի վերականգնման, հյուրանոցի շինարարության և ենթակառուցվածքների բարեկարգման աշխատանքները: Բացմանը ներկա էին գտնվում ՀՀ նախագահ Սերժ Սարգսյանը, վարչապետ Տիգրան Սարգսյանը, հանրապետության այլ բարձրաստիճան ղեկավարներ և հյուրեր: Ճանապարհի կառուցումն իրականացրեց ավստրո-շվեյցարական “Doppelmayr Garaventa Group” ընկերությունը, որն այս բնագավառում աշխարհի առաջատարն է հանդիսանում: Ճոպանուղիով ընդհանուր ճանապարհորդությունը դեպի Տաթևի վանք տևում է մոտ 11,5 րոպե, իսկ կիրճի վրայով անցնելիս ամենաբարձր կետը կազմում է 330մ: Յուրաքանչյուր ուղղությամբ շարժվելու է 25 մարդ տարողությամբ մեկ խցիկ : Նշենք, որ այս օդային տրամվայով «թռիչքը» ամենևին թույլ նյարդեր ունեցող մարդկանց համար չէ... «Տաթևի Վերածնունդ» ծրագրի նախնական արժեքը նախատեսված էր $ 20-25 միլիոն, սակայն աշխատանքների արժեքը հասել է մինչև $50 մլն: Ծրագիրը ֆինանսավորվել է մի քանի աղբյուրներից: Միջոցների կեսից ավելին ներդրել է Ռուբեն և Վերոնիկա Վարդանյաններ և ընկերներ Հիմնադրամը, իսկ Հայաստանի կառավարությունը հիմնականում ֆինանսավորել է ենթակառուցվածքների զարգացումը:
Ինչպես հայտնում է թուրքական Huberturk-ը, Դիարբեքիրում իրականացվում են հայկական Սուրբ Կիրակոս եկեղեցու վերանորոգման աշխատանքները: Նախագիծը գնահատվում է $ 2,5 մլն և ֆինանսավորվում է «Սուրբ Կիրակոս» հիմնադրամի կողմից: Հիմնադրամը, որը գլխավորում է Թեքին Փափուչյանը, հիմնականում ֆինանսավորվում է դիարբեքիրցի հայերի կողմից: Աշխատանքները նախատեսված են ավարտին հասցնել 2011 թվականին: Նախատեսվում է նաև եկեղեցու վրա խաչ տեղադրել և տարեկան երկու անգամ պատարագ իրակացնել: Ցավալին այն է, որ քաղաքում այժմ միայն 8-10 հայ ընտանիք են ապրում, թեև 50 տարի առաջ Դիարբեքիրում մոտ 1000 ապրող հայ կար: Ըստ քաղաքի իշխանությունների արձանագրությունների, եկեղեցին կառուցվել է XV դարում: Հետաքրքիր է, որ կայծակից հին զանգակատան ավերումից հետո, 1913 թվականին, շինարար-ճարտարապետ Դավիթ Խըզարճյանը կառուցեց նոր՝ սլացիկ գոթական ոճի զանգակատուն, որը շատ ավելի բարձր և գեղեցիկ էր, քան հինը: Սակայն շուտով՝ տխրահռչակ 1915 թվականին, այն ավերվեց թուրքական հրետանու կողմից: Ներկայումս Դիարբեքիրը, որը կառուցվել է Մեծ Հայքի նախկին մայրաքաղաքներից մեկի՝ Տիգրանակերտի տեղում, ոչ պաշտոնապես համարվում է Թուրքական Քուրդիստանի մայրաքաղաքը...
Ըստ Forbes ամսագրի կատարած վերջին ուսումնասիրությունների, բացահայտված են ԱՄՆ-ի ամենաթանկ բնակավայրերը ըստ փոստային ինդեքսների (ZIP Codes): Ինչպես տեսնում ենք, ամսագրի հրատարակված ցուցակում առաջին երեք տեղերը պատկանում են Կալիֆորնիային: Սակայն, ի զարմանս շատերի, Լոս Անջելեսի արվարձան Բեվերլի Հիլսը չի ընդգրկվել առաջատար եռյակի մեջ և միայն վեցերորդ տեղն է զբաղեցնում: Իսկ ամենաթանկ փոստային ինդեքսների մրցույթում առաջին տեղը գրավել է Լոս Անջելեսի կենտրոնից հյուսիս-արևելք գտնվող Դյուարտ արվարձանը (Duarte, Calif., ZIP -91008), որը գտնվում է Լոս Անջելեսի ազգային անտառ-արգելոցի մոտակայքում: Այսօր, այդ արվարձանում տների միջին գինը կազմում է $4,276,462 դոլլար: Ներկայումս Դյուարտում 1391 տուն կա, որոնցից միայն 12 են վաճառքի հանված: Ինչպես երևում է ցուցակից, ԱՄՆ-ի ամենաթանկ բնակավայրերը հիմնականում գտնվում են Կալիֆորնիայում և Նյու Յորքում: Ինչպես նշում է Forbes-ը, եթե անշարժ գույքի շուկայում սովորական տների գների անկումը վերջին տարվա ընթացքում կազմել է 7%, ապա թանկերինը միայն 5%: 1. 91008, Դյուարտ, Կալիֆորնիա 2. 94027, Ատերտոն, Կալիֆորնիա 3. 90274, Ռոլինգ Հիլս, Կալիֆորնիա 4. 07620, Ալպին, Նյու Ջերսի 5. 10014, Նյու Յորք, Նյու Յորքի նահանգ 6. 90210, Բեվերլի Հիլս, Կալիֆորնիա 7. 10065, Նյու Յորք, Նյու Յորքի նահանգ 8. 94920, Բելվեդեր, Կալիֆորնիա 9. 10012, Նյու Յորք, Նյու Յորքի նահանգ 10. 93108, Սանտա Բարբարա, Կալիֆորնիա Դիտել ԱՄՆ-ի առաջին 100 թանկարժեք ZIP ինդեքսները
Ճապոնական Obayashi Corp. շինարարական ընկերությունը, որը 2009 թվականի արդյունքներով աշխարհի խոշոր շինարարական կազմակերպությունների ցուցակում պատվավոր 22-րդ տեղն է զբաղեցնում, նախատեսում է մինչև 2012 թվականի գարնանը ավարտել աշխարհի ամենաբարձր շինություններից մեկի՝ 634մ բարձրությամբ Տոկիոյի Tokyo Sky Tree-ի շինարարարությունը: Նախկինում շինարարության ավարտը նախատեսվում էր 2011 թվականի վերջին: Հեռուստաաշտարակը, որի վերին մասը նախատեսված է թվային ալեհավաքների համար, կունենա աշխարհի ամենաբարձր դիտահարթակը՝ 450 մ նիշի վրա: Շինարարության պատվիրատուն է հանդիսանում Tobu Tower Sky Tree Co. Ltd.-ն, իսկ աշտարակի նախագծողն է Nikken Sekkei Ltd. ճարտարապետական բյուրոն: Աշտարակը կհամալրվի 6 Toshiba վերելակներով, որոնցից 4-ը նախատեսված են 40 հոգու համար և կսլանան 600 մ/րոպ արագությամբ: Դրանք Ճապոնիայում այսպիսի մեծ տարողությամբ վերելակներից ամենաարագն են լինելու: Հեռուստաաշտարակը կառուցվում է Obayashi կազմակերպության կողմից մշակված հատուկ հիմքերի վրա, ինչը կերաշխավորի աշտարակի բարձր կայունությունը երկրաշարժերի, ուժեղ քամիների և այլ ուժերի նկատմամբ: Նշենք, որ աշխարհի ամենաբարձր շենքի ռեկորդը դեռ պատկանում է Դուբայի Burj Khalifa երկնաքերին, որի բարձրությունը հասնում է 828 մ:
Սահմանվել է բնակարանների ձեռք բերման արժեքի նոր համաշխարհային ռեկորդ: Մոնակոյում La Belle Epoque առանձնատան 1600 քռմ մակերեսով երկհարկանի պենտհաուսը վաճառվել է $ 306,5 միլիոնով: Գնորդի անունը չի հրապարակվում: Նախկին ռեկորդը պատկանում էր լոնդոնյան Հայդ Պարկի տարածքում գտնվող պենտհաուսին, որը ձեռք էր բերվել $ 202 միլիոնով: Երկու բնակարանների վերջին սեփականատերերը Բրիտանացի կառուցապատող Քենդի եղբայրներն էին: Նիք և Քրիսթիան Քենդիները կառուցապատման բիզնեսով զբաղվում են 1995 թվականից, երբ նրանք 23 և 21 տարեկան էին: Իրենց մոտ ամեն ինչ պատահաբար ստացվեց, երբ նրանք ձեռք բերեցին բնակարան 122.000 ֆունտով, տատիկից պարտք արեցին 6000 ֆունտ, վերանորոգեցին այն և վերավաճառեցին 172000 ֆունտով: Առաջին շահույթը՝ 44.000 ֆունտը, խթան հանդիսացավ լյուքս կարգի անշարժ գույքի շուկայում բավականին հաջողակ կազմակերպություններից մեկի՝ Candy&Candy-ի կայանալու համար: Սակայն, դժվար թե այսօր եղբայրները ցանկանային այս բիզնեսը սկսել Լոնդոնում, քանի որ միայն այս տարվա սեպտեմբեր ամսին Մեծ Բրիտանիայում անժարժ գուքի գինը նվազել է 3,6%-ով, ինչը երեք տասնամյակների ընթացքում ամենացածր ռեկորդային ցուցանիշն է:
