Մոնղոլիայի մայրաքաղաք Ուլան Բատորում նախատեսվում է կառուցել արհեստական սառցարան, որն ամբողջ ամառվա ընթացքում մայրաքաղաքի բնակչությանը կապահովի խմելու ջրով և սառը օդով, գրում է Constructiondigital կայքը: Դարերի ընթացքում գիտնականները մտածել են՝ ինչպես սառցաբեկորների սառույցը օգտագործեն աշխարհի բնակչությանը սառը օդով և խմելու ջրով ապահովելու նպատակով: Իսկ ահա Մոնղոլիայում այլ բան են մտածել՝ ձմռանը կառուցել սեփական արհեստական սառցաբեկոր, իսկ ամռանը կուտակված սառույցն օգտագործել ըստ նպատակի: Գիտնականները հույս ունեն, որ իրենց այս նախաձեռնությունը կծառայի ըստ նշանակության: Պետական ֆինանսավորմամբ 700 հազար ԱՄՆ դոլար արժողությամբ նախագծը կիրականացնի մոնղոլական Էքոս և Էմի (ECOS & EMI) ընկերությունը: Արհեստական սառցարանը կկառուցվի Տուլ (Tuul) գետի վրա, իսկ ճարտարագետներն անընդհատ կհետևեն սառույցի առաջացմանը: Նախագիծը կաշխատի հետևյալ կերպ՝ օրվա ընթացքում ճնշման ազդեցության տակ ջուրը կներթափանցի անցքերի մեջ, իսկ գիշերվա ընթացքում կսառչի՝ ձևավորելով սառցաշերտեր: Այնպիսի հյուսիսային քաղաքաներում, ինչպիսին է Ուլան Բատորը, նման սառցաշերտերի հաստությունը կարող է հասնել մինչև 5 մետրի: Եթե այս փորձը հաջողություն ունենա, ապա երկրի այլ հյուսիսային քաղաքներում էլ, որտեղ ձմռանը լինում է 5-20°C զրոից ցածր, կկառուցվեն նմանատիպ արհեստական սառցարաններ:

Ինչպես տեղեկացնում է news.am կայքը, Հայաստանում ընթացիկ տարվա երրորդ եռամսյակում իրականացվել է բնակարանների առքուվաճառքի 3427 գործարք, ինչը նախորդ տարվա նույն ժամանակահատվածի ցուցանիշը գերազանցել է 101 գործարքով (կամ 2,9 տոկոսով): Գործարքների 68 տոկոսը կամ 2403-ը բաժին է ընկնում մայրաքաղաքին: Այսպիսով, ընթացիկ տարվա սեպտեմբերին 1քառակուսի մետրի միջին գինը Երևանում կազմել է 256.5 հազար դրամ, ինչը 5,1 տոկոսով ցածր է նախորդ տարվա նույն ժամանակահատվածի ցուցանիշից: «Կենտրոն» վարչական շրջանում 1քառակուսի մետրի գինը 1.7 անգամ գերազանցել է միջին քաղաքային ցուցանիշը: Բացարձակ արժեքով 1քառակուսի մետրի գինը վերոնշյալ հատվածում կազմել է 436.2 հազար դրամ կամ 1172 ԱՄՆ դոլար: Երևանի միջին բնակարանային` 63,1 քառակուսի մետր տարածքի դեպքում այստեղ բնակարանը կարժենա 27.5 մլն դրամ կամ 74 հազար ԱՄՆ դոլար: Բնակարանների բարձր գնով հաջորդն աչքի է ընկնում Արաբկիրը`1 քառակուսի մետրի համար 337.9 հազար դրամ կամ 908 ԱՄՆ դոլար: Այստեղ միջին չափի բնակարանն արժե 21.3 մլն դրամ կամ 57.3 հազար ԱՄՆ դոլար: Նկատենք, սակայն, որ եթե քաղաքի կենտրոնական հատվածի էլիտար բնակարանների գները տարվա ընթացքում նվազել են 4.2 տոկոսով, ապա Արաբկիրի դեպքում նվազումն ավելի զգալի է` 9.8 տոկոս: Բնակարանի գնման համար առավել օպտիմալ են քաղաքի մյուս խոշոր արվարձանները, որտեղ գները միջին քաղաքային գնից ցածր են Ավանում` 2 տոկոսով, Նոր Նորքում և Աջափնյակում` մինչեւ 13 տոկոսով: Նշենք, որ բացի Կենտրոնից, միջին քաղաքային ցուցանիշը գերազանցում է Արաբկիրը՝ 1.3 անգամ, Քանաքեռ-Զեյթունը` խորհրդանշական` 1.04 անգամ: Դավիթաշենում 1քառակուսի մետրի արժեքը գրեթե համարժեք է միջին քաղաքային ցուցանիշին` 256.3 հազար դրամ` 256.5-ի դիմաց:Ամենացածր գները Նուբարաշենում են. այստեղ 1 քառակուսի մետրի արժեքը միջին քաղաքային արժեքի մոտ կեսն է կազմում:

43 հարկանի Էյժա Սքուեր Թաուեր 1 (Asia Square Tower 1) նորագույն կանաչ երկնաքերը կառուցվել է 3 տարում Սինգապուրի Կենտրոնական գործարար թաղամասում (Central Business District), տեղեկացնում է Asiaone կայքը: Վերջին տարիներին Սինգապուրն աչքի է ընկնում իրականացված մի շարք կանաչ նախագծերով, քանի որ երկրում շինությունների նախագծման հիմնական փուլերից մեկը դրանց բնապահպանական բարձր մակարդակի ապահովումն է: Տարածաշրջանի ամենականաչ նախագծի բացման հանդիսավոր արարողությունը տեղի է ունեցել նոյեմբերի 11-ին: Շինությունը համարվում է տարածաշրջանի առաջին նախագիծը, որն իրականացնում է թափոնների վերամշակում: Բանն այն է, որ այն համալրված է բիոդիզելային սարքավորումներով, որոնք իրականացնում են սննդի թափոնների յուղերի վերամշակում: Երկնաքերում տեղադրված են նաև այնպիսի համակարգեր, որոնք օգտագործում են օդորակիչների արտադրած ջուրը ոռոգման նպատակներով: Այս աշտարակը նախագծվել է «աշխատել, խաղալ, ապրել, աճել» սկզբունքով, հետևաբար կան դրա համար բոլոր հարմարությունները: Էյժա Սքուեր Թաուեր 1 աշտարակում կան գրասենյակային տարածքներ, հյուրանոցային համալիր, ռեստորան, մարզադահլիճ և խանութներ: Մինչ օրս աշտարակի 60 տոկոսն արդեն վարձակալված է: Շինության գլխավոր վարձակալը համարվում է Սիթիբանկը (Citibank) իր 9 հարկերով, երկրորդ տեղում է Google ընկերությունը՝ 3.5 հարկով, իսկ Փյուր ֆիթնես (Pure Fitness) ընկերությունը վարձակալել է 1 հարկ: Ըստ նախնական տվյալների՝ Վեսթին Հոթել (Westin Hotel) հյուրանոցային համալիրը կլինի նախագծի 2-րդ աշտարակում, որը նախատեսվում է շահագործման հանձնել 2013 թ-ին:

Ինչպես տեղեկացնում է constructiondigital կայքը, հղում կատարելով պաշտոնական աղբյուրներին, 6.08 մլրդ ԱՄՆ դոլար արժողությամբ Աբու Դաբի միջազգային օդանավակայանի (Abu Dhabi International Airport (ADIA)) նոր տերմինալի շինարարությունը կսկսվի 2012 թ-ին: Չնայած համաշխարհային տնտեսական ճգնաժամին՝ Միացյալ Արաբական Էմիրություններում շարունակում են իրականացնել բազմաթիվ շինարարական նախագծեր: Այսպես՝ 2012 թ-ին նախատեսվում է սկսել Աբու Դաբի միջազգային օդանավակայանի՝ 650 հազար քառակուսի մետր ընդհանուր մակերեսով նոր տերմինալի շինարարությունը: Ըստ նախնական տվյալների՝ նոր տերմինալը շահագործման կհանձնվի 2017 թ-ին և կսպասարկի ավելի քան 30 մլն ուղևոր: Օդանավակայանի ղեկավարությունը շինարարությունն իրականացնելու համար ստացել է 6 դիմում- հայտ աշխարհի տարբեր երկրներից, այդ թվում՝ Գերմանիայից, Հարավային Աֆրիկայից և ԱՄՆ-ից: Շինարարության իրականացման վերջնական պայմանագիրը կստորագրվի 2012 թ-նի առաջին եռամսյակում: Ըստ նախանական տվյալների՝ նոր տեմինալի հսկա շենքը կունենա աշխարհի ամենաերկար ծածկող կամարները, որոնց բարձրությունը կհասնի 52 մետրի: Նոր տերմինալում կլինի նաև շքեղ հյուրանոց, սպա-կենտրոն, ռեստորաններ, բարեր և 20-25 հազար քառակուսի մետր մակերեսով առևտրային կենտրոններ: Այս կառույցները կգտնվեն 8.4 հազար քառակուսի մետր մակերեսով, միջերկրական և անապատային բնաշխարհով, փակ այգու շրջակայքում: Ինչպես տեղեկացնում է օդանավակայանի պաշտոնական կայքը, նախապատրաստական աշխատանքները սկսվել են դեռևս 2009 թ-ի փետրվարի, իսկ շինարարության իրականացման նպատակով մրցույթ է հայտարարվել այս տարվա հունվարին: Աբու Դաբի միջազգային օդանավակայանն իր առաջին չվերթն իրականացրել է 1982 թ-ին: Այն գտնվում է մայրաքաղաքի կենտրոնից 30 կիլոմետր հեռավորության վրա, որտեղ գտնվում է Էթիադ Էյրվեյս (Etihad Airways) ընկերության գլխավոր գրասենյակը:

Նոյեմբերի 3-ին ամենամյա 10-րդ հանդիսավոր մրցանակաբաշխության ժամանակ բարձրահարկ շենքերի և քաղաքային միջավայրի միջազգային Խորհուրդը (The Council on Tall Buildings and Urban Habitat- CTBUH) հայտարարել է “2011 թ-ի լավագույն բարձրահարկ շենք” անվանակարգի հաղթողի անունը: Այս տարի հաղթող է ճանաչվել KFW Վեսթարկադե (KFW Westarkade) աշտարակը Ֆրանֆուրտում: KFW Վեսթարկադե աշտարակը նախագծել է Զաուերբրուխ Խաթթոն (Sauerbruch Hutton) ճարտարապետական ընկերությունը, և 2010 թ-ին, շինարարության ավարտից հետո, այն ճանաչվել է աշխարհի ամենաշատ էներգիա խնայող կառույցը: Բարձրահարկ շենքերի և քաղաքային միջավայրի միջազգային Խորհուրդի կողմից շենքը ներգրավվել է մրցույթում ոչ թե բարձրության համար, ընդամենը 56 մետր, այլ անհավանական ռեսուրսային խնայողության համար: Բանն այն է, որ տիպիկ եվրոպական գրասենյակային կառույցի համեմատությամբ այս աշտարակն օգտագործում է 2 անգամ ավելի քիչ էներգիա: Շենքը կառուցված է այնպիսի վայրում, որտեղ գերակշռում են քամիներ, և շենքի երկշերտ Ճակատային երեսապատումը հնարավորություն է տալիս օգտագործել այդ քամիները տարվա 8 ամսվա ընթացքում՝ շենքը բնական օդափոխությամբ ապահովելու նպատակով: