Դուբայը կառուցում է նոր ստորջրյա ընդարձակ ընտանեկան առանձնատներ բոլոր նրանց համար, ովքեր արդեն հոգնել են Դուբայի գրավիչ երկնաքերերից կամ էլ Պալմայի տեսքով կղզիներից: Ստորջրյա առանձնատները կառուցվում են «Աշխարհ» (The World) արհեստական կղզիների վրա: Նախագծի առաջին տները վաճառվել են դեռևս անցած տարի, սակայն ծրագրի կառուցապատողները մի քայլ առաջ են գնացել: Այսօր յուրօրինակ նախագիծը գնորդներին առաջարկում է 372 քառակուսի մետր մակերեսով ընդարձակ ընտանեկան առանձնատներ, որոնք ունենալու են գեղեցիկ ստորջրյա այգի: Ինչպես նշում է Daily Mail պարբերականը, իրենց նախորդներին գերազանցող «The Signature Edition of The Floating Seahorse» առանձնատները եռահարկ են և ունեն 4 ննջասենյակ: Առանձնատան առաջին հարկը ամբողջովին սուզված է ջրի տակ: Այստեղ տեղակայված են գլխավոր ննջասենյակը 80 քառակուսի մետր մակերեսով և 56 քառակուսի մետր մակերեսով ստորջրյա «Մարջանե այգին» իր աննման ծովային տեսարանով: Ըստ նախնական տվյալների՝ «Սանկտ-Պետերբուրգ» կղզում կառուցվող առանձնատների արժեքը տատանվում է 2.8-3.2 մլն ԱՄՆ դոլարի սահմաններում: Նախագծի շրջանաներում կկառուցվի 127 առանձնատուն, իսկ շինարարությունը կավարտվի 2018 թվականին: «Աշխարհ» նախագծի շինարարությունը սկսվել է դեռևս 2003 թվականին: Սակայն 2008 թվականի համաշխարհային ֆինանսական ճգնաժամի ընդհատել է նախագիծը: 2009 թվականին նախագիծը վերակենդանացավ և հայտարարվեց «Եվրոպայի սիրտ» (The Heart of Europe) նախագծի մեկնարկը:

«Փենդա» (Penda) և կանադական «Թմբեր» (Tmber) ընկերությունները յուրօրինակ նախագիծ են մշակել, որն անվանել են «Տորոնտո Թրի Թաուեր» (Toronto Tree Tower), գրում է Dezeen օնլայն պարբերականը: Ըստ նախնական տվյալների՝ 18 հարկանի և 62 մետր բարձրությամբ բնակելի շինությունը կկառուցվի բացառապես խաչաձև սոսնձված փայտանյութից, կառուցման ժամանակ ավանդականի փոխարեն կկիրառվի շինարարության «հավաքովի» մեթոդը և յուրաքանչյուր բնակարանի պատշգամբում կաճի մեկ ծառ: Նախագծի համահեղինակ Քրիս Փրեչթի (Chris Precht) խոսքերով, փայտի տաքուկ և բնական տեսքը, շինության դիմային հատվածում աճող ծառերը կարող են դառնալ էկոլոգիապես մաքուր շինարարության նոր մոդել: «Տորոնտո Թրի Թաուերում» բնակելի մակերեսը կկազմի 4500 քառակուսի մետր, իսկ հանրային տարածքը՝ 550 քառակուսի, որտեղ կտեղակայվեն սրճարան, մանկական և հասարակական սեմինարների սենյակներ: «Փենդա» ընկերությունը իր նախագծերում աշխատում է միշտ յուրօրինակ լուծումներ գտնել՝ ներառելով փայտանյութ և բուսականությամբ պատված ճակատային հատվածներ: Ընկերությունում գտնում են, որ փայտանյութը կարող է դառնալ «դարի հիանալի» շինանյութը և իր հետևում թողնել բետոնն ու ապակին: Փրեչի խոսքերով, մեր քաղաքները կառուցված են պողպատից, բետոնից և ապակուց: Նմանատիպ քաղաքներում փայտանյութից կառուցված և բուսականությամբ պատված շինությունը կարող է յուրօրինակ կոնտրաստ ստեղծել:

Հյուսիսային Կորեայի մայրաքաղաք Փհենյանում սկսել են վերակառուցել «Ռյուգյոն» (Ryugyong) հյուրանոցը, որը համարվում է աշխարհի ամենաբարձր անավարտ շինությունը, գրում է Daily Mail պարբերականը: Շինարարական աշխատանքները սկսվել են մեկ շաբաթ առաջ՝ հուլիսի 27-ին, կորեական պատերազմում կնքված հրադադարի օրվա կապակցությամբ: Քաղաքային իշխանությունները հեռացրել են բարձրահարկը շրջապատող շինարարական ցանկապատը և դեպի երկնաքեր տանող երկու քայլուղի բացել: «Ռյուգյոն» հյուրանոցի շինարարական աշխատանքները սկսվել են դեռևս 1987 թվականին՝ Կիմ Իր Սենի նախագահության տարիներին: Նախատեսված էր հյուրանոցը բացել 1989 թվականին, սակայն 1990-ականների տնտեսական ճգնաժամը բերեց շինարարության երկար տարիների կոնսերվացման: 105 հարկանի և 330 մետր բարձրությամբ հյուրանոցը համարվում է Հյուսիսային Կորեայի ամենաբարձր շինությունը: Հյուրանոցի ընդհանուր մակերեսը կազմում է 300 հազար քառակուսի մետր: Չնայած այն փաստին, որ արտաքինից հյուրանոցը ավարտված շինության տպավորություն է թողնում, անավարտ են ներքին հարդարման աշխատանքները: Բացի այդ ինչպես նշում է Daily Mail պարբերականը, անավարտ շինությունը լուրջ կառուցվածքային խնդիրներ ունի: Կիմ Չեն Ընի նախագահության սկզբից՝ 2011 թվականից, Հյուսիսային Կորեայում շինարարական աշխատանքներ են սկսվել մի շարք անավարտ շինություններում, ներառյալ 70 հարկանի երկնաքերը, միջազգային օդանավակայանը և ատոմի տեսք ունեցող գիտական կենտրոնը: Այդ ժամանակ եգիպտական «Օրասքոմ Տելեկոմ Մեդիա և Թեքնոլոջիս Հոլդինգի» (Orascom Telecom Media & Technology Holding) հետ համագործակցության արդյունքում իրականացվեցին նաև Հյուրանոցի ճակատի ապակեպատման աշխատանքները:

Շվեյցարական Ցերմատ (Zermatt) քաղաքի մոտակայքում բացվել է աշխարհի ամենաերկար՝ հետիոտնային կախովի կամուրջը, որի երկարությունը գրեթե կես կիլոմետր է։ Այն կոչվում է «Եվրոպական» (Europe Bridge) և ձգվում է Գրաբենգուֆեր (Grabengufer) կիրճի վրայով մինչև 85 մետր բարձրության վրա։ Կամուրջը պահող երկու ճոպանների ծանրությունը գրեթե 8 տոննա է, իսկ կամուրջի լայնությունը 65 սանտիմետր։ Ցերմատի զբոսաշրջության խորհուրդը պնդում է, որ դա աշխարհի ամենաերկար հետիոտնային կախովի կամուրջն է, չնայած՝ ոչ ամենաբարձրը։ Ավստրիայում գտնվող Ռոյտեի 405 մետր երկարությամբ կամրջի բարձրությունը 110 մետր է։ Այս կամուրջը կառուցվել է 10 շաբաթվա ընթացքում և փոխարինում է նախկին կամուրջին, որը ավերվել էր ժայռերից քարաթափման հետևանքով:

Չինական «Չայնա Ռեյլվեյ Քոնսթրաքշն Քորփորեյշնը» (China Railway Construction Corporation) և աֆրիկական «Ջեներալ Քոնսթրաքշն օֆ Կասաբլանկա» (The General Construction Company of Casablanca) ընկերությունը պայմանագիր են ստորագրել, որը նախատեսում է Մարոկկոյի մայրաքաղաք Ռաբաթում կառուցել Աֆրիկայի ամենաբարձր երկնաքերը, գրում է Xinhuanet օնլայն պարբերականը: Ըստ նախնական տվյալներ՝ չինական ընկերությունը պարտավորվել է ֆինանսավորել շինարարության 60 տոկոսը, որի բյուջեն կազմում է US$ 380 մլն, իսկ մնացած 40 տոկոսը պետք է ներդնի մարոկկական ընկերությունը: 55 հարկանի երկնաքերի բարձրությունը կկազմի 55 մետր: Այնտեղ կտեղակայվեն գրասենյակներ, հյուրանոցներ և լյուքս դասի բնակարաններ: Նշենք, որ այս շինությունը պետք է դառնա 2014 թվականին երկրի իշխանությունների կողմից ընդունված և 2014-2018 թվականների համար նախատեսված «Ռաբաթ՝ լույսի քաղաք, Մարոկկոյի մշակութային մայրաքաղաք» նախագծի հիմնական մասը: Վերոնշյալ նախագծի շրջանակներում այս երկնաքերից բացի Ռաբաթում նախատեսվում է կառուցել որոշ մշակութային կենտրոններ, այդ թվում՝ թատրոն, մշակույթի տուն, հնէաբանական թանգարան և Մարոկկոյի ազգային արխիվ: Ներկայումս Աֆրիկայի ամենաբարձր շինությունը գտնվում է Յոհաննեսբուրգում: «Քարլթոն Ցենթեր» (Carlton Center) երկնաքերի բարձրությունը կազմում է 225 մետր: Իսկ Մարոկկոյի ամենաբարձր երկնաքերը 115 մետր բարձրությամբ «Կասաբլանկա Թվին Սենթերն» (Casablanca Twin Center) է: