Հինգ ամիս տևած շինարարական աշխատանքների արդյունքում ավարտվել է Ծիծեռնակաբերդի խճուղու վերակառուցման առաջին փուլը: Աշխատանքները իրականացվել են «Շինֆորում» շինարարական կազմակերպության կողմից, սկսվել էին հունիսի 12-ին և նախատեսված էր ավարտել հոկտեմբերի 15-ին: Նախկին երկկողմանի միագոտի երթևեկության փոխարեն երկկողմանի երկգոտի երթևեկություն է ապահովվել, ճանապարհը լայնացել է գրեթե հինգ մետրով և համալրվել ջրահեռացման ու լուսավորության նոր համակարգերով, ինչի բացակայությունը հաճախ լուրջ խնդիրների պատճառ էր հանդիսանում նախկինում: Վերակառուցվել են նաև մայթերը, և այժմ հետիոտները կարող են օգտվել 1.5 մետր լայնությամբ մայթերց։ Վերակառուցման առաջին փուլին զուգահեռ իրականացվում են նաև երկրորդ փուլի շինարարական աշխատանքները, և խճուղու միջնամասում կառուցվում է նոր էստակադա, ինչը հնարավորություն կտա վարորդներին առանց լուսանշանի շրջադարձ կատարել: Այդ պատճառով ճանապարհի միջին հատվածը չի վերանորոգվել, և այնտեղ բացակայում են մայթերը և նոր ասֆալտը: Նշենք նաև, որ նոր ասֆալտի հիմք հիմնականում ծառայել է հին ճանապարհային ծածկը, ինչը կարող է հետագայում ճանապարհի դեֆորմացիայի խնդիրների հանգեցնել: Ծիծեռնակաբերդի խճուղու վերակառուցման համար Երևանի բյուջեից հատկացվել է մոտ 1 մլրդ 500 մլն դրամ, որից 866 մլն դրամը նախատեսված է երկրորդ փուլի շինարարական աշխատանքների իրականացման համար: Նշենք նաև, որ վերջերս բացվել է Գարեգին Նժդեհ փողոցում գտնվող ուղեկամուրջը (ինչպես ժողովուրդն է ասում՝ «Վստրեչի կամուրջ»), որի շինարարական աշխատանքներն իրականացրել է Գրիար ՓԲԸ-ն: Աշխատանքները երկարաձգվել են կամուրջի վիճակի մասին նախապես սխալ գնահատականի պատճառով և համաատասխան փոփոխություններով նախագծա-նախահաշվային փաստաթղթերում ու աշխատանքների ծավալներում:

Երևանի Կոմիտասի անվան պանթեոնում շուտով կբացվի առաջին՝ «Նեմո» անվամբ դելֆինարիան: Շինարարական աշխատանքներն իրականացնում է ուկրաինական «Ներում» կազմակերպությունը: Ինչպես նշում է կազմակերպության տնօրեն Ալեքսանդր Մերլյանը, շինությունն ամբողջովին պատրաստվելու է մետաղակոնստրուկցիաներից, ինչը հնարավորություն է տալիս շատ արագ հավաքել կառույցը և դելֆինարիան արդեն երկու ամսից պատրաստ կլինի: Այն կհամալրվի չորս ուրախ դելֆիններով, մեկ ծովառյուծով և երկու ծովային կատուներով և իր հարկի տակ պատրաստ կլինի ընդունել մոտ 900 այցելու: Դելֆինարիայի շինարարությունը այգու վերականգման ծրագրի մի մաս է կազմում, որը նախաձեռնել է Երևանի քաղաքապետարանը: Նշենք նաև, որ ծրագրի շրջանակներում գարնանը պանթեոնում լայնածավալ ծառատունկ է իրականացվելու և հնարավորինս պահպանվելու է պանթեոնի ֆունկցիոնալ նշանակությունն ու ճարտարապետական ներդաշնակությունը: Երևանի դելֆինարիան արդեն բացվել է Դեկտեմբերի 24-ին կայացավ Երևանի «Նեմո» դելֆինարիայի բացումը: Բացի ներկայացումներից դելֆինարիան առաջարկում է լրացուցիչ ծառայություններ՝ նկարահանվել կամ լողալ դելֆինների հետ, ինչպես նաև բուժվել «դելֆինաթերապիայի» միջոցով: Դելֆինարիան ունի իր սեփական ինտերնետային կայքը, որտեղ դուք կարող եք գտնել ձեզ հետաքրքրող բոլոր հարցերի պատասխանները: 25.12.2010

Կանադայի Քվեբեկի անվտանգության ծառայությունը համատեղ եկամուտների հետաքննության վարչության հետ, 2008 թվականից հետախուզություն են վարում՝ ստվերային շինարարության դեպքերի բացահայտման համար: Մինչև չորեքշաբթի արդեն ձեռք են բերվել 14 մարդու ձերբակալման հրամանագրեր: Ոստիկանությունը պատրաստվում է ռեյդեր անցկացնել Մոնրեալի և Լավալի տասնյակ տներում և կազմակերպություններում, որոնք կասկածվում են շինարարության վարման ստվերային մեթոդների կիրառման մեջ: Ձերբակալման հրամանագրերը տրված են հարկերից խուսափելու կամ որպես հարկերից խուսափելու վճարման սխեմաների օգտագործման մեղադրանքով: Շինարարները օգտագործում էին կեղծ (չձևակերպված) հաշիվ-ապրանքագրեր, աշխատողներին վճարում կանխիկ՝ առանց ձևակերպման և, բնականաբար, չմուծելով տեղական հարկերը: Ի տարբերություն Կանադայի, որտեղ ստվերային շինարարությունը և վերանորոգումը կարծես սպիտակ ագռավ լինի, Հայաստանում ստվերային է գրեթե ողջ սեփական տների շինարարությունն ու վերանորոգումը, որոնք հիմնականում իրականացվում են առանց որևէ ձևակերպման և հարկերից խուսափման բարդ սխեմաների: Հատկապես կարծես «տրամաբանական և բնական» է, երբ շինարարական աշխատանքները իրականացնում են ոչ թե կազմակերպությունները, այլ արհեստավորական խմբերը կամ առանձին արհեստավորները: Նշենք, որ Հայաստանում, լիցենզավորված շինարարական կազմակերպությունների հետ օրինական պայմանագրեր կնքելու ժամանակ աշխատանքների արժեքը կտրուկ աճում է մոտ 50%-ով՝ հաշվի առնելով ԱԱՀ-ն, այլ հարկերը և վճարները: Ահա և ստացվում է մի ահռելի տարբերություն՝ ստվերային և օրինական շուկաների միջև, և արդյունքում բարգավաճում է ստվերը, իսկ «օրինական կազմակերպությունները» չեն կարողանում գոյատևել: Մենք ունենք խորը կիրճերով անհավասար մրցակցային դաշտ, որը շտկելու համար կառավարությունը պետք է երկար և քրտնաջան աշխատանք կատարի, որպեսզի ինչ-որ կերպ մոտեցնի հարկային բեռը շինարարական շուկայի բոլոր մասնակիցների համար և ստեղծի «օրինական աշխատանքի» և կազմակերպությունների օրինական զարգացման համար իրական և գործող պայմաններ: Այս հավասար պայմանները ստեղծելուց հետո միայն միգուցե կարելի կլինի գործել ինչպես Կանադայում...

Այսօր, հոկտեմբերի16-ին, ինչպես և նախատեսված էր շահագործման հանձնվեց Տաթևի վանական համալիր տանող 5,7 կմ երկարությամբ ռեվերսային ճոպանուղին, որն անցնում է Հալիձորի կիրճի վրայով: Ճոպանուղին ներկայումս աշխարհում ամենաերկարն է հանդիսանում. այն «Տաթևի Վերածնունդ» ծրագրի մասն է կազմում, որը նաև ընդգրկում է վանքի վերականգնման, հյուրանոցի շինարարության և ենթակառուցվածքների բարեկարգման աշխատանքները: Բացմանը ներկա էին գտնվում ՀՀ նախագահ Սերժ Սարգսյանը, վարչապետ Տիգրան Սարգսյանը, հանրապետության այլ բարձրաստիճան ղեկավարներ և հյուրեր: Ճանապարհի կառուցումն իրականացրեց ավստրո-շվեյցարական “Doppelmayr Garaventa Group” ընկերությունը, որն այս բնագավառում աշխարհի առաջատարն է հանդիսանում: Ճոպանուղիով ընդհանուր ճանապարհորդությունը դեպի Տաթևի վանք տևում է մոտ 11,5 րոպե, իսկ կիրճի վրայով անցնելիս ամենաբարձր կետը կազմում է 330մ: Յուրաքանչյուր ուղղությամբ շարժվելու է 25 մարդ տարողությամբ մեկ խցիկ : Նշենք, որ այս օդային տրամվայով «թռիչքը» ամենևին թույլ նյարդեր ունեցող մարդկանց համար չէ... «Տաթևի Վերածնունդ» ծրագրի նախնական արժեքը նախատեսված էր $ 20-25 միլիոն, սակայն աշխատանքների արժեքը հասել է մինչև $50 մլն: Ծրագիրը ֆինանսավորվել է մի քանի աղբյուրներից: Միջոցների կեսից ավելին ներդրել է Ռուբեն և Վերոնիկա Վարդանյաններ և ընկերներ Հիմնադրամը, իսկ Հայաստանի կառավարությունը հիմնականում ֆինանսավորել է ենթակառուցվածքների զարգացումը:

Ինչպես հայտնում է թուրքական Huberturk-ը, Դիարբեքիրում իրականացվում են հայկական Սուրբ Կիրակոս եկեղեցու վերանորոգման աշխատանքները: Նախագիծը գնահատվում է $ 2,5 մլն և ֆինանսավորվում է «Սուրբ Կիրակոս» հիմնադրամի կողմից: Հիմնադրամը, որը գլխավորում է Թեքին Փափուչյանը, հիմնականում ֆինանսավորվում է դիարբեքիրցի հայերի կողմից: Աշխատանքները նախատեսված են ավարտին հասցնել 2011 թվականին: Նախատեսվում է նաև եկեղեցու վրա խաչ տեղադրել և տարեկան երկու անգամ պատարագ իրակացնել: Ցավալին այն է, որ քաղաքում այժմ միայն 8-10 հայ ընտանիք են ապրում, թեև 50 տարի առաջ Դիարբեքիրում մոտ 1000 ապրող հայ կար: Ըստ քաղաքի իշխանությունների արձանագրությունների, եկեղեցին կառուցվել է XV դարում: Հետաքրքիր է, որ կայծակից հին զանգակատան ավերումից հետո, 1913 թվականին, շինարար-ճարտարապետ Դավիթ Խըզարճյանը կառուցեց նոր՝ սլացիկ գոթական ոճի զանգակատուն, որը շատ ավելի բարձր և գեղեցիկ էր, քան հինը: Սակայն շուտով՝ տխրահռչակ 1915 թվականին, այն ավերվեց թուրքական հրետանու կողմից: Ներկայումս Դիարբեքիրը, որը կառուցվել է Մեծ Հայքի նախկին մայրաքաղաքներից մեկի՝ Տիգրանակերտի տեղում, ոչ պաշտոնապես համարվում է Թուրքական Քուրդիստանի մայրաքաղաքը...