Օլե Շիրենի (Ole Scheeren) ճարտարապետական ընկերությունը հանրությանն է ներկայացրել Վիետնամի խոշորագույն քաղաքներից մեկում կառուցվելիք նոր երկնաքերի դիզայնը: Ինչպես տեղեկացնում է The Dezeen պարբերականը, երկնաքերը նախագծված է այնպես, որ արտացոլի երկրի բնապատկերները: «Էմփայր Սիթի» (Empire City) անվանումը ստացած երկնաքերը նախատեսվում է կառուցել Խո Շի Մին (Ho Chi Minh) քաղաքում Սայգոն (Saigon) գետի արևելյան ափին տեղակայված արագ զարգացող թաղամասում: Ըստ նախնական տվյալներ՝ նոր համալիրը բաղկացած կլինի 3 երկնաքերերից, որոնք վեր կխոյանան լեռնային բնապատկեր հիշեցնեղ ամբիոնից: Ամբիոնում կտեղակայվեն երկրին բնորոշ բրնձե դաշտեր հիշեցնող զբոսայգիներ, իսկ երկնաքերերից ամենաբարձրի վերնահարկում վեր կխոյանա «Երկնային անտառը» (Sky Forest): Ճարտարապետ Օլե Շիրենի խոսքերով, այս նախագիծը ցույց է տալիս ճարտարապետության ապագան ու ներկայացնում է մարդու և բնության համակեցության նոր ուղիներ: Նախագիծը ցանկանում է ապացուցել, որ բնությունը կարող է գոյություն ունենալ ոչ միայն երկրակեղևի վրա, այլ նաև երկնքում: Ըստ նախնական տվյալների՝ շինարարության ավարտից հետո 333 մետր բարձրությամբ «Էմփայր Սիթին» հավակնում է դառնալ քաղաքի ամենաբարձր աշտարակը՝ իր հետևում թողնելով 262.5 մետր բարձրությամբ «Բիտեքսկո ֆինանսական աշտարակին» ( Bitexco Financial Tower): Համալիրի գլխավոր աշտարակում կտեղակայվեն բնակարաններ և հյուրանոցներ, հանրային դիտահարթակ, և հանդիսությունների համար նախատեսված հատուկ երկնային հարկ: Մյուս երկու շինություններում կտեղակայվեն բնակարաններ և գրասենյակներ, իսկ բուն հարթակը (պոդիումը) կծառայի որպես առևտրային գոտի:

90 կմ երկարությամբ Մ6 Վանաձոր-Ալավերդի-Բագրատաշեն միջպետական ճանապարհի վերանորոգումը նախատեսված է իրականացնել երկու փուլով: Շինարարական տեխնիկան այս ճանապարհի տարբեր հատվածներում աշխատում է արդեն մեկ տարի: Առաջին փուլում վերանորոգվում է Վանաձոր-Ալավերդի ճանապարհի 38,5 կմ երկարությամբ հատվածը, որն ընդգրկում է նաև միջպետական ճանապարհի երեք թունելներն ու կամուրջները: Ձորագետ համայնքի ղեկավար Լյովա Գրիգորյանը պատմում է, որ վերջին անգամ թունելները վերանորոգվել են 1962 թվականին. «Դրանից հետո այս թունելներ շինարար չի մտել: Մեքենաները ջարդվում էին, իսկ հիմա մարդիկ հեշտ կգնան մարզկենտրոն, ավտոբուսները կաշխատեն: Թունելները մայթեր են ունենալու, լուսավորվելու են: Բացի դրանից, մեր համայնքը մայրուղուն կպած է, միգուցե խորտկարաններ, կրպակներ բացեն, մարդիկ աշխատեն»: «Կապավոր ՍՊԸ» -ն հիմնանորոգումն իրականացնող երեք կապալառու կազմակերպություններից մեկն է և այժմ վերանորոգման աշխատանքներն իրականացնում է Թումանյան քաղաքից Ձորագետ հատվածում՝շուրջ 9 կմ ճանապարհին: «Կապավոր ՍՊԸ»-ի տեղամասի պատասխանատու Բաղդասար Զարգարյանն ասում է, որ տեղանքը բարդ է: Արդեն իրականացվել են պայթեցման ու ժայռերից քարաթափման աշխատանքները, ճանապարհի երթևեկելի հատվածի հետ կապված խնդիրներ չկան: «Սկզբում կառուցել ենք հենապատերը, համարյա ավարտել ենք: Երկու թունելները վերանորոգվել են, մեկը կարելի է ասել՝ վերակառուցել: Մեքենաների համար լուրջ դժվարություն էր այս թունելներով անցնելը: Նախկինում լայնությունը եղել է 3,5-ից 4 մետր, տեղեր կային անանցանելի էին, հիմա արդեն երթևեկելի մասը 5 մ ապահովում է, այսինքն այժմ արդեն լայնությունն էլ, բարձրությունն էլ ապահովված է և երկու մեքենա իրար կողքով անցնում են»,- ասում է Բաղդասար Զարգարյանը: Այժմ իրականացվում են Ձորագետի երկու թունելների մուտքերը մոտ 25 մետրով երկարացնելու աշխատանքները, ինչի անհրաժեշտությունն առաջացել է այս տեղանքում առկա քարաթափումների վտանգից: Թումանյան քաղաքի հատվածում իրականացվել է ջրատարի տեղափոխում, կտեղափոխվի նաև գազատարը: Շինարարների խոսքով ՝ճանապարհների լայնացման աշխատանքները հատկապես Թումանյանից Ձորագետ հատվածում նկատելի կլինի: Նախկին ճանապարհը նեղ էր, իսկ վարորդների տեսադաշտը փակում էին ժայռերը: Ներկայիս ճանապարհը լայն է և անվտանգ: «Ճանապարհի 6 կմ-ը խճապատված է, պատրաստ է, 4 կմ-ն արդեն ասֆալտապատված է, մնում է վերևի շերտն անենք, բայց, երևի, ոչ այս տարի: Աշխատում ենք որակն ապահովենք, դրա համար էլ այս անձրևոտ եղանակներին ասֆալտապատումն արդարացված չէ», - պատմում է շինարարության այս տեղամասի պատասխանատու Բաղդասար Զարգարյանը: Իսկ Վանաձոր քաղաքի տարածքում 6,6 կմ ճանապարհն արդեն վերանորոգվել է և շահագործվում է: Վերանորոգվել են նաև երեք կամուրջներից երկուսը: Լոռու մարզպետարանի աշխատակազմի քաղաքաշինության վարչության տրանսպորտի և ճանապարհաշինության բաժնի պետ Վարդան Գևորգյանի խոսքով՝ Վանաձոր-Ալավերդի-Բագրատաշեն միջպետական ճանապարհի վերանորոգումը մեր երկրում իրականացվող ճանապարհաշինության ոլորտի կարևոր ծրագրերից մեկն է և կենսական նշանակություն ունի ամբողջ հանրապետության համար. «Հանրապետություն ներկրվող բեռների մեծ ծավալի տեղափոխումն իրականացվում է Բագրատաշեն-Ալավերդի-Երևան ճանապարհով, և այն կարևոր նշանակություն ունի և Լոռու մարզի, և հանրապետության համար: Զբոսաշրջության զարգացման առումով էլ հսկայական դեր ունի: Եթե թեթև մարդատար մեքենաները մի կերպ էին գնում այդ թունելներով, պատկերացրեք ծանրաքարշ բեռնատարները կամ բազմատեղանոց ավտոբուսներն ինչ դժվարություններ էին ունենում: Իսկ հիմա թունելները նորոգվել են հիմնովին, ճանապարհի շրջադարձերն ավելի թեթև են»: Զբոսաշրջիկներ տեղափոխող ավտոբուսի վարորդ Հրաչյա Ասլանյանը մեզ հետ զրույցում պատմեց, որ զբոսաշրջիկների հիմնական դժգոհությունների առիթը հենց ճանապարհներն էին. «Մի անգամ դեպք եղավ, որ ճանապարհների պատճառով ավտոբուսի մեջ դրամահավաք կազմակերպեցին, որ մեզ վճարեն և խնդրեցին, որ իրենց հետ տանենք Վրաստան: Թեև մեր երկրում զարգացած է սպասարկման ոլորտը, հյուրանոցները, մարդիկ հյուրընկալ են, բայց ճանապարհները ստվեր էին գցում այդ ամենի վրա»: Միջպետական ճանապարհի՝ Ալավերդուց մինչև Բագրատաշեն հատվածը կհիմնանորոգվի ծրագրի երկրորդ փուլում, աշխատանքները սկսվելու են 2018 թվականի գարնանը: Մ6 միջպետական ճանապարհի վերակառուցման ծրագիրն իրականացվում է Եվրոպական ներդրումային ու Ասիական բանկերի ֆինանսավորմամբ ու պետբյուջեի համաֆինանսավորմամբ: Առաջին փուլով նախատեսված հիմնանորոգման աշխատանքների արժեքը կազմում է 15 մլրդ դրամ: 33 համայնքների տարածքով անցնող ավտոմայրուղին ամբողջությամբ շահագործման կհանձնվի 2020 թվականի հունվարին:

«Զահա Հադիդ» ճարտարապետական ընկերությունը (Zaha Hadid Architects) Մեխիկոյում սկսել է կառուցել նոր բնակելի աշտարակ, որը շինարարության ավարտից հետո հավակնում է դառնալ քաղաքում ամենաբարձրը: Ինչպես տեղեկացնում է ճարտարապետական ընկերության պաշտոնական կայքը, «Բորա» բնակելի աշտարակը (Bora Residential Tower) կառուցվում է քաղաքի արևմտյան մասում Սանտա-ֆե (Santa-Fe) կոչվող գործարար թաղամասում 280 հազար քառակուսի մետր մակերեսով Լա-Մեկսիկանա (La-Mexicana) այգու հարևանությամբ: Ի դեպ, այս այգում են տեղակայված 3 համալսարաններ, Apple, Microsoft և Amazon հանրահայտ ընկերությունների տարածքային գրասենյակները, բազմաթիվ դպրոցներ, թատրոններ, սրճարաններ և ռեստորաններ: Բացի վերոնշյալը, աշտարակը կառուցվում է Սանտա-Ֆե տրանսպորտային հանգույցի հարևանությամբ, ինչը հնարավորություն կտա շինությունը շատ արագ կապել քաղաքային մետրոպոլիտենին: Աշտարակի իդեալական դիրքից ելնելով՝ ճարտարապետական ընկերությունը յուրօրինակ լուծում է գտել: Քանի որ աշտարակը հարմար է բոլոր խմբերի գնորդների համար՝ ընտանիքներ, երիտասարդ մասնագետներ, թոշակառուներ, այն բաժանված է 5 տարբեր թևերի, որոնք շրջապատում են կենտրոնական հատվածը: Ըստ նախնական տվյալների՝ աշտարակի թևերից մեկը բաղկացած է լինելու 50 հարկից, ինչի արդյունքում աշտարակը դառնալու է ամենաբարձր բնակելի շինությունը Մեխիկոյում: Ինչպես տեղեկանում ենք ճարտարապետական ընկերության կայքից, աշտարակում տեղակայված են լինելու 200 բնակարան՝ մեկ, երկու և երեք սենյականոց: Յուրաքանչյուր բնակարանի 2 պատը ապակեպատ է լինելու, ինչը հնարավորություն է տալու, որ բնական լույսը ներթափանցի ներս և բացի դա բնակիչների առաջ բացվելու է հիանալի տեսարան դեպի գեղատեսիլ շրջապատը: Բնակարաններն ունենալու են նաև փոքրիկ պատշգամբներ, որպեսզի բնակիչները կարողանան վայելել տեղական մեղմ կլիման: Աշտարակի ստորին հատվածում կառուցվելու են ռեստորաններ, խանութ-սրահներ, զբոսուղիներ և նստարաններ:

ՌԻՈ Առևտրաժամանցային Կենտրոնը Երևանում Բացեց Իր Դռները: «Ռիո մոլը» տեղակայված է քաղաքի խիտ բնակեցված գոտիներից մեկում, Արաբկիր համայնքի Քոչար-Փափազյան-Սարալանջ խաչմերուկում: Ունի երեք մուտք, ինչը հասանելի է դարձնում մոլը տարբեր կողմերից: Շենքը կազմված է 3 հարկերից: Ի տարբերություն մյուս մոլերի, շենքի յուրաքանչյուր հարկն ունի մեկ երկար միջանցք, որտեղ տեղակայված են բոլոր խանութները: Այս կառուցվածքի շնորհիվ առևտրի կենտրոնում «մեռյալ» գոտիներ չեն առաջանում, և բոլոր տաղավարները տեսանելի ու հասանելի են այցելուներին: Դա թույլ է տալիս այցելուներին անցնել շրջանով և լինել մաքսիմալ քանակությամբ խանութներում: Սա ցանկացած մոլի հաջողության առաջին գրավականներից մեկն է: Հարկերն իրար հետ կապվում են շարժասանդուղքներով: Գործում են նաև 2 մարդատար և մեկ բեռնատար վերելակներ: Երկրորդ հարկում կա նաև շարժահարթակ: Յուրաքանչյուր հարկում տեղադրված տեղեկատվական վահանակները օգնում են ավելի հեշտ կողմնորոշվել համալիրում: «Ռիո մոլի» կառուցվածքային առանձնահատկություններից մեկն այն է, որ առաստաղն ապակեպատ է: Նույնպիսի լուծում ունի նաև Մոսկվայում գործող նույնանուն համալիրը: Տաղավարների առաստաղի բարձրությունը 6 մետր է, ինչը մոլի դրական կողմերից է, քանի որ գնորդները ճնշող ազդեցություն չեն զգում: Կառույցի էքստերիերը իրականացվել է բնական քարերով և ապակիներով, ինտերիերում օգտագործվել են փայտային լուծումներ: Մոլի «խարիսխներից» մեկը առաջին հարկում տեղակայված սուպերմարկետն է՝ Երևան սիթին: Վերջին հարկում է գտնվում ֆուդ կորտը, որտեղից բացվող պատշգամբից կարելի է վայելել Երևանի գեղեցիկ տեսարանը: «Ռիո մոլում» գործում է նաև «Սինեմա սթար» կինոթատրոնը: Մոլն ունի վերգետնյա ավտոկայանատեղի նախատեսված 250 ավտոմեքենայի համար:

Ֆրանսիայի լազուրե ափին 5,25 մլն ԱՄՆ դոլարով վաճառվում է Էդիտ Պիաֆի այն տունը, որտեղ երգչուհին անց է կացրել կյանքի վերջին տարիները, տեղեկացնում է բրիտանական Daily Mail պարբերականը: Եռահարկ առանձնատունը գտնվում է Ֆրանսիայի հարավարևելյան Գրասս քաղաքում: Երգչուհին այդ տունը գնել է 1949 թվականին և ապրել այնտեղ մինչև իր կյանքի վերջը՝ 1963 թվականը: Ըստ պարբերականի ներկայացրած տվյալների՝ առանձնատանը տեղակայված են 4 ննջասենյակ, հյուրասենյակ բիլլիարդով և բուխարիով, ճաշասրահ ու խոհանոց: Տան հատակն հինականում սալիկապատված է, իսկ առաստաղը ձևավորված են փայտով: Պատերը և հյուրասենյակի ու ճաշասենյակի միջև գտնվող կամարը ձևավորված են քարով: Գլխավոր առանձնատնից բացի հսկայական տարածքի վրա տեղակայված են թենիսի կորտ, 2 լողավազան՝ բացօթյա և փակ, 3 տնակ նախատեսված հյուրերի համար և երկսենյականոց պահակակետ: Բացի վերոնշյալը տնամերձ հողամասում գտնվում է միջերկրածովյան ոճով ձևավորված այգի՝ փոքրիկ լճակով և ուղղաթիռի վայրէջքի համար նախատեսված հարթակով: