«Տիտանիկ» նավի պատմությանը նվիրված աշխարհի խոշորագույն թանգարանը՝ «Տիտանիկ Բելֆասթը» (Titanik Belfast), բացվել է Հյուսիսային Իռլանդիայի Բելֆասթ քաղաքում, այն նույն վայրում, որտեղ էլ ժամանակին կառուցվել է աշխարհահռչակ նավը: Ինտերակտիվ թանգարանի նախագիծը մշակել են «ԹՕԴԴ Արքիթեքթս» (TODD Architects) ճարտարապետական բյուրոյի մասնագետները: Նշենք, որ թանգարանի շինարարությունը տևել է 3 տարի՝ ճիշտ այնքան, ինչքան որ տևել է նավի կառուցումը: Իսկ թանգարանի բացման հանդիսավոր արարողությունը կայացել է մարտի 31-ին՝ նավի կառուցման 100-ամյա տարեդարձին նվիրված տոնակատարությունների շրջանակում: «Տիտանիկ Բելֆասթ» թանգարանը նախագծված է սառցաբեկորի տեսքով, ունի 4 մասնաճյուղ, որտեղ տեղակայված են նավի պատմությունը ներկայացնող 9 պատկերասրահներ: «Տիտանիկն» իր առաջին ծովային ճանապարհորդությունը կատարել է 1912 թ-ի ապրիլին, և 100 տարի անց Բելֆասթում բացված թանգարանը նվիրված է հենց նավի և այն կառուցողների հիշատակին: Այս բավականին հետաքրքիր թանգարանի նախագիծն իրականություն դարձնելու հանար «ԹՕԴԴ Արքիթեքթս» ընկերության ճարտարապետները օգտագործել են 3-D մոդելավորում և ավելի քան 3 հազար ալյումինե բեկորներ: Արդյունքում շինությունը, որը բաղկացած է 27.5 մետր բարձրությամբ 4 մասնաշենքերից, չափազանց նման է ստացվել այն սառցաբեկորին, որն աշխարհահռչակ նավի խորտակման պատճառն էր դարձել: «Տիտանիկ Բելֆասթ» զվարճանքների կենտրոնի 9 պատկերասրահներում ներկայացված են նավին վերաբերող վայրերը, ձայները, հոտերը, պատմությունը, այն մարդկանց կենսագրությունը, ովքեր նախագծել և կառուցել են այն: Թանգարանի այցելուները կարող են ուսումնասիրել «Տիտանիկի» կառուցման պատմությունը, վերջինիս փորձարկումը, առաջին ծովային ճանապարհորդությունը, հարուստների և աղքատների համար նախատեսված սենյակները, աղետի ժամանակագրությունը և ուղևորների մասին տվյալները: Վերը նշվածներից բացի թանգարանում ժամանակ առ ժամանակ կարող են անցկացվել տարբեր ցուցահանդեսներ, կրթական և հասարակական միջոցառումներ: Այստեղ նաև կառուցված է հազար այցելուի համար նախատեսված բանկետային սրահ, ավտոկայանատեղի, ռեստորաններ և առևտրային տարածքներ:

Ապրիլի 21-ին միլիարդատեր Դոնալդ Թրամփը երկօրյա այցով կլինի Վրաստանում, տեղեկացնում է News-Georgia ինտերնետային պարբերականը՝ հղում կատարելով «Սիլք Ռոուդ Գրուփ» (Silk Road Group) ընկերության ներկայացուցչի հայտարարությանը: Նրա այցի ժամանակ Բաթում քաղաքում տեղի կունենա «Թրամփ Թաուեր» (Trump Tower) նախագծի շնորհանդեսը: Աշտարակի նախագծման աշխատանքներն արդեն ավարտված են, իսկ շինարարության համար անհրաժեշտ գումարը կսկսվի հավաքագրվել արդեն շնորհանդեսից հետո: Ինչպես ավելի վաղ տեղեկացրել էինք , 2 աշտարակների նախագծման և կառուցման համաձայնագիրը ստորագրվել էր անցյալ տարվա մարտ ամսին, Վրաստանի նախագահի Ամերիկայի Միացյալ Նահանգներ կատարած այցի ժամանակ, երբ Միխաիլ Սահակաշվիլին և միլիարդատեր Դոնալդ Թրամփը հանդիպել էին Մանհեթենի «Թրամփ Թաուեր»-ում տեղի ունեցած ընթրիքի ժամանակ: Ըստ նախնական տվյալների՝ աշտարակի շինարարության սկիզբը նախատեսվում է 2013 թ-ին, իսկ այդ աշխատանքները կվերահսկի «Սիլք Ռոուդ Գրուփ»-ի նախագահ Գեորգի Ռամիշվիլին: Թբիլիսիում և Բաթումում կառուցվելիք աշտարակների ընդհանուր բյուջեն գնահատվում է 250-300 մլն ԱՄՆ դոլար: Նշենք, որ «Թրամփ Թաուեր»-ը պետք է դառնա Սև ծովի ափին գտնվող ծովափնյա Բաթում քաղաքում կառուցվող «Սիլք Ռոուդ» համալիրի բաղկացուցիչ մասը: Աշտարակը կունենա 40 հարկ և 100 բնակարան: Ի դեպ, եթե 40 հարկ բարձրությունը Նյու Յորքի համար միջին չափանիշ է, ապա Բաթումի համար այն կրկնակի բարձր է, քան քաղաքի ամենաբարձր շինությունները:

Կարլսրուհի Տեխնոլոգիական ինստիտուտի և Բայեր ընկերության գիտնականները ստեղծել են այնպիսի սեյսմակայուն պաստառներ, որոնք կարող են պաշտպանել շինության պատերը փլուզումից ուժեղ երկրաշարժի ժամանակ, տեղեկացնում է The Inhabitat կայքը: EQ-Top անվանմամբ սեյսմակայուն պաստառները հնարավորություն են տալիս պատերին մնալ կայուն երկրակեղևի տատանումների ժամանակ: Նշենք, որ գիտնականները հաջողության են հասել 2 տարի տևած հետազոտությունների և փորձարկումների արդյունքում, և շուտով շինանյութը կհայտնվի շուկայում: Արդեն երկար տարիներ Կարլսրուհի Տեխնոլոգիական ինստիտուտի գիտնականները փորձում էին ստեղծել այնպիսի շինանյութ, որը կկարողանար պաշտպանել կառույցի պատերը այս բնական աղետից: Սկզբում նրանք օգտագործում էին ածխածնային մանրաթելային հիմքով նյութեր, սակայն փորձարկումները ցույց տվեցին, որ այդ շինանյութերն ավելի անկայուն են՝ քան ավանդականները: Այնուհետև, արդեն 2010 թ-ից ի վեր, նրանք սկսեցին օգտագործել ապակյա մանրաթելը և արդյունքում մեծ հաջողությունների հասան: Իսկ ինչպես են աշխատում EQ-Top պաստառները: Դրանք պինդ և էլաստիկ վահանակներ են, որոնք ստանում են ամուր ապակյա մանրաթելերը միահյուսելով: Մանրաթելերը հյուսվում են տարբեր ուղղություններով, որպեսզի վահանակները միաժամանակ լինեն և ամուր, և ճկուն: Արդյունքում, երկրակեղևի տատանումների ժամանակ, էներգիան հավասարաչափ է բաշխվում ողջ մակերեսով՝ ամուր պահելով պատերը: Սակայն նշենք, որ սովորական պաստառների համար նախատեսված սոսինձը ամենևին էլ չի համապատասխանում այս նոր պաստաներին: Ուստի Կարլսրուհի Տեխնոլոգիական ինստիտուտի գիտնականները դիմում են Բայերի գիտնականներին նոր սոսինձի բաղադրատոմս մշակելու նպատակով: Արդյունքում ստեղծվում է ճկուն, և միևնույն ժամանակ փափուկ սոսինձ՝ բաղկացած ջրից ու պոլիուրեթանային հավելանյութերից: Ամբողջական մշակումից հետո գիտնականները փորձարկել են շինանյութը տան փորձնական մոդելի վրա առաջացնելով արհեստական երկրաշարժ. տունը մնացել է կանգուն, իսկ տան պատերը գրեթե չեն տուժել: Բայեր ընկերությունը շուտով նախատեսում է սկսել այս պաստառների արտադրությունը և ինչպես սպասվում է, նոր տեսակի պաստառները բավականին թանկ կլինեն ավանդականների համեմատ: Սակայն այն բնակիչները, ովքեր ապրում են սեյսմավտանգ գոտիներում, և այն կառուցապատողները, ովքեր նման վայրերում շինարարություն են իրականացնում, անշուշտ, կօգտվեն նորահայտ շինանյութից՝ կյանքի և շինությունների անվտանգությունն ապահովելու նպատակով:

Չինաստանի Չանչժոու քաղաքում մոտ ապագայում նախատեսվում է կառուցել հսկա մշակութային կենտրոն, որտեղ կլինեն գրադարան և տարբեր նշանակության թանգարաններ՝ գեղարվեստական, գիտական և տեխնոլոգիական, տեղեկացնում է The Inhabitat կայքը: Նոր մշակութային կենտրոնը կնախագծի համբուրգյան «ՋիԷմՓի Արքիթեքթն» (GMP Architekten) ճարտարապետական գրասենյակը, իսկ դիզայնի հիմնական ուղղությունը կլինի բնական լույսի առավելագույն օգտագործումը: Ճարտարապետների կարծիքով՝ տանիքային ապակեպատումը, թափանցիկ դիմային հատվածները (ֆասադները) և պատերի վառ սպիտակ մակերեսները կնպաստեն, որ արևի բնական լույսը հեշտությամբ ներթափանցի համալիրի բոլոր անկյունները: «ՋիԷմՓի Արքիթեքթն» ճարտարապետական գրասենյակը վերջերս է ստացել համալիրը նախագծելու իրավունքը՝ հաղթելով միջազգային մրցույթում: Նշենք, որ 350 հազար քառակուսի մետր ընդհանուր մակերեսով կենտրոնը 6 անգամ ավելի մեծ կլինի, քան Փարիզի Լուվրը: Բացի թանգարաններից կենտրոնում կլինեն նաև առևտրային սրահներ, ռեստորաններ և ստորգետնյա ավտոկայանատեղի: Ըստ նախնական տվյալների՝ համալիրը բաղկացած կլինի 6 շինություններից, որոնք կունենան նմանատիպ արտաքին տեսք և կտեղակայվեն միևնույն հարթ տանիքի տակ, իսկ կենտրոնում կլինեն բաց տաղավարներ: Համալիրի ամբողջ դիմային հատվածը պատված կլինի շախմատաձև դասավորված թափանցիկ և մոխրագույն ապակիներով այնպես, որ արևի բնական լույսը առավելագույնս ներթափանցի համալիրի մեջ: Եվ վերջապես, կառույցում նախատեսված կանաչ տարածքները և անկյունագծով հատող ջրային ավազանը, մշակութային կենտրոնը կդարձնեն քաղաքի բնակիչների հանդիպումների և հանգստի սիրված վայրը:

Պատրաստ եք, արդյոք, 300 ԱՄՆ դոլար ծախսել մեկ գիշեր «գետնի տակ» քնելու համար: Հավանաբար, յուրաքնաչյուրն էլ կհամաձայնի վճարել այդ գումարը, երբ տեսնի Չինաստանում «գետնի տակ» կառուցվող շքեղ հյուրանոցային համալիրի նախագիծը: Վերջին 10 տարիների ընթացքում Չինաստանը համարվում է երկնաքերերի շինարարության առաջատարը: Այսօր, նա պատրաստվում է գրավել երկնաքերերի մեկ այլ ոլորտ, որոնք արդեն կկառուցվեն ոչ թե դեպի երկինք, այլ դեպի երկրի ընդերք՝ այսպես կոչված «գետնաքերեր» (groundscrapers): Ինչպես տեղեկացնում է CNN International լրատվական գործակալությունը, անցած ամիս Շանհայում՝ «Տյանմուշան» (Tianmushan) բարձունքի ստորոտում, 100 մետր խորությամբ փոսի մեջ սկսվել է էլիտար հյուրանոցի շինարարությունը: 19 հարկից բաղկացած հյուրանոցի կառուցումը ձեռնարկել է Շանհայի «Շիմաո գրուփ» (Shimao) անշարժ գույքի ընկերությունը: 2014 թ-ի վերջին կամ 2015 թ-ի սկզբին՝ շինարարության ավարտից հետո, շքեղ ստորգետնյա հյուրանոցի ամենացածր հարկը Շանհայում կառուցվող «Ջեյ Հոթել» (J Hotel) հյուրանոցի ամենաբարձր հարկից ցածր կլինի ավելի քան 700 մետր: Ի դեպ, վերոնշյալ հյուրանոցը ևս նախատեսվում է շահագործման հանձնել 2014-2015 թթ-ին, իսկ շինարարության ավարտից հետո այն կհամարվի աշխարհի ամենբարձր հյուրանոցը: «Տյանմուշան» բարձունքի ստորոտում գտնվող հսկա փոսը, որը գտնվում է կենտրոնական Շանհայից 45 կիլոմետր դեպի հարավ-արևմուտք, ունի 100 մետր խորություն, 240 մետր երկարություն և 160 մետր լայնություն: Ըստ նախնական տվյալների՝ «Շանհայի Հրաշքների Երկիր ԻնտերԿոնտինենտալ Շիմաո» (InterContinental Shimao Shanghai Wonderland) հյուրանոցը կունենա 380 սենյակ, ստորջրյա ռեստորան, և բաղկացած կլինի 19 հարկից, որից 16-ը ստորգետնյա, 3-ը վերգետնյա: Նաև նախատեսվում է հյուրանոցի կողային մասում կառուցել 60 մետրանոց «ապակե վարագույր»՝ արհեստական ջրվեժի իմիտացիայի նպատակով: Պետք է նշել, որ այս փոսը առաջացել է 1950-ական թթ-ից սկսած, քարհանքի շահագործման հետևանքով, իսկ 2000-ին ամբողջովին լքվել է: 2006-ին «Շիմաո» ընկերությունը գնել է տարածքն այնտեղ հանգստավայր և հյուրանոց կառուցելու նպատակով: Հյուրանոցի նախագիծն իրականացրել է հանրահայտ «Աթքինս» (Atkins) ճարտարապետական բյուրոն, որը հեղինակ է նաև անկրկնելի Բուրջ Ալ Արաբ հյուրանոցի: Ի դեպ, անցած տարի այս «ստորգետնյա» նախագիծը MIPIM Asia ճարտարապետական ցուցահանդեսի ժամանակ արժանացել է ոսկե մեդալի: Ոլորտի փորձագետների կարծիքով շինարարության ավարտից հետո հյուրանոցում սենյակների գները 1 գիշերվա համար կլինեն 320 ԱՄՆ դոլարից ոչ պակաս, ինչը կրկնակի թանկ է, քան մյուս հինգ-աստղանի հյուրանոցների սակագները Շանհայի այս շրջանում: Նշենք նաև, որ 428 հազար քառակուսի մետր ընդհանուր մակերեսով հանգստավայրի կառուցման համար «Շիմաո» ընկերությունը նախատեսում է ծախսել ավելի քան 555 մլն ԱՄՆ դոլար: