Ֆլորիդա նահանգի Մայամի շրջանի անշարժ գույքի շուկայում նոր ռեկորդ է սահմանվել: Ինչպես տեղեկացնում է The Wall Street Journal պարբերականը, 47 մլն ԱՄՆ դոլար գումարով առանձնատունը ձեռք է բերել ազգությամբ ռուս անհայտ գնորդը: Վերջինիս ինքնությունը բացահայտել չի հաջողվել, քանի որ առուվաճառքն իրականացվել է ԱՄՆ-ում գրանցված մի ընկերության միջոցով: Ի դեպ, Forbes ամսագիրը նույնպես վկայում է, որ Մայամիի անշարժ գույքի շուկայում սա մինչ օրս գրանցված ամենաթանկ գործարքն է: Նոր առանձնատունը գտնվում է Բիսքեյն ծովածոցում (Biscayne Bay) տեղակայված հսկվող կղզու վրա: Աստեղ ապրում են շատ նշանավոր մարդիկ, ներառյալ Խուլիո Իգլեսիասը: 2790 քառակուսի մետր մակերեսով առանձնատանը կա 10 ննջասենյակ, 14 լոգասենյակ, մի քանի հյուրասենյակ, բար, ձայնագրման ստուդիա, մարզադահլիճ, գրադարան, մերսման սենյակ, 3-D կինոդահլիճ, արվեստի գործերի պահպանման սենյակ, լողավազան և գինիների մառան, որտեղ կարելի է հասնել միայն մատնահետքերը ստուգելուց հետո: Կզղում տեղակայված է նաև գոլֆի ակումբ: Նշենք, որ հատուկ այս առանձնատան համար Բահամյան կղզիներից մի քանի տոննա վարդագույն ավազ է բերվել: Այս հրաշալի առանձնատան շինարարությունը սկսվել է 2008 թ-ին: Շինարարությամբ զբաղվել են կառուցապատողներ Շլոմի Ալեքսանդրը (Shlomi Alexander) և Ֆելիքս Կոհենը (Felix Cohen): Տունը վաճառքի է հանվել 2011 թ-ին 60 մլն ԱՄՆ դոլարով, իսկ անցած տարվա ընթացքում վերջինիս առաջարկվող գինը իջել է մինչև 52 մլն ԱՄՆ դոլար:
Անցած տարվա վերջին Չինաստանում առաջին անգամ փորձարկվել է աշխարհի ամենաերկար արագընթաց երկաթուղին: Նոր արագընթաց երկաթուղու երկարությունը, որն իրար է միացնում մայրաքաղաք Պեկինը հյուսիսում ու Գուանչժոու (Guangzhou) ֆինանսական կենտրոնը հարավում, կազմում է 2298 կիլոմետր: Ըստ տարածված հաղորդագրության՝ նոր երկաթուղով ամեն օր մոտ 150 զույգ գնացքներ կընթանան ավելի քան 300 կիլոմետր ժամ արագությամբ՝ արդյունքում երկու քաղաքների միջև երթևեկության տևողությունը կրճատելով 12 ժամով՝ 22-ից մինչև 10 ժամ: Երթևեկության ընթացքում մի շարք կանգառներ են նախատեսված, որոնք ներառում են Շիցզյաչժուն (Shijiazhuang), Ուհան (Wuhan) և Չանշա (Changsha) նահանգային մայրաքաղաքները: Չնայած այն հանգամանքին, որ Չինաստանը հսկայական ռեսուրսներ է ներդրել արագընթաց երկաթուղու կառուցման մեջ, այնուամենայնիվ վերջին ամիսներին մի շարք շինարարական խնդիրներ են առաջացել: Մարտյան հեղեղային անձրևներից հետո արագընթաց երկաթգծի որոշ հատվածը փլուզվեց, 2011 թ-ին գնացքներից մեկի վթարի հետևանքով 40 մարդ զոհվեց, իսկ այդ դեպքից մի քանի ամիս առաջ ձերբակալվեցին երկաթուղային գծերի նախարարը և նախարարության գլխավոր ինժեները, ովքեր կասկածվում էին կաշառակերության մեջ: Պեկին-Գուանչժոու արագընթաց երկաթգծի բացումից հետո Չինաստանն արդեն ունի շահագործվող 9.3 հազար կիլոմետր արագընթաց երկաթգիծ: Նորաբաց գիծը հանդիսանում է նախատեսված հյուսիս-հարավ ուղղության 4 գծերից մեկը, որոնք պետք է կառուցվեն ապագայում: Երկաթգծային ենթակառուցվածքների զարգացման 12-րդ հնգամյակի պլանով 2015 թ-ին Չինաստանում շահագործման կհանձնվի 120 հազար կիլոմետր երկաթգիծ, որից 18 հազար կիլոմետրը արագընթաց (300 կմ/ժամ), իսկ 40 հազարը էքսպրեսս երկաթգիծ (160 կմ/ժամ):
Նյույորքյան Բրուքլին շրջանում սկսվել է աշխարհի ամենաբարձր «հավաքովի» աշտարակի շինարարությունը: 32 մետր բարձրությամբ աշտարակը կառուցվում է մանհեթենյան «Շոփ Արքիթեքթս» (ShoP Architects) ճարտարապետական ստուդիայի նախագծով «Աթլանթիք Յարդս» (Atlantic Yards) թաղամասի զարգացման շրջանակներում: «Բի 2» (B2) անվանումը ստացած աշտարակի մոտ 60 տոկոսը կազմված կլինի հավաքովի կառուցվածքներից, ինչը նշանակում է, որ վերջինիս շինարարության ժամանակ կարտադրվի 60-70 տոկոս պակաս շինարարական թափոն և կօգտագործվի 67 տոկոս պակաս էներգիա, քան ավանդական մեթոդների օգտագործման դեպքում: Մինչև շինարարության սկսվելը, շատերը վիճում էին ընտրված մեթոդի շուրջ: Բանն այն է, որ ճիշտ է այս մեթոդը բավականին կրճատում է շինարարության ընդհանուր ծախսերը, պակասեցնում օգտագործվող էներգիայի ծավալը, բայց միևնույն ժամանակ կրճատում է նաև աշխատուժի քանակը: Հազարավոր մարդկանց փոխարեն այս շինության կառուցման ժամանակ հնարավորություն կունենան աշխատել միայն 125 «երջանիկներ»: «Աթլանթիք Յարդս» թաղամասի զարգացման ծրագրով նախատեսվում է կառուցել 3 բնակելի շենք, որոնք կտեղակայվեն այս տարվա սեպտեմբերին շահագործման հանձնված 19 հազար հանդիսատեսի համար նախատեսված մարզական և երաժշտական փակ համալիրի շուրջը: 3 աշտարակները համատեղ կառաջարկեն 1500 բնակարան, որոնց կեսը բավականին մատչելի կլինի և հասանելի բնակչության միջին խավին: «Բի 2» - ի 363 բնակարանները պատրաստ կլինեն արդեն 2014 թ-ին: Այն ժամանակ, երբ նախագծողները և քաղաքի ղեկավարությունը ողջունում են «Բի 2»-ը՝ որպես աշխարհի ամենաբարձր «հավաքովի» աշտարակ, Չինաստանում նոր նախագիծ է հասունանում: Ամիսներ առաջ չինական «Բրոուդ Սըսթեյնըբլ բիլդինգ» (Broad Sustainable Building) ընկերությունը հայտարարել է, որ պատրաստվում է ընդամենը 90 օրում կառուցել 220 հարկանի 838 մետր բարձրությամբ «Երկնային Քաղաք» (Sky City) հավաքովի աշտարակը, որն աշխարհում կդառնա ամենաբարձրը ոչ միայն իր տեսակի մեջ, այլև ընդհանրապես: Ի դեպ, վերոնշյալ ընկերությունն արդեն իրականացրել է մի քանի զարմանալի նախագծեր: Վերջերս, Չինաստանի Հունան (Hunan) նահանգում ընդամենը 15 օրում, 170 քառակուսի մետր հողատարածքի վրա կառուցվել է 30-հարկանի հյուրանոց: Չինական «Բրոուդ Գրուփ» (Broad Group) ընկերության կառուցած շենքում տեղադրված են էներգախնայող տեխնոլոգիաներ, և այն ընդունակ է դիմակայել 9 մագնիտուդ ուժգնությամբ երկրաշարժի: Նույն ընկերությունը 2010 թ-ին 6 օրում կառուցել է «Տապան Հյուրանոց» (Ark Hotel) 15 հարկանի շենքը: Նախապես կառուցվել էր միայն շենքի հիմքը, իսկ կարկասը և հարդարումը բոլոր հաղորդակցություններով ավարտին էին հասցվել ռեկորդային 6 օրում:
Լեհ շինարարները հավանաբար հիմար սխալի հետևանքով ապամոնտաժել են ռուս գործարարին պատկանող ֆրանսիական Բորդոյի արվարձանում գտնվող 18-րդ դարի դղյակը, տեղեկացնում է BBC-ն: Դղյակի սեփականատեր ռուս միլիարդատեր Դմիտրի Ստրոսկինը ցնցվել է նորությունը լսելուց հետո: Բանն այն է, որ իր կարգադրած փոքրիկ՝ դղյակին կից շինության փոխարեն շինարարները քանդել են պատմական մեծ արժեք ներկայացնող գեղեցկագույն դղյակը: Ցնցված են նաև Բորդոյի տարածքում գտվող Իվրակ (Yvrac) գյուղի բնակիչներն ու գյուղապետը, որի զարդն էր դղյակը: 13 հազար քառակուսի մետր ընդհանուր մակերեսով, խաղողի այգիներով շրջապատված, պերճաշուք միջանցքից ու հանդիսությունների սրահից բաղկացած հոյակերտ դղյակը, նախկինում ծառայել է որպես հարսանիքների և այլ հանդիսությունների սրահ: Դղյակի նախկին սեփականատեր Ջուլիետ Մարմին (Juliette Marmie) նորությունը լսելուց հետո հայտարարել է, որ «Բելվյու» (Bellevue) դղյակը Իվրակի հպարտությունն էր, և նա չի հասկանում՝ ինչպես կարող էին շինարարները սխալմամբ քանդել այն: Մինչ ֆրանսիացի դատախազները փորձում են հասկանալ` ով է պատասխանատվություն կրում այս անհեթեթ սխալի համար, Ստրոսկինը հայտարարել է, որ հասկանում է տեղաբնակների զգացմունքները, և ինքն էլ է շատ վրդովված, այդ իսկ պատճառով բոլոր ուժերը կներդնի, որպեսզի իր նախկին հմայքով ամբողջությամբ վերականգնի դղյակը: The Telegraph պարբերականի տվյալներով, լեհ ճարտարապետներն արդեն զբաղվում են քանդված դղյակի վերականգնման նախագծով: Ըստ նախնական տվյալների` վերականգնման բյուջեն կազմելու է 1.5 մլրդ եվրո, իսկ տևողությունը 2 տարի:
«Տաշիր գրուփի» ընդհանուր եկամուտը 2012 թ-ին կկազմի 2.9 մլրդ ԱՄՆ դոլար, ընկերության կողմից հրավիրված մամուլի ասուլիսի ժամանակ հայտարարել է «Տաշիր գրուփի» փոխնախագահ Վիտալի Եֆիմկինը: Նախորդ տարվա ավարտին հրավիրված ասուլիսի ժամանակ Եֆիմկինը հայտարարել էր, որ 2011թ-ին ընկերությունը նախատեսում է իր եկամուտը 2010 թ-ի համեմատությամբ ավելացնել մոտ 1 մլրդ ԱՄՆ դոլլարով և հասցնել 2.8 մլրդ ԱՄՆ դոլլարի, սակայն, համաձայն ճշտված տվյալների, 2011 թ-ին ընկերության եկամուտը կազմել է 2.6 մլրդ ԱՄՆ դոլար: 2012 թ-ին ընկերությունը շահագործման է հանձնել 840 հազար քառակուսի մետր մակերեսով անշարժ գույք, որից 370 հազար քառակուսի մետրն առևտրային և 415 հազար քառակուսի մետրը բնակելի: Ընկերության կողմից շահագործման հանձնված հյուրանոցային անշարժ գույքը կազմել է 20 հազար քառակուսի մետր, իսկ գրասենյակայինը՝ 35 հազար: Նշենք, որ 2012 թ-ին «Տաշիր գրուփը» շահագործման է հանձնել 11 անշարժ գույք, որոնցից 7-ը «Ռիո» անվանմամբ: Մամուլի ասուլիսի ժամանակ ընկերության փոխնախագահը նաև հայտարարել է, որ 2013 թ-ին «Տաշիր գրուփը» նախատեսում է բացել «Սինեմա սթար» անվանմամբ 13 կինոթատրոն և մոտակա 3-4 տարում մոտ 1.5 մլրդ ռուբլի ներդնել 50 ավտոլիցքավորման կայանների կառուցման մեջ: Միաժամանակ հիշեցնենք, որ 2012թ–ի հոկտեմբերի 20-ին կայացավ «Dalma Garden Mall» առևտրա-ժամանցային կենտրոնի բացումը Երևանում, որի կառուցապատողն էր Dalma Invest-ը ՝ «Տաշիր գրուփի» կողմից հիմնված ընկերությունը: Ավելի վաղ նաև հայտարարվել էր, որ 2012 թ-ին «Տաշիր գրուփը» ցանկանում է մոտ 50 մլն ԱՄՆ դոլար ներդնել Սոչիի ուղևորական նավահանգստի վերակառուցման ծրագրում:
