Ինչպես հայտնում է Բլումբերգ գործակալությունը, ընթացիկ տարում Հարավային Կորեայի շինարարական ընկերությունների համար արտասահմանում սպասվում է պատվերների ռեկորդային աճ: Էլեկտրակայանների շինարարության, նավթաարդյունաբերող գործարանների և այլ արտադրական հզորությունների կառուցման ընդհանուր պայմանագրերի գումարը կարող է $60 միլիարդից ավել կազմել: Աշխատանքների 72% իրականացվելու են Մերձավոր Արևելքում: Այսպես, օրինակ Korea Electric Power Corp.-ը հաղթող է ճանաչվել ՄԱԷ-ի (Միացյալ Արաբական Էմիրություններ) $18.6 միլիարդ դոլլար արժողությամբ 4 ատոմային էլեկտրակայանների կառուցման համար հայտարարված մրցույթում, իսկ Doosan Heavy Industries & Construction Co.-ը Սաուդյան Արաբիայում 2800 մգվ հզորությամբ $3.4 միլիարդ արժողությամբ էլեկրտակայան է կառուցելու: Հիշեցնենք, որ ընթացիկ տարվա գարնանը Երևանի հարավում ավարտվել է Հարավկորեական GS Engineering&Construction Corp. ընկերության կողմից իրականացվող 205 մգվ հզորությամբ և $218 միլիարդ դոլլար արժողությամբ ջերմաէլեկտրակայանի շինարարությունը:
Ավարտվեց Պիացա Գրանդե համալիրի շինարարությունը: Այն գտնվում է Վազգեն Սարգսյան փողոցում` Հանրապետության Հրապարակի հարևանությամբ, որտեղից էլ հավանաբար ծագում է նրա անունը (Պիացա Գրանդե իտալերեն նշանակում է մեծ հրապարակ): Այսօր` սեպտեմբերի 20-ին, տեղի ունեցավ համալիրի բացման պաշտոնական արարողությունը, որը ստանձնեցին կատարել Երևանի քաղաքապետ Գագիկ Բեգլարյանը և «Ռենկո» հոլդինգի գլխավոր տնօրեն Ջիովաննի Ռուբինին (www.renco.it). Համալիրը ունի երկմակարդակ ստորգետնյա ավտոկայանատեղիներ, կոմերցիոն հարկ, 3 հարկանի բիզնես կենտրոն՝ իր ներքին բակով և ապակյա տանիքով (ատրիումով), և վերին 7 հարկեր, որոնք նախատեսված են բնակարանների համար: Համալիրի շինարարությունը տևել է 2,5 տարի, նրա վրա ծախսվել է 50 մլն դոլար: Այն կառուցվել է 1842 թվականի պատմական հուշարձանի շենքի տեղում, որը 2007թ. պաշտպանության նախարարությունից ձեռք է բերել «Ռենկո» կազմակերպությունը: «Պիացա Գրանդե»-ն աչքի է ընկնում շինարարության բարձր որակով, որը իրականացրել է «Ռենկո ԱրմԷստեյտ» «Ռենկո ԱրմԷստեյտ» շինարարական կազմակերպությունը: Շինարարության ողջ ընթացքում աշխատանքների կազմակերպման և իրականացման բարձր մակարդակը արժանի է հիացմունքի, ինչը իհարկե ունի նաև իր դերը կառույցի վերջնական գնի բարձրացման մեջ: 2009 թվականի արդյունքներով «Ռենկո ԱրմԷստեյտ» գլխավորել է 30 խոշոր շինարարական կազմակերպությունների ցուցակը Հայաստանում:
Վերջերս Վրաստանի նախագահի վարչակազմի ղեկավարը հայտնել է բարձրակարգ բնակելի համալիրների շինարարության մասին, որն իրականացնելու է ամերիկացի մագնատ Դոնալդ Թրամփը: Մտադրությունների մասին արձանագրությունը Trump Organization-ի և վրացական Silk Road Group կառուցապատող կազմակերպության միջև վերջերս ստորագրվել է Վրաստանի նախագահ Միխաիլ Սահալաշվիլիի Նյու Յորք այցելության ժամանակ, ուր նա մասնակցել է ՄԱԿ-ի վեհաժողովին: Trump Organization-ի գործադիր փոխնախագահ Մայքլ Քոենի խոսքերով, նրանք մտադիր են եզակի ճարտարապետություն ունեցող մի համալիր կառուցել՝ ներքին դիզայնի և հարմարավետության բարձր մակարդակով: Թբիլիսիում կառուցվելիք համալիրի վայրը ամենայն հավանականությամբ ընտրվել եր Քոենի հուլիսի Վրաստանյան այցի ընթացքում: Trump Organization-ի նախնական մտադրություններում ընդգրկված է ինչպես Թբիլիսիում այնպես էլ Բաթումիում բնակելի համալիրների կառուցումը: Հետաքրքրական է, որ Վրաստանում բնակարանային գները ամենացածրն են տարածաշրջանում և տվյալ նախագիծը ներդրումային գրավչության տեսանկյունից որոշ կասկածներ է հարուցվում: Սակայն Վրաստանի կառավարությունը ջանք չի խնայում երկրում ներդրումնային ավելի գրավիչ միջավայր ստեղծելու համար, և այդ, ամենայն հավանականությամբ, այսօր հաջողվում է:
«Վրաստանի պետական Էլեկտրահամակարգ» ընկերության նախագահ Սուլհան Զումբուրիձեն եւ «Ազերէներժի» -ի փոխնախագահ Մառլեն Ասկերովը հուշագիր են ստորագրել Վրաստանի եւ Ադրբեջանի էներգահամակարգերի միջեւ եղած կապերի զարգացման վերաբերյալ՝ նպատակ ունենալով էներգակամուրջ ստեղծել Թուրքիայի հետ։ GSE-ի հաղորդմամբ, խոսքը վերաբերում է Ախլցխա-Բորչխա էլեկտրահաղորդալերերի կառուցման ծրագրի մեջ Ադրբեջանին ներգրավելու մասին, որը պետք է Վրաստանի էներգահամակարգերը կապի Թուրքիայի հետ։
Ի ուրախություն բոլոր ափամերձ հանգստյան գոտիների, ռեստորանների և սրճարանների սեփականատերերի` Արփա-Սևան թունելը (անվանափոխվել է Հայաստանի Կոմկուսի 1960-1966թթ. 1-ին քարտուղար Հակոբ Զորաբյանի անվամբ) վերակառուցվելու է, և Սևանա լճի մակարդակը չի կարողանալու բարձրանալ մինչ աշխատանքների ավարտը, իսկ մինչև ձմեռ այն նույնիսկ կիջնի 20 սմ-ով: Աշխատանքների կատարման համար հայտարարված մրցույթում հաղթող է ճանաչվել Արփա-Սևան համանուն կազմակերպությունը, որը նախատեսված աշխատանքների կատարման համար ամենացածր գինն է առաջարկել՝ 11.8 միլիարդ դրամ (32 միլիոն ԱՄՆ դոլլար): Ծրագրի ֆինանսավորումը իրականացվելու է Հայաստանի կառավարության կողմից և Աբու Դաբիի (ՄԱԷ) զարգացման հիմնադրամի աջակցությամբ: 48.2 կմ երկարություն ունեցող Արփա-Սևան թունելի շինարարությունը սկսվել էր 1961 թ. և ավարտվել էր 1981թ.-ին: Գլխավոր կապալառուն եղել է «Արփասևանշին» տրեստը՝ Արփա-Սևան կազմակերպության իրավահաջորդը: Թունելի շահագործումից հետո որպես Սևանը փրկելու ծրագրի շարունակություն կառուցվեց 21.6 կմ երկարությամբ Որոտանի թունելը՝ Որոտան գետի ջուրը Արփա գետ փոխադրելու համար: Վերանորոգման աշխատանքները շատ տեղին են ոչ միայն ափամերձ ձեռնարկատերերի համար, այլ նաև կառավարության համար, քանի որ վերջինս ժամանակ կշահի նախկին սխալները ուղղելու համար: Լճի ջրի բարձրացումը ծովի մակարդակից մինչև 1901մ բացարձակ նիշի (նախատեսվում է մինչև 2032 թվականը այն բարձրացնել մինչև 1903.5մ+1.5մ ալիքների համար) լուրջ խնդիրների հանգեցրեց՝ հեղեղելով ափամերձ տարածքները: Անհասկանալի է, թե ինչպես ջրի տակ հայտնվեցին անտառներ, բազմաթիվ կառույցներ, ճանապարհ ու խողովակաշարեր, և ինչու՞ ժամանակին չէր կարգավորվել ջրի հոսքը Արփա-Սևան թունելի միջով կամ լճից բացթողումներով, որպեսզի կանխվեր այս ամենը: Պետությանը հսկայական վնաս է հասցվել, քանի որ հեղեղված տարածքների մաքրումը արդեն իսկ շատ ավելի թանկ կարժենա: Համալիր միջոցառումները, որոնք մշակվել էին դեռևս 80-ականների սկզբին, նախատեսում էին մինչև 1905մ բարձրության ջրի բարձրացմանը զուգահեռ աստիճանաբար մաքրել ափամերձ տարածքները բոլոր կառույցներից, ծառերից ու բուսականությունից՝ բերրի հողի շերտից ամբողջությամբ: Նախատեսվում էր նոր անտառների, ինչպես նաև ճանապարհների և կառույցների ստեղծումը ավելի բարձր նիշերի վրա: Նշենք, որ մինչ Սևանի ջրի պաշարների օգտագործումը լիճը աչքի էր ընկնում աշխարհում եզակի ձկնատեսակներով: Դեռևս 40-50 տարի առաջ արված կանխատեսումների համաձայն` Սևանի ջրի ցածր մակարդակը պետք է հանգեցներ լճի ճահճացմանը, ինչն այսօր տեղի է ունենում: Սևանը փրկելու համար ջրի մակարդակը պետք է բարձրացվի առնվազն մինչև 1903,5 մ` միաժամանակ կատարելով տարածքների մաքրման բոլոր նախատեսված գործողությունները, քանի որ առանց հատակի մաքրման լճի մակարդակի բարձրացումը կհանգեցնի հակառակ արդյունքի և ավելի կարագացնի լճի ճահճացումը:
