Իհարկե վախենում եք, այլապես Դուք շատ վատ եք տեղեկացված: Արդյոք տեղյակ եք, որ Global Facility for Disaster Reduction and Recovery կազմակերպության 2009 թվականի հաշվետվությունում երկրաշարժերի նկատմամբ խոցելիության տեսակետից Հայաստանը զբաղեցրել է առաջին տեղը: Երկրաշարժը կարող է հատկապես ծանր հետևանքներ ունենալ Երևանում, քանզի որոշ փորձագետների գնահատմամբ, եթե Հայիթիի (2010) կամ Սպիտակի (1988) մագնիտուդի ուժգնությամբ երկրաշարժ տեղի ունենա մայրաքաղաքում, ապա շենքերի մոտ 80% կփլուզվեն: Հնարավոր ուժեղ երկրաշարժը Երևանում կործանարար հետևանքների կբերի՝ ստիպելով բազում–անհամար մարդկանց լքել երկիրը, և գրեթե անհնարին կդարձնի մայրաքաղաքի և պետության վերականգնումը: Մենք տեսել ենք Սպիտակի երկրաշարժի հետևանքների վերացումը, որը շարունակվում է արդեն 21 տարի, և հետևում ենք Հաիթիի երկրաշարժից հետո վերականգնողական աշխատանքների ընթացքին... Եզրակացությունը մեկն է. չնայած տրամադրվող ահռելի միջոցներին՝ երկրաշարժից հետո ստեղծված քաոսային իրավիճակում գրեթե անհնար է արդյունավետ կազմակերպել վերականգնողական աշխատանքներ՝ հատկապես մայրաքաղաքում: Նույնիսկ վերակառուցման սցենարի հաջող ընթացքի դեպքպում մենք, միևնույնն է, չենք կարող հետ բերել հարյուր հազարավոր կորցրած մարդկային կյանքեր: Արդյոք՛ մենք դրան ենք սպասում: Այսօր գրեթե բոլոր մեր հիվանդանոցները և դպրոցները (առաջին հերթին), կառավարական, հասարակական, բնակելի և այլ նշանակության շենքերը վերակառուցման կարիք ունենք: Նրանց հիմնական մասը չի համապատասխանում սեյսմակայունության նորմերին, և եթե այժմ հնարավորություն չկա լայնածավալ համազգային վերակառուցում իրականացնելու, ապա պետք է սկսել գեթ մեկ սեյսմակայուն հիվանդանոցի կառուցումից: Աշխարհում աճում է տարերային աղետների թիվը, և ավելի դժվար է դառնում դրանց դիմակայելը, իսկ պետությունների օգնությունների հնարավորությունները հետզհետե սպառվում են... Խնդրում ենք բոլոր հետաքրքրված անձանց իրենց կարծիքն արտահայտել հարցի վերաբերյալ, ինչպես նաև խորապես գիտակցել հարցի կարևորությունը և իրենց հերթին անել հնարավորինս աջակցելու խնդրի լուծմանը:

Վրաստանում զբոսաշրջության զարգացումը իշխանությունների ուշադրության առարկա է: Ինչպես սեպտեմբերի 11-ին Բաթումիում տեղի ունեցած հանդիպման ժամանակ նշել է Վրաստանի վարչապետ Նիկա Գիլաուրին, 2009/2010թթ. 8 ամսվա ընթացքում զբոսաշրջիկների ներհոսքը ավելացել է 34%-ով և կազմել 1 350 000 մարդ: Իշխանությունները, սակայն, լրջորեն մտահոգված են այդպիսի ներհոսքի զբոսաշրջիկների տեղաբաշխման խնդրով, որի լուծման համար մի շարք շտապ միջոցներ են կիրառվում: Այսպես նախագահ Միխայիլ Սահակաշվիլին հեղափոխական առաջարկ է արել գործարարներին, համաձայն որի Քոբուլետիի սոճուտում նրանց կտրամադրվեն անվճար հողատարածքներ` 27 տուրիստական համալիր կառուցելու համար: Նա նաև խոստացել է, որ անվճար կանցկացվեն բոլոր անհրաժեշտ ինժեներական հաղորդագծերը, կֆինանսավորվեն նախագծման աշխատանքները, և վերջապես 5 տարով հարկերից կազատվեն այն ձեռներեցները, ովքեր այս ամենը կիրականացնեն մինչև հաջորդ տարվա սեպտեմբերի 1-ը: Նշենք, որ Վրաստանումը արդեն երկար տարիներ զբոսաշրջության խթանման քաղաքականություն է վարում: Սահակաշվիլին նաև ուշադրություն է դարձրել Թիֆլիսի հյուրանոցային բիզնեսում կատարված ներդրումների էական աճի վրա: Նախագահի խոսքերով, Թիֆլիսի նախկին Մարքսիզմ-Լենինիզմի ինստիտուտի տեղում կառուցվող «Կեմպինսկի» հյուրանոցը լավագույններից մեկը կլինի Արևելյան Եվրոպայում: Շինարարությունն իրականացնում է Աբու Դաբիի (Արաբական Միացալ Էմիրություններ) ներդրումային խումբը: Նախատեսվում է այն ավարտել 2012 թ.: Հետաքրքիր է նշել, որ անցյալ տարի հյուրանոցի շինարարական աշխատանքների ժամանակ հայտնաբերվել է Ստալինի ժամանակաշրջանի գաղտնի բանտ, ինչի մասին որևէ մեկը նախկինում տեղյակ չի եղել: Այս առիթով Թիֆլիսի պետական համալսարանում խորհրդային պատմություն դասավանդող քաղաքական գիտությունների թեկնածու Թիմոթի Բլովելթը նշել է, որ 1930 թվականին ինստիտուտի շինարարության ժամանակ Լավրենտի Բերիան գրեթե ամեն օր այցելում էր շինարարություն վայր: Հիմա արդեն պարզ է, թե ինչու...

Սեպտեմբերի 3-ին Կ. Դեմիրճյանի անվ. մարզահամերգային համալիրում բացվել է տասներորդ ունիվերսալ տարածաշրջանային “Armenia Expo 2010” ցուցահանդեսը, որը տարածաշրջանի ամենախոշոր է հանդիսանում: Ցուցահանդեսը տևեց երք օր՝ մինչև սեպտեմբերի 5-ը: Ցուցահանդեսի կազմակերպիչներն էին Հայաստանի Արդյունաբերողների և Գործարարների Միությունը և LOGOS EXPO կենտրոնը, իսկ գլխավոր ինֆորմացիոն հովանավորը հանդիսանում էր VivaCell-MTS: Ցուցահանդեսին մասնակցում էին ավելի քան 150 կազմակերպություններ՝ ինչպես Հայաստանից, այնպես 14 այլ երկրներից: Ցուցահանդեսը բացեցին Հայաստանի վարչապետ Տիգրան Սարգսյանը և Հայաստանի Արդյունաբերողների և Գործարարների Միության նախագահ Արսեն Ղազարյանը: Ցուցահանդեսի բացման արարողության ժամանակ վարչապետը իր ելույթում հատկապես կարևորեց արտասահմանյան կազմակերպությունների մասնակցությունը, ինչը թույլ է տալիս պահպանել ցուցահանդեսի միջազգային կարգավիճակը: Հիշեցնենք, որ ցանկացած ցուցահանդեսի նպատակն է ցուցադրել մարդու ձեռքբերումները որևէ բնագավառում, իսկ “Armenia Expo 2010” ցուցահանդեսինը՝ տնտեսության: Հուսով ենք, որ այն դրական դեր է խաղացել տարածաշրջանի տնտեսության ինտեգրման և զարգացման մեջ, չնայած այն հանգամանքի, որ ցուցահանդեսի 3-րդ օրը որոշ կազմակերպությունների տաղավարներ արդեն դատարկ էին:

Հարավաֆրիկյան հանրապետությունում բանակցություններ են ընթանում այդ երկրի կառավարության և Չինաստանի պետական սեփականություն հանդիսացող China Railway Group կազմակերպության միջև Յոհաննեսբուրգ և Դուրբան քաղաքների միջև 556 կմ երկարությամբ Հարավաֆրիկյան Հանրապետությունը բանակցություններ է վարում չինական China Railway Group կազմակերպության հետ Յոհաննեսբուրգ և Դուրբան քաղաքների միջև 556 կմ երկարությամբ արագընթաց երկաթուղու կառուցման շուրջ: 30 միլիարդ դոլար արժողությամբ այս ծրագիրը կկարողանա մեքենայի հետ համեմատած կրկնակի կրճատել մի քաղաքից մյուսը հասնելու ժամանակը: China Railway Group-ը աշխարհի երկրորդ խոշոր շինարարական կազմակերպությունն է, իսկ վարկանիշային ցուցակում այն 342-րդն է: Նշենք նաև, որ ներկայում Կալիֆորնիայի նահանգապետ Առնոլդ Շվարցենեգգերը «շրջագայում» է ճեպընթաց գնացքներ արտադրող և կառուցող հիմնական ասիական երկրներով, որպեսզի Լոս Անջելես և Սան Ֆրանցիսկո քաղաքների միջև ճեպընթաց երկաթգծի կառուցման համար կապալառու ընտրի: Վերջերս՝ օգոստոսի 31-ին Հայաստանի գերազանցիկ շրջանավարտների հետ հանդիպման ժամանակ, նախագահ Սերժ Սարգսյանը տնտեսության զարգացման խթանման համար հատկապես կարևորել է ճանապարհներում ծախսած ժամանակի կրճատումը:«Տրանսպորտային համակարգը երկրի զարկերակն է հանդիսանում, նրա արյունատար անոթները, առանց որի անհնար է ապրել ժամանակակից աշխարհում», -նշել է նախագահը: Մեր պարագայում, իհարկե, խոսքը արագընթաց երկաթգծի կառուցման մասին չէ, այլ դեռևս ավտոճանապարհների: Կարծում ենք, որ «հեռավորության կրճատման» ցանկությունն իրականացնելու համար պետությունը առաջին հերթին պետք է ուշադրություն դարձնի ճանապարհաշինարարական աշխատանքների որակին, որոնք հեռու են միջազգային չափանիշներից, ինչպես նաև ճանապարհային նշանների ցավալի վիճակին՝ սկսած հիմնական մայրուղիներում արագության անհիմն սահմանափակումներից, մինչև նախազգուշացնող նշանների ու անվտանգության արգելապատնեշների բացակայությունը բազմաթիվ վտանգավոր վայրերում, ինչը կնպաստի տրանսպորտային միջոցների արագ և անվտանգ երթևեկությանը:

Կարեն Դեմիրճյանի անվան մարզահամերգային համալիրում մեկնարկեց 7-րդ միջազգային Կովկաս Շինարարություն և Վերանորոգում ցուցահանդեսը որը կտևի օր 3՝ ապրիլի 2-4: Կազմակերպիչ` LOGOS EXPO Center-ը հավաստիացնում է, որ վերջին 10 տարիների ընթացքում այս շինարարական ցուցահանդեսը խոշրագույնն է Հայաստանում, որտեղ մասնակցում են տարբեր երկրներից ավելի քան 100 կազմակերպություններ: Ցուցահանդեսը միջազգային փորձի փոխանակման և շինարարական շուկայի ընդլայնման լայն հնարավորություն է ստեղծում: