Բելգիան Հյուսիսային ծովում պատրաստվում է կառուցել արհեստական կղզի, որը պետք է ծառայի որպես պահեստ արտադրվող քամու էներգիայի համար: Այս մասին հայտարարել է Հյուսիսային ծովի հարցերով զբաղվող նախարար Յոհան Լանոտեն (Johan Lanotte): Նա նշել է, որ չնայած Բելգիայում ուժեղ քամիների ժամանակ հնարավոր է արտադրել բավականաչափ շատ էներգիա, այնուամենայնիվ արտադրված էներգիայի մեծ մասն չօգտագործվելով կորչում է: Արհեստական կղզի կառուցելով և պահեստային հզոր համակարգ ստեղծելով՝ Բելգիան հույս ունի, որ կկարողանա երկիրը հետզետե զերծ պահել ատոմային էներգիայի հետագա օգտագործումից: 2011 թ-ին «Ֆուկուսիմա» ատոմային էլեկտրակայանում տեղի ունեցած աղետից հետո Բելգիան, ինչպես նաև Գերմանիան և Շվեյցարիան, որոշեցին մինչև 2025 թ-ը փակել բոլոր ատոմային էլեկտրակայանները և օգտագործել բացառապես այլընտրանքային էներգիա: Բայց այսօր, Բելգիայում օգտագործվող էլեկտրաէներգիայի միայն 4 տոկոսն է բաժին ընկնում քամու էներգիային, իսկ մնացած առյուծի բաժինն ատոմայինինն է: Բանն այն է, որ որպես այլընտրանքային էներգիայի աղբյուր քամու էներգիայի արտադրությունը մի շարք խնդիրներ ունի: Ուժեղ քամիների ժամանակ մեծ քանակությամբ էներգիա է արտադրվում, իսկ արտադրված էներգիան անիմաստ կորչում է, անմիջապես չօգտագործվելով: Նոր, անցքով փքաբլիթի տեսք ունեցող արհեստական կղզին կաշխատի ավելորդ էներգիայի հաշվին ջուրը պոմպի միջոցով մեջտեղից դատարկելու համար՝ հետագայում թույլ տալով ջրին հոսել դեպի պահեստ, ինչի արդյունքում կպտտվի տուրբինը և կսկսի արտադրվել էներգիա: Այս տարբերակը կաշխատի այն ժամանակ, երբ քամին կդադարի, իսկ ջրային տուրբինով ստացված էներգիան կմատակարարվի ընդհանուր ցանց:
Google ընկերությունը Լոնդոնի հանրահայտ «Քինգս Քրոսս» (King’s Cross) կայարանի հարևանությամբ նոր գլխավոր գրասենյակ կկառուցի, որի բյուջեն գնահատվում է մոտ 1.6 մլրդ ԱՄՆ դոլար, տեղեկացնում է The Financial Times պարբերականը: Լոնդոնի հյուսիսում գտնվող «Քինգս Քրոսս» կայարանում գնված տարածքի մակերեսը կազմում է 10 հազար քառակուսի մետր, որտեղ ինտերնետային հսկան պատրաստվում է կառուցել 11 հարկանի շենք, որը կդառնա ընկերության Մեծ Բրիտանիայի նոր գլխավոր գրասենյակը: Ըստ Reuters լրատվական գործակալության տվյալների՝ ընկերությունն ավելի քան 1 մլրդ ԱՄՆ դոլար կծախսի տարածքի գնման և կառույցի շինարարության համար, իսկ նախագծի ընդհանուր բյուջեն, որը պետք է ավարտվի 2016 թ-ին, կկազմի 1.6 մլրդ ԱՄՆ դոլար: Google-ը պատրաստվում է նոր գրասենյակում կենտրոնացնել Լոնդոնում գտնվող իր ներկայիս 2 գրասենյակների աշխատանքը, որոնք այժմ գտնվում են Վիկտորիա (Victoria) և Հոլբորն (Holborn) շրջաններում: Իսկ ընկերության Մանչեսթրյան գրասենյակի աշխատանքը կմնա անփոփոխ: Ինչպես նշում է FT պարբերականը, Google ընկերության կողմից նմանատիպ գործարքը ֆինանսական ճգնաժամից ի վեր համարվում է ռեկորդային Մեծ Բրիտանիայում: Ավելի վաղ խոշորագույն գրասենյակային տարածքներ Մեծ Բրիտանիայում զբաղեցրել են այնպիսի տեխնոլոգիական ընկերություններ, ինչպիսին են Skype-ը, Oracle-ը, Amazon-ը և Facebook-ը: Google ընկերության Կենտրոնական և Հյուսիսային Եվրոպայի մասնաճյուղերի փոխնախագահ Մեթ Բրիթթինի (Matt Brittin) խոսքերով, սա խոշորագույն ներդրում է ընկերության համար, և նրանք հետագայում նախատեսում են ավելի զարգանալ և տարածվել Մեծ Բրիտանիայում: Որպես կանոն՝ Google ընկերությունը ԱՄՆ-ի տարածքից դուրս միայն վարձակալում էր գրասենյակային տարածքներ, բայց վերջին 2 տարում նա գնել է անշարժ գույք Փարիզում և Դուբլինում: Բացի այդ անցած տարի ընկերությունը Լոնդոնում բացեց իր 7 հարկանի կենտրոնը սկսնակ մասնագետների և նորարարությունների մշակման համար:
Աբու-Դաբին պաշտպանել է Մերձավոր Արևելքի մշակութային մայրաքաղաքի իր կոչումը՝ վերջնականապես կանաչ լույս վառելով «Աբու-Դաբի Լուվր» (Abu-Dhabi Louvre) նախագծի համար: Տեղական ԶԼՄ-ների տեղեկատվությամբ՝ հանրահայտ «Լուվր» թանգարանի մասնաճյուղն Աբու-Դաբիում կկառուցվի մինչև 2015 թ-ը, իսկ շինարարության ընդհանուր բյուջեն կկազմի 653 մլն ԱՄՆ դոլար: Շինարարության գլխավոր կապալառուի համար վերջերս հայտարարված մրցույթը հաղթել է Դուբայի «Արաբթեք» (Arabtec) շինարարական ընկերությունը: «Լուվրի» նոր մասնաճյուղի շինարարությունը համարվում է Արաբական Միացյալ Էմիրությունների և Ֆրանսիայի միջև 2007 թ-ին կնքված միջազգային մշակութային համագործակցության արդյունք: Թանգարանի ճարտարապետական նախագծմամբ զբաղվում է հանրահայտ «Պրիտցկերյան մրցանակի» դափնեկիր, ճարտարապետ Ժան Նուվելը (Jean Nouvel): «Աբու-Դաբի Լուվր» անվանումը ստացած աշխարհահռչակ թանգարանի մասնաճյուղը կկառուցվի «Սաադիյաթ» (Saadiyat Island) արհեստական կղզու վրա, որը ենթադրվում է, որ ժամանակի ընթացքում կդառնա տարածաշրջանի խոշորագույն մշակութային կենտրոններից մեկը: Ի դեպ, այս նույն կղզում 2016 թ-ին նախատեսված է «Շեյխ Զայեդի անվան Ազգային» (Zayed National Museum) թանգարանի, իսկ 2017 թ-ին՝ աշխարհի խոշորագույն «Սոլոմոն Գուգգենհայմի» (Guggenheim Abu Dhabi) անվան թանգարանի մասնաճյուղի բացումը: «Աբու-Դաբի Լուվր» թանգարանի ընդհանուր մակերեսը կկազմի 64 հազար քառակուսի մետր՝ ներառյալ շինությունը և հարակից տարածքները: Ենթադրվում է, որ հիմնական ցուցադրությունների սրահների մակերեսը կկազմի 6 հազար քառակուսի մետր, իսկ 3 հազար քառակուսի մետր տարածք էլ կտրամադրվի ժամանակավոր ցուցադրություններին, խորհրդակցությունների-սրահին և տեխնիկական կառույցներին: Նախագծի համաձայն՝ թանգարանը «կլողա» ծովի մակերևույթին: Բազմաթիվ ջրային ուղիների և 180 մետր լայնությամբ պերֆորացված գմբեթի շնորհիվ այցելուներին կթվա՝ թանգարանը գտնվում է «բաց ծովում, բաց երկնքի տակ»: Ընդ որում՝ ժամանակակից տեխնոլոգիաները հնարավորություն կտան ապահովել իդեալական պայմաններ ոչ միայն այցելուների, այլև ցուցանմուշների համար: Թանգարանի շինարարական աշխատանքները սկսվել են մի քանի տարի առաջ: 2009 թ-ին 40 մետր խորությամբ ավազի մեջ պատեր թաղվեցին, որպեսզի կառույցի ջրադիմացկունությունն ապահովեն: 2010 թ-ին շինարարության գլխավոր կապալառուն հիմքային աշխատանքների համար օգտագործեց այնքան հիմնասյուն, որ դրանք իրար հետևից շարելու դեպքում կստանանք Աբու-Դաբի և Դուբայ քաղաքների միջև եղած հեռավորությունը: Բայց այս արված բոլոր աշխատանքներն անտեսվեցին, իսկ 2010 թ-ից ի վեր շինարարական աշխատանքները սառեցվեցին: Իսկ ահա ճարտարապետների և ճարտարագետների միջազգային խումբը շարունակեց ծրագրի նախագծման աշխատանքերը: Այսօր նախապատրաստական աշխատանքները գրեթե ավարտված են, իսկ շինարարական աշխատանքերն էլ անմիջապես կսկսվեն:
Ֆուկուսիմա ատոմային էլեկտրակայանում տեղի ունեցած աղետից հետո ամբողջ աշխարհի երկրները սկսեցին մտահոգվել ատոմային էներգիայի ապահովության վերաբերյալ, և Ճապոնիան` որպես նմանատիպ աղետ վերապրած երկիր, որոշեց մինչև 2040 թ-ն ամբողջությամբ ազատվել ատոմային էներգիայից և օգտագործել էներգիայի այլընտրանքային տարբերակներ: Անցած տարվա մայիսից 1970-ական թթ-ից ի վեր առաջին անգամ Ճապոնիան ամբողջությամբ հրաժարվեց ատոմային էներգիայի օգտագործումից` փակելով Հոկայդո (Hokkaido) կղզում տեղակայված վերջին ատոմակայանը: Բայց այսօր, տարիներ անց, թվում է` երկրի նորընտիր կառավարությունը մոռացել է ատոմային ճգնաժամն ու դրա հետևանքները: Մինչև 2011 թ-ի մարտը, երբ տեղի ունեցավ հզոր երկրաշարժը և Ֆուկուսիմաի ատոմակայանի աղետը, ճապոնական կառավարությունը որոշել էր ատոմային էներգիայի օգտագործումը 30-ից հասցնել 50 տոկոսի: Բայց աղետի ժամանակ և դրանից հետո, երբ հսկայական քանակությամբ վտանգավոր և ռադիոակտիվ նյութեր արտանետվեցին մթնոլորտ, հողի, օդի և ջրի մեջ, ինչի հետևանքները դեռ տասնյակ տարիներ ճապոնացիները զգալու են, կառավարությունը որոշեց ատոմային էներգիայից ազատ ապագա կառուցել: Սակայն տարվա սկզբին Ճապոնիայի նորընտիր կառավարությունը և լիբերալ-դեմոկրատական կուսակցությունը հայտարարեց, որ պատրաստվում է վերագործարկել ատոմային էլեկտրակայանները` այս հայտարարությամբ ամբողջությամբ թաղելով երկրի ատոմային էներգիայից ազատ ապագայի հույսը: Կառավարությունը խոստացել է, կրկին վերագործարկել փակված ատոմակայանները, եթե վերջիններս անցնեն անվտանգության թեսթը, ավելին` անհրաժեշտության դեպքում կկառուցվեն նորերը: Երկրի նորընտիր առևտրի նախագահ Տոշիմիցու Մոտեգին (Toshimitsu Motegi) հայտարարել է, որ չի պատրաստվում վտանգել երկրի տնտեսությունը հանուն ատոմային անկախության: Նա նաև ավելացրել է, որ ամիսներ և անգամ տարիներ կպահանջվեն փակ ռեակտորների վերագործարկման համար, ինչն արդեն հսկայական վնաս է երկրի տնտեսությանը:
Երբ տարիներ առաջ իտալացի ճարտարապետ Ստեֆանո Բոերին (Stefano Boeri) հայտարարեց, որ ծրագրում է նախագծել աշխարհի առաջին «Ուղղահայաց Անտառը» (Bosco Verticale), ոչ ոք չէր հավատում, որ այն ավելին է քան ճարտարապետի երևակայությունը: Սակայն փաստն այն է, որ աշխարհի առաջին ուղղահայաց անտառի շինարարությունն արդեն մոտենում է ավարտին: Երկու աշտարակներն արդեն պատրաստ են, իսկ անցած տարվա ապրիլից հատուկ խմբերը սկսել են ծառերի և այլ բուսականության տեղադրումը: Նախատեսվում է, որ ծրագրի հանդիսավոր բացման արարողությունը կկայանա այս տարվա վերջին: Միլանն աշխարհի ամենաաղտոտված մթնոլորտ ունեցող քաղաքներից է, իսկ «Ուղղահայաց Անտառ» նախագիծն ուղղված է փոքր-ինչ մեղմելու քաղաքի էկո համակարգին հասցված վնասը: Նախագիծը բաղկացած է 2 աշտարակներից, որոնց դիմային հատվածներում պետք է տնկվեն բազմաթիվ ծառեր և թփեր: «Ուղղահայաց Անտառը» համակարգ է, որը կոչված է էներգիայի օպտիմալացմանը, վերականգնմանը և արտադրմանը, իսկ բուսականության բազմազանությունն էլ ապահովելու է խոնավություն, կլանելու է ածխաթթու գազ ու վնասակար նյութեր և արտադրելու է թթվածին: Ըստ նախնական տվյալների՝ յուրաքանչյուր բնակարան ունենալու է ծառերով ու բուսականությամբ հագեցած պատշգամբ, որոնք պետք է արձագանքեն եղանակային փոփոխություններին: Ամռանը ծառերի խիտ սաղարթները պահպանելու են բնակարաններն արևից, ինչպես նաև մաքրելու են աղտոտված մթնոլորտը, իսկ ձմռանը մերկ ծառերը հնարավորություն են տալու, որպեսզի ցերեկային բնական լույսը ներթափանցի բնակարաններ: Պատշգամբներում տնկված բուսականությունը ոռոգվելու է շենքի օգտագործած վերամշակված ջրով: 80 և 110 մետր բարձրությամբ աշտարակները ներառելու են մեծ և միջին մեծության 480 ծառ, 250 փոքր ծառ, 5 հազար թուփ և 11 հազար հատակային բույսեր: Աշտարակներում օգտագործվող ծառերի տեսակները մանրակրկտորեն են ընտրվել, բուսաբանների մի խումբ ավելի քան 2 տարի աշխատել է, որպեսզի քաղաքի կլիմային հարմար ծառեր ընտրի: Նախագծում օգտագործվող բույսերը նախօրոք աճեցվել են կլիմայական պայմաններին հեշտությամբ ընտելանալու համար: Միլանի շրջակա միջավայրը բիոբազմազանության հնարավորություն չի տալիս, իսկ նոր տնկիները կարող են որոշ չափով փոխել քաղաքի էկո համակարգը և հնարավորություն տալ տարբեր թռչունների և սողունների ապրելու այնտեղ: Իսկ ամենաուշագրավն այն է, որ «Ուղղահայաց Անտառ» նախագծի իրականացումն ընդամենը 5 տոկոսով է ավելի թանկ, քան ավանդական երկնաքերերի շինարարությունը:
