Այս ամենը կարող է հնչել որպես ապրիլմեկյան կատակ, սակայն Չինաստանը պատրաստվում է արագընթաց երկաթուղի կառուցել Չինաստանից դեպի ԱՄՆ: Մի շարք ԶԼՄ-ների տվյալներով, Չինաստանը պատրաստվում է կառուցել 12870 կիլոմետր երկարությամբ արագընթաց երկաթգիծ: Սա իհարկե իրական է հնչում: Անհավանականն ու զարմանալին այն է, որ այս երկաթգիծը, իր մեջ ներառելով 200 կիլոմետր երկարությամբ ստորջրյա թունել Բերինգի նեղուցի հատվածում, պետք է իրար միացնի Չինաստանը, Ռուսաստանը, Ամերիկան և Կանադան: Ինչպես հաղորդում է չինական կառավարական Beijing Times պարբերականը, Ռուսաստանը պատրաստ է միանալ այս նախագծին: Չնայած այն բանին, որ բավականին հաճելի է հնչում այն հնարավոր տարբերակը, որ կարելի է 2 օրում Չինաստանից հասնել ԱՄՆ առանց օդանավակայաններում երկար սպասումների, ամբողջ աշխարհի ճարտարագետները թերահավատորեն են տրամադրված նախագծի իրականացմանը: Ինչպես նշում է Չինաստանի Ճարտարագիտական ակադեմիայի անդամներից մեկը, Չինաստանն ուսումնասիրում է այնպիսի երթուղի, որը կսկսվի երկրի հյուսիս-արևելյան շրջանից, կանցնի արևելյան Սիբիրով, այնուհետև Ալյասկայի հատվածում 200 կիլոմետր երկարությամբ ստորջրյա թունելով կհատի Բերինգի նեղուցը: Ամեն ինչ հավանական է հնչում մինչև համեմատությունը. վերոնշյալ թունելը քառակի անգամ երկար է «Եվրոթունելից» (The Eurotunnel), որի երկարությունը կազմում է 51 կիլոմետր, իսկ Ճապոնիայում գտնվող ներկայիս տիտղոսակիր աշխարհի ամենաերկար ստորջրյա «Սեյկան» թունելի (Seikan Tunnel) երկարությունը կազմում է 53,85 կիլոմետր, որի ստորջրյա հատվածը կազմում է 23.3 կիլոմետր: Ինչպես նշում է The Guardian պարբերականը, վերոնշյալ 2 թունելներն էլ համարվում է յուրօրինակ սխրանքներ տեխնիկայի ոլորտում, և 2 շինարարության մեջ էլ աշխարհի 4 կարևոր կառավարությունները մասնակցություն չեն ունեցել, իսկ նրանցից 2-ը, մեղմ ասած, իրար բոլորովին չեն համակրում: Նշենք նաև, որ չինական կառավարական Beijing Times պարբերականը նշում է միայն Ռուսաստանի մասնակցության պատրաստակամության մասին, այն ինչ մյուս 2 պետությունների դիրքորոշումները անհայտ են: Ինչպես նշում է մեկ այլ հեղինակավոր պարբերական The Washington Post-ը, չնայած այսօր մենք կասկածում ենք այս նախագծի իրականություն դառնալու շուրջ, այնուամենայնիվ արդարության համար պետք է նշել, որ Չինաստանը այն միակ երկիրն է, որն ի վիճակի է նմանատիպ նախագիծ իրականացնել: Նշենք, որ վերջին 5 տարիների ընթացքում Չինաստանը տասնյակ հազարավոր կիլոմետրեր արագընթաց երկաթգծեր և բազմաթիվ եզակի տրանսպորտային կառույցներ է կառուցել:

Ինչպես բոլորս գիտենք, Չինաստանն ամբողջ աշխարհում հայտնի է իր «ճարտարապետական կրկնօրինակներով»: Իսկ դրանցից վերջինն այնպես է զայրացրել Եգիպտոսի իշխանություններին, որ վերջիններս դիմել են ՅՈՒՆԵՍԿՕ-ին` ստիպել Չինաստանին կանգ առնել: Արդյունքում Չինաստանը պարտավորվել է ապամոնտաժել կեղծ Սֆինքսը, որն ավելի մեծ է բնօրինակից: Կեղծ Սֆինքսը կառուցվել է Չինաստանի հյուսիսային Հեբեյ (Hebei) արվարձանում գտնվող Շիցզյաչժուան (Shijiazhuang) մշակութային այգում: 30 մետր բարձրությամբ և 80 մետր երկարությամբ Սֆինքսը կառուցվել է ընդամենը մի քանի ամսում ամրանավորված ցեմենտից: Ինչպես պնդում է այգու ներկայացուցիչը, Սֆինքս կառուցվել է միայն որպես կինոֆիլմում նկարահանման դեկոր, և ցանկացած դեպքում այն պիտի ապամոնտաժվեր: Մշտական կամ ժամանակավոր, այնուամենայնիվ, Սֆինքսի կրկնօրինակը զբոսաշրջիկների մեծ խմբեր է հավաքում: Եգիպտոսի հնագիտության հարցերով նախարար Մուհամեդ Իբրահիմը պնդում է, որ Սֆինքսի կրկնօրինակը հակասում է 1972 թ-ին ընդունված ՅՈՒՆԵՍԿՕ-ի կոնվենցիաին, իսկ ահա մշակութային այգու ներկայացուցիչը հակասում է, շեշտելով, որ Սֆինքսի կրկնօրինակը չի օգտագործվել կոմերցիոն նպատակներով, այցելուներից որևէ գումար չի գանձվել, և իրենք մտադիր չեն վերջինս օգտագործել` որպես տեսարժան վայր: Ի դեպ, այգու տնօրինությունը համաձայն է ապամոնտաժել կեղծ Սֆինքսը: Չինաստանը վաղուց հայտնի է իր «ճարտարապետական կրկնօրինակներով»: Չինաստանում կա կրկնօրինակված Էյֆելյան Աշտարակ, Վենետիկ քաղաք, Սպիտակ տուն, Մոսկովյան Կրեմլ, ավստրիական լեռնային գյուղ և անգամ դեռևս չկառուցված, ճարտարապետ Զահա Հադիդի նախագծած «Վանջին Սոհո» (Wangjing Soho) համալիրի կրկնօրինակը: Այս տարվա հունվարին հայտնի դարձավ, որ Պեկինի Մենթոուգոու (Mentougou) շրջանում կառուցվել է 4 գրասենյակային շինություններից բաղկացած համալիր, որը նման է մոսկովյան Կրեմլի հանրահայտ եկեղեցիներից մեկին (Благовещенский собор): Տեղական ԶԼՄ-ների փոխանցմամբ յուրօրինակ գմբեթներով շենքը կառուցվել է տեղական կառավարման մարմինների համար: Ըստ նախնական տվյալների` այնտեղ տեղակայվել են շրջանի սեյսմոլոգիական բյուրոն, ջրային ռեսուրսների վարչությունը, լանդշաֆտային և անտառտնտեսության բյուրոն, ինչպես նաև տեղական օդերևութաբանական ծառայությունը: Դեռևս 2007 թ-ին չինացի ճարտարապետները կառուցել են ֆրանսիական մայրաքաղաքի իրենց սեփական տարբերակը, որտեղ գտնվում են 108 մետր բարձրությամբ Էյֆելյան աշտարակը, Վերսալի պալատի այգու հայտնի շատրվանը: Ի դեպ Տիանդուչեն (Tianducheng) փակ համայնքում հայտնի շենքերը կառուցված են փարիզյան ոճով և շրջապատված են եվրոպական առանձնատներով: 2011 թ-ին Չինաստանը որոշեց կրկնօրինակել մի ամբողջ գյուղ: «Մինմեթալս Քորփորեյշն» (Minmetals Corporation) ընկերությունը Գուանդուն (Guangdong) նահանգում գտնվող Հույչժոու (Huizhou) քաղաքից դուրս կառուցեց նույնպես ՅՈՒՆԵՍԿՕ-ի պաշտպանության տակ գտնվող ավստրիական հանրահայտ «Հալստատ» (Hallstatt) լեռնային գյուղի կրկնօրինակը: Նշենք, որ նախագծի ընդհանուր բյուջեն կամել է 940 ԱՄՆ միլիոն դոլար: Ներկայացնենք մեկ այլ հետաքրքիր նախագիծ ևս: Երբ 2011 թ-ին ճարտարապետ Զահա Հադիդը ներկայացրեց իր «Վանջին Սոհո» համալիրի նախագիծը, աշխարհի բոլոր ճարտարապետները իրենց բարձր գնահատականը տվեցին դրան: Սակայն նոր համալիրի նախագիծն այնքան գայթակղիչ էր, որ չինական մեկ այլ կառուցապատող ընկերություն որոշեց կրկօրինակել դեռևս չկառուցված մի համալիր: Վերոնշյալ նախագծի կրկնօրինակը ստացավ «Մեյքուն 22-րդ Սենչըրի» (Meiquan 22nd Century) անվանումը, իսկ այսօր կառուցապատող 2 ընկերություններն էլ շտապում են առաջինն ավարտել իրենց նախագծերի շինարարությունը: Նշենք, որ համալիրի բնօրինակը բաղկացած է 3 կոպիճի տեսքով կորագիծ շինություններից, իսկ կրկնօրինակը` երկու:

Չինաստանը շարունակում է համաշխարհային հանրությանը զարմացնել ճարտարապետական իր յուրօրինակ փորձերով: «Ոսկե փքաբլիթ» հիշեցնող 138 մետր բարձրությամբ «Գուանչժոյի շրջանակ» անվանումը կրող գրասենյակային երկնաքերի շինարարությունը ավարտվել է այս ամիս: Քաղաքի Մարգարտե (Չժուցյան) գետի ափին կառուցված երկնաքերում տեղակայվել են Hongda Xingye Group քիմիական ընկերությունը և Guangdong Plastic Exchange համաշխարհային ապրանքային բորսան, որտեղ իրականացվում է պլաստմասայի առևտուր: Նախագծի հեղինակների առջև լուրջ խնդիր էր դրված` կառուցել ոչ թե ավանդական երկնաքեր, այլ այնպիսի գրասենյակային համալիր, որը կբնորոշեր չինացիներին: Արդյունքում նախագծի ճարտարապետները ստեղծեցին այնպիսի համալիր, որը ներկայացնում է չինական մեծահոգությունը խորհրդանշող «Նեֆրիտե բի-սկավառակը»: Վերջինս խորհրդանշում է հանրության մեջ անհատի բարձր դիրքը, նրա բարոյական անթերիությունը և կապը նախնիների հետ: Բացի այդ «Նեֆրիտե բի-սկավառակը» եղել է դեռևս 2000 տարի առաջ տվյալ շրջանում թագավորած դինաստիայի խորհրդանիշը: Նշենք նաև, որ սա կառույցի արտաքին տեսքի միակ բացատրությունը չէ: Բանն այն է, որ երկնաքերն արտացոլվելով Մարգարտե գետի ջրերի մեջ ստեղծում է անվերջության նշանի, ինչպես նաև 8 թվանշանի պատկեր, որը Չինաստանում համարվում է երջանիկ թիվ: Պատահական չէ, որ 2008 թ-ին Պեկինում կայացած Օլիմպիական խաղերի ժամանակ մեդալների վրա փորագրված էր փոքրիկ «Նեֆրիտե բի-դիսկ», իսկ բացման արարողությունն անմիջական կապ ուներ 8 թվի հետ, մասնավորապես` Պեկինի Օլիմպիական խաղերի բացման արարողությունը սկսվեց 08.08.2008 թ-ի ժամը 8:08-ին: Գուանչժոու քաղաքում կառուցված յուրօրինակ գրասենյակային համալիրի նախագիծը հաղթել է 2009 թ-ի միջազգային ճարտարապետական մրցույթում Միլանում գտնվող «ԷյԷմ Փրոջեքթ» ճարտարապետական բյուրոն՝ ղեկավար իտալացի Ջոզեֆ դի Պասկուալեյի գլխավորությամբ: 138 մետր բարձրությամբ աշտարակի ընդհանուր մակերեսը կազմում է 85 հազար քառակուսի մետր: «Ոսկե փքաբլիթը» Գուանչժոույի և Չինաստանի մյուս երկնաքերերից տարբերվում է ոչ թե նախագծով, այլ արտաքին տեսքով: Չէ որ այն իրենից ներկայացնում է մեջտեղում 50 մետր տրամագծով անցքով հսկա շրջանակ:

Պեկինի Մենթոուգոու շրջանում կառուցվել է 4 գրասենյակային շինություններից բաղկացած համալիր, որը նման է մոսկովյան Կրեմլի հանրահայտ եկեղեցիներից մեկին (Благовещенский собор): Տեղական ԶԼՄ-ների փոխանցմամբ յուրօրինակ գմբեթներով շենքը կառուցվել է տեղական կառավարման մարմինների համար: Ըստ նախնական տվյալների` այնտեղ կտեղակայվեն շրջանի սեյսմոլոգիական բյուրոն, ջրային ռեսուրսների վարչությունը, լանդշաֆտային և անտառտնտեսության բյուրոն, ինչպես նաև տեղական օդերևութաբանական ծառայությունը: Նշենք, որ վերջինս արդեն տեղափոխվել է իրեն հատկացված նոր շենք, իսկ մյուս պետական ծառայությունների տեղափոխությունը նախատեսված է 2014 թ-ի սկզբին: Նշենք, որ տեղական ԶԼՄ-ները ոչ մի կերպ չեն մանրամասնում` ինչու է չինական պետական ծառայությունների գրասենյակային համալիրը կառուցվել ռուսական ճարտարապետության ոճով: Միայն նշվում է, որ գրասենյակներից մեկի բյուջեն կազմել է 3.5 մլն ԱՄՆ դոլար, մյուսինը` ավելի քան 1.5 մլն ԱՄՆ դոլար, իսկ մյուս երկուսինը չի հայտարարվում: Ի դեպ, Չինաստանում սա առաջին դեպքը չէ, երբ պետության կամ գործարարների կողմից կառուցվում են աշխարհում գոյություն ունեցող ճարտարապետական գլուխգործոցների թանկարժեք նմանակներ: Չինաստանում կան նմանատիպ տասնյակ կրկնօրինակներ՝ մասնավորապես, Ֆույան նահանգի իշխանությունները կառուցել են Վաշինգտոնի Կապիտոլիումի կրկնօրինակը, Սպիտակ տան կրկնօրինակը կառուցվել է Խանչժոու քաղաքում, Նոտր Դամ Դյու Օ-ի նմանակը կառուցվել է Չժենչժոում և այլն: Նշենք նաև, որ այս բնագավառում չինացիներն ավելին են գնացել և սկսել են կրկնօրինակել անգամ հանրահայտ քաղաքների ամբողջական թաղամասեր: Չինաստանի կառավարության կողմից թանկարժեք պետական շինությունների կառուցման արգելանք է սահմանվել այն պահից հետո, երբ պետությանը պատկանող դեղագործական Harbin Pharmaceutical Group կորպորացիան իր գրասենյակի ներքին հարդարման աշխատանքներն իրականացրեց Վերսալյան պալատի ոճով:

Չինաստանի Շանսի նահանգի Սիան քաղաքի իշխանությունների անուշադրության հետևանքով բնակելի շենքը հայտնվել է նորակառույց մայրուղու տարածքում: Բազմաբնակարան շենքը կառուցվել է բնակիչներին մեկ այլ շրջանից տեղափոխելու նպատակով, որտեղ նախատեսված էր այգի կառուցել: Վերաբնակեցումից մի քանի ամիս անց պարզ է դառնում, որ քաղաքային իշխանությունները ճանապարհային ծանրաբեռնվածությունը թեթևացնելու նպատակով պլանավորել են այս տարածքով ավտոմայրուղի կառուցել: Հենց այդ ժամանակ էլ պարզվում է, որ իշխանությունները կառուցապատող ընկերությանը թույլ են տվել կառուցել շենքի մեկ ավելորդ հատված: Արդյունքում ստացվել է այնպես, որ շենքը զբաղեցնում է մայրուղու երթևեկելի 8 գծերից 4-ը: Շենքի բնակիչները դժգոհ են նմանատիպ հարևանությունից, սակայն կրկին տեղափոխվել համաձայն են միայն խոշոր փոխհատուցման պարագայում: Քաղաքային իշխանությունները հաշվարկել և եկել են այն եզրակացության, որ բնակիչներին տեղափոխելը և շենքն ապամոնտաժելը բավականին թանկ է, ուստի որոշել են ամեն ինչ թողնել այնպես, ինչպես կա: Չինաստանում շատ են հանդիպում նմանատիպ շինարարական պատահարներ: Մասնավորապես, 2012 թ-ի դեկտեմբերին նույն Շանսի նահանգում բարձրահարկ թաղամասի շինարարությունը որոշ առումով ներգրավեց տեղական գերեզմանատան մի հատվածը: Հանգուցյալներից մեկի հարազատները, մատնանշելով առաջարկված ցածր փոխհատուցումը, հրաժարվեցին վերահուղարկավորել մարմինը: Արդյունքում շինարարական աշխատանքերը ծավալվեցին հողե հսկա բլրի շուրջը, որտեղ թաղված էր հանգուցյալը: Կրկին անցած տարի չինական Վենլինգ քաղաքում ընտանեկան զույգը հրաժարվեց լքել իրենց կիսաքանդ տունը, որը նախատեսվում էր ապամոնտաժել նոր մայրուղի կառուցելու համար: Նրանց հնարավոր եղավ համոզել միայն մայրուղու կառուցման ավարտին, երբ փոխհատուցման գումարը 35.3 հազար ԱՄՆ դոլարից բարձրացավ մինչև 41.8 հազար: Շինարարների կամ տեղական իշխանությունների անուշադրության հետևանքով նմանատիպ դեպքեր գրանցվում են ամբողջ աշխարհում: Վերջերս իսպանական մի ընկերություն կառուցել էր 47 հարկանի երկնաքեր և «պատահաբար» մոռացել էր վերելակի մասին :