Ֆրանսիայում նախատեսվում է Նապոլեոն Բոնապարտի պատվին, նրա մահից մոտ 200 տարի անց, թեմատիկ այգի կառուցել, տեղեկացնում է The Telegraph պարբերականը: Աշխարհահռչակ «Դիսնեյլենդին» մրցակից այս այգին կկրի «Նապոլեոնլենդ» անվանումը: 280 մլն ԱՄՆ դոլար բյուջեյով նախագծի իրականացման գաղափարը պատկանում է Ֆրանսիայի նախկին նախարար և պատմության սիրահար Իվ Ժեգոյին (Yves Jégo): Ըստ նախնական տվյալների՝ զվարճանքների այգին կկառուցվի Փարիզից ոչ հեռու՝ Մոնտերո (Montereau) փոքր քաղաքում, որտեղ 1814 թ-ին Նապոլեոնի բանակը հաղթանակ կրեց ռուս-ավստրիական զորքերի հետ մարտում: Ժեգոն հուսով է, որ այգու շինարարությունը կսկսվի 2014 թ-ին, և այն պատրաստ կլինի արդեն 2017-ին: Այգում կլինի հյուրանոց, թանգարան, խանութներ, ռեստորաններ և խորհրդակցությունների կենտրոն: Այգում «կվերականգնվի» 1815 թ-ի Վաթերլոյի ճակատամարտը, որտեղ Վելինգթոնի դուքսը վերջ դրեց Նապոլեոնի կառավարմանը: Եվ իհարկե, աչքից չի վրիպի Աուստերլիցի ճակատամարտը, որտեղ Նապոլեոնը ջախջախեց ռուս-ավստրիական զորքերին: Այցելուները կարող են նաև դիտել ջրային շոու, որը կներկայացնի 1805թ-ի Թրաֆալգարի ճակատամարտը, երբ ծովակալ Հորացիո Նելսոնը ջախջախեց ֆրանս-իսպանական նավատորմը: Աշխարհահռչակ ֆրանսիացի առաջնորդը մինչ օրս չունի ազգային և պատմական թանգարան Ֆրանսիայում և Ժեգոն վստահ է, որ այս նախագիծը ոչ միայն վառ կպահի նրա անունը, այլև կնպաստի տեղեկան տնտեսությանը: Ըստ նրա՝ առաջին տարում այգին կհյուրընկալի ավելի քան 1.5 մլն այցելուի:

Հունաստանը որոշել է վարձով հանձնել իր պատմական հուշարձանները, այդ թվում՝ «Ակրոպոլիսը» (Acropolis) և «Ապոլոնի տաճարը» Դելֆի (temple of Delphi) քաղաքում, տեղեկացնում է The Guardian պարբերականը: Ցանկացողները կարող են օրական 2.1 հազար ԱՄՆ դոլարով (1.6 հազար եվրոյով) վարձակալել պատմական հուշարձանները նկարահանելու և լուսանկարելու նպատակով: Հունաստանում որոշել են «վաճառել» իրենց պատմական հուշարձանները և այդպես փորձել մեղմել տնտեսական ճգնաժամի հետևանքները: Բնականաբար, հույն ժողովրդին իրենց պատմական հուշարձաններն առևտրային նպատակներով վարձակալությամբ տալու որոշումը շատ դժվար է տրվել: Պարբերականի տվյալներով՝ այս շաբաթ օտարազգի նկարահանող խմբերը, գովազդային գործակալությունները և այլ առևտրային կազմակերպություններ կկարողանան նկարահանել Պերիկլեսյան (Periclean) այնպիսի գլուխգործոցներ, ինչպիսին է Աթենքի Պարֆենոնի տաճարը (Parthenon) (մ.թ.ա. 5-րդ դար): Նախկինում երկրի ամենահզոր կառույցներից մեկը՝ Հնագիտության կենտրոնական խորհուրդը (Central Council of Archaeology), բոլոր դիմողներին կամ մերժում էր, կամ էլ այնպիսի աստղաբաշխական գումար էր պահանջում նկարահանելու թույլատվություն ընձեռելու համար, որ ցանկացողները հրաժարվում էին: Իր 2500 տարվա պատմության ընթացքում «Ակրոպոլիսը» միայն մեկ անգամ է վարձով հանձնվել, երբ ամերիկացի կինոռեժիսոր Ֆրենսիս Ֆորդ Կոպոլան նկարահանում էր իր «Իմ մեծ հունական հարսանիք» ֆիլմը: Այն ժամանակ ֆիլմի գլխավոր դերասանուհի Նիա Վարդալոսը խոստովանել էր, որ իրենից մեծ ջանքեր էր պահանջել հունական կառավարությունից դրական պատասխան ստանալը: Այսօր Հունաստանի մշակույթի նախարարությունը գոյատևում է կառավարության բյուջեյի 0.7 տոկոս հատկացումների հաշվին, և պաշտոնյաները հուսով են, որ վարձավճարների շնորհիվ կկարողանան հոգ տանել պատմական հուշարձանների մասին, որոնք վնասվել են տնտեսական ճգնաժամի հետևանքով: Սակայն մշակույթի նախարարությունը նաև զգուշացնում է, որ այս ամենն իրենց կողմից խիստ վերահսկվելու է: Բոլոր եկամուտները կտնօրինի մշակույթի նախարարությունը, որի բյուջեն 30 տոկոսով նվազել է տնտեսական ճգնաժամի արդյունքում:

Էներգիան խնայելու նպատակով Վաշինգտոնի համալսարանի Մոլեկուլային ճարտարագիտության և գիտության մասնաճյուղի շենքի պատերն օդի տաք ջերմաստիճանի դեպքում սկսում են «հալվել», հաղորդում է The Tecca կայքը: Շենքի արտաքին կառուցվածքն, անշուշտ, կարծր է, բայց էներգիա խնայելու նպատակով գիտնականները ստեղծել են հատուկ մի գել, որը նրանք լցրել են շենքի արտաքին պատերի՝ ապակիների մեջ: Երբ դրսում ջերմաստիճանը բարձրանում է, պատերի մեջ եղած գելը սկսում է հալվել՝ ապահովելով զովություն շենքի ներսում: Գելի աշխատանքի յուրահատկությունն այն է, որ այն օգտագործում է թերմոդինամիկայի հիմնական սկզբունքը՝ նյութը պինդ վիճակից հեղուկի անցնելու ժամանակ և ընդհակառակը, կլանում է էներգիան` առանց ջերմաստիճանի փոփոխման: Օրվա ընթացքում, երբ դրսում ջերմաստիճանը բարձր է, գելը հալվում է` վերցնելով էներգիան: Գիշերվա ընթացքում գելը նորից անցնում է պինդ վիճակի՝ ցուրտ ջերմաստիճանի պատճառով, որպեսզի հաջորդ օրվա ընթացքում պատերը կարողանան էներգիա կլանել: Այս կերպ կարիք չի լինում օդորակիչներ օգտագործել և նվազում են շենքի էներգետիկ ծախսերը: Սա զովացնող նոր տեխնոլոգիաներից միայն մեկն է, որ ստեղծվել է գիտնականների կողմից: Եվ չնայած, որ այն լայն գործածություն չունի, գիտնականները կարծում են, որ մեկ տասնամյակ հետո նման տեխնոլոգիաները լայն տարածում կստանան շինարարության ոլորտում:

Չինաստանի Հունան (Hunan) նահանգում ընդամենը 15 օրում, 170մ² հողատարածքի վրա կառուցվել է 30-հարկանի հյուրանոց տեղեկացնում է Constructiondigital կայքը: Չինական «Բրոուդ Գրուփ» (Broad Group) ընկերության կառուցած շենքում տեղադրված են էներգախնայող տեխնոլոգիաներ, և այն ընդունակ է դիմակայել 9 բալ ուժգնությամբ երկրաշարժի: Վերոնշյալ ընկերությունը նման կարճ ժամանակահատվածում կարողացել է կառուցել 30-հարկանի շենքը միմիայն «հավաքովի նախագծի» (Smart prefab design) շնորհիվ: Ի դեպ, նախագծման այս տեսակը հնարավորություն է տալիս շինության տարբեր հատվածները կառուցել շինհրապարակից դուրս՝ գործարանային պայմաններում, իսկ վերջնական շենքը հավաքել արդեն նախատեսված վայրում: Ինչպես անցած տարի գրել է մեր կայքը ,«Բրոուդ Գրուփ» ընկերությունն ամբողջ աշխարհում հայտնի դարձավ, երբ Չինաստանում ընդամենը 6 օրում կառուցեց 15-հարկանի «Տապան Հյուրանոցը» (The Ark Hotel): Ընկերության վերջին նախագիծն էլ կրկին Չինաստանում, Չանգշա (Changsha) քաղաքում կառուցված աշտարակն է, որի 90 տոկոսը նախօրոք կառուցվել է գործարաններում, և հետո միայն շինհրապարակում հավաքվել է շենքը: Ընկերությունն ապագայում նախատեսում է կառուցել 30–հարկանի նմանատիպ ևս 150 բնակելի շենքեր, հյուրանոցներ և գրասենյակներ: Ընթերցողի համար ավելի պարզ լինելու համար եկեք պարզաբանենք՝ ինչ է «հավաքովի նախագիծը» (prefab design) կամ «հավաքովի շենքը» (prefabricated building): Սա շինության կամ նախագծի այնպիսի տեսակ է, որը բաղկացած է գործարաններում նախօրոք կառուցված և շինհրապարակում հավաքված տարբեր մասերից: Այսօր շատ ճարտարապետներ իրենց նախագծերում օգտագործում են դիզայնի այս տարբերակը: Այս նախագծերում հնարավոր է օգտագործել «կանաչ» տեխնոլոգիաներ, կառուցապատողները կարող են ավելացնել նոր սենյակ կամ նույնիսկ արևային մարտկոցներ տեղադրել տանիքին: Պատմության մեջ հայտնի առաջին «հավաքովի տունը»՝ «Մենինգի հավաքովի քոթեջը» (Manning Portable Cottage) հանրությանը հայտնի է դարձել 1837 թ-ին հարավային Ավստրալիայում և գոյություն ունի մինչ օրս: Տան հատվածները կառուցել է լոնդոնցի հյուսն Մենինգը, իսկ ավելի ուշ բրիտանացի ներգաղթյալները Ավստրալիայում կառուվել են տնակը:

2015 թ-ի օգոստոսին Գիզայի սարահարթին, եգիպտական բուրգերի մոտ բացվելու է աշխարհում խոշորագույն Եգիպտական մեծ թանգարանը (Grand Egyptian Museum), տեղեկացնում է ria.ru կայքը՝ հղում կատարելով Կահիրեյում տեղի ունեցած մամուլի ասուլիսի ժամանակ Եգիպտոսի հնությունների հարցերով նախարար Մուհամեդ Իբրահիմի (Mohammed Ibrahim) կատարած հայտարարությանը: Հունվարի 10-ին Կահիրեում ստորագրվել է Եգիպտական մեծ թանգարանի շինարարության վերջնական` երրորդ փուլի մասին պայմանագիրը: Շինարարությունն իրականացնելու են եգիպտական խոշորագույն Օրասքոմ (Orascom) և բելգիական Բեսիքս (Besix) շինարարական ընկերությունները: Ինչպես մամլո ասուլիսի ժամանակ հայտնել է Եգիպտոսի հնությունների հարցերով նախարար Մուհամեդ Իբրահիմը, շինարարության երրորդ փուլը տևելու է 40 ամիս, որի ընթացքում կառուցվելու է համալիրի 108 հազար քառակուսի մետր մակերեսով տարածքը: Ընդհանուր առմամբ, թանգարանային համալիրը տեղակայվելու է 480 քառակուսի մետրի վրա: Պարբերաբար ցուցադրվելու են 100 հազար ցուցանմուշներ, որոնք վերաբերում են եգիպտական պատմության տարբեր դարաշրջաններին: Միայն երրորդ փուլի շինարարության համար ծախսվելու է 830 մլն ԱՄՆ դոլար: Ճապոնիան տրամադրելու է 300 մլն ԱՄՆ դոլար արտոնյալ վարկ, իսկ եգիպտական կողմը` 150 մլն ԱՄՆ դոլար: Վարկի մարումը սկսվելու է թանգարանի բացումից 10 տարի անց` թանգարանի եկամուտների հաշվին: Բացի հիմնական շենքից, թանգարանում նախատեսված է ստեղծել կինոթատրոն, գրադարան, լսարաններ, խորհրդակցությունների սրահներ, երեխաների և սահմանափակ հնարավորություն ունեցող մարդկանց համար թանգարաններ, զվարճանքների կենտրոն, ցուցասրահ` ժամանակավոր ցուցադրությունների համար և զբոսայգիներ: Զբոսաշրջիկների հարմարավետության համար թանգարանային համալիրը Գիզայի բուրգերին է միանալու հատուկ ճանապարհով: Եգիպտոսի իշխանությունները հույս ունեն, որ Եգիպտական մեծ թանգարանը բացումից 5 տարի հետո ամեն տարի ընդունելու է 8 մլն այցելու: Զբոսաշրջիկների պահանջները բարելավելու համար անհրաժեշտություն կառաջանա նոր խանութներ բացել և կառուցել 40 նոր հյուրանոց: Մայրաքաղաքի Թահրիր «հեղափոխական» հրապարակում (Tahrir Square) գտնվող Կահիրեի թանգարանն արդեն չի տեղավորում եգիպտական մշակույթի բոլոր հուշարձանները: Սրանց մեծ մասը ժամանակի ընթացքում տեղափոխվելու են Եգիպտական մեծ թանգարան: Եգիպտոսի հնությունների հարցերով նախարարը մասնավորապես նշել է, որ Թութանհամոն փարավոնի դամբարանի գանձերի սրահը նոր թանգարանում նախորդի համեմատ ունենալու է 7 անգամ մեծ տարածք: