Չինաստանում մարդկային աչքի տեսքով հանրային գրադարան է կառուցվել: Ինչպես տեղեկացնում է The Dezeen պարբերականը, «Տյանցզին Բինհայ հանրային գրադարանի» կենտրոնական հատվածը նախագծված է հսկայական եռաչափ բիբի տեսքով, որն անցորդին է նայում շինության ապակյա դիմային հատվածից: Հինգհարկանի շինության մեջ հատակից մինչև տանիք տեղակայված են գրադարակներ, որոնք ձևավորում են ակնախոռոչը, իսկ կենտրոնում տեղակայված ապակյա հսկա գունդը ձևավորում է աչքի բիբը: Նշենք, որ գրադարակներն այնպես են նախագծված, որ այցելուները կարող են վերցնել գիրքը, նստել դարակների վրա, կարդալ և մյուս գրասերների հետ քննարկել կարդացածը: Նախագծային «ԷմՎիԱրԴիՎի» (MVRDV) ընկերությունն այս նախագծի մասին առաջին անգամ հայտարարել է 2016 թվականին, երբ շինարարությունը պաշտոնապես արդեն սկսված էր: Նշենք, որ այս հանրային գրադարանը կառուցվել է Բինհայ քաղաքում նոր մշակութային կենտրոնի կառուցման ծրագրի շրջանակներում: Կառուցապատման գլխավոր հատակագիծն իրականացրել է գերմանական «ՋիԷմՓի» ճարտարապետական ընկերությունը: 33.7 հազար քառակուսի մետր մակերեսով մշակութային կենտրոնի շինարարությունը ավարտվել է 3 տարվա ընթացքում, ինչը ռեկորդային է այս բարդության կառույցի իրականացման համար: Միգուցե այդ իսկ պատճառով շինարարության ընթացքում և ավարտից հետո որոշակի խնդիրներ են առաջացել: Մասնավորապես, կառուցապատող ընեկերության տեղական խումբը առանց գլխամասային գրասնեյակի հետ քննարկման չի կառուցել դեպի վերին գրադարակներ տանող սենյակները: Արդյունքում ընկերությունը ստիպված է եղել վերևի հատվածում տեղակայված գրադարակների վրա նկարելով այնպիսի տպավորություն ստեղծել, որ այնտեղ գրքեր են շարված: Հանրային գրադարանի ստորգետնյա հատվածում տեղակայված են գրքերի պահետսներ, առաջին հարկում երեխաների և ծերերի համար նախատեսված ընթերցասրահներ, երկրորդ և երրորդ հարկերում ընթերցասրահներ և հանգստի գոտիներ, իսկ ահա վերին հարկերում գտնվում են խորհրդակցությունների սենյակներ, գրասենյակներ, համակարգչային լսարաններ և 2 բացօթյա պատշգամբ՝ տեղակայված շինության տանիքին:
Ֆլորիդա նահանգի Հոլիվուդ քաղաքում կայացել է կիթառի տեսքով յուրօրինակ հյուրանոցի հիմնարկեքի արարողությունը: 137 մետր բարձրությամբ և 36 հարկանի հսկա ապակյա շինությունը 1.5 մլրդ ԱՄՆ դոլար արժողությամբ «Սեմինոլ Հարդ Ռոք Հոթել և Կազինո» (Seminole Hard Rock Hotel & Casino) զվարճանքների կենտրոնի ընդլայնման մի մասն է կազմում: Ինչպես տեղեկացնում են նախագծի հեղինակները, սա առաջին շինությունն է աշխարհում, որ նախագծվել է ճիշտ կիթառի տեսքով: Այն ոչ թե նման է լինելու երաժշտական գործիքին, այլ ամբողջությամբ կրկնօրինակելու է կիթառի բոլոր կորությունները և առանձնահատկությունները: Ըստ նախնական տվյալների՝ հյուրանոցը հանրության առաջ իր դռնեըը կբացի 2019 թվականին: Բացվելուց հետո այն իր այցելուներին կառաջարկի 638 սենյակ` հյուրանոցային համարների ընդհանուր քանակը հասցնելով 1270-ի: Հյուրանոցում կտեղակայվեն 3900 քառակուսի մետր մակերեսով սպա-կենտրոն, ռեստորաններ և սրճարաններ: Խաղասրահը կունենա 3267 սլոթ մեքենա և 178 խաղասեղան, ինչպես նաև 1670 քառակուսի մետր մակերեսով պոկեր-սրահ: Բացի յուրօրինակ տեսքով հյուրանոցից այցելուները կկառողանան մուտք գործել 40.5 հազար քառակուսի մետր մակերեսով համալիր, որտեղ կտեղակայվեն մասնավոր լողավազաններ, արհեստական ջրվեժներ, լողափներ, ռեստորաններ և զվարճանքի այլ կենտրոններ:
Ամեն տարի միլիարդավոր պլաստիկե շշեր նետվում են աղբանոց և հինգից մեկն է միայն վերամշակվում: Սակայն Մասաչուսեթսի տեխնոլոգիական ինստիտուտի (MIT) մի խումբ ուսանողներ մշակել են նոր մեթոդ, որը հնարավորություն կտա պլաստիկե շշերի թափոններն օգտագործել բետոնի մշակման մեջ: Ինչպես տեղեկացնում է ինստիտուտի պաշտոնական կայքը (MIT News), նոր մեթոդի օգտագործումը հնարավորություն կտա դարձնել բետոնը առավել ամուր, ինչը նշանակում է որ մոտ ապագայում հնարավոր է շինարարության ընթացքում օգտագործեն այս նորագույն մեթոդով ստացված բետոնը: «Թափոնների կառավարում» (Waste Management journal) գիտական ամսագրում տպագրված ուսումնասիրությունը ներկայացնում է, որ նոր մեթոդով ստացված բետոնը 20 տոկոսով ամուր է ավանդական մեթոդով պատրաստված բետոնից: Այս նորագույն բետոնի ստացման եղանակը հետևյալն է. Սկզբում պլաստիկե շշերի թափոնները ենթարկվում են անվտանգ գամմա ճառագայթման, այնուհետև թափոնները մանրացվում են և ստացված փոշին խառնվում է բետոնի շաղախին: Արդարացիության համար նշենք, որ բետոնի ամրությունն այս մեթոդի միակ առավելությունը չէ: Ինչպես նշում է ինստիտուտի պաշտոնական կայքը, բետոնն այսօր աշխարհում համարվում է առավելագույն օգտագործվող շինանյութերից մեկը, իսկ ցեմենտի արտադրությանը բաժին է ընկնում տարեկան մթնոլորտ արտանետվող ածխաթթու գազի 4.5 տոկոսը: Նորագույն մեթոդը կկրճատի ոչ միայն վնասակար նյութերի արտանետումը մթնոլորտ, այլ նաև պլաստիկե շշերի թափոնների ծավալները:
«Ստեֆանո Բոերի» (Stefano Boeri) ճարտարապետական ընկերությունն ամբողջ աշխարհում շարունակում է իր «Ուղղահայաց այգու» հաղթարշավը: Ինչպես տեղեկացնում է The Inhabitat կայքը, այս անգամ ճարտարապետական ստուդիան կանգ է առել Փարիզում, որտեղ նախատեսում է կառուցել Ֆրանսիայի առաջին ուղղահայաց աշտարակը: Ըստ նախնական տվյալների՝ «Ֆողե Բլանշ» (Forêt Blanche) անվանումը ստացած նախագիծը, ինչը ֆրանսերենից թարգմանաբար նշանակում է «Սպիտակ անտառ», կկառուցվի Փարիզի արևելյան հատվածում գտնվող Վիլյի-սյուր-Մարն (Villiers sur Marne) թաղամասում: 54 մետր բարձրությամբ աշտարակը կկառուցվի հիմնականում փայտանյութից, իսկ ճակատային հատվածներում կտնկվեն մոտ 2000 ծառ, թուփ և բույս, ինչն իր մակերեսով հավասար կլինի մոտ 1 հեկտար անտառի: Ինչպես տեղեկացնում է ճարտարապետական բյուրոյի կայքը, շինության վերին հարկերում կտեղակայվեն բնակարաններ, իսկ ստորին հարկերում՝ գրասենյակային և առևտրային տարածքներ: Աշտարակի չորսբոլորը կտեղակայվեն պատշգամբներ դեպի կենտրոնական Փարիզ տեսարաններով:
Հյուսիսային Նորվեգիայում կկառուցվի ռեստորան, որը մասամբ մխրճված կլինի ծովի մեջ, հնարավորություն տալով իր այցելուներին ճաշել ալիքներից ներքև, գրում է The Dezeen պարբերականը: Ինչպես նկարագրում է ճարտարապետական «Սնոհետտա» (Snohetta) ընկերությունը «Եվրոպայի առաջին ստորջրյա ռեստորանը» իրենից կներկայացնի բետոնե տուփը՝ մի մասը ծովափին, մյուս մասը ջրի մեջ մխրճված: Ըստ նախնական տվյալների՝ այս յուրօրինակ ռեստորանն ի վիճակի կլինի սպասարկել մոտ 100 այցելուի, սակայն ազատ ժամանակ այն կիրականցնի իր վրա դրված մյուս գործառույթը՝ գիտականորեն ուսումնասիրել ստորջրյա կյանքը: Ճարտարապետական ընկերությունը ռեստորանի անունը կնքել է «Անդր» (Under), ինչը նորվեգերեն թարգմանելուց հետո շատ նման է «Հրաշք» բառին: Ռեստորանը կկառուցվի Նորվեգիայի հարավային Լինդեսնես (Lindesnes) շրջանի Բոլի (Båly) գյուղում: Կառույցի բետոնե պատերը կունենան 1 մետր հաստություն, որպեսզի կարողանան դիմակայել ծովի ալիքների ճնշմանը: Ռեստորանը կունենա շատ գեղեցիկ ներքին հարդարում, ինչը կմիաձուլվի ծովի ներքին աշխարհին: Ռեստորանի նախասրահը կձևավորվի փայտյա կամարով, որն այցելուներին կտանի դեպի ճաշասրահ: Հիմնական սրահը կներկվի մուգ կապույտ և կանաչ երանգներով՝ ներշնչված ծովի գույներից: Իսկ ահա բարը կներկվի տարբեր գույներով՝ ներշնչված ավազի և ժայռերի երանգներից: Սակայն ռեստորանի հիմնական առավելությունը 11 մետր լայնությամբ հսկայական պատուհանը կլինի, որտեղից այցելուների համար կբացվի ստորջրյա յուրօրինակ աշխարհը: Մինչ այս յուրօրինակ ռեստորանի այցելուները կհիանան ստորջրյա հրաշքներով, կառույցում ներառված փոքրիկ գիտական կենտրոնը հնարավորություն կտա հետազոտողներին ուսումնասիրել ստորջրյա կյանքը, ձկների կենսակերպը տարվա տարբեր եղանակներին, նրանց արձագանքը տարբեր ձայներին և այլն:
