Չինաստանի Դատուն (Datong) քաղաքում կառուցվող մշակութային քաղաք-կենտրոնում սկսվել է «Ֆոսթեր և գործընկերներ» (Foster+Partners) ճարտարապետական բյուրոյի կողմից նախագծված նոր գեղարվեստական թանգարանի շինարարությունը, տեղեկացնում է The Inhabitat կայքը: 32 հազար քառակուսի մետր մակերեսով թանգարանի շենքը կազմված է իրար միացված 4 պողպատե բուրգերից, որոնք մխրճված են գետնի մեջ: Նշենք, որ կառույցի անսովոր կառուցվածքը հնարավորություն կտա խնայել էլեկտրաէներգիա, իսկ շինության հյուսիսային և հյուսիս-արևմտյան մասերում տեղադրված տանիքային լուսամուտները կնպաստեն ցերեկային լույսի առավելագույն ներթափանցմանը, և արևի տաքության նվազագույն ազդեցությանը: Այս «լուսարձակները» թանգարանի համար կծառայեն նաև որպես փարոս՝ լուսավորելով երկինքը գիշերային ժամերին: Ըստ նախնական տվյալների՝ թանգարանի տանիքը կունենա կրկնակի մեկուսացում, որն էլ ավելի կնվազեցնի էներգիայի օգտագործումը, միևնույն ժամանակ պահպանելով կառույցի ներսում անհրաժեշտ ջերմաստիճան: Թանգարանում կլինի «Մեծ պատկերասրահ», մանկական պատկերասրահ, իսկ բակում՝ սրճարաններ և ռեստորաններ: Թանգարանի բացման հանդիսավոր արարողությունը նախատեսված է հաջորդ տարի: Դրանից հետո «Գեղարվեստական թանգարանի» շենքը կդառնա Դատուն քաղաքում կառուցվող նոր մշակութային կենտրոնի չորրորդ նորաբաց շինությունը:

Աշխարհի խոշորագույն արևային ջերմային համակարգը, տաք ջրամատակարարման նպատակով, կառուցվել է Սաուդյան Արաբիայի մայրաքաղաք Էր-Ռիյադում: Նոր կառուցված համակարգը երկու անգամ մեծ է, քան նախորդ տիտղոսակիրը, որը գտնվում է Դանիայում: Ըստ նախնական տվյալների՝ այս համակարգը կապահովի տաք ջրով 40 հազար ուսանողուհի ունեցող, մայրաքաղաքային «Արքայադուստր Նորա բին Աբդուլ Րահման» (Princess Nora bint Abdul Rahman University) կանացի համալսարանը: Արևային համակարգի նախագծման և շինարարական աշխատանքներն իրականացրել է «Միլլենիում Էներջի» (Millennium Energy) ընկերությունը, իսկ արևային վահանակները տրամադրել է ավստրիական «ԳրինԹեքՈւան» (GREENTechONE) ընկերությունը: 36 հազար քառակուսի մետր վահանակների մակերես ունեցող արևային ջերմային համակարգի շինարարության բյուջեն կազմել է 14 մլն ԱՄՆ դոլար: Ի դեպ, տանիքին տեղադրված արևային վահանակներից յուրաքանչյուրն ունի 10 քառակուսի մետր մակերես և 170 կիլոգրամ կշիռ: Ավելի արդյունավետ աշխատելու նպատակով այս վահանակները թափանցիկ պաշտպանիչ ծածկ ունեն, իսկ Էր-Ռիյադի սաստիկ քամիներից պաշտպանվելու նպատակով դրանք հատուկ կառուցվածքներով ամրացված են հիմքին: Էներգետիկայի ոլորտի մասնագետների կարծիքով՝ մոտ ապագայում, արդեն 2020 թ-ին Սաուդյան Արաբիայում կսկսեն իրականացվել բազմաթիվ նախագծեր, որոնք կօգտագործեն արևի էներգիան, և երկիրը կարող է դառնալ աշխարհի արևային էներգետիկայի առաջատարներից: Բանն այն է, որ սև ոսկին տարեց տարի թանկանում է, հետևաբար երկրի համար ավելի նպատակահարմար է այդ թանկ վառելիքն արտահանել, իսկ սեփական կարիքները հոգալու համար օգտագործել անապատի անվճար կիզիչ արևի էներգիան, հատկապես, որ այսօր ողջ աշխարհը ձգտում է էներգիայի այլընտրանքային և էկոլոգիապես առավել մաքուր աղբյուրների օգտագործմանը:

Ապրիլի 16-ին, նախատեսվածից 3 շաբաթ ուշացումով, ավարտվել է «Եվրոտեսիլ-2012» 57-րդ միջազգային երգի մրցույթի համար կառուցվող «Բաքու Քրիսթալ Հոլ» (Baku Crystal Hall) համալիրի շինարարությունը: 25 հազար հանդիսատեսի (աղբ. Ալիևի ֆոնդ) համար նախատեսված համալիրի շինարարությունը սկսվել էր անցած տարվա աշնանը, գերմանական Alpine Bau Deutschland AG-ի կողմից, համաձայն օգոստոսի 2-ին կնքված պայմանագրի: Կառույցի գլխավոր նախագծող է հանդիսացել գերմանական «ՋիԷմՓի Արքիթեքթս» (GMP Architects) ընկերությունը, որը նաև հանդիսանում է այս կառույցի Չինական նմանակի՝ «Ունիվերսիադայի Մարզական Կենտրոնի» (Universiade Sports Center) հեղինակը: Նախագծային աշխատանքներում նաև ներգրավվել է շվեյցարական Nussen ընկերությունը: Այս հսկայական կառույցի արագ իրականացումը հնարավոր է դարձել գործարանային պայմաններում նախապես կառուցված, հավաքովի կոնստրուկցիաների լայն օգտագործմամբ, և իհարկե, Չինաստանում նախկինում ձեռք բերված փորձով: Երկու կառույցների դիզայնի տարբերությունները չնչին են՝ ավելացված է տանիքը և փոխված է ճակատի երեսպատման նյութը: Որոշ աղբյուրների տեղեկությամբ, համալիրի շինարարության արժեքը կազմել է 105 մլն ԱՄՆ դոլար, և նույնքան էլ ծախսվել է համալիր տանող ճանապարհի կառուցման և բարեկարգման համար: Նշենք, որ համալիրը գտնվում է 2010 թվականի Գինեսի գրքի ռեկորդակիր, 162 մ բարձրությամբ, Բաքվի գլխավոր դրոշակաձողի անմիջապես դիմացը: Ադրբեջանական լրատվամիջոցների հաղորդմամբ, կառույցի իրականացմանը մեծ աջակցություն է ցուցաբերել «ազգի» և միաժամանակ գործող նախագահի հայր՝ «ադրբեջանական ազգի համազգային առաջնորդ» Հեյդար Ալիևի ֆոնդը: Ալիևի ֆոնդի նախագան է երկրի առաջին տիկին Մեհրիբան Ալիևան, իսկ փոխնախագահը՝ դուստրը՝ Լեյլա Ալիևան: Այս ֆոնդի ֆինանսավորման աղբյուրները չեն հրապարակվում, ինչ էլ իսկ ադրբեջանական ընդիմադիրների մշտական քննադատության է արժանանում: Դեպի համալիր տանող ճանապարհի իրականացման ընթացքում, ինչպես հաղորդում է Human Rights Watch կազմակերպությունը, բազմաթիվ բնակիչների իրավունքներ են գետնահարվել, որոնք ուժով վերաբնակեցվել են իրենց բնակարաններից: Հետաքրքիր է նաև այն, որ զուգահեռ այս համալիրի շինարարությանը, կառավարությունը համենայն դեպս, ընձեռնել էր նաև Թոֆիք Բահրամովի մարզադաշտի վերանորոգման աշխատանքները՝ 90 մլն ԱՄՆ դոլար արժողությամբ:

Քանի որ գլոբալ տաքացման հիմնախնդիրներն սկսում են ավելի մեծ ազդեցություն ունենալ քաղաքական ու տնտեսական որոշումների հարցում, գնալով ավելի մեծ ուշադրության է արժանանում շինարարական ոլորտը, որտեղ տարեկան արտադրվում է մոտ 3 տրլն կիլոգրամ ցեմենտ, դրանով իսկ նպաստելով գլոբալ տաքացման մակարդակի զգայուն բարձրացմանը: Բանն այն է, որ այսօր ցեմետնի արտադրությունը երկրորդ տեղն է գրավում մթնոլորտ արտանետած ջերմոցային գազերի ծավալներով՝ զիջելով միայն հանածո վառելիքի արտադրությանը: Ըստ կատարված հետազոտությունների՝ ցեմենտի արտադրության ժամանակ մթնոլորտ արտանետված ածխաթթու գազի (CO2) ծավալը կազմում է ընդհանուր արտանետումների 5-6 տոկոսը, քանի որ յուրաքանչյուր 10 կիլոգրամ ցեմենտի արտադրության ժամանակ մոտ 9 կիլոգրամ ածխաթթու գազ է արտանետվում: Այս ամենը հաշվի առնելով՝ Վիրջինիա նահանգի Աշբուրն քաղաքում գտնվող Ջորջ Վաշինգթոնի անվան համալսարանի մի խումբ գիտնականներ մշակել են ցեմենտի արտադրության նոր եղանակ՝ «Արեգակնային, ջերմային էլեկտրաքիմիական արտադրություն» (Solar Thermal Electrochemical Production (STEP)), որն ամբողջությամբ բացառում է ածխաթթու գազի արտանետումը մթնոլորտ, և անգամ ավելի մատչելի է, քան ավանդական մեթոդը: Այսօր ցեմենտի արտադրությունն իրականացվում է քիմիական փոխակերպման՝ դեկարբոնիզացիայի միջոցով: Կրաքարը տաքացնելու արդյունքում առաջանում է կիր և ածխաթթու գազ՝ մթնոլորտն աղտոտելով ջերմոցային գազերով: Ածխաթթու գազի արտանետումները մթնոլորտ էլ ավելի են շատանում, երբ դեկարբոնիազացիայի գործընթացը սկսելու համար օգտագործում են վառելիքի այրում՝ կրաքարը տաքացնելու նպատակով: Նորամշակ STEP եղանակը բացառում է վառելիքի օգտագործումը, քանի որ կրաքարի տաքացման համար օգտագործվում է արեգակնային էներգիան, և ամեն ինչ կատարվում է էլեկտրոլիզի միջոցով: էլեկտրոլիզի ժամանակ քիմիական փոխակերպումը կատարվում է առանց ջերմոցային գազերի արտանետումների: Ավելի բարձր ջերմաստիճանի ժամանակ առանձնանում է ածխածնի օքսիդ (CO), որը, ըստ գիտնականների, կարելի է օգտագործել այլ արտադրական նպատակների համար: Ըստ նախնական հաշվարկների՝ եթե այս մեթոդը լայն կիրառում ստանա, և իհարկե հնարավոր լինի վաճառել առանձնացված ածխածնի օքսիդը, ապա 1 տոննա ցեմենտի ինքնարժեքը կկազմի մինուս 298 ԱՄՆ դոլար, համեմատած ավանդական մեթոդով արտադրված 70 ԱՄՆ դոլար ցեմենտի արժեքին: Քանի որ այսօր ցեմենտի արտադրության խոշորագույն ընկերությունները հետաքրքրված են ավելի անվնաս մեթոդների կիրառմամբ, գիտնականները հույս ունեն, որ մշակված նոր մեթոդը լայն կիրառում կստանա այս ոլորտում: Նրանք անգամ մտադիր են փորձերը շարունակել, և այս մեթոդը կիրառել նաև երկաթի, ալյումինի, ապակու, թղթի, և անգամ շաքարի արտադրության ժամանակ:

2011 թ-ի մարտին Ճապոնիայում տեղի ունեցած ավերիչ երկրաշարժից և ցունամիից հետո, ինչի արդյունքում խափանվեց նաև «Ֆուկուսիմա» ատոմակայանի աշխատանքը, Ճապոնիայի կառավարությունը որոշեց նվազեցնել ատոմային էներգիայի օգտագործումը, և երկրում մեծացնել ավելի ապահով ու այլընտրանքային էներգիա արտադրող էլեկտրակայանների քանակը: Reuters լրատվական գործակալության հաղորդմամբ՝ 3 կազմակերպություններ՝ «Կիոսերա» (Kyocera) և «ԱյԷյջԱյ» (IHI) կորպորացիաները և «Միզուհո Քորփորեյթ» բանկը (Misuho Corporate Bank), Ճապոնիայի հարավային հատվածում նախատեսում են կառուցել 307 մլն ԱՄՆ դոլար արժողությամբ երկրի խոշորագույն արևային էլեկտրակայանը: «Կյոսերա» ընկերությունը կտրամադրի էլեկտրակայանի համար անհրաժեշտ 290 հազար արևային պանելներ, ինչպես նաև կիրականացնի էլեկտրակայանի սպասարկման և մոնտաժային որոշ աշխատանքեր, «ԱյԷյջԱյ» ընկերությունը կզբաղվի Կագոսիմա (Kagoshima) բնակավայրում 3.14 մլն քառակուսի մետր տարածքի ձեռք բերման աշխատանքերով, իսկ ահա «Միզուհո Քորփորեյթ» ֆինասական հաստատությունը կտրամադրի շինարարության համար անհրաժեշտ գումարը: Ըստ նախնական տվյալների՝ շահագործումից հետո 70 մեգավատ/ժամ հզորությամբ էլեկտրակայանը կկարողանա էլեկտրաէներգիայով ապահովել մոտ 22 հազար բնակարաններ՝ տարեկան արտադրելով 79 հազար մեգավատ/ժամ էլեկտրաէներգիա: Արևային էլեկտրակայանի շինարարության և շահագործման համար կստեղծվի հատուկ նշանակության խումբ (SPC): Համաձայն շրջանառվող տեղեկատվության` շինարարությունը նախատեսվում է սկսել այս տարվա հուլիսին, իսկ այլ մանրամասներ դեռևս չեն հաղորդվում: