Իրաքի նավթային մայրաքաղաք համարվող Բասրա քաղաքում նախատեսվում է կառուցել աշխարհի ամենաբարձր երկնաքերը, տեղեկացնում է Designboom պարբերականը: «Հարս» (The Bride) անվանումը ստացած երկնաքերը նախագծել է «ԷյԷմԲիԷս Արքիթեքթս» (AMBS Architects) ճարտարապետական ընկերությունը: Ի տարբերություն անապատում տեղակայված հարևան բնակավայրերի, Բասրա քաղաքը կառուցված է Շատ-Էլ-Արաբ գետի ափին բերրի հողերի վրա: Հողատարածքների բարձր բերքատվության և քաղաքի յուրօրինակ ճարտարապետության շնորհիվ Բասրա քաղաքն անվանում են նաև Պարսից ծոցի «հարսնացու»: Ըստ նախնական տվյալների՝ «Հարսնացու երկնաքերը» բաղկացած է լինելու 4 աշտարակներից, որոնք տարբեր հարկերում իրար են միանալու բազմաթիվ կապող հատվածներով: Ինչպես պնդում են նախագծի հեղինակները, նմանատիպ մոտեցումը երկնաքերին բավականին ամրություն կհաղորդի: Բազմաֆունկցիոնալ համալիրի ամենաբարձր երկնաքերը կդառնա հարավային աշտարակը, որի բարձրությունն առանց ալեհավաքի կկազմի 964 մետր: Աշտարակի գագաթին կտեղադրվի նաև 188 մետր բարձրությամբ ալեհավաք, որի օգնությամբ երկնաքերի ընդհանուր բարձրությունը կկազմի 1152 մետր: Արդյունքում աշտարակը կդառնա ամենաբարձրն աշխարհում՝ իր հետևում թողնելով ներկայիս ռեկորդակիր «Բուրջ Խալիֆա» երկնաքերին (828 մետր): Նախատեսվում է, որ 241 հարկանի աշտարակում կտեղակայվի ավելի քան 1.55 մլն քառակուսի մետր մակերեսով անշարժ գույք: Հարավային հատվածում «Հարսնացու երկնաքերը» կծածկվի «հարսանեկան քողով»: Կորացած մետաղական կոնստրուկցիան յուրօրինակ ծածկ կդառնա երկնաքերի ստորոտին կառուցվող փոքրիկ շինությունների համար: «Հարսանեկան քողի» ուղղահայաց մակերեսը կկազմի 79 հազար քառակուսի մետր, իսկ հորիզոնականը՝ 590 հազար քառակուսի մետր: Ըստ նախնական տվյալների՝ «հարսանեկան քողի» տակ կտեղակայվեն ռեստորաններ, այգիներ, հանրային տարածքներ, զբոսուղիներ: Նշենք նաև, որ «հարսանեկան քողը» բաղկացած կլինի հիբրիդային արևային վահանակներից, որոնք ներգրավելով արևի ճառագայթները կվերածեն դրանք ջերմային և էլեկտրական էներգիայի: Ստացված էներգիան կծախսվի երկնաքերի կարիքները հոգալու նպատակով: Նախագծի հեղինակները այս յուրօրինակ համալիրը անվանում են նաև »ուղղահայաց քաղաք»: Բանն այն է, որ բացի հյուրանոցներից, գրասենյակային և բնակելի տարածքներից, երկնաքերում կտեղակայվեն նաև առևտրային և զվարճանքի կենտրոններ, բուսաբանական այգի, ինչպես նաև սեփական երկաթգիծ: Այսօր Բասրայում ապրում է գրեթե 2 մլն մարդ: Այստեղ են գտնվում խոշորագույն նավթաարդյունաբերական, քիմիական և տեքստիլ ընկերությունները: Համաձայն քաղաքի ղեկավարության որդեգրած քաղաքականության՝ Բասրան պետք է ընդլայնվի ոչ թե լայնությամբ, այսինքն՝ նոր տարածքներ ներգրավելով, այլ ուղղահայաց, այսինքն՝ բարձրահարկ շինարարության շնորհիվ: Տարեցտարի աճող բնակչությունը տեղավորելու համար արդեն 2025 թ-ին Բասրայում պետք է շահագործման հանձնվի 1,1 կիլոմետր բարձրությամբ «Հարսնացու երկնաքերը», որն էլ կդառնա քաղաքի գլխավոր այցեքարտը: /a>;

Հանրահայտ «Սագրադա Ֆամիլիա» (Sagrada Familia թարգմ. - Սուրբ Ընտանիքի Եկեղեցի) տաճարի շինարարության ավարտի մոտավոր տարեթիվն արդեն հայտնի է: Ինչպես պնդում է բրիտանական The Independent պարբերականը՝ հղում կատարելով նախագծի ներկայիս ճարտարապետ Ջորդի Ֆաուլին (Jordi Fauli), սուրբ տաճարն ամբողջությամբ պատրաստ կլինի 2030-2032 թթ-ին: Իսկ ահա արդեն 2026 թվականին աշխարհի ամենահայտնի երկար կառուցվող շենքը հավակնում է դառնալ ամենաբարձր եկեղեցին աշխարհում և ամենաբարձր շենքը Բարսելոնայում: Այս յուրօրինակ շենքը կառուցվում է արդեն 1 դարից ավել՝ այն սկսել են կառուցել 1882 թվականին և չեն ավարտել մինչ օրս: Սուրբ տաճարի ներկայիս ճարտարապետը նախատեսում է եկեղեցու մաս կազմող 6 աշտարակների շինարարությունն ավարտել Անտոնիո Գաուդիի մահվան 100 ամյա տարելիցին ընդառաջ, մինչև 2026 թվականի հունիսի 10-ը, իսկ ահա տաճարն ամբողջությամբ պատրաստ կլինի արդեն 2030-2032 թթ-ին: Նշենք, որ դեռևս այս տարվա մարտին Ջորդի Ֆաուլին հայտարարել էր, որ սուրբ տաճարի շինարարության ընթացքում 3D տպիչների ներդրումը հնարավորություն կտա ավելի արագացնել վերջինիս շինարարությունը և հնարավորինս հավատարիմ մնալ Գաուդիի նախնական գծագրերին «Սագրադա Ֆամիլիա» տաճարի կենտրոնական շենքի շուրջը կկառուցվեն 6 աշտարակներ, որոնցից մեկը խորհրդանշելու է Հիսուս Քրիստոսին, մեկը կույս Մարիամին, իսկ մյուս 4-ն էլ առաքյալներին: Ամենաբարձր աշտարակը կլինի Հիսուս Քրիստոսին նվիրվածը, որի բարձրությունը կկազմի 172,5 մետր: Այս աշտարակը հնարավորություն կտա սուրբ տաճարին դառնալ աշխարհի ամենաբարձր եկեղեցին: Այսօր այդ ռեկորդը պատկանում է գերմանական Ուլմ քաղաքում գտնվող «Մյունսթեր» գոթական տաճարին, որի բարձրությունը կազմում է մոտ 161,5 մետր: Վերջինս կառուցվել է 498 տարի՝ 1392-1890 թթ-ին: Ֆաուլիի խոսքերով այսօր «Սագրադա Ֆամիլիա» տաճարն ավարտված է 70 տոկոսով; Նշենք, որ տաճարի շինարարությունը ֆինանսավորվում է զբոսաշրջիկների կողմից վճարված այցեվճարների միջոցով: Տարեկան այս յուրօրինակ եկեղեցի է այցելում ավելի քան 3,2 մլն մարդ, որոնց կողմից վճարված գումարները զգալի մաս են կազմում են տարեկան 28 մլն ԱՄՆ դոլլար բյուջեով շինարարության համար: Նշենք նաև, որ 2005 թվականից «Սագրադա Ֆամիլիան» ներառված է ՅՈՒՆԵՍԿՕ-ի մշակութային ժառանգության ցանկում:

Վիետնամի մայրաքաղաք Հանոյում նախատեսվում է վիետնամական ավանդական ծաղիկ լոտուսի տեսքով նորագույն առևտրային ցուցասրահ կառուցել: Այս յուրօրինակ նախագծի հեղինակը գերմանական «ՋիԷմՓի» (GMP) ճարտարապետական բյուրոն է, որը հաղթել է ծրագրի գլխավոր կառուցապատող «ՎիԱյԷն Գրուփ» (VIN Group) ընկերության կողմից հայտարարված մրցույթում: Ըստ նախնական տվյալների՝ համալիրը կկառուցվի Հանոյից հյուսիս գտնվող 128 հեկտար մակերեսով հողակտորի վրա: 600 հազար քառակուսի մետր մակերեսով շինությունը կգտնվի քաղաքից միջազգային օդանավակայան տանող գլխավոր ավտոմայրուղու հարևանությամբ: Հարավային կողմից համալիրը կտեղակայվի գետի ափին և կգտնվի մի քանի կարևորագույն մայրուղիների հատման կետում; Համալիրը կբաժանվի 8 տարբեր ցուցասրահների, որտեղ կարող են անցկացվել իրարից բոլորովին տարբեր միջոցառումներ: Ի դեպ, միջոցառման մասշտաբայնությունից ելնելով՝ ամբողջ համալիրը կարող է ծառայել ինչպես 1 ամբողջական ցուցասրահ, այնպես էլ որպես առանձին սրահներ: Օղակաձև շինության կենտրոնական բաց տարածությունում նախատեսվում է կառուցել յուրօրինակ այգի անմիջապես ջրի վրա: Այգու տարբեր հատվածներն իրար կմիանան փոքրիկ ցամաքային կամրջակներով: Համալիրի կենտրոնական շինությունը պայմանականորեն կանվանվի «Տերմինալ», քանի որ վերջինս իր նախագծային մտահղացմամբ բավականին մոտ է օդանավակայանի: «Տերմինալ»-ի հարևանությամբ կկառուցվի ևս 2 շինություն, որոնցից յուրաքանչյուրում կտեղակայվեն 6-ական առևտրային տաղավարներ: Համալիրի բոլոր հատվածներն իրար կմիանան փակ քայլուղիներով: Առևտրային համալիրի մուտքի մոտ, աջ և ձախ կողմերում, կկառուցվեն գրասենյակային և հյուրանոցային աշտարակներ, որոնք յուրօրինակ դարպասի դեր կկատարեն համալիրի մուտքի մոտ: Ամբողջական կառույցի շուրջը ևս այգի կկառուցվի:

Ամերիկյան Apple կորպորացիան դեռևս չի հասցրել ավարտին հասցնել իր նոր գլխավոր գրասենյակի շինարարությունը, սակայն արդեն ընտրել է մեկ այլ ամբիցիոզ նախագիծ իր երկրորդ գրասենյակի համար: Ինչպես տեղեկացնում է business Insider պարբերականը, «Սիլիկոնե հովտում» Apple ընկերության երկրորդ յուրօրինակ գլխավոր գրասենյակը կկոչվի «Սենթրալ ենդ Վոլֆ» (Central & Wolfe): Նորագույն գրասենյակային կենտրոնը նախատեսվում է կառուցել Կուպերտինո քաղաքից հյուսիս գտնվող Սեննիվեյլ (Sunnyvale) քաղաքում: Ըստ նախնական տվյալների՝ որպես շինարարության կառուցապատող ընկերություն հանդես կգա «Լենդբենք Ինվեսթմենթս» (Landmark Investments) ընկերությունը, իսկ նախագիծը կիրականացնի ամերիկյան «Էյջ Օ Քեյ» (HOK) ճարտարապետական ընկերությունը: Ինչպես պնդում է Quartz ինտերնետային պարբերականը, Apple ընկերությունը ոչ թե կգնի այս բազմաֆունկցիոնալ համալիրը, այլ վարձակալությամբ կվերցնի այն: Կառուցապատող ընկեկերության հետ պայմանագիրն արդեն կնքված է, սակայն դեռևս անհայտ են շինարարության ժամկետները: Նորագույն բազմաֆունկցիոնալ համալիրը նախատեսվում է կառուցել ԱՄՆ-ի ամենահանգիստ քաղաքներից մեկում՝ 7,3 հեկտար տարածքի վրա: Ըստ նախնական տվյալների՝ Apple ընկերության գլխավոր գրասենյակի շենքը կունենա եռաթերթ ծաղկի տեսք, որի թերթիկները կշրջապատեն 500 հանդիսատեսի համար նախատեսված բացօթյա ամֆիթատրոնը: Ամֆիթատրոնի հարևանությամբ կարող են տեղակայվել սրճարան, մարզասրահ, խորհրդակցությունների սրահ, խանութ-սրահ, վարսավիրանոց, բանկի մասնաճյուղ, քիմմաքրման կետ, լվացքատուն, որոշ մարզական հրապարակներ և անգամ հեծանիվների վերանորոգման կենտրոն: Նախագծի տարբերակիչ առանձնահատկությունը զբոսուղիների և կանաչ տարածությունների հսկայական քանակությունն է; Եթե հաշվի առնվի այն հսկայական այգին, որ պետք է կառուցվի շինության տանիքին, ապա «Սենթրալ ենդ Վոլֆ» համալիրի կանաչ մակերեսը կհասնի 79 տոկոսի, եթե հաշվի չառնվի՝ 53 տոկոսի: Քայլուղիների ընդհանուր երկարությունը կկազմի 3 կիլոմետր, որոնց կեսը կտեղակայվի անմիջապես համալիրի տանիքին: Ըստ նախնական տվյալների՝ համալիրի շենքը կունենա 6 հարկ, որից 2-ը ստորգետնյա՝ նախատեսված ավտոկայանատեղիի համար: Յուրաքանչյուր հարկի բարձրությունը կկազմի 4 մետրից ավելի, իսկ յուրաքանչյուր աշխատատեղի հեռավորությունը պատուհանից կկազմի 14 մետր: Յուրաքանչյուր աշխատակից ամֆիթատրոնի կենտրոնից իր աշխատատեղ կկարողանա հասնել 2,5 րոպեում: Համալիրում գրասենյակային տարածքների ընդհանուր մակերեսը կկազմի 68,7 հազար քառակուսի մետր: Նշենք նաև, որ համալիրը կառուցվելու է «բաց տարածություն» (open space) սկզբունքով, ինչը, ըստ նախագծի հեղինակների, հնարավորություն կտա ավելի սերտացնել շփումն աշխատակիցների միջև և ավելի կհեշտացնի առաջացած խնդիրների լուծումը:

Լոնդոնում պատրատվում են կառուցել թափանցիկ լողավազան, որը կտեղակայվի գետնից 35 մետր բարձրության վրա, տեղեկացնում է The Inhabitat կայքը: Ըստ նախնական տվյալների՝ բաց լողավազանն ամբողջությամբ կկախվի օդում և իրար կմիացնի 2 նորակառույց բարձրահարկերի «Նայն Էլմս» (Nine Elms) թաղամասում: Լողավազանի երկարությունը կկազմի 25 մետր, լայնությունը 5 մետր, իսկ խորությունը 3 մետր: Լողավազանի պատերն ու հատակը կկառուցվի 20 սանտիմետր հաստությամբ ապակուց: Իր տեսակի մեջ առաջին լողավազանը կդառնա Լոնդոնում կառուցվելիք 2000 բնակարան պարունակող «Դեսպանական այգիներ» (Embassy Gardens) բնակելի համալիրի մի մասը: Էլիտար բնակելի համալիրը կկառուցվի Լոնդոնի հարավում գտնվող «Բաթթերսի» թաղամասում, իսկ անմիջապես լողավազանից և համալիրի տանիքից յուրօրինակ տեսարան կբացվի դեպի «Վեսթմինսթերյան պալատ»: Ըստ նախնական տվյալների՝ նախագծի կառուցապատող ընկերությունն է «Բելլիմոր» (Ballymore) անգլիական ընկերությունը, լողավազանի կոնստրուկցիան նախագծել են «Արուփ» (Arup ), «Իքերսլի Օ՛Քալլագան» (Eckerseley O’Callaghan) և «Ռեյնոլդս» (Reynolds) ընկերությունները համատեղ: Բացի լողավազանից այս 2 բնակելի երկնաքերերը իրար կմիանան լողավազանին զուգահեռ քայլուղով: Նշենք, որ այս յուրօրինակ լողավազանի այցելուները կարող են դառնալ միայն «Դեսպանական այգիներ» համալիրի բնակիչները, իսկ այդ համալիրում անշարժ գույք հնարավոր կլինի ձեռք բերել նվազագույնը 944 հազար ԱՄՆ դոլարով: Լողավազանի և բնակելի համալիրի շինարարության ավարտը նախատեսված է 2017 թվականին: