Լոնդոնի «Քինգս Քրոսս» (King’s Cross) պատմական երկաթգծային կայարանում ավարտվել են հինգ տարի տևած վերականգնողական աշխատանքները, իսկ կայարանի բացման հանդիսավոր արարողությունը նախատեսված է մարտի 19-ին, տեղեկացնում է The Inhabitat կայքը: Վերականգնողական աշխատանքների նախագիծն իրականացրել են «Ջոն ՄաքԱսլան և Գործընկերներ» (John McAslan + Partners) ճարտարապետական գրասենյակի մասնագետները 3 մասով՝ կառույցների կրկնակի օգտագործում, վերականգնում և նոր շինարարություն: Տանիքները և որոշ շինություններ վերանորոգվել են և կրկին կօգտագործվել, կայարանի պատմական նշանակության շենքի ճակատը զգուշորեն և մանրակրկիտ վերանորոգվել է, իսկ ահա կայարանի արևմտյան մասում նոր տանիք է կառուցվել: Արևմտյան մասը ծածկում է 150 մետր թռիչքով ապակեպատ տանիքը, որն այս տարածքը լցնում է բնական լույսով: Բացի վերոնշյալը, 784 մլն ԱՄՆ դոլար արժողությամբ վերականգնողական ծրագրի ընթացքում բարելավվել են ուղևորների երթևեկության պայմանները, տեղադրվել են արևային ֆոտովոլտաիկ համակարգեր, ինչպես նաև երկաթգծային հարթակներում նոր լուսավորություն է տեղադրվել: Նշենք նաև, որ վերանորոգման աշխատանքներում ներգրավվել են 5 հազար մարդ, օգտագործվել է մոտ հազար տոննա պողպատ, 1 մլն հատուկ պատրաստված «պատմական» աղյուսներ և 5 մլն կերամիկական սալիկներ, 5 մլն մետր երկարությամբ լարեր: Քանի որ կայարանի շենքն ընդգրկված է առաջին մակարդակի պատմական շինությունների ցանկում, ապա վերականգնման ժամանակ մասնագետները պարտավոր էին աշխատանքները կազմակերպել այնպես, որ կայարանի ճակատը անփոփոխ մնար: Վերանորոգումն իրականացվել է մանրակրկիթ և բարձր մակարդակով, կառույցի դիմային հատվածը մնացել է անփոփոխ, զուգահեռ բացվել են ուղևորների և երկաթգծային աշխատողների համար նոր սրահներ, գրասենյակներ, ինչպես նաև սրճարաններ, բարեր ու առևտրային կենտրոններ: Մարտի 19-ի բացման հանդիսավոր արարողությունից հետո նորակառույց ապակեպատ տարածքը կդառնա կայարանի «սիրտը»: Այս տանիքը, որը գտնվում է պատմական ճակատի կողքին, երբեմնի գորշ ու մռայլ կայարանը վերածում է լուսավոր և երկար սպասված այցելության վայրի: Նշենք, որ «Քինգս Քրոսս» երկաթգծային կայարանը կառուցվել է 1852 թ-ին Լոնդոնի կենտրոնական հատվածի հյուսիսային մասում և անվանել ի պատիվ Լոնդոնի Քինգս Քրոսս շրջանի: Կայարանի կառուցման նախագիծն առաջին անգամ ներկայացվել է 1848 թ-ի դեկտեմբերի, իսկ վերջնական նախագիծը մշակել է ճարտարապետ Լյուիս Քյուբիթթը (Lewis Cubitt):

Նոյեմբերի 22-ին Վրաստանի Քութայիս քաղաքում սկսվել է նոր օդանավակայանի շինարարությունը: Օդանավակայանը, որը նախագծել է ՅուԲիՍթուդիո (UBStudio) ընկերությունը, իր մեջ ներառելու է ուղևորական տերմինալ, 55 մետր բարձրությամբ աշտարակ, գրանցման սենյակ, մաքսային և անձնագրային հսկողության սենյակներ, սպասասրահներ, բար, սրճարան և այլն: Ըստ նախնական տվյալների՝ նոր օդանավակայանի շինարարությունը կավարտվի հաջորդ տարվա սեպտեմբերին: Ինչպես տեղեկացնում է Inhabitat կայքը, արտաքինից նոր օդանավակայանի շենքը նախագծված է որպես 4 անկյուն ունեցող տաղավար՝ գունավոր, անփայլ ներդիրներով: Օդանավակայանի տանիքն այնպիսի թեքություն ունի, որը շենքը պաշտպանում է արևի ճառագայթներից: Հեղինակները մտադիր են ներդնել նաև օգտագործված ջրերի հետագա օգտագործման համակարգը և հիբրիդային ռեսուրսախնայող օդափոխությունը: Ինչպես նաև կօգտագործվի բետոնի ակտիվացում (concrete core activation) մեխանիզմը, այսինքն՝ բետոնե պատերի և հատակի մեջ կտեղադրվեն խողովակներ, որոնց միջով կհոսի տաք, կամ սառը ջուրը, կառույցը համապատասխանաբար հովացնելու կամ տաքացնելու նպատակով: Իսկ աղետի ժամանակ, ջուրը կմատակարարվի Քութայիսի տարածքում գտնվող բնական աղբյուրից: Նշենք, որ դեռևս այս տարվա նոյեմբերին Հայաստան կատարած պաշտոնական այցի ժամանակ, Վրաստանի էկոնոմիկայի և կայուն զարգացման նախարար Վերա Կոբալիան հայտարարել էր, որ իրենք անպայման կօգտագործեն հայ ճարտարագետների և շինարարների փորձը Քութայիսի օդանավակայանը կառուցելիս:

Երկար վեճերից և հետաձգումներից հետո Թել Ավիվում սկսվել է հանրային տրանսպորտային ցանցի շինարարությունը, տեղեկացնում է Constructiondigital կայքը: Լայթ Ռեյլ (Light Rail) նախագծի բյուջեն կկազմի 2.5 մլն ԱՄՆ դոլար, իսկ շինարարությունը, ըստ նախնական տվյալների, կավարտվի 2017 թ-ին: Դեռևս 2006 թ-ին նախագիծն իրականացնելու նպատակով Իսրաելում արտասահմանյան և տեղական կապալառուների կոնսորցիում էր ստեղծվել, սակայն 2010-ին ծրագիրը հետաձգվել էր: Այսօր վերսկսվել է նախագծի իրականացումը: Շինարարներն արդեն աշխատում են ծրագրի Կարմիր գծի 25 մետր խորությամբ թունելի վրա: Ըստ նախնական տվյալների՝ Կարմիր գիծը կունենա 23 կիլոմետր երկարություն, կսկսվի Թել Ավիվի հյուսիսային Պետահ Տիկվա (Petah Tikya) արվարձանից, կանցնի քաղաքի կենտրոնով և կհասնի հարավային Բատ Յամ (Bat Yam) արվարձան: Նախագծի 22 ենթադրյալ կայարաններից 10-ը կլինեն ստորգետնյա: Թել Ավիվը Իսրաելի երկրորդ խոշորագույն քաղաքն է՝ 3.3 մլն բնակչությամբ: Շինարարության ավարտից հետո Լայթ Ռեյլ նախագիծը կդառնա երկրի խոշորագույն և ամենաթանկ հասարակական տրանսպորտային ցանցը:

Ինչպես տեղեկացնում է constructiondigital կայքը, հղում կատարելով պաշտոնական աղբյուրներին, 6.08 մլրդ ԱՄՆ դոլար արժողությամբ Աբու Դաբի միջազգային օդանավակայանի (Abu Dhabi International Airport (ADIA)) նոր տերմինալի շինարարությունը կսկսվի 2012 թ-ին: Չնայած համաշխարհային տնտեսական ճգնաժամին՝ Միացյալ Արաբական Էմիրություններում շարունակում են իրականացնել բազմաթիվ շինարարական նախագծեր: Այսպես՝ 2012 թ-ին նախատեսվում է սկսել Աբու Դաբի միջազգային օդանավակայանի՝ 650 հազար քառակուսի մետր ընդհանուր մակերեսով նոր տերմինալի շինարարությունը: Ըստ նախնական տվյալների՝ նոր տերմինալը շահագործման կհանձնվի 2017 թ-ին և կսպասարկի ավելի քան 30 մլն ուղևոր: Օդանավակայանի ղեկավարությունը շինարարությունն իրականացնելու համար ստացել է 6 դիմում- հայտ աշխարհի տարբեր երկրներից, այդ թվում՝ Գերմանիայից, Հարավային Աֆրիկայից և ԱՄՆ-ից: Շինարարության իրականացման վերջնական պայմանագիրը կստորագրվի 2012 թ-նի առաջին եռամսյակում: Ըստ նախանական տվյալների՝ նոր տեմինալի հսկա շենքը կունենա աշխարհի ամենաերկար ծածկող կամարները, որոնց բարձրությունը կհասնի 52 մետրի: Նոր տերմինալում կլինի նաև շքեղ հյուրանոց, սպա-կենտրոն, ռեստորաններ, բարեր և 20-25 հազար քառակուսի մետր մակերեսով առևտրային կենտրոններ: Այս կառույցները կգտնվեն 8.4 հազար քառակուսի մետր մակերեսով, միջերկրական և անապատային բնաշխարհով, փակ այգու շրջակայքում: Ինչպես տեղեկացնում է օդանավակայանի պաշտոնական կայքը, նախապատրաստական աշխատանքները սկսվել են դեռևս 2009 թ-ի փետրվարի, իսկ շինարարության իրականացման նպատակով մրցույթ է հայտարարվել այս տարվա հունվարին: Աբու Դաբի միջազգային օդանավակայանն իր առաջին չվերթն իրականացրել է 1982 թ-ին: Այն գտնվում է մայրաքաղաքի կենտրոնից 30 կիլոմետր հեռավորության վրա, որտեղ գտնվում է Էթիադ Էյրվեյս (Etihad Airways) ընկերության գլխավոր գրասենյակը:

Պեկինում սկսվել է նոր հսկա օդանավակայանի շինարարությունը, որն իր մակերեսով հավասար կլինի Բերմուդյան կղզիներին և կունենա 9 թռիչքուղի, տեղեկացնում է The Telegraph-ը: Նոր օդանավակայանը կանվանվի «Պեկին-Դեքսինգ միջազգային օդանավակայան» (Beijing Daxing International airport), և շինարարության ավարտից հետո՝ 2015 թ-ին, օրեկան կսպասարկի մոտ 370 հազար ուղևոր Չինաստանի մայրաքաղաքը դարձնելով աշխարհի ամենածանրաբեռնված ավիացիոն հանգույցը: Համեմատության համար նշենք, որ Երևանի նորաբաց Զվարթնոց օդանավակայանի ուղևորափոխադրման հնարավորությունը մոտ 40 անգամ պակաս է այս Չինական հսկայի հնարավորություններից: Դեռևս 3 տարի առաջ Պեկինում բացվեց Սեր Նորման Ֆոսթերի նախագծված Մայրաքաղաքային օդանավակայանի (Beijing Capital Airport) 3-րդ տերմինալը, որն իր մակերեսով ավելի մեծ է, քան Լոնդոնի Հիթրոու (Heathrow) օդանավակայանի 5 տերմինալները միասին: Սակայն երկրի ավիացիոն ուղեվորափոխադրումների բումը դարձրեց Չինաստանի ներկայիս օդային ենթակառուցվածքները չափազանց հագեցած: Գոյություն ունեցող Մայրաքաղաքային օդանավակայանը ի վիճակի է տարեկան սպասարկել 75 մլն ուղևոր: Ի դեպ, անցած տարի օդանավակայանի ուղևորահոսքը կազմել է 73 մլն, և, մասնագետների կարծիքով, 2 տարի անց օդանավակայանն այլևս ի վիճակի չի լինի սպասարկել աճող ուղևորահոսքը: Ինչպես նշում է երկրի Քաղաքացիական ավիացիայի նախարար Լի Ջիքսինգը, «Մայրաքաղաքային օդանավակայանի թռիչքացուցակն այնքան հագեցած է, որ անհրաժեշտության դեպքում անհնար է որևէ նոր թռիչք ավելացնել»: Հաշվի առնելով բոլոր խնդիրները` Չինաստանում որոշեցին նոր օդանավակայան կառուցել 54 քառակուսի կիլոմետր տարածքի վրա, որը գտնվում է Պեկինի Դեքսինգ (Daxing)՝ արվարձանում, (և կպահանջվի 1 ժամ մայրաքաղաք հասնելու համար:) մայրաքաղաքից 1 ժամ հեռավորության վրա: Նախատեսվում է օդանավակայանի շինարարությունից հետո դեպի մայրաքաղաք ընդլայնել ինչպես մետրոպոլիտենը, այնպես էլ կառուցել նոր արագընթաց երկաթգիծ: Նոր օդանավակայանը կսպասարկի ոչ միայն Պեկինը, այլև Տիանջինը (Tianjin) և Հեբեյի մի մասը (Hebei): Ըստ նախնական տվյալների՝ Պեկին-Դեքսինգ օդանավակայանը կունենա 9 թռիչքուղի, որոնցից 8-ը կունենան քաղաքացիական նշանակություն, իսկ 1-ը ռազմական: Պետք է նշել, որ օդանավակայանը կառուցվում է այնպիսի վայրում, որը նոսր է բնակեցված, չկան շատ շինություններ և, անհրաժեշտության դեպքում, հնարավոր է ընդլայնել այն՝ կառուցելով հավելյալ թռիչքուղիներ: